مذكرات طفولية : اعترافات حوميدي الصغير

Houmidi59

::الفارس المغربي ::

غير متصل
#21
رد: مذكرات طفولية : اعترافات حوميدي الصغير

مذكرات houmidi59 : حوميدي البرهوش الصغير

الحلقة رقم 7 : حوميدي في القسم الرابع

الجزء الأول : مع المعلّم كْراري

حوميدي نجح للمستوى الرابع بعد ما حصل على معدل مشرّف ولوحة الشرف فاللغة الفرنسية.فهاد المستوى كانو جوج معلمين كْبارْ فالسن ورْزينين بالمعقولْ.هادو ما يستعملو العصا الا عند الضرورة.
اللّول كان يقرّينا اللغة الفرنسية .باقي عاقل كانت عندو بيسْكْليتا (دراجة) تعقل على جدْ النمل.كانو التلامد يتسابقو باشْ يدخلوها للمدرسة أو يْخرْجوها.تصورو أن خونا بالله ديما يْصيفطْ جوجْ تلاميد باشْ يقومو بهاد العملية.فْديكْ لوقيتة وعلى الخصوص فوقت الخروج يبقاوْ مْعاهْ جوج تلاميد : واحد يحلْ الدفتر والتاني يْسدّو.سّي كْراري هو فقط يعطي النقطة.
خوكم الحوميدي كان هو المميّزْ عند هاد المعلّم .فالشهر اللّول عرفني باللي عندي مع لفرانسوية.اوى خوكم الحوميدي هو اللي يتكلف بالقراءة .سّي كْراري اما يضربها بنعسة فالمكتب أو يمشي عند سّي طْويل يْقرْقبْ معاه النابْ.أنا نبقى نْعيّطْ بالواحد باشْ يقراوْ القطعة بالفرنسية.التلاميد الكوسالى واللي باقيينْ يتْهجّاوْ مساكين عارْفينْ راسهوم واكلينْها (لعصا) يبْداوْ يْقَفْقْفو.كل واحد كيفاشْ باغي يرْشيني:
_ شوف أخويا هادي قبْسَةْ شيكولا غيرْ ليكْ.الله يرحم الوالدين غير كْتبْ باللي راني قْريتها مزيان
_ انا غادي نعطيكْ زربوط واعر الى صاوبْتي ليا الضّوسي
_ ها درهم غير فوتني
المهم خوكم الحوميدي يتبرّعْ مع راسو .ولكن سّي كْراري عايق بهاد لخّوت.غير يدخل يقول لي : التلاميد كولهوم قراوْ مزيانْ ياكْ أولدي حميدْ؟
أنا نْردْ عليه : نعمْ سيدي
يبتاسمْ ويْقرّبْ من هادوكْ المجموعة المشكوك فيها .مساكين غير يحسّو بيه حْداهوم ، صافي تْشدْهومْ الخلعة.هو غير يْهزْ فراسو ومرّة مرّة كنسمعو شي هضْرة ما يفهمها غير هو والتلاميد المعنيين بالأمر :
_ دابا هاد التلاميد قلْعو الحروف ، مزيانْ!! ....أنا دابا هوما اللي غادي نْقلّعْهومْ
_ اوهْ كيلعبو بالحروف ولكن راهوم ما شافوشْ باللي النقط راهوم عندي
هي هاديك يْبانْ لو شي واحد بانتْ عليه الخلعة.يْقرّبْ منّو ويقول لو : ولدي عندك صوت زينْ ، أطْربنا شوية ومتّعنا
التلميذ مسكين يبْقا يْشوف فيا .زعما باغيني ندافع عليه حيت راهْ مْخلّصْني.انا الصراحة ما عندي ما نْديرْ .ياكْ راني قلت للأستاذ راهوم كولهومْ قْراوْ مزيانْ.سّي كراري دكي ؛ يشوفْ فيا ويقول بحال الى راه يْخاطبْ القسم كامل : انا عارف باللي راكْ قريتي والسيد عبد الحميد راه يقول باللي لقراية ديالك معتبرة ولكن واشْ حْنا ما عندناشْ الحق نتْبرعو بالصوت ديالك .ياكْ أمسْيو
عبد الحميدْ ؟
خوكم الحوميدي ما يْفيدو غير يهزْ راسو بأنه متّافق مع المعلم ديالو.
هي هاديكْ خونا بالله يبْدى يقرى .سّي كْراري يصحّحْ لو .من بعد بالاشارة يقولو قرّبْ باشْ يعطيه شي بركة من لعْصا.
واحد الحاجة كان يْديرْها معانا سّي كْراري وهو أنه يطرح علينا شي سؤال ديالْ الدّكاء.التلميد اللي عندو الجواب يمشي لعندو للمكتب ويْخَبْرو فودنيهْ.حْنا الصراحة كانت تعجبنا الفكرة نتكلْمو فلْودنينْ ديالْ المعلّم ديالنا.ولكن الفرحة لكبيرة مينْ سّي كْراري يقول لك : الجواب ديالك راه صحيح عنداكْ تْورّيهْ لْشي حدْ.بالطبع حتى هو يْقولو لك فْودْنيكْ



الجزء الثاني : سّي طْويلْ باغي يسرق البيضْ


سّي الطْويل هادا معلم الصراحة ظْريّف والطريقة ديالو فالشرح كتعتامد على الحكاية.كان يحكي لينا شي قصص عندها علاقة مع التاريخ .انا شخصيا كنت نوْجد متعة كبيرة وما كنتْشْ نمشي للدار باشْ نحفظ حيتْ كنتْ نْسجلْ الدرس مباشرة فالذاكرة ديالي.
حاجة وحدة اللي ما كانشْ يرحم فيها : القرآن الكريم.كل يوم لعْراضة واللي ما حافضْشْ ، ما كاينْ غير الفلقة
واحد التلميد كان يقرى مْعايا كان عندو مشكل فالحفظ.هادْ خونا بالله ديما فالجمل ديالو كيْزيدْ حرف الواوْ.تْصوْرو مثلا راه يستضْهر سورة الرحمان .ها كيفاشْ يقْراها : الرحمان وعلّم القرآن وخلق الإنسان وعلّمه البيان.....
سّي الطويل كان يطلع لو الدّم .هي هاديك يقولو باراكا أو لدي ويْعيّطْ لو باشْ يْوكلو ولكن ماشي فرجليه.هاد خونا بالله الى حيّدْ الصبّاط راه بْحالْ الى رْميتي شي قنبلة نوَوِية .راه كولشي يْطيحْ كاوْ.هادْ خونا موحال الى يكون مْشى للحمّامْ شي نْهارْ.
كانْ سّي الطويلْ يضربو لْيدّيه يمكن 50 دقّة .خونا بالله ما يْحسْ بوالو .فالّاخّرْ يبتاسمْ ويرجع لبْلاصْتو.
واحد النهار سّي الطويل حكى لينا قصة ما زالْ باقية فالداكرة ديالي .هاد القصة واقعة في عام 1929 عام الأزمة العالمية.ديك لوْقيتة سّي الطويلْ كانْ فْعمْرو 12 أوْ 13 سنة.كان السكّر مفقود ولهادا كانو الناس يشربو القهوة كحْلة ويْدوْزوها مع التمرْ.
شي نهار المعلم ديالنا مع واحد صاحبو مْشاوْ لْشي فيرْما (ضيعة) ديالْ شي نْصارى .كانت الساعة الجّوج ديال لعشية.الناس دايْرين القيلولة.المهم طلْعو مع الحيط ودخلو بْلا ما يْشوفْهومْ شي واحد.من الزْهر ديالهوم لكْلابْ ما كانوشْ حيتْ كانو مْشاوْ مع الصيّادة.هي هاديك قرْبو من خمْ الدجاجْ .من واحد الفتْحة صغيرة دخلو باشْ يجّمْعو البيض.
المشكل الدْيوكا والدجاج هجمو عليهوم هجمة وحدة .المعلم ديالنا مسكين طاحْ فواحد المرْجا كولها غيسْ.امّا صاحبو شي دجاجة
حطاتْ لو شي بركة فوق راسو ......
لخّوتْ دغيا سلتو من الفيرْما قبل ما يْشدْهوم شي حدْ.






الجزء الثالث : قصة حداد والتلفزة


هاد القصة سْبق لي حْكيتها فالمذكرات ديالي بالفرنسية.قصة جوج تلاميد : واحد الطّبّوزي (سمين) كْحلْ كي لغرابْ والثاني مْجيعيطْ (نحيل ) والمشكل تمْتامْ.
اللّوّلْ سْميْتو حدّادْ والتاني سْميْتو التافْزة
هاد حدّاد والتافزة ديما بجوج كي المش والفار.
واحد النهار كنّا نكتبو شي ملخّصْ ديال التاريخْ.كان سّي الطويلْ فالمكتب ديالو يكتب او يصحّحْ.شي وْقيتة ناضْ التافزة يتكلّمْ بْلا ما ياخودْ الادنْ من المعلّمْ:
_ أسْ أسْ أسْ أسْ....أسْ تااااااااااااادْدْدْدْدْ....
سّي طْويلْ شافْ فيه وقالْ ليهْ : آشْ كاينْ أولدي؟
التافزة راكو عارفينو تمتامْ ، قالِ للمعلّم :
_ حَ حَ حَ حَ دْدْدْدّدّدّاااااااااااادْدْدْدْدْدْدْ...
_ مالو حدّادْ أولدي تْكلّمْ !!
_ حدّدّدّدّدّدّاااااادْدْدْدْدْ تَتَتَتَتَتَتَتَتَ......
_ مالو حدّادْ ؟ تْكلّمْ !!!
_ تَتَتَتَتَتَشْشْشْشْشْشْ
_ تْكلّمْ أولدي واشْ باغي تْسطّيني ؟
_ تَتَتَتَتَتَتَشْشْشْشْشْشْشْهااااااااااااااااااااا اااااااااااااااااااااا
القسم كلّو تْفرْكعْ بالضحكْ.حداد مسكين كانْ ناوي راسو دايرْ شي فضيحة كبيرة ولكن مينْ سْمع لكلامْ ديالْ التافزة بْحالْ الى رجعاتْ فيه الروحْ وبْدى حتى هو يضحك.
سْي طويل حتى هو ضحك وقال لتّافزة : ولدي راكْ خلعتيني .انا كنت ناوي باللي صاحبك راه تْعدّى عليكْ .ما فيها والو الى بنادم تْنفّسْ.
شي شوية سْي طْويلْ سَدْ نيفو وقال لحدادْ : واهْ واهْ على ريحة !!!!
واشْتا (أشنو) كليتي أداكْ الحلّوفْ ؟
_ ما كْليتْ والو أسيدي غير البيصارة
_ شْحالْ من زلافة ؟
_ ما عارفش ولكن يمكن 5 أو 6 ديال الزلايف كبارْ
_ سيرْ الله يمسخك للمرحاضْ وما ترجع حتى تقضي غراضك.
حْنا شْحالْ ضحكنا داكْ النهارْ.التافزة مسكين باقي مع الجملة ديالو:
_ حدّدّدّدّذاااااادْدْدْدْدْ تَتَتَتَتَتَتَتَتَشْشْشْشْشْشْههههههها

الى اللقاء مع الحلقة 8 حوميدي والامتحان ديال الخامس

كيفاشْ حوميدي عاودْ العامْ أو هو زعما من التلاميد المجتهدينْ ؟
 

Houmidi59

::الفارس المغربي ::

غير متصل
#22
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير

حلقة رقم 8 :
حوميدي والمستوى الخامس

الجزء الأول : عام تاني مع سّي الطْويلْ

بالنسبة للسنة الخامسة كانت البداية مزيانة ، خصوصا مين سّي الطويل سَنْدو لو هاد المستوى بصفة استثنائية.اللي وْقع أن المعلّم اللّي يْقرّي الخامسْ دارْ شي عملية جراحية وبالطبع الغياب ديالو غادي يْأتّرْ على السير العادي للدراسة وحْنا متبوعين بالامتحانات.على داكْ الشّي سّي الطْويل قال ما فيها باسْ نْعاودْ نْقرّي التلاميد دياوْلي اللي كانو عندي فالرابع.
خوكم الحوميدي عجبو الحال بزاف .هي هاديكْ تْنبّأْ بسنة دراسية ناجحة بكل المقاييس.
لكنْ اللي وْقع ما كانْ فالحسبان .حوميدي اللي حصل على أعلى معدل فالامتحان التجريبي : تقريبا 78 نقطة على 120 ، يلقى راسو فالامتحان يا الله لْحقْ على 59.5 .النجاح ديك لوقيتة كان هو النقطة 60 .عندك هاد النقطة راك خْديتي الشهادة الابتدائية ديالك معندكشْ ، غادي تعاود العام أولدي واخّا تكون خاصّاكْ غير نصْ نقطة
من بعد مين كنا نْقرّيوْ الخامس هاد المعدّل هبطْ حتى 34 .هدا الديل على المستوى اللي وصلولو التلاميد ديانا.
المهم خوكم الحوميدي قْرى عام عند السّي الطويل اللّي الصراحة كان نعم الناصح والمرشد والدّليل.

الجزء الثاني : راها تْهرْساتْ يا أستادْ

بالنسبة للمعلّم التاني واللي كان يْقرّينا اللغة الفرنسية ، كان باقي شابْ.يمكن عندو ديك 24 أو 25 سنة .كان مْهالّي فْراسو ديما الكوستيم ولكْرافاطا.قضية مهمة لاحظْناها عليه : هو أنه كانيْبدّلْ لقْوامجْ بزافْ وكل لون عندو إشارة.مثلا النهار اللي يلبس قاميجّة حمراء ، هاداكْ النهار يدوز علينا أكحَلْ.التلاميد كولهوم ياكْلو سلخة كي المجتهدين كي الكوسلاء ، مع الفابور لتّلاميد لمْساليينْ.
النهار اللي يكون لابس قاميجّة لونها أصفر ، هاداكْ النهار ديال السِّلم.نهار يْدوز على خير وحتى اللّون لخضر .ولكن الخطار هو اللون لكْحلْ.الحمد لله غير مرّة وحدة اللي لبسْ فيها قاميجّة بهاد اللون والا يمكن كونْ راه سالا معانا كولنا.
واحد النهار كان باينْ راشقا ليه وبالطبع كان لابس اللون لصفر .المهم يا الله قال لينا جبدو الكتب وقْراوْ .الى ما خفتش نكدب كان النصْ يتعلق بالمعْزة ديال السيد سوغان.سّي غيّوغي خرجْ .يمكن مشى عند المدير.المهم دازت ديك رْبع ساعة ، المعلم ما ضْهرْ لو أثَرْ.صافي التلاميد قلبوها غْواتْ وصْداعْ.شي يلعب فوق الطابلة ، شي مْشى للمكتب لاعبها معلم.شي اللي يكتب فالسبورة.المهم الحيحة نايضة.
بْلا ما نْحسّو ، دخل سّي غيّوغي وشافْ اللّي شافو.مَنْ داكْ الشّي اللي شافْ واحد التلميد سْميْتو حجي .كان طويل ورقيق بْحالْ الستيلو .هاد خونا بالله كان زعما يْقلّدْ المعلم فالقراية ديالو .سّي غيّوغي ما قالّو والو .يا الله فاشْ رْجع كل واحد لبْلاصْتو ، قرّبْ من حجّي وقال ليه بكل أدب : مسْيو حجّي تفضّل وقْرى لينا شوية هاد النصْ الرائع .
حجي هو لمكلخ ديال القسم ولقرايا ديالو تقتل بالضحك.خونا بالله كيتْهجّى بالحرف والى قْرى غير جملة يمكن فربع ساعة .سّي غيّوغي اعْطى الإشارة لواحد 6 ديال التلاميد صْحاحْ وقال
ليهوم :جيبو المتعوسْ وحطّوه فوق الطّابلة.يا الله شدّوه مزيانْ ودَوْروهْ لْجيهة التلاميذ.
سّي غيّوغي قرّب منّو شادْ عْمودْ صْحيحْ وانزلْ على المؤخِّرة ديالْ خونا بالله .خونا بالله غيرْ داقْ الدّقة اللّولى ، بْدى فالتْبَحْليطْ (لغْواتْ) .سّي غيّوغي زادْ أكْسيرا فالضرب.
شي وْقيتة حجي علّى(رْفَعْ) يدّو وقال على فورْ جهدو : ميسْيو ميسْيو ريَّضْ ريَّضْ (باراكا عليا) صافي تْهرْساتْ
واه واشْتا هادي اللي تْهرْساتْ ؟
سّي غيّوغي حتى هو حار لو لعجب.هي هاديكْ ما زادشْ ضْربْ حجي.المهم حطْ لعمود وقال لْحجّي : شكون هي اللي تْهرْساتْ ، تْكلّم يا متعوسْ
حجي باينة عليه الفرحة قال للمعلم أُو هو كيْورّيه المؤخّرة ديالو : هادي هي اللي تْرْساتْ يا ميسْيو
اول مرة سّي غيوغي كنْشوفوهْ يضحك.حْنا تْبعنا المعلم ديالنا والصراحة بْكينا بالضحك.


الجزء الثالث : كيفاشْ حوميدي عاودْ العامْ

الامتحانات ديال الخامس ماكانتشْ بحال هادي .كانت الصراحة قاصْحة بالمعقول وكانت تقريبا تشبه الباكلوريا حيتْ كانتْ على المستوى الوطني.
المهم اول مادة كانت هي العربية وفيها حتى القرآن الكريم والتاريخ والجغرافية .خوكم الحوميدي حسْ باللي غادي يجيبْ شي معدّلْ مْطَرْطَكْ.
ولكن اللي جا من بعد ما كانشْ فالحسبان.هاد الشّي وقع في مادة الرياضيات.خوكم حوميدي كان مْهنّي بْحالْ الحوتة فالما.ياكْ هاد الحسابْ ما عندي مْعاه مشْكيلْ ؟ خوكم غادي يجيبْ كولشي صحيح خصوصا وكنت لْقيتْ نضْرة على الاسئلة وبانتْ لي كولْها بْحالْ شْريبْ الما.
المهم خوكم خدّامْ يْجاوبْ على الاسئلة وسيابق التلاميد اللي ما زال حاصلين يا الله مع العمليات الأولى.
شي وْقيتة ، الورقة ديال الوساخ عمْراتْ وما لقيتْشْ فينْ يمكن نحسب.بالطبع كان خاصني نطلب شي ورقة خاوية من عند مراقبين ولكن حْشمتْ على حقّاشْ كنت من قبل طلبْت عليهوم ورقة.
اللي كانْ فتحتْ المحفظة باشْ نْشوف الى عندي شي ورقة خاوية .من الزهر لْقيت ورقة فيها جهة عامرة.باقي عاقل فيها الأفعال بالفرنسية وطريقة الصرف ديالهوم للمضارع .خوكم الحوميدي ردْ الورقة.واحد من المراقبين شافني وجا عندي وقال لي بْحالْ الى زعما شدْني نْديرْ شي جريمة كبيرة : شَدّيتَكْ يا الغشّاشْ
أنا شفتْ فيه .ما فاهم والو .هي هاديك حلّ الكارْتابْلْ (المحفظة ) وخرّجْ الورقة اللي أنا زعما ردّيتْها.
_ وهادي ألغشاش ماشي هي الورقة اللي كنتي باغي تنقل منها؟
الحوميدي ما عمرو كان لا نقّال لا غشّاشْ ، جاوبتو : انا ماشي نقّال ومن الفوق هاد الورقة ما عندها حتى علاقة بلحساب.شوف مزيان راها مكتوبة بالفرنسية
بالطبع المراقب ما رْضاشْ برهوشْ بْحالي يْورّيه .اوى اللي كان قال لصاحبو: أجي تْشوف هادْ لفْهايْمي ضْبطْناهْ ينقلْ ودابا راهْ يضحك علينا
صاحبو جا ولكن ضاهرْ باللي موحال الى عندو شي دراية ديال هاد اللغة.ماشي بعيد يكون من هادوك اللي قاريين 60 حزب ومْتلْفين 70 .العجيب فالامر شد الورقة بالمقلوب ودارْ راسو يقرى وقال لصاحبو : عندك الحق فيها شي معلومات ديال الامتحان .
انا حيت حسّيتْ بالضُّلمْ ، شدّيت الورقة وقلت لو راكْ قالبها ماشي هكْدا تتْنقْرى لفْرانسوية
اوى خونا بالله صافي غْضبْ وغلْغَلْ : كيفاشْ أنت يا داكْ النقّال باغي تْورّيني آشْ نْديرْ
زاد صاحبو قالّو : شوف هادا ما يصلح مْعاه غير نعطيوْ لو 0 ونكتبو لو باللي ضبطناهْ ينقلْ
صافي داكْ الشّي اللي وقع .حوميدي الأول فالقسم يصبح مجرد غشّاشْ.عييتْ ما نرغبْ غيرْ باشْ يْخلّيوْني نْكمّلْ التمارين ولكن بدون جدوى
النتيجة باينة خْديتْ 0 .
واخّا هكدا قْدرت نوْصل ل59.5 ديال النقط ولكن للأسف ما كانشْ عندي الحق فالنجاحْ
بالطبع السلخة اللي كْليتْ من عند الواليد ما عمرو ما ننْساها.
داكْ النهار الواليد حسّنْ الموسطاشْ وسبحان الله بانْ ليا شْحالْ واعرْ.المهم كْليتْ وفرّقْتْ كي ما نقولو بالوجدية


الى اللقاء مع الحلقة رقم 9 وسنتي الثانية في المستوى الخامس

 

Houmidi59

::الفارس المغربي ::

غير متصل
#23
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير
الحلقة رقم 9 : حوميدي ديما فالخامس


الجزء الأول : ذكرياتي مع سّي عابيدْ

تصورو يا خّوتي هادوك الجوج معلمين شْحالْ دعيتْ فيهوم.مازال لْحدْ الآن غير نتفكرهوم نكرهْ داكْ النهار اللي لقاني بيهوم....
ما عْليه ، الحوميدي استاعدْ لسنة دراسية جديدة .بالنسبة للمعلمين ، سّي غيّوغي دوّزْتْ مْعاه العام التاني ديالي والصراحة هو أعطاني التيقار ، أمّا أنا حيتْ كنت فاهم الطريقة ديال الخدمة ديالو كنتْ مْتبّعها حرفيا.شي وْقيتة ، بْقيتْ انا اللي نْقومْ بعمليات التصحيح وشي مرّاتْ المراقبة ديال الدفاتر.
بالنسبة للعربية كان عندنا معلّم أقلْ ما يمكن نوصْفوهْ هو أنه مْسالي مع قبّو.
كانت عندو واحد الحقيبة كبيرة مْعمّرها قصص.اللي بْغى يْرشّقْهى لهاد المعلّم ، ساهْلة ماهلةْ : يكْري من عندو القصص.
باقي عاقل ثمن كراء القصة هو 10 سنتيم وتبقى عندك يومينْ.في حالة الى ما رجّعْتيهاشْ فالوقت المناسب ، راهْ عندك خْطية ديال دورو (ريال) لكل نْهارْ.
هاد خونا بالله كان عندو واحد الزعْبولة كيجمع فيها فلوسْ القصص.صَدْقوني الى قلت ليكوم كان جامع حْصيْصةْ كبيرة .
حاجة ما طّيحْشْ فالبالْ: هاد المعلّم ما يستعملشْ لعمود مع اللي ما يحفضوشْ أو مثلا يْديرو لبْسالة.هدا عندو طريقة ديالو : اللي ما حافضْشْ عندو نقطة ديال المخالفة والى تْجمْعاتْ ليه 5 راهْ مَكْلاسي.يعني أنّ هاد التلميد غادي يْشَدْ القنتْ ويمكن الى بْقى على هاد الحالة يْعاود العامْ.
ولكن اللي عجبني فْهادْ المعلّم أن هاد الكسول يقدر يرجع لبْلاصتو الى خلّصْ لبْروسي (المخالفة).كاين جوج طُرُقْ : الحل اللّوّلْ يخلّصْ 50 سنتيم دقّة وحْدةْ.الى ما كانْشْ عندو لفلوسْ، ما عْليه غير كل مرّة يَعْرضْ القرآن أو شي نشيد وحتى الى جاوب جواب صحيح على سؤال ديال المعلّم.فْهاد الحالة ، سّي عابيدْ ينْقصْ ليه نقطة ديالْ المخالفة.مينْ يتْقاضاوْ النقط ديال المخالفة اللّي عندو ، غادي يرجع لبْلاصتو.
العجيب فالأمر التلاميد (شي وحدينْ) عجْباتهوم هاد الطريقة .تْصوْرو تلقى تلميد يتكلم مع صاحبو فوقت الاستراحة :
_ أخويا أنا لحْفاضة قهْراتْني.يمكن غادي نشوفْ باشْ نْشَدْ القُنْتْ
_ والله الى عندك الحقْ.حتى انا راه باقي ليا غير نقطة ديالْ المخالفة وها راني مسْتْراحْ مع راسي.
هاد السّي عابيدْ كان يْكلّف التلاميد بالمراقبة ديال الأعمال ديالنا .انا ما كنتشْ من المحضوضين عندو حيتْ واحد النهار صحّحْتْ لو شي خطأ فالاعراب .اوى خونا بالله ما عجبوشْ الحالْ.منْ داكْ النْهارْ ، رْماني للتّوشْ.ولكنْ واخّا هكْدا مينْ يحصلْ ، كانْ يْجي عندي ويقولْ لي بْسخْرية : يا الله ورّينّا كي درتي ليها أداكْ المَجْهَدْ.
هاد المعلم كي ما قلت كان الاهتمام ديالو لكبير هو كراء القصص.هاد العملية كانت تقريبا تتعدى ساعة.كانو التلاميد يقراوْ القصّة فالقسم.شْحالْ من واحدْ كانْ يْردها فْداكْ النهار ويْزيدْ ياخودْ قصة تانية ...ولكن يْخلَّصْ جوج دورو (ريال)
سّي عابيدْ فْلفْلوسْ ما يعرف حتى واحد.
باقي عاقل السبورة كانت تقريبا خاوية .قليل مين خونا بالله يكتب شي حاجة.كان (الله يْسامحو) غير يفْتي علينا آشْ نكتبو.
بعضْ المراتْ يكون عاطيها لحْساباتْ ديالْ مداخيل القصة أو المخالفات .غيرْ يْشوفْ المديرْ دايزْ ، يبْدى غيرْ بوحدو يْغوّتْ : فتح طارق بن زياد الأندلس
حْنا التلاميد حيتْ نكونو مع القصص او حوارات ثنائية ، كانت الهضْرة ديالْ خونا بالله تْفاجاْنا .واهْ آشْ دخَّلْ التاريخ مع القراءة.حيتْ ديكْ لوْقيتة نْكونو زعما من المفروض نقْراوْ شي
قطعة .
واحد المرّة سَخْسْخو المدير .ماشي بعيد يكون عاق بيه.انا دابا كنتْخايْلو يقولْ لو :واشْ هادْ طارق عندك كل نهار فاتح الاندلس.واشْ ما يفتحشْ شي حاجة خْرى ؟
بعضْ المراتْ سي عابيدْ يمشي دغيا للسبورة ويكتب بالزربة شي تْخرْبيقة : تاريخ ، جغرافيا ، نشيد ، أعمال يدوية
شْحالْ من مرة كنضكحو ونقولو ليهْ : معلّم راه اليوم ما عنْدْناشْ التاريخْ أو النشيد. يا الله فاشْ دازْ
الحاصولْ هاد السّي عابيد كانْ مْسالي مع قبّو
فْآخير السنة شي واحد سالا مْعاهْ بالمعقول : سْرق ليه الدراهم اللي جَامعْ فالزعبولة وعمّرها لو حجَرْ .
سّي عابيد ما قْدرشْ يْديرْ شي حاجة لأنّه غادي يتْبتْ باللي كانْ يْتاجَرْ مع التلاميد وهادا ماشي قانوني.
من بعد خونا بالله باع القصص ديالو بثمن رمزي زعْما باشْ يْرد فلوسو

الجزء الثاني : قصة رابح بوخنونة

جاتْ آخر السنة بعدما دوّزنا الامتحاناتْ.جا اليوم اللي غادي يعطيوْنا النتائج.كنّا تقريبا شي 200 تلميد ننْتاضْرو النتيجة.خوكم الحوميدي كانْ عارف راسو ناجحْ.باقي عاقل كانْ واحد صاحبي كنتْ نمشي معاه فالطريق للمدرسة .كان يسكن تقريبا من جهة الدار ديالنا.سْميْتو رابح ومعروف بِ بوخْنونة.مسكين ديما نيفو يْسيلْ.هي فالحقيقة غير خْنونة وحْدة : هاهي هاوْدة ، هاهي طالعة.
كانْ سّي غيّوغي مثلا يقولو : صرّف هاد الفعل للمضارع (بالفرنسية).رابح مسكين غير يْشوف فالمعلّم .هي هاديكْ تْجي خارجة لخنونة طْويلة بْحالْ التْرانْ ديالْ مارْشونْديزْ(train de marchandise).سّي غيّوغي غير يْشوفْ منظر لخنونة بْحالْ الى يبْغي يتْقيّى .هي هاديكْ يقول لو بالفرنسية
mouche-toi morveux
معناها أداكْ لمْخنَّنْ امْسحْ نيفكْ
رابح ما عمْرو كان عندو موشوار .كان دغيا يْطلّعْ لخنونة ويرجع لبْلاصتو .
اما سّي غيّوغي كان يخرج شوية باشْ يتْنفّسْ او يشرب كاس ما.
نرجعو لنّتائج اللي كنّا ننْتاضرو.اللي كانو شافّينّي هوما الكوسالاى.سبحان الله العظيم هاد لمْكلخينْ عارفين راسْهومْ جايْبينْها فالطْبكْ (يعني ساقطينْ) ولكن مازال عندهوم الأمل باشْ ينّجْحو.
داخلْنا عليكوم بالله واشْ واحد عندو جوج فالمعدل وتلقاه يطلب الله ويقول : يا ربّي نجّحني
هادا هو لحْماقْ بْعينو
شي وْقيتة ، دْخلْ سّي كْراري هازْ شي وْراقْ.مْشى عند المعلمين وتْكلّمْ معاهومْ شوية .من بعد شافْ فينا وهاد المرة تْكلّم معانا بالعربية : سمْعو وليداتي ، غادي نْعيّط على سْماواتْكومْ.اللّي سْمعْ سْميْتو غير يمْشي في حالاتو .
مجموعة شافو فيه بْحالْ الى ما فاهمينْ والو.الصراحة حْنا مْوالْفينْ نسمعو أسماء الناجحين ماشي أسماء الراسبين.
هاد السّي كْراري شاف باللي من الأحسن يْكَرْكبْ هادو اللّي ساقطينْ باشْ من بعد يعطي لكل واحد ناجح الورقة ديالو وحتى لوحة الشرف.
المعلّم بْدى يْعيّطْ .اللي سْمع سْميتو إمّا تْجيهْ السّخْفة أو يخرج يجْري بْحالْ العَوْدْ.
شي وْقيتة سّي كْراري قالْ : رابح .....
كولنا شفنا جيهة رابح.
رابح كي العادة خْنونْتو طلّاتْ منْ نيفو .وْقفْ مسكينْ وردْ على المعلّم : أنا رابح
المعلّم قال ليه (باقي عاقل) ولدي ما بْقيتيشْ رابح حيتْ غادي تْعاودْ العامْ.
رابح مسكين شاف فينا وخْنونْتو حتى هي .هاد المرّة بْيدّو جْبدْها وضربْها مع الأرض.خْرج من القسم وخلّاها (لخنونة ) باقية تَردحْ بحال خروف العيد مين يدبْحوه.
انا الصراحة حسّيتْ بالحزن .ماشي غير أنا حتى التلاميد.سبحان الله العظيم كولْنا كنّا باغْيينْ رابح بوخنونة ينجح.
حتى المعلمين ماشي بْعيدْ كانو يبْغيوْ رابح بوخنونة ولكن النجاح ما فيهْشْ اللّعْبْ
دازت تقريبا 20 دقيقة.جا المدير ومْعاه سّي غيّوغي .
سّي غيّوغي تْكلّم معانا بالفرانْسوية وهنّأنا بالنجاح .من بعد جا المدير باشْ يقرى الاسماء ديال الناجحين مْبدّي باللي جابو أعلى معدل .خوكم الحوميدي كان من الأوائل .
المهم غير اللي يْعيّطْ لو امّا يْغوّتْ أو يرفع يدّو ويقول : الحمد لله الحمد لله
شوفو هاد لعجب .ياكْ زعما بْقينا غير حْنا الناجحين بعدما الراسبين مْشاوْ في حالاتهوم.هدا يعني أن بنادم ديما خايف وما يتْهنّى حتى يسمع بْودْنيهْ او يْشوفْ بْعينيهْ.
شي وْقيتة ، المدير عيّطْ : رابح ....
ما يمكنشْ !!! التلاميد والمعلمين شافو فالمدير .المدير حَنْزَزْ فينا : مالكوم جاتْكومْ عْجبْ الى رابحْ نْجحْ ؟
سّي كْراري قرّبْ من المديرْ وهْمسْ لو في ودنيه.
المديرْ غيرْ هزْ راسو .شي شوية جبدو اللائحة وبْداوْ يْعيْطو على شي تلاميدْ من المفروضْ كانو ساقطين .جابْ الله شي وحدين كانو حْدى بابْ المدرسة.دَغْيا لْقاوْهومْ.
انا خْرجتْ نْقلّبْ على صاحبي رابح بوخنونة.للأسف ما لْقيتوشْ.
سّي كْراري قالْ لي : ولدي حميد سيرْ دابا لدار رابح وما تْجي الّا ونْتْ معاهْ
خوكم الحوميدي خْرج ومعاه جوج تلاميد : عبد الجبّار ولشْهبْ.
بتْلاتة بينا مْشينا نجريوْ باشْ نقولو لصاحبنا بوخْنونة راكْ نجحتي فالامتحان
آه يا خوتي مين وصلنا لدّار ديالو ، كانت الباب مفتوحة .حْنا دخلنا وحْنا نْعيطو : رابح رابح راكْ ناجحْ
فوسط الدار شفْنا منظر ما يمكنشْ ليكوم تتصوْروه: رابح يدو ورجليه مربوطين.بّاهْ شادْ حْديدة غادي ينْزلْ بيها على راسْ ولدو.
الحمد لله لغْواتْ ديالنا هو اللي وقّفْ خونا بالله والّا كان دمّو سالْ قْبلْ ما تْسيلْ خْنونْتو.
الحدّادْ (والد رابح) شافْ فينا وقالْ لينا : آشْ كنسمع ؟ ولدي نْجحْ
خوكم الحوميدي ردْ عليهْ : والله أعمّي الى رابح نْجحْ فالامتحانْ وراهْ مْصيفَطْني المعلّم
رابح شافْ فينا وضْحكْ.سبحان الله العظيم : من نيفو خَرْجاتْ خْنونة كبيرة وصفرا.
رابح ما زال فالنّيف ديالو احتياطي كبير ديال لخنونة.
مسكين ضْحكْ وقالْ لينا : أبّا راني نْجحْتْ ، راني نْجحْتْ
الحدّادْ رْمى لحديدة وقالْ لينا : والله الى جيتو نيشانْ فالوقت .كنتْ غير شْوية ونْهرّسْ راسْ هادْ المتعوسْ
هي هاديكْ ، جْبدْ الحدّاد من جيبو درهم وقال لي : سيرْ أولدي وشْري لينا قرعة موناضا باشْ نشربوها براكة على رابح بوخنونة
شفتْ فيهْ : رابح بوخنونة ؟
_ مالكْ أولدي ؟

ياكْ راكو تْعيطولو رابح بوخنونة؟
_ نعمْ أعمّي ولكن غير بيناتْنا.
ضْحكْ الحدّادْ وقالْ لينا : انا دابا مفتاخر بولدي رابح بوخنونة


الى اللقاء مع الحلقة رقم 10 من مذكرات الطفولة
في هذه الحلقة
صاحبي بونور وقصتو مع أتايْ والسفنجْ
مين المدير فْرضْ على كولشي صلاة العصر
قصة المعلم وصاحبو تحت المكتب
 

Houmidi59

::الفارس المغربي ::

غير متصل
#24
رد: مذكرات طفولية : اعترافات حوميدي الصغير

مذكرات الطفولة : مذكرات حوميدي الصغير
الحلقة رقم 10
: ذكريات لا تنسى (2)


الجزء الأول : صاحبي بونور وقصتو مع أتاي والسفنج

في سنة 1970 بالضبط رحلنا إلى منزلنا الجديد بحي الطوبة الداخلي.هاد المنزل قام الواليد ديالي بالبناء ديالو وكان يْراقب عملية البناء ديكْ لوقيتة الصديق الوفي ريزو كارلو(Rizo Carlo).هاد النصراني هو طالياني وكان عندو مقهى معروف في وجدة .كان الواليد ديالي من الرواد ديالو وكان في نفس الوقت يقوم بالحراسة الليلية .كي ما تعرفو فالليل دائما كاين المشاكل خاصة مع دوك الناس اللي كيخَبْطوها بالمعقول (يسكْرو )
هاد الدار مبنية بطريقة عصرية ماضايْراشْ.للأسف الواليد عند انتقالو لمدينة الرباط باعها بثمن رخيص ما يتعدّاشْ 18 مليون.تصورو أن اللي شْراها يا الله 6 ديال شْهورا من بعد باعها ب34 مليون.
المهم نرجعو لهاداك العام .سكنا فْحي جديد وبالطبع تْعارفنا على أصدقاء جدد .من هاد الأصدقاء صاحبي بونور اللي كان حتى هو يقرى فالقسم الخامس.
كانو اصدقاء بْحال جمال ادخيسي ، نور الدين الزاوش ، محمد النجاري ، مصطفى عامري ، مراد فراجي ، الزعيم ، يحي عيساوي.....هادو اصدقاء مع آخرون كنّا نتْلاقاوْ كل نهار باشْ نلعبو الكرة أو الألعاب الّي كانت معروفة فْديكْ لوقيتة بْحالْ لعبة كاما (cama)أو لعبة الكنز(trésor) أو لعبة الزّوزْليطْ (les osselets) أو لعبة الزّرْبوطْ (la toupie)
باقي عاقل كان واحد لبْلانْ(ساحة) كبير خاوي .حنا أولادْ الدرب صايبْنا فيه ملعب لكرة القدم.
تقريبا شي عام وحْنا نلعبو
ولكن جا النهار اللي هاد لبْلانْ ارجع ديور ومنازل.بالطبع اللي ربحنا هوما اصدقاء جدد.
باشْ نلعبو الكرة كنّا نستعْملو الطريق لكْبيرة .هاد الطريق كانت عْريضة بما فيه الكفاية .
كل نهار نتلاقاوْ حْدى الدّار ديالْنا.من بعد نمشيو لهاد الطريق لكبيرة باشْ نلعبو الماتش ، إما بيناتْنا أو مع شي فرقة جايّا من شي درب بعيد علينا.
واحد النهار كنا في مقابلة مع فرقة جاتنا من حي بعيد.باقي عاقل كنّا منتاصْرينْ.
شي شوية سمعنا شي واحد يْعيَّطْ :" بالاكْ ، بالاكْ" اللّاعّابة كولهوم وقفو باشْ يْشوفو المنظر الرائع اللي دوماجْ مْنعْ لكاميرات العالم لأنه فالحقيقة منظر فريد من نوعو.هاد المنضَرْ يا خّوتي هو ديالْ صاحبي بونور مع أبّاهْ.الأبْ صايكْ (يقود) الدراجة ديالو وحاطْ من فوق الكيدونْ (المقود) صينية فيها برّاد وكيسان.ولدو تابعو فْيدّو طبسي سْفنج باقي سْخونْ.
دازو حْدانا بعدما وسَّعْنا ليهوم الطريق بْلا ما يوقفو.صاحبي بونور باقي يْعيّطْ "بالاكْ ، بالاكْ"
دازت يمكن 10 ديال دقائق وحنا شي يْشوفْ فْشي.من بعد قْلبْناها ضحكْ.
شي شوية جا لعندنا بونور باينة عليه الفرحة والافتخار بالنفس.
سَوْلو صاحبنا ادخيسي : خويا حميد شفناك غادي للمدرسة .واشْ برّعتي المعلمين بْشي زردة ؟
رد عيه بونور : اوى بعدا بارْكو لي النجاح .صافي راني نجحت للْإعْدادي
كلنا تبْهضْنا : كي درتي ليها ؟ ياكْ مازالْ ما خرجو النتائج.
بنور شاف فينا بْحالْ الى زعما عندو الحكمة : اوى آشْ ضْهرْ ليكوم أن الواليد قال ليهوم راحنا غادي نْسافرو هاد الأسبوع وراهْ خاصْ تكون عندي النتيجة قبل ما نسافر لأنّنا غادي نمشيوْ للجزائر
_ اوى ؟
_ اللي كان أنّ واحد الموظف قال لينا : فالحقيقة راه ممنوع نعطيوْ النتائج قبل الوقت ديالها ولكن حيتْ أنت باغي تْسافر غادي نْديرو معاكْ هادْ الاستتْناء ولكن ما تقولها لحتى واحد.
المهم شافو فاللائحة وقالو للْواليد ديالي : بونور عبد الحميد راه ناجح.
الواليد شْحالْ شْكرهوم .هوما جاوْبو الواليد ديالي : بْلا ما تشكرنا .الخير اللي غادي أدّيرْ فينا هو جيبْ لينا شي برّادْ أتايْ مع شوية خبز.راحنا من الصباح ما كْلينا
هي هاديكْ جبنا ليهوم أتايْ والسفنج.
هي هاديك المقابلة سالاتْ وكل واحد مْشى في حالاتو أو هو يفكر فالنتيجة ديالْ الشهادة.الصراحة كانت الشهادة صْعيبة وقليلْ اللي كان ينجح فيها.
جا اليوم ديال النتائج .أنا والأخوة ديالي مْشينا باشْ نجيبو النتيجة من مدرسة بن الخطيب.تصورو أننا بْقينا مسجلين فهاد المدرسة واخّا رْحلنا.أصحابي ديال الدرب كانت المدرسة أحْداهومْ.هي هاديك دغْيا جابو النتيجة ديالهوم
المضحك أن بونور ما كانشْ فاللائحة ديال الناجحين.
فلعشية تْلاقينا باشْ نهضْرو فالموضوعْ.
_ بونور مسكين ما نْجحْشْ
_ ما يمكنشْ ؟ ياكْ زعما قالها لينا بْفمّو
_ لعجب هادا
_ انا بعدا عْييتْ ما نشوفْ وفالحقيقة ما سْمعتْشْ الاسم ديالو
_ عْرفتو آشْ نديرو ؟ يا الله نمشيوْ عندو لدّار باشْ نْجيبو التحقيق
فعلا مْشينا لدّارْ ديالو.دقّينا حتى فْرعْنا البابْ.حتى واحد ما بْغى يْردْ علينا.
داز تقريبا أسبوع وخونا بونور ما ضْهرْ عليهْ أتَرْ.واه واشْ بونور زعما يكون مسافرْ ؟
شي واحد من الدرب هو اللي جابْ لينا لخْبرْ : بونور ما زال ما سافر وراه يا الله شافو البارح خارج بالليل للْحانوت وراه مسكين عينيه بْجوجْهومْ منفوخينْ.
سوّلْنا على السببْ ، قال لينا مولْ لخبار : هادا ما يْكونْ غيرْ كْلا سلخة
خوكم الحوميدي تْفكّر السلخة اللي حتى هو تْبرّع بيها العام اللي قْبَلْ.
واحد النهار جا عندنا بونور وباينة عليه العلامة ديال السلخة.عين وحدة باقية منفوخة وما زال شوية ديال الزْروقية ضايْرة بيها.
انا حيتْ صاحبو اعتارف لي باللي كاين : خويا حميد راني تْبَهْدلْتْ
_ حْكي لي خويا بونور .يمكن نقدر نْساعدكْ
_ تعقل داكْ النهار اللي ادّينا للمدرسة أتاي والسفنج؟
_ باقي عاقل ياكْ كنّا نلعبو ماتش
_ واه يا خويا ولد لحرام كْدبْ علينا
_ كيفاشْ كدبْ عليكوم
_ قالك أسيدي تْخالطو لو السْميَاتْ
_ كيفاشْ تْخالطو لو السْميَاتْ ؟
_ هادا اللي نْجح سميتو بونوحْ حميد ماشي بونور حميد
_ اوى القضية فالرّا
_ واه أخويا
_ زعما قالو ليك أرّا

الجزء الثاني : مين المدير فْرضْ علينا نْصلّيوْ العصر فالمدرسة



ما عْرفتشْ واشْ جاتْ شي مدكّرة للمدارس أو هي مجرد فكرة طاحت على المدير ديالنا.اللي كاين أن المعلمين جمعو التلاميد كاملين فوقت الاستراحة وقالو لينا كل نهار غادي تْصلّيوْ صلاة العصر .تصورو يا خّوتي انا فْديكْ الساعة كان في عمري 9 ديال السنوات وما كنتشْ نصلي وما نعرفش الصلاة كي دايرة.
واخاّ قْريناها فالتربية الاسلامية ولكن كان داكْ الشّي غير حْفاضة.
الصراحة حْنا فالصغر ديالنا كنّا مكلخين.
غادي نعترف ليكومْ بواحد الحاجة غريبة باقي عاقل عليها لحد الآن.واحد النهار فالمستوى الثالث تكلّم لينا المعلم على عبادة الأصنام اللي كانت منتاشْرة في مكة.خوكم الحوميدي اللي عْقلْ عليه هو أن الناسْ مينْ يكبرو خاصهوم يصنعو شي صنم كبير باشْ يعبدوهْ.باقي عاقل كنت نتمشى مع صاحبي عبد الجبار وقلت لو داكْ النهار خويا أنا مين نكبر غادي نصاوب صنم بلحْديد باشْ ما عمرو ما يْهرْسوهْ ليا ونعبد ربّي على خاطري.
هادا عبد الجبار يمكن الى كان أكْلخْ منّي جاوبني أنا غادي نْصاوْبو بْلخشبْ باشْ يكونْ خفيف
المهم المعلمين بْداوْ يجمعونا كي لغْنم .المشكل ما عمرو ما تْوضينا .اللي كان يهم المعلمين هو أننا نكونو واجدين مين يحضر الإمام .شكون هو الإمام ؟ هو المديرْ
المشكل السيد المدير يقول الله أكبر .حنا موراه تابعينو ونقولو معاه الله أكبر.
راكو عارفين أن صلاة العصر سرّية.المشكل فلوقيتة اللي خاصنا نقراوْ سورة الفاتحة مع سورة قصيرة حْنا مع ما عارفينشْ آشْ يمكن نْديرو.اوى شي ينغزْ فْشي .المهم ما كاين غير الضحك والتكرْكيرْ .لفضيحة لكبيرة مينْ نكونو ساجدينْ.آه يا خوتي كاينْ شي مساخيط اما يْضَغْضْغوكْ فْرجْليكْ.او يركلوكْ.المهم منضر غير نتفكرو نقول مع راسي موحال الى قريش كانو يْديرو هاد لفعايلْ ديالنا.؟ ما يمكنشْ
ولكن مسكين المدير كان مفقوصْ بالمعقول.كان مرّة مرّة يْغوّتْ غيرْ بوحْدو بْحال الى يْنبّهنا باللي راحْنا فالصْلاة.
مرّة مرة نسمعو المدير يقول على فورْ جهدو : "ربّنا ولك الحمد " أو اللّه أكبااااااااااااااااارْ.كان ينطق بيها بواحد الطريقة فيها الغضب وباللي راه طالع لو الدم
المشكل الطريقة ديالو فلغْواتْ كانتْ عاد تشجعنا باشْ نزيدو فالضحك واللعب
غير خونا بالله يقول السلام عليكم ، يْنقزْ على اللي حْداهْ بالضرب أُو يْغوّتْ : الله ينعل اللي ما يحشم.
المعلمين حتى هوما كانو ديما حاضْيينْ المشاغبين باشْ يْوكلوها ليهومْ
العجيبْ فالأمر ما كانْ حتى واحد فيهوم يْصلّي من غير مولاي رشيدْ


الجزء الثالث : قصة جوج معلمين تحت المكتب

كانت لوقيتة ديال الاستراحة فرصة للتلاميد باشْ يْراجعو بعض القواعد خاصة فاللغة الفرنسية.تْصورو أن دائما الحصة اللي تْجي مورا الاستراحة كايْكون فيها لعْمودْ.على داكْ الشّي كانو التلاميد شي يعرضْ على شي.كانت مناسبة باشْ اللي ما كانشْ خادَمْ شي تمرين باشْ يكتبو قبل ما يْفيقْ بيهْ المعلّمْ
المعلمين فوقت الاستراحة كانو يمشيو لواحد القاعة باشْ يشربو اما القهوة أو أتايْ من غير المعلم اللي خاصّو يْديرْ الحراسة.
واحد النهارْ باقي عاقل ، صاحبي عبد الجبار قال لي :راني جبتْ مْعايا جوجْ بيضاتْ .
خوكم الحوميدي ديما قانوني : ولكن أخويا عبد الجبار راه ممنوع علينا ندخلو للأقسام فوقت الاستراحة
_ راني عارف ولكن أجي ندخلو بالزربة بْلا ما يْعيقو بينا
_ واخّا ولكن غادي نبقى واقف حْدى الباب باشْ نحضي اللي جايْ.
هي هاديك ، مْشينا للقسم.عبد الجبّارْ دخْلْ .مشى ديريكْتْ للمحفظة ديالو وجْبدْ جوجْ بيضاتْ.شي شوية بْيدّو قالْ لي أجي .
غيرْ قرّبْتْ منّو ، قالْ لي فودني شي حسْ كاينْ تحت المكتبْ.فعلا حتى أنا سْمعتْ شي تْخَرْشيشْ.
واهْ شي حاجة تحت المكتب..يمكن فارْ ؟
عبد الجبار قال لي : الفار ما كاينشْ فالمدرسة
_ اوى مُشْ ؟
_ لمُشْ يْخافْ حيتْ كاينْ لكلابْ
_ اوى هدا شي شفّارْ
_ ياكْ عندنا الحارسْ
_ اوى ؟
_ أجي ندفعو البيرو شي شْوية
_ عندك الحق
فعلا قرّبْنا من المكتب ودفعناهْ دفعة وحدة.شي شوية سمعنا شي طبسي بْحالْ الى تْهرّسْ وسمعنا شي واحد يْغوّتْ
عبد الجبار قال لي : حميد البيرو مسْكونْ (فيه الجنون)
دغيا خرج وجابْ سْطلْ ديالْ الْمَا .هي هاديك بْلا ما يْشوفْ آشْ يمكن يكون تحت المكتب أهْرق السطل كامل وهْربنا للساحة.
من حسن الحظْ الجرس دقْ.خوكم الحوميدي كانْ حاضي البابْ ديال القسم: شكون اللي غادي يخرج منها ؟
المفاجأة ماكانتشْ فالبالْ.سّي غيّوغي وسّي الطْويلْ خرجو باين الما على وجهْهومْ
الحمد لله ما عقْلوشْ عليا ولكن عبد الجبار عرفوه بْصوْتو
اوى آشْ غادي نقول ليكوم كْلى مسكينْ وْفرّقْ.
من عبد عرفنا باللي سّي غيّوغي هو صاحبو كان عندهوم شي شْغلْ وما قدروشْ يتغدّاوْ.اللي كاينْ هو أن الحارس جابْ ليهوم الماكلة وباشْ ما يْفيقوشْ بيهوم المعلمّين اتّافقو ياكلوها تحت المكتب
العجيب فالأمر أن هاد العادة كانت متداولة عند التلاميد.كان بعض المرات شي تلميد يْعاقْبو المعلّم وبالطبع ما يمشيشْ للدّارْ.مينْ يْجي وقت الدخول ديالْ لعشية يكون خونا بالله قاتلو الجوع.كانو الوالدين ديالو يْجيوْ للمدرسة ماشي باشْ يشْكيوْ أو يحتجّو .بالعكس كانو يْجيبو الماكلة باشْ زعما ولدهوم يتْغدّى.
المعلّم كان يْعيّطْ على التلميد ويْقولْ لو : أدخل تحت المكتب باشْ تاكولْ على خاطرك.



الى اللقاء مع الحلقة رقم 11 من مذكرات الطفولة
هذه الحلقة مع
بيكْ نيكْ بْكاسْ عدس (نزهة)
حوميدي وقْراقرْ (الضفادع) واد إسلي
مين هجمو علينا فالغابة الصغيرة (la petite forêt)


 
التعديل الأخير:

Houmidi59

::الفارس المغربي ::

غير متصل
#25
رد: مذكرات طفولية : اعترافات حوميدي الصغير

مذكرات الطفولة : حوميدي داكْ البرهوش الصغير
الحلقة رقم 11
: ذكريات لا تنسى (3)

الجزء الأول : بيك نيكْ (نزهة ) بْكاسْ عدس





اللي كانْ يعجبني فْأيام الطفولة أنّ الأصدقاء كانو يتّافقو شي نْهار يكون مْشمَّسْ باشْ نْديرو شي خرجة لطَّبيعة.فالصباح بكري كل واحد فينا يْجيبْ الماكلة ديالو وحتى بعض المرات الدفاتر ولكْتوب حيتْ يكون الاستاد عْطانا شي فروضْ أو باشْ نْوجدو لْشي اختبارْ.الصراحة كنّا نسْمعو للمعلمين ديالنا وكنْديرو اللّي يطَّلْبوهْ منّا .تصورو انّه فْشي نهار مْشيتْ للحمّامْ وكان خاصني نحفض شي كلمات بالفرنسية .اللّي وْقعْ انّي خْديتْ معايا اللّيفْرْ (الكتاب) باشْ خوكم الحوميدي يحفضْ هادْ الكلمات.
المهم واحد النهار تْلاقينا أصحابْ الدرب حْدى الدار ديالنا.على فكرة كانت الدار ديال الواليد هي مقر الاجتماعات وكنّا معروفين بدار السّيكْري نسبة الى عمل الواليد اللي كان مفتش شرطة.باقي عاقل كانت تقريبا العشْرة ديالْ الصباح.جاوْ الاخوان ناويينْ يلعبو شي ماتشْ ديالْ الكرة.المشكل اللي جا على غفلة هو أن المدرب ديالنا كان مسافر والكولْ مفْدوعْ فْيدّو .لهادا ما كانْشْ ممكن نلعبو الكرة.
اوى النهار كان زين ويصلح لْشي نزهة.هي هاديك كل واحد فينا مشى لْدارهوم باشْ يجيبْ معاه شي حاجة يساهم فيها فالنزهة.
خوكم الحوميدي دخل هو خوه حسن للدّار.مَنْ الصدف كانت الواليدة فالكوزينة
حسن خويا لْحقْ بيها وقال ليها : أمّا هادْ الريحة شْحالْ بْنينة !
الواليدة عارفاتو جَنْ : بعّدْ من الطنجرة وسيرْ تلعب.راكْ تْشوفْ راني مشغولة
حسن لصقة واشْ من لصقة : أمّا راني جَعْتْ
_ ها الخبز وها الزبدة .كولْ وبعّدني
حسن شاف فيا : الخبز والزبدة ما كانشْ بْحالو ، ياكْ
رديتْ عليه : خدْ لينا جوج خْبيزات وهاديكْ الطّاسة ديالْ الزبدة .
_ وأنت آشْ غادي تْجيبْ ؟
_ هادوك لتْشيناتْ (ليمونات) اللي فوق الثلاجة.
ولكن الواليدة شافتْنا:
_ آشْ كدّيرو يا لمْساخيطْ ؟
انا اللي جاوبتها : والو يا مّا .غير بْغينا نمشيوء لْشي نزهة وبغينا ناخْدو ما نكلو
الصراحة الواليدة من بكري وْأنا عزيزْ عليها .ما عمرو ما ضرباتني .بالعكس كنت ديما مرضي وكنسمع لكْلام ديال الواليدة بالعكس ديال حسن أو جمال الله يرحمو.
الوالدة ابتاسمت وقالت لي : حلْ لبْلاكارْ (الخزانة) خود المادْلينة وكولوها مع أصحابكوم بالصحة والراحة
خرجت أنا وحسن فرحانين .لْقينا الاصدقاء كولهوم كينتاضْرونا حْدى البابْ.فاشْ بْغينا نمْشيوْ ، لاحضْنا باللي نور الدين ما كاينْشْ.
المهم شي واحد فينا مْشى يْقلّبْ عليهْ.
دازت واحد النَّصْ ساعة خونا بالله عاد بانْ فْيدّو كاسْ عدس .
شفنا فيه متعجْبينْ.
قالّو خويا حسن : ياكْ ما امَّكْ أعطاتكْ لعْدسْ باشْ تْنقّيه ليها فالطريقْ ؟
ضحك مسكين ولكن بْحالْ الى حشْمانْ : لّا خويا حسن .راني ما لْقيتْ ما نْجيبْ من غير هاد كاس ديال لعدس
شي واحد من الجماعة ردْ عليه : عندك الحق بنادم خاصّو يْجيبْ شي حاجة فْيدّو واخّا خبز يابسْ
المهم شدّينا الطريق ديال المطار .كانت ديك لوقيتة الطبيعة خضرا .الصراحة مناضر طبيعية ما كاينشْ بْحالها.
تْمشّينا واحد 4 أو 5 كيلومتر وقرّبنا من الواد (واد اسلي) كان فيه الما يجري .كانو شي أولاد يلعبو الكرة مورا الواد.لخّوت كل واحد حطْ صاكو وحيَّدْ صبّاطو باشْ يْبرّدْ رجليه ويغسل وجهو من لعْرقْ ديالْ لمْشي.
كاين اللي جْبدْ كتابْ (بْحالي) باشْ يطالع شْوية.كاينْ اللي جاهْ الجوع وبْدى فالماكلة.
خونا نور الدّينْ ما لْقى ما يْديرْ .الماكلة ما عندوشْ .باشْ يتْلهّى بْدى يحسبْ فلعدسْ.
دازت واحد الساعة جا عندي حسن وقال لي : خويا حميد جاني الجوع .أجي ناكلو
أنا كنت مشغول فلقراية : غير كول الخبز والزبدة ، أنا ما فيا ما ناكولْ
حسن هزْ راسو : راكْ ما فهمتنيشْ .انا باغي المادلينة ديال الواليدة
_ المادلينة ماشي ديالك بوحدك راه ديالنا كولنا
_ ولكن راني جعْتْ
_ اوى كولْ الخبز والزبدة والليمون
_ كْليتْهوم وباقي فيا الجوع
هاد حسن كان الله يستر كرشو بْحالْ الحفرة ما عمرو ما تعمر وشْحالْ ياكول وتْكولْ يشبعْ.
هي هاديكْ عيّطْتْ لصْحابنا باشْ نتقاسمو المادْلينة.


الجزء الثاني : حوميدي وقْراقرْ(الضفادع) واد اسلي







كان واحد خالي يسكن قرب القَشْلَة (الثكنة) ديال العسكر.كنت أنا وخويا حسن نمشيوْ لعندو حيت الطبيعة فهاديكْ الجهة ما كاينْشْ بْحالها.
باقي عاقل كانت غابة صغيرة فيها تيران (terrain) يصلح للكرة.كانو لوجادة ديما لاعبين فيه مقابلات ديال كرة القدم .شي شوية قريبْ منّو وادْ اسلي ولكن كان عبارة على بِرَكْ ديالْ الما.كانولوْلادْ يْصيْدو لقراقرْ (الضفادع) لواحد النصراني .تصورو كانْ يشريهوم علينا ب4 دورو (ريال) للوحدة .
واحد النهار مْشينا زعما باش نربحو شوية دراهم مع خونا السْبَنْيولي(l'espagnol).باقي عاقل خْديتْ معايا كاسرونة كبيرة .
هاداك النهار خويا حسن كان عندو زهر كبيرْ.يا الله غطّسْنا الطاسة خرجاتْ مْعمرة ديدانْ .من بعد عرفنا باللي هاد لعجب اللي صيّدْنا نوع ديال الحوتْ كانْ معروف بْبوزْريويطةْ
المهم قال لي حسن : موحال الى السبنيولي بوقْراقرْ يبغي ياخود منّا هاد الدّودْ
خوكم الحوميدي كان دكي على صغرو :
_ سمعني مزيان : غادي تْغبّر هاد الدّيدان وما تْخلّي غير وحدة أو جوج
_ زعْما الشانْطِيو(l'échantillon)
_ بْحالْ داكْ الشّي
_ اوى ؟
_ ساهلة غادي سْبنْيولي يْشوف هاد لعجب ولكن حيت غير وحدة أو جوج غادي يطلب منّا نزيدو نْصيدولو شي بركة
_ صافي فهمت .من بعد نْديرو شي دورة ونْجيبو لو داكْ الشّي اللي صيَّدْنا
_ اوى غادي يْدَوّرْ معانا مزيانْ
فعلا غير خونا النصراني شاف الدّودة وخَتْها ، عجباتو وقال لينا : هادا خُوتا عمّرني ما شفْتْ بْخالها.خاصْكومْ تْجيبولي منْها كْثيرْ كْثيرْ.
خويا حسن سالو رْيوكو : كومْبْيانْ ميسْيو ؟ (زعما شْحالْ فالثمن؟)
_ النصراني ضْحك وخَرّجْ ورقة ديال 10 ديال الدراهم : غادي نعطيكوم هادي
لمسيخيط ديال حسن مشى دغيا يجري لبْلاصة فينْ خبّينا الدّيدان.الحمد لله دغيا تْبعتو ولْحقْتْ بيهْ:
_ اداكْ لهْبيلْ (لحْمقْ) واشْ عندك شي عْقلْ تكْسابو؟
_ عْلاهْ واشْ انا الزّيكو ؟ (واحد لحْمق كانْ معروف في وجدة في الستينات والسبعينات)
_ أجي بعدا نْشوفو شي قرعة ديالْ الزّاجْ باشْ نديروهوم فيها.خاصْنا نْبيْنولو باللي حْنا مْجهدينْ.
المهم اللي كانْ مْشينا لدار خالي .هاد خالي كان عايش في فرنسا وكان يْجي كل صيف ولكن وْلادو كانو عايشين فالمغرب.هي هاديكْ أعطاونا قرعة ديال الخاريج .عمّرنا الديدان وزدنا عليهوم الما .
هي هاديكْ ، مشينا عند السْبَنْيولي باشْ نبيعو لو الدّيدانْ
السبنيولي فْرح بزّافْ وقالْ لينا : خاصْكوم تْزيدو تْجيبو لي هادا دودا .انا باغي كْثيرْ كْثيرْ مَنْ دودا
شدّيتْ الورقة النقدية .يا الله بعّدنا ، قال لي خويا حسن:
_ اعطيني حقّي ولّا نْكولْها لبّا
_ مالكْ أصاحبي غير مْقلّقْ.اصْبرْ نْشوفو شي حانوتْ نْصرفوها
المشكل حتى واحد ما بْغى يْعطينا الصَّرْف ديالها.ولكن دغيا لْقينا الحل: خويا حسن شْرى بولانْجية (gros pain qu'on appelait boulanger , jadis)وبْواطا (boite)ديال السردين .هي هاديك كل واحد فينا خْدى حقّو : أنا خْديتْ 100 دورو (ريال) وخويا حسن كان من حقّو 85 ريال.
من بعد الاصدقاء كولهوم بْداوْ يْصيْدو بوزريويطة وسمحو فلقْراقرْ


الجزء الثالث : مين هجمو علينا فالغابة الصغيرة





كانت واحد الغابة صغيرة فيها ملعب ديال الكرة.كانو الاغلبية ديال لوجادة يْجيوْ باشْ يْديرو ماتْشاتْ ديال كرة القدم.
كنّا حتى حْنا أصدقاء الدرب كنْجيوْ مرة مرّة ولكن للأسف دائما التّيرانْ عامر.وبالطبع كانْ بنادم حكّارْ .لكبير ولقوي ديما غالب على الضعيف ولكثيرْ يغلب لقْليلْ
حْنا كنّا قْلالينْ وما كنّاشْ أقوياء .على هاد الشّي كانو دغيا يْجرّيوْ علينا.
واحد النهار كنّا 6 بينا فالملعب .كنّا شْرينا كرة جديدة .زعما بْغينا نْدشْنوها فالغابة الصغيرة

اللي وْقعْ هجمو علينا شي مْسوفْجينْ (sauvages)هجمة السْبوعا على حمير الوحشْ.
الصراحة كانو يمكن 20 أو زيادة.ما كانْ ينفع مْعاهومْ غير لهروب.
كل واحد فينا شدْ طريق.
المشكل واحد فينا مسكين شدّوه .اوى أرى ليكْ لصْقولْ (الصفع) والبونيا (اللكم) والركيلْ .خونا بالله زرْقو لو عينيه ومن الفوق خْداوْ لو سروالو بعدما لْقاوْ فْجيبو 4 دورو وموشْوارْ
المشكل بانْ من بعد باللي هاداكْ الموشوار(mouchoir) هو سْبابو حيت الموشوار ما كانو يستعملوه غير النْصارى وأولاد الشيكولا (الألِبَّةْ) هاد لمساخيط يَسْحابْ ليهومْ أنَّ مولْ الموشوار ما يكون غير شي واحد بورجوازي ولكن ما كانوشْ عارفين باللي هادْ الموشوار راه لْقيناهْ فْشي بيدو (طارّو) ديالْ الزْبلْ
شي وْقيتة ما بْقيناشْ نمشيوْ الا الى كنّا بزّاف يعني فوق من 10 .
ولكن النهار اللي مْشينا مع عمّي لهاد الغابة الصغيرة ما عمرو ما ننْساشْ.عمّي مولود كان تبارك الله طْويلْ وكانت عندو لحية طويلة وكان تقريبا يشبه كْلينْتْ ايسْتْوودْ (Clint Eastwood)الممثل المريكاني ديال كويْ بويْ(cow boy)
كان عمي عندو واحد البوطْ يوْصلْ لو حتى للرُكْبةْوكانْ مْلصَّقْ فيه الصْفايح ديالْ العَوْدْ باشْ مينْ يتْمشّى تسْمع الحسْ ديالْ الصبّاطْ على بعد 100 متر أو أكثر.
المهم مْشينا واحد النهار مع عمّي حيتْ كانْ غادي يلعب شي ماتش ديالْ الكورة.
شي وْقيتة طلبنا من عمّي باشْ يْخلّينا نْصيدو لحوتْ فلْكَلْتة (البِرْكَة)ديال الما.
عمّي قبل ما يْخلّينا ، قال لينا : شوفو ما تبعدوشْ.الى تْعدّى عليكوم شي حدْ ، غيرْ عيْطولي غادي دغيا نْجي
خوكم الحوميدي وخوه حسن وجوج صْحابنا ديالْ الدرب كانو عاطْينْها لصْيادة وراشقا ليهوم حيتْ حتى واحد ما جا باشْ يْصدّعْهومْ
ولكن شي شْوية ، قَربو منّا جوج رْجالْ كبارْ وصْحاح.واحد فيهوم قالْ لينا : أراوْ لفلوسْ اللّي عندكومْ أو غادي نقتلكومْ
حسن خويا قالْ لو : ما تقدرشْ راهْ مْعانا عمّي مولودْ
خونا بالله ضْحكْ بْحالْ داكْ الشّي ديالْ الأفلامْ وقال لخويا حسن :أشْكون هاد عمّكْ اللّي راكْ مْعنّي بيهْ؟
انا اللي ردّيتْ عليهْ : عمّي واعر ويغْلبْ السْبعْ
ضحكو بْجوجْهومْ : السْبعْ هاهاهاها ...اولدي السبع هو أنا وعمّكْ هو القرد اللّي حْنا غادي نْشطْحوه
هي هاديك حسن بْدى يْعيّطْ على فورْ جهدو : مييييييييلوووووووووووود ! ميييبيييييييلووووووووود !
المشكل عمّي مولود ما بانْشْ.
هي هاديك واحد فيهوم شدْ خويا حسنْ وقالْ ليهْ : أرى لفلوسْ اللّي عندك
خويا حسن كانت عندو 4 دورو
_ ما عنديشْ
_ وْهادي ما تحشَمْشْ وتكدبْ
_ وانت ماتَحْشَمْشْ وتسرقْ
فاشْ جا يضربْ خويا حسنْ ، جا عمّي هازْ زرْواطة كبيرة وانْزلْ بيها على راسْ اللّوّلْ
آه يا خّوتي دمّو سالْ كي الوادْ
تمْ تَمْ طاحْ كي لخروف المدبوحْ.التاني شدّاتو الخلعة بْغى يهربْ.
عمّي رْمى الزرواطة ونقّزْ عليهْ وطاحْ عليهْ بْحالْ شي حجرة كبيرة.منْ بعدْ بْدى عليه فالبونية والرّيسانْ حتى خونا بالله بْقى يْشوفْ النْجومْ فالنهارْ
مساكين اوّلْ مرّة شفّوني هادْ الجوج اللّي من دون شكْ ما عمرو كانو غادي يْرحمونا لوْلا تدخّلْ عمّي مولودْ


الى اللقاء مع الحلقة رقم 12 مع الأجزاء التالية

حوميدي وألعاب الطفولة
حوميدي ولحلاقي
حوميدي شْرى لو بّاهْ بيسْكْليتة (دراجة)


















 

Houmidi59

::الفارس المغربي ::

غير متصل
#26
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير
الحلقة رقم 12 مع الأجزاء التالية


الجزء الأول : حوميدي وألعاب الطفولة

فلوقيتة ديال حوميدي الألعاب كانو على قد الحال ولكن هدا لا يمنع أن الواليد كان مْهلّي فينا .من فوق هادا كان صديق الواليد الطالياني ريزو مرّة مرّة كيهْدي لينا شي كادوياتْ .باقي عاقل واحد النهار أعطانا واحد اللعبة ديال واحد مول الطبل كتخدمو بالساروتْ.هي هاديك يبقى يضربْ فالطبلْ والطبل كيْدورْ.فالدورة ديالو كيْبانْ واحدْ لْفلّوسْ أصفر ودغيا يغْبرْ.
ولكن اللي كان يعجبني فالواليد كل راس العام كان يْجيبْ لينا شي ماسْكاتْ(أقنعة) ديال المهرجين يْموْتو بالضحك ولكن أنا وخويا حسن شْحالْ من واحد خْلعناهْ على الخصوص بالليل.
حسن خويا كانْ عْزيزْ عيه واحد بوحْنوكْ ونيفو طْويلْ.
واحد النهار حسن خْرجْ لابْسو وكانْ دايزْ الزيكو (واحد لحمق) والله الى الزغبي شدْ رجليه وهْربْ كي لقْنية مينْ تشوف الصيادْ.
كي ما قلت الألعاب كانو تقريبا من الصنع ديالنا .مثلا كنّا ناخدو علب السردين وناخدو سلك طويلْ ولغْلاقاتْ ديال المونادا (السّيدادا) ونصنعو سيارة وبالطبع كنّا نْجرّوها بخيط طويلْ.
كنا ناخدو بْناواتْ(إطارات مطاطية) قْدامْ وباستعمال سلك بْحالْ اللي عند مول السفنج باشْ نْدوْرو الرْويضة .
ولكن لوقيتة الزينة هي ديال الكرّوسة .كنّا نصنعوها بلْخشَبْ والرولْماتْ (roulement)كنشريوْهومْ من عند هادوكْ اللي يْبيعو أجزاء السيارات
الصراحة كانت فيهوم متعة ما يْحسْ بيها غير اللي يكون راكب من فوق هاد الكرّوسة.للأسف كانو هاد لكْراريسْ كيْسبّو لينا حوادث كثيرة ولكن الحمد لله ربّي نجّانا من الموت مرّاتْ ومرّاتْ.
بالنسبة للألعاب الجماعية كانو ألعاب حسب الفصول .مثلا بعد العيد لكْبير كنا نستعملو لعْضامْ ديالْ مفاصل الخروف باشْ نلعبو بيهوم لعبة الزّوزْليطْ (les osselets) وكنا نلعبو لعبة "لبّاطْ هدي كانت معروفة فالمغرب عبارة عن 5 ديال الحجْراتْ وفيها المهارة حيت فاللّولْ كترْمي وحدة وتبْدى تْهزْ بالوحدة ومن بعدْ بالجوج وبالثلاثة وفالخّر تْهزْهومْ كاملينْ دقّة وحدة
كانت أيضا اللعبة الشهيرة دينيفْري .هادي فيها تقريبا غير السْبْرينتْ (sprint ) ما كاينْ غيرْ اجْري عليا نجْري عليكْ.
ولكن اللعبة اللي كان بنادم ياكول فيها لعمود هي لعبة الكنز.جوج فْراقي في صراع .الفرقة الأولى كتْخبّي كنزْ وتحاول تهربْ.الفرقة التانية كتْقلّبْ على أعضاء الفرقة الأولى.المهم الى شدّو شي واحد يْوكْلوهْ لعمود باشْ زعما يْورّيهوم فين راهوم مْخبْيينْ الكنز.بالطبع الأغلبية ديال هادوالمشْدودين كانو يصبْرو للعداب وما يمكنشْ يْبوحو بمكان الكنز
أنا وخويا حسن شْحالْ من واحد سلّينا لو لْسانو ورجَّعْناهْ يخبّرْنا بمكان الكنزْ غير بْشي لْعيباتْ كنّا نقراوْهومْ فالكتب المصوَّرَةْ اللي كان الواليد يشري لينا.
باقي عاقل كان عندنا قطْ وكان مسكين هاد القط كيلْحسْ بزاف أي واحد يْقرّبْ لو يدّو .
أنا وخويا حسن مينْ نْشدّو شي واحد من هادوك اللّي زعما خبّاوْ الكنز.كنْحيْدولو صبّاطو وكنْجيبو المشْ
هاد المشْ يبْدى يلحسْ فرجلينْ خونا بالله.اوى مسكين يعْيى ما يضحك حيت كيْجيه الهَرّان.ما يْفيدو مسكين غير يقول لينا فينْ راهومْ مْخبْيينْ الكنز
من الألعاب اللي كانت تعجبني هي لعبة كاما .هادي كنّا نلعبوها بكرة صغيرة تسمّى التّينيسة .كل واحد يْشد قُنْتْ وخاصّكْ بالكرة تْقيسْ شي واحد يخرج من لبلاصة ديالو .المهم كانو جوج فرقات فرقة ترمي الكرة والفرقة التانية ما خاصْهاشْ تْقيسْها الكرة
لعبة أيضا جميلة ورائعة هي لعبة سرْجو عْوادكوم.هادي زعما كل واحد يركب على ضْهرْ صاحبو ويغمّضْ لو عينيه.الشافْ ديالْ هادوكْ اللي راكْبينْ يْعيّطْ على شي واحد من صْحابو اللي راكبين .ينزل من الفرس ديالو ويمشي عند الشاف .إمّا ينْغزْ الفرسْ او يضّرْبو.من بعد يرجع باشْ يركب العود ديالو.
شي شوية الرُّكّابْ كاملين ينزْلو من لعْواد .هي هاديكْ نْسَوْلو الفرسْ ديالْ الشّافْ شكون اللي زعما نغْزو أو ضربو ؟
خونا بالله باستعمال الحيلة او شي إشارة مع أفراد الفرقة ديالو باشْ يكتشف شكون مولْ الفَعْلة
لعبة أخيرة هادي كانت تقريبا ثقافية .كنّا نجتامعو على شكل دائرة ونكونو جالسينْ.نتافْقو على موضوع معيّنْ أو كلمة .مثلا نختار سيّارة .المقصود هو أن كل واحد فينا يختار جزء من مكوّنات هاد السيارة : عجلة ، مقود ، باب خلفي ، لفْرانْ (frein) بارْ بْريزْ او بارْ شوكْ (pare-brise ou pare-choc) .من بعد نُنادي على واحد يْكونْ بعيد علينا حيتْ ما خاصّوشْ يسمع للْإخْتيارات ديالنا.ها الجملة اللي يسمع : هرّسْنا طوموبيلا، آشْ تختارْ ؟
هو مثلا يقول : أجي آلْرْويضة.
اللي يكون أختار الرويضة يْجي حتى لْعندو ويْهزّو على ضهْرو حتى المكان فينْ راحْنا مجموعين
بالطبع بعض المرات الأجزاء اللي يْعيّطْ عليها خونا بالله ما تكونْشْ .لهادا خاصّو يدكر بزّافْ الأجزاء ديال السيارة حتى يلقى اللي يمكن غادي يْجي باشْ يْهزّو على ضهْرو
الصراحة كانت ألعاب فيها اما الذكاء أو الخيال وحتى المغامرة وبالطبع الأغلبية ديالها فيها شوية العنف
بالنسبة لبنات اللعبة المفضلة ديالهوم هي لعروسة او الزوجة الصالحة كانو لبنات ديما كيحلمو باللي راهوم متزوجات وعندهوم دارهوم وبْناتهوم.هْنا كانو يعتامْدو على لوْلادْ باشْ زعما تنجح اللعبة ديالهوم.
ولكن سبحان الله ما كان فينا لا تحْرامياتْ لا سوء نية.تصورو هاد اللعبة كانت توْقع في جو أخوي.

الجزء الثاني : حوميدي ولحلاقي فالجوطية

حوميدي كانو عْزيزينْ عليهْ لحْلاقي بزّاف .باقي عاقل كنت نمشي مع صاحبي عبدلي وصاحبي بونور ومن بعد مع ادريس التّوبيسْ باشْ نتفرجو على لحْلايْقية فالجوطية.
كانو صْحابْ الكصبة بْحالْ عبد الله المكانا وأحمد ليو والتينيساني .هادو كانو يْغنّيوْ قصائد خاصة على مصخوط الوالدين.ولكن اللي كان يعجبنا هوما هادوك اللي يحكيوْ قصص بحال ديال الأزلية وعنتر بن شداد.الصراحة قصص طويلة ومشوّقة.للأسف كانو يوقْفو القصة فْشي حدثْ مهمْ .باشْ زعما يْكملو لك القصة خاصّكْ أدّوَرْ معاهوم.هي هاديك الأغلبية يمشيوْ يْشوفو شي حلقة من غير هادي
كان واحد خونا بالله عندو صْنيديقة .هادا زعما سحّارْ.ديما يْعيّطْ على جوج وْلادْ.
يتكلّمْ مع اللّوَلْ:
_ اسْميْتكْ ولدي ؟
_ ابْراهيم أعمّي
_ مزيان ولدي ابراهيم .شوفْ مزيانْ هاد الصنيديقة راها مسحورة .اطْلبْ اللي بغيتي من الماكلة، يْجيكْ فالحالْ
الولد ما يعرفْ آشْ يْجاوبْ ولكن خونا السحّار هو اللي يْساعدو :
_ شوف أولدي واشْ تبغي تاكولْ البنانْ أو التفاحْ
الولد يقولْ دغيا : البنانْ حيت كانت هاد الفاكهة غالية وما ياكولْها غير اللي عندو لفلوسْ
من بعد يرجع للـتّاني .من بعد ما يْسوْلو على سْميْتو يقولْ ليهْ : انت باينة يعجبكْ التفاحْ
الولد حيتْ غادي يتبرّع ما عليه غيرْ يْوافقْ بدونْ تردد
هي هاديك يْشدْ خونا بالله الصْنيديقة ويبْدى زعما يْعَزّمْ عليها ويقرى عليها شي تْخرْبيقْ.شي شْوية يقول للجمهور : هاد الصنيديقة يحكم فيها جن كبير .الى ما عطيتو لفتوح ما غاديشْ يْخلّيني تْرانْكيلْ.
هي هاديك ، يقولْ لينا :
اللي ما رْفعْ يدّو ادْعيتو لله .
كاعْ اللي فالحلقة يرفع يدّو.
من بعد يقول لينا : ضربو اليد ليمْنى على ليسْرى وكولو ها سْوارتْ الربحْ
كاع الجمهور يْردْ : ها سْوارتْ الربحْ
من بعد خونا بالله يدخل فالمعقول : انا جيتكوم طالب ضيف ربي.كنعرف لوجادة ديما مّالينْ الخيرْ.واشْ قابْلينْ أضّيْفوني؟ كولو قابلينْ
الجمهور يْردْ : قابْلينْ
السحار يزيد فكْلامو : بْغيتْ واحد فيكوم يقول لي هاكْ درهم أو 10 دورو أو 100 دورو ياداكْ المسكين باشْ تتعشى وتْعشّي اوْلادكْ.اللي دارْها ياربي أعطيه ما يتمنّى وحرّم عْضامو على جهنم.

من بعدْ يْشدْ طبسي ويْدور باشْ يجمع لحصيْصة ديالْ لفلوس
الصراحة كان يجمع تبارك الله قيمْة الجورْني ديالْ بنّايْ
من بعد يقول لينا دابا غادي نْبرّعْ هاد لوْليداتْ.يْشوفْ فاللّوّلْ : أنت ولدي باغي البنانْ .ياكْ أولدي.
_ نْعمْ أعمّي
يْشوفْ فالتّاني : ونْتْ عْزيزْ عليكْ التفاح.ياكْ أولدي
_ واهْ أعمّي
يشوفْ فينا : مزْيانْ
يْقرّبْ الصنيديقة من لوْلادْ ويقول للّوّلْ : صوطْ (انْفخْ)أولدي وقول لصْنيديقا بْغيتْ البنانْ
الولد يْعاودْ الهضرة : بْغيتْ البنانْ
يْحلْ الصنيديقة وطبعا يْخرّجْ البنانْ.
_ هاهي أولدي اللي طلبتي.شَدْ البنانة واصبر ما تاكولهاشْ حتى نْشوفو واشْ صاحبكْ عندو الزْهرْ بْحالكْ
_ أنت أولدي صوطْ فصْنيديقا وقولْ ليها بْغيتْ التفاح.
الولد يْعاود : بْغيتْ التفاح.
السحار يْحلْ الصْنيديقا ويْخرّجْ التفاحة ويعطيها للولدْ
ولكن اللي يوقع من بعد ما يْكونْ غيرْ مدروسْ.شي شوية قبل ما الجوج وْلادْ ياكْلو الفاكهة المفضلة ديالهوم يدخلْ شي واحد عندو بالْطو(معطف) ويقول للسحّارْ : عنداكْ التسريح باشْ تخدم هنا.
الساحر يردْ عليه : اسمح لي خويا شْكونْ أنتوما ؟
_ بوليسْ
_ اسمح لي ما عنديشْ
_ اوى خاصّكْ تخْوي لبْلاصة حيتْ ممنوع تخدم هنا بْلا رخصة
هي هاديك خونا بالله يْرد التفاحة والبنانة لبْلاصتها يعني فالصنيديقة ويجمع حْوايجو ويقول لينا : خوتي سالات هاد الحلقة .
من الذكريات ديالي مع هاد السحّار واحد النهار من الزهر ديالي أخْتارني باشْ زعما يْبيّنْ للنّاسْ البراعة ديالو ولكن مسكين ندّمتو فحْياتو.
تصورو بعد ما سوّلني على سْميْتي ، قالْ لي آشْ باغي تاكول ؟
حوميدي جاوبو فالحال : مشْماشة
_ شوف شي حاجة أخرى أولدي
_ بطيخة
_ شوف أولدي راه كاين البنانْ والتفاحْ .واشْتا (أشْنو) تختارْ
_ بْغيتْ لعنبْ
_ ما عنديشْ لعنب اولدي ولكن كاين البنانْ والتفاح
_ أنا بغيتْ لعنب
الجمهور حتى هوكان فالصفْ ديالي : أعطيه لعنب ياكْ أنت سحّارْ
خونا بالله تْلفْ .باينة ما كْرهْشْ يْجيه البوليسي باشْ دغيا المجمع يتْفرّقْ
المهم خونا بالله شاف باللي راها حْماضتْ عليه وقالْ لي : شوف أولدي أنت باينة عليك دكِيْ .انا غادي نْبرْعكْ بالبنان والتفاحْ بْجوجْهم.
إوي آشْ ضْهرْ ليكْ ؟
خوكم الحوميدي كان راسو قاسح : أنا بْغيتْ لعنبْ
ولكن الفرج جا حيتْ البوليسي الغريبْ جا ونقْدو من الموقف الحرج

الجزء الثالث : حوميدي والدراجة الهوائية
واحد النهار جابْ لينا الواليد 3 ديالْ البيسْكْليتاتْ .وحدة ليا والتانية لخويا جمال والتالتة لخويا حسن.تصورو أننا الوحيدين فالدرب اللي عندهوم بيسكليتة.
المهم كنّا نتْساراوْ بيها فالزناقي والدروبا بْحالْ شي واحد عندو BMW .كانو مْساكينْ شي صْحابنا يطلبو منا دورة ولكن مساكين غير يْركبو عليها دغيا يْطيحو .
خوكم الحوميدي ما تعلم يركبها حتى راسو تْشقّفْ ويدّو وْرجْليهْ سالو بالدمْ.
واحد النهارْ باقي عاقل كنت فالدراجة راكب .فْواحد الدّورة اصْطادمتْ مع سيارة .مول السيارة شافني باقي صغير ، خْدالي الدراجة بعدما صْفعني في وجهي ومْشى بعدما خلّاني نبكي.ديك لوقيتة كان في عمري يمكن 10 أو 11 سنة.
رْجعت للدّارْ وشافتني الواليدة نبكي .بعدما اخْبرتها قالتها للواليد غير دْخلْ للدار.
الواليد كان بوليسي مْحنّكْ .ما تْكلّمْ مْعايا ما قالّي والو .
مع الربْعة رْجع للخدمة بْحالْ الى ما كاينْ والو.
المهم فلعشية مع السبعة مين رْجعْ جابْ مْعاهْ الدراجة ديالي.الصراحة ما تيّقْتْشْ تكون ديالي ولكن هي حيتْ كنّا فْديكْ لوقيتة نْمْشيوْ عند السّيكْليسْتْ باشْ يْصاوبْ لينا بْلاكة مكتوب فيها الاسم والعنوان ديال مول الدراجة
من بعد عرفت باللي الواليد ديالي سحّار كبيرْ حيتْ هو قْدرْ يْخرّجْ بيسْكْليتة من مدينة كبيرة بْحالْ وجدة بْلا ما نعطيه حتى معلومة.
دازت يمكن 4 ديال السنوات وعرفنا أن الواليد اتّاصل بواحد من المخْبرين ديال الشرطة كان معروف بْلعْضمْ.هو اللي تْكلّفْ وجابْ الدرّاجة حتى للكوميسارية


إلى اللقاء مع

الحلقة رقم 13 من مذكرات الطفولة : اعترافات حوميدي الصغير


الجزء الأول : ليلة 27 كان فيها الدجاج ولكن مسّوسْ

الجزء الثاني : خوكم حوميدي شْرى كتاب ديال السحر

الجزء الثالث : دارْ الشيخ وقادة وخاصة الكاراج ديالها ..واهْ يا خوتي
 

Houmidi59

::الفارس المغربي ::

غير متصل
#27
رد: مذكرات طفولية : اعترافات حوميدي الصغير


الحلقة رقم 13 من مذكرات الطفولة : اعترافات حوميدي الصغير


الجزء الأول : ليلة 27 كان فيها الدجاج ولكن مسّوسْ


يوم 26 من رمضان المبارك يمكن أحسن يوم في حياة الأطفال بعد العيدين : عيد الفطر والعيد لكبير.هاداك اليوم كاينة حركة كبيرة ورواج كبير فالسوق.حْنا الاطفال ديال ديك لوقيتة كنا نحسّو بسعادة كبيرة وكُلْنا صايْمينْ النهار اللي غادي زعما تفْتح فيه السْما.الوالدات ديالنا يشريوْ الجاوي ولبخور ومن الصباح يْطيبو الطعام (الكسكس) مع فقط الحمص والزبيب.أما الوالدين كانو يشريوْ لينا الكسوة الجديدة ديال العيد.
الى مْشيتو لقبور حتى هي مْنوْرة النهار كلّو بالزيارات ديال الناس اللي باغيين يتْرحمو على الموتى ديالهوم .يا الله فاشْ تدخل يْقربو منّكْ شي وْلاد صغار فْيدْهومْ بيدو (سطل) من الحديد باقي فيه ريحة الزيت ويقول ليكْ : عمّي (أو عمْتي) واشْ نسقي لك لقبرْ؟
ما تسمع غير القرآن في كل جهة .الصراحة انا شخصيا كنت نلقى راحة وطمأنينة مين نمشي رفقة الوالدة باشْ نترحمو على قبر جدي وقبر أختي الصغيرة نادية.هاد الأخت مسكينة ماتت وفعمرها عام وشي شْهورا بعدما قاستها حمّى .هاد المرض الله يستر باقي عاقلْ على سميتو "مرض فاس " اللّي تْصابْ بيه وعلى الخصوص الرُضَّعْ تْجيهْ سخانة كبيرة توصل حتى ل45 درجة وكانو الأغلبية يْموتو.
غير يودّنْ المغرب ونفطرو تلقى الزنقة نايضة فيها الحيحة .أصحاب الدرب خارجين وباينة عليهوم الفرحة.مع آذان لعشى ، الجامع يعمر بالمصليين باشْ يْصلّيوْ التراويح.شي شْوية ، لعْيالات هازّينْ الطْباسا ديال كسكسو وداخلينْ بيهوم للجامع.خوكم الحوميدي وأصحابو واقفين حْدى البابْ كيحسْبو البركة اللّي داخلة.سبحان الله كل طبسي وريحْتو.
المهم يدخلْ سّي عمر .هادا واحد الاستاذ كيْحدّتْ فالجامع ديالنا.هي هاديكْ يقول لينا بكل عفوية : أوليداتي خاصكوم تْصليوْ وتحْيِيوْ الليلة راها مباركة وخير من ألف شهر.أحنا حيت كنحتارمو هادْ العلاّمة ندخلو ونبْداوْ فالصلاةْ مع الجماعة ...ولكن بالنا غير مع الطْباسا ديالْ الطعام اللي داخلة للجامع.
آهْ يا خوتّي كل ما نتفكّر هديك اللحظات نستغفر الله على ودّاشْ كنّا نلعبو بدل ما نصلّيوْ بخشوع.تصورو وحْنا ساجدين باركين
فالهضرة :
_ حميد خَيَّسْ (انظرْ) على طبسي
_ واه ولكن راهْ مْغطّي
_ هادا فيه دجاجة كاملة
_ واهْ واشْ كاين شي واحد زعما يْحط دجاجة فطبسي ديالْ
الطعام ؟
_ اوى نتْراهنو ؟
_ واخّا نتْراهنو
_ شوف الى فيها دجاجة بصدرها ورجليها غادي تخلّصْ علي غدّا بْلاصى فالسينيما
_ وانت تعطيني 2 دراهم
_ متّافقين
هاد الحوار كان يْدور بيني وبين صاحبي ادريس التّوبيس وفقطْ غير فالسجدة حيت هي الفرصة اللي يمكن ليا نتكلم مْعاه بْلا ما يْعيقو بنا.
المهم دازو شي ركيعات وصاحبي ادريس مْشى لطَبْسي ورجع دغيا يْغوَّتْ :
_ حميد الدجاجة طارتْ
_ ما يمكنشْ ربما ما كانتْشْ الدجاجة كاينة فالطبسي
_ والله الى كانت والدليل باقيينْ ليتْراسْ(les traces) ديال صدرها ورجليها ومنْ الفوق راني شمّيتْ ريحة الدجاجْ
_ اوى ياكْ ما غطْساتْ فوسط الطعامْ
_ حميد ما تْمهْبلْشْ(ماتكونش أحمق) .هادا خْداها شي واحد
_ شكون اللي يْكونْ خْداها ؟
وقفنا من الصلاة وحْنا نفكْرو بالمعقول فهاد الدجاجة اللّي غبْراتْ حْدى عينينا.
شي شْوية خرجنا من الجامع .لقينا شي واحد من أصحابنا يضحك .غير شافنا قرّبْ منّا : عرفتو ، راكو منّعتو واحد المنْضَرْ شحالْ واعرْ
اوى هو يحكي لينا : شفت بْعينيَا هادو" بونور" خارج من الجامع فْيدّو دجاجة وكياكول فيها.غير شافني دغْيا سْلتْ وغْبرْ فواحد الزنقة مضْلامة.
_ فينا هو دابا ؟
_ مْشى من هادْ الجهة
_ أجيوْ نلحقو عليه
فعلا دخلنا مع الزنقة المضْلامة ولقينا خونا بونور يتْكرّعْ
_ آشْ كدّيرْ فالضْلامْ أداكْ الحلّوفْ
_ والو غيرْ كنت نطلب ربّي باشْ يرحمني
_ وأنت يا عدو الله رْحمتي الدجاجة اللي تْكرفصْتي عليها
خونا بونور دايرْ راسو ما فاهم والو : الدجاجة ؟ أنا ما شفت دجاجة
_ شوف بلا كْدوبْ راحنا شفْناكْ تْمرّشْ فعْضامها
_ والله الى غير لكدوب
واحد من أصحابنا جْبدْ لو من جيبو فْخدْ ديالْ الدجاجة : وْهدا فخدْ ديالْ الدجاجة ولّا عَكّازْ ؟
خونا بالله شاف راسو باللّي حْصلْ : إيه راكو تْكلمو على ديكْ الدجاجة اللي لْقيتها مرْمية فالطريق..
ضْحكْ باشْ يبيَّنْ لينا باللي هو مسكين ما عندو حتى علاقة مع سرقة الدجاجة
_ هاديكْ الدجاجة مسّوسة
من ديكْ الليلة خونا بالله رجعْ لو لقب تعْرفْ بيه هو الدجاج المسّوسْ


الجزء الثاني : خوكم حوميدي شْرى كتاب ديال السحر


شي وْقيتة خوكم الحوميدي كان يتعاطى السحر بعد ما شرى كتابْ ديال واحد الفلكي اسْميْتو الطّوخي.هاد السحّار كان كاتبْ شي وصفاتْ الصراحة كانت تْبانْ ليا ساهلة.
واحد النْهار قلت لصاحبي ادريس : خويا ادريس راني لْقيتْ واحد العزيمة باشْ نرد بيها أي بنتْ تبقى تبغيك وتموت عليكْ
صاحبي ادريس عجبو الحال : واش راك بْنيْتكْ خويا حوميدي
_ سير جيبْ تفاحة وْ أجي تْشوفْ
_ أخويا التفاح غالي .الى خْديتْ تفاحة غادي الدّارْ يْعيقو بيا
_ اوى خويا الى باغي تكسبْ لقْلْيَبْ ديالْ خديجة جيبْ التفاحة
صاحبي ادريس شافْ فيا مبهوضْ : واهْ باشْ عرفتي باللي راني كنحماقْ على خديجة ؟
_ راني درتْ العزيمة ولْقيتْ باللي هي اللي دّاتْ لك عقلكْ
_ واشْ ضروري تفاحة ؟
_ سيرْ دغيا جيبْ التفاحة .شوفْ هاهي خارجة تلعب مع خوها الصغير.
فعلا صاحبي ادريس دْخلْ لدارهوم .شي شْوية رجعْ واعطاني تفاحة شوية مضْروبة :
_ واه أصاحبي ما لْقيتي غير هاد الدّيشي ديالْ التفاح
_ اسمع الله يخلّيكْ أنا باقي ما تايقْ فهاد السحور ديالك
_ واخّا غادي تْشوفْ.أرى التفاحة
هي هاديكْ دخلت للدار .جْبدْتْ واحد اليَبْرةْ (إبرة) وغمّسْتْها فالسْماقْ وعن طريق الغرزْ ديالها فالتفاحة كتبتْ " بَدّوح سْمهنونْ حبّي يْكونْ"
شي شوية رْجعتْ عند صاحبي المغروم : هاكْ أخويا ادريسْ .سير عند لالّاكْ خديجة وقدّمْ ليها التّفاحة
_ ولكن أخويا انا ما نقدرشْ نعطيها ليها.ها العار الى ما أنت تعطيها ليها
_ أصاحبي أعطيها ليها أنت باشْ أتَّغْرَمْ بيكْ
_ أخويا أنا ما نقدرشْ
_ واخّا .أنا غادي نعطيها التفاحة فبْلاصتكْ
فعلا مْشيتْ عند خديجة .كانت تلعب مع خوها الصغير.هادا خوها مسكين مريض ما يتكلم ما يسمع.مسكين ديما رْيوقو سايْلينْ.
_ بونْسوارْ خديجة
على فكرة خديجة فَكانْسية (زْماكْرية ) وتتكلّم تقريبا بالفرنسية
_ بونسوار
خوكم الحوميدي عندو مع الفرانسوية من بكري.قلت ليها :
_ بْغيتْ نهْديكْ هادْ التفاحة .واشْ تقبْليها منّي
شافت فيا وابتاسماتْ : أووو أنتَ ضْريَّفْ .شكرا
المشكل أنها خْداتْ التفاحة وأعطاتها لْخوها .صافي قفّرْناها .منْ دابا شْوية هادْ المعوَّقْ غادي يرجع يتكلّم ويقول ليا : أحبّكْ
دَغْيا حيّدْتْها لو من فمّو :
_ شوفي يا آنسة هادا ماشي من الأدبْ.أنا عْطيتْ لك التفاحة ليكْ ماشي لْخوكْ
_ ولكن أنا ما يعْجبْنيشْ التفاحْ.
_ الى كنت عْزيزْ عليكْ غضّي غير عضّة وحدة
خوكم الحوميدي كان مْقزدرْ.ولكن واخّا هكْدا كنت نتْوقّعْ جوجْ حْوايجْ : إمّا غادي تضربني بالتفاحة أو تبْزقْ عليا.
صافي غمّضْتْ عينيا.
شي شْوية قالت لي ها نا كْليتْ النّصْ ديالها وْدابا واشْ نقدر نعْطيها لْخويا مصطفى.
شفْتْ فْخوها مصطفى وقلت لو بالعربية : خويا صطّوفْ الى خْتك تْغرْماتْ بيا راكْ تْسالْ كلْ نهارْ تفاحة
المهم بقيتْ مع خديجة يمكن ساعة أو أكثر وحسّيتْ بالسعادة معاها .شي وْقيتة سْمعتْ حسنْ يْعيّطْ علي : حميدْ كالَتْلكْ الواليدة سيرْ جيبْ الخبز من الفرّانْ
الحوميدي كان ديما مطيع للواليدة ديالو .هي هاديكْ ودّعْتْ خديجة.
اللّي وْقعْ ما كانْشْ فالحسبانْ.خديجة شدّاتْني من يدّي وقالتْ لي : عافاكْ الى ما ترجع دغيا راني ما سْخيتشْ بيكْ.....راهْ عندي واحد الهضرة بْغيتْ نقولها لك .
صافي حكمة الطوخي أعطاتْ المفعول ديالها.دابا واشْتا غادي نجاوبْ ادريسْ التوبيسْ؟
خويا ادريسْ بانْ ليا يشْطح بالفرحة .غيرْ قرّبْتْ منّو قالْ لي مسكين: حوميدي راها شافتْ فيا وابتاسماتْ لي
_ شْكونْ ؟
_ أصاحبي مالكْ مْدوّخْ .خديجة لحبيبة ديالي
خوكم الحوميدي مْشى يْجيبْ الخبزْ من الفرّانْ .
فاشْ كنتْ راجع لْقيتْ ادريسْ باينْ عليهْ الحزْنْ.وجهو بْحالْ الى كْحالْ وعينيه غادي يخَّرْجو منهوم الدموعْ
_ مالكْ أخويا ادريس غير دابا شْوية كنت فرحانْ
_ خديجة تموتْ عليكْ أنت ماشي أنا
هاد الزغبي شَفْني .بغيتْ نكدبْ عليه ولكن والو خونا بالله متْأكَّدْ:
_ شوف أخويا حميد راه الهضرة كانت غير عليكْ.
شوفْ راها تحْماقْ عليكْ
شدّيتْ صاحبي وضْربتْ لو فْكتفو وقلتْ ليه: خويا ادريس راها لافوطْ ديالكْ.راني قلت لك خاصّكْ تعطيها التفاحة أنت بْداتكْ ولكن ما بْغيتيشْ
ادريس باغي خديجة باشْ مّا كانْ :
ساهلة خويا حميد.غادي نمشي دابا ونْجيبْ تفاحة كبيرة.يا الله ديرْ فيها بركة الطوخي وهادْ المرة والله حتى نعطيها ليها.غادي تْشوفْ
_ خويا ادريس راه ما عندكْشْ الزْهرْ.
ادريس هاد المرة غوّتْ : وعْلاشْ ما عنديشْ الزهر ؟
_ برّدْ أصاحبي راها ما تبغيشْ التفاحْ
_ اوى كاينْ شي حلْ؟
_ كاينْ.سيرْ جيبْ ليا بنانة
_ بْقى هْنا غادي نمشي جوج بناناتْ ماشي وحدة
_ عنداكْ يْعيقو بيكْ الدّارْ
_ أخويا غير يْعيقو أنا باغي حبّي خديجة
اللّي كانْ أن خوكم الحوميدي دارْ العزيمة على البنانة وأعطاها لصاحبو ادريسْ.
فلعشية جا عندي ادريس وقال لي : خويا حميدْ .الحكمة ديال الطوخي ما زال ما خدماتْ
بْقيتْ نْصبرو : شوف صْبرْ شوية .بْحالْ البرد هادْ الليلة غادي تْجي عندك وتفرعْ البابْ وتقولْ لك : بْغيتكْ أحُبّي
_ لّا أخويا واشْ بغيتي الواليد يْجرّي علي من الدارْ
_ اوى اصبر واسكتْ
من بعد خديجة رجعاتْ لفرنسا واحد النهار وما رجْعاتْ حتى دازتْ سنوات (يتبع في ما بعد)



الجزء الثالث : دارْ الشيخ وقادة وخاصة الكاراج ديالها ..واهْ يا خوتي


دار الشيخ وخوه قادا.هادو جوج ديال الشخصيات من أغرب ما في هاد الدرب.اللّول يا الله في عمرو 8 ديال السنوات وكيْديرْ فْعايلْ الشيطانْ.يدخلْ لْشي دارْ بْلا ما يْعيقْ بيه شي حدْ ويسرق اللّي بْغى .الحمد لله كان الاختصاص ديالو هو القسْ (الماكلة) .شي مرة عاودنا شي واحد كان دخل لْشي دارْ والمشكل ما صابْ فينْ يَتْخبّى .ما لقى غير الثلّاجة وسدْ على راسو فيها.من زهرو شي واحد حلْ الثلاجة .كان خونا بالله يلْقاواهْ رْجعْ بولو (polo)
هاد المسخوط من كترة المناوشات ديالو مْشاتْ لو عينْ ودارْ فبْلاصتها حجرة.كانْ يْخوّفْ بيها حتى الناس لكبارْ
خوه قادا هادا كان أكبر منّو ب3 سنين.هادا كان اللّي لْقاها يْبيعها وكان اختصاصي فلقْوادس ديالْ الديور والسلك ديالْ الضو.شْحالْ من مرّة كْلا لعصى ولكن ديما خوكم طبيعتو لقوادس والسلك ديال الضّو
هاد الجوج كان عمّهوم يْسدْ عليهوم فالدّارْ باشْ ما يخرجوشْ للزنقة.هي هاديكْ لْقاوْ الحيلة باشْ زعما يقدرو يسلتو برّا.
طلبو من أصحاب الدربْ كل عشية مع لوقيتة ديال المغرب.نْجيبو لحجر ونضربو على فورْ جهدنا الكاراج.هادا كاراج ديال الرّيدو .الحجرة مينْ تقيسو تسمع صوتو على بعد مئات الأمتار .ياخوتي مين نسمعو الصوت
ZZZZZDRRRROUMMMMMMMMMMMMMMMM

نطلْقو رجلينا للريحْ .وا جْري وتْكولْ ما جْريتْ.شي شْوية يخرج الشيخ وْخوه قادا زعما كيقلبو على اللّي فْرعْ الكاراج او هوما يْغوْتو : أجيوْ يا وْلادْ لحرامْ .فينْ مْشيتو ؟
فعلا يلحقو بينا ويبقاوْ يلعبو معانا حتى لْديك التسعة ديالْ اللّيلْ.

يتبع غدا الحلقة رقم 14

الجزء الأول : حوميدي ودْعاوي المصلّين على أصحاب الدرب
الجزء الثاني : مين عمّي ادريس الدّيواني خرج لينا بالشطّابة
الجزء الثالث : الزعيم يبيع الحلوى فصْنيديقة

 

bouchaib56

::مراقب مغربي ::

غير متصل
#28
رد: مذكرات طفولية : اعترافات حوميدي الصغير

المهم خونا الحوميدي ادخل الى مدرسة الرهيبات وتأثر باللغة الفرنسية
أما هويته الدينية لم تزحزح رغم ظروف ذلك الوقت والاغراءات بالملابس والنقوذ
واشارات الصليب
وهو مسلم على المذهب المالكي ككل المغاربة قاطبة
لوكان غيره لانجرف مع الكنسية بحثا عن أوراق الاقامة بأوروبا
والعياذ بالله
وماهذه خصلة من خصال حوميدينا


:36_1_30::36_1_30:


الله يقتلنا في طاعة الله ورسوله
 
التعديل الأخير:

Houmidi59

::الفارس المغربي ::

غير متصل
#29
رد: مذكرات طفولية : اعترافات حوميدي الصغير

الحلقة رقم 14 : حوميدي وفْعايلْ لبراهشْ

الجزء الأول : حوميدي ودْعاوي المصلّين على أصحاب الدرب

دعوة المضْلومْ راها مستجابة ومول الفعلة يلْقاها يلْقاها واخّا يكون غير برهوش صغير بْحالْ حوميدي.الصراحة كنّا نْديرو شي فْعايلْ ديال الشيطانْ.واشْ عن قصد أو غير قصد ؟ الله أعلم.اللّي كاينْ هو أن أصحابْ الدرب جاتْهومْ فكرة جهنمية .هاد الفكرة هي نْقصرو على المصليين ديال الجامع وعلى الخصوص لقْروشا (الناس لكْبارْ فالسن) حيتْ هوما مساكين ما يْعيقوشْ دغيا.شوفو يا خّوتي التاشيطانيتْ ديال لبراهشْ ديالْ ديكْ لوقيتة
كنّا نمشيوْ للجامع مع لوقيتة ديالْ المغرب.هي هاديكْ ندخلو للمراحيض باشْ نْقومو بالعملية ديالنا.كلْ واحد فينا يْعمّرْ سطل بالْما ويْحطّو من فوق الباب ديال المرحاضْ.
خاصكوم تعرفو ان بيبان المراحيض مصنوعين بْلخْشبْ وماشي عاليين بزاف ومن فوق هاد الشّي كاين واحد السْقيفة من الحيطْ عالية على كل باب.اوى حْنا كنا نْحطّو السطل باشْ نْكاليوْ الباب مع السقيفة.بطبيعة الحال السطل ما غاديشْ يْبانْ.
يا الله اللّي غادي يْحلْ البابْ يطيح عليهْ السطل نيشانْ
آه يا خّوتي شْحالْ من مصلّي مسكين ما بيه ما عليه حتى لقى راسو غارق فالما وماشي زعما شي وحدين لْقاوْ راسْهومْ لابْسينْ كاسْكْ (السطل)
لخّوت ردّوها عادة وبْقاوْ مع لوْقيتة ديالْ المغرب يْوجْدو السْطولا.شي مساخيط كانو يْديرو راسهوم يتْوضّاوْ باشْ يْشوفو اللّقطة مباشرة على الهواء
كانو مساكين هادْ لقْروشا (المسنّينْ) يدخلو بعض المرات للمسجد وهوما كولهوم سايْلينْ بالما.كانو شي وحدين يمكن ما بْقاوشْ يمشيو للمراحيض باشْ يتوضّاوْ
الله يستر اللّي جانا من بعد ما يْكون غير غضبْ من عند الله.
فعلا واحد النهار على حسب لكلام ديال شي صاحبنا كان فالجامع كل المصليين وخاصة اللّي كْلاوْ الدّقة ديالْ السْطولا رفعو فاتحة وقالو بالحرف الواحد : يا ربّي خدْ الحق من هاد الأبالسة اللّي بهدلونا وتكرْفصو علينا.يا ربّي لكّيها ليهومْ
أنا كنت الأوّل اللّي خْديتْ حقي من هادْ الدْعاوي.واحد اللّيلة ما بيا ما عْليا كنت خارج من السينيما.اللّي كانْ تْعرْضو ليا شي شَمْكارةْ وبعد ما خْداوْ اللّي عندي من لفلوسْ وشَبْعوني كَشْماطي (عمود وبونية وركل) وهرْسو لي النْضاضر خلّاوني نتوجع ودمي يْسيلْ.
فالدار الوالدة تْخلْعاتْ وطبعا مْشينا للمستعجلات باشْ نتْعالجْ.
الثاني هو واحد الصديق ديالنا .فداك النهار حتى هو وقعاتْ ليه حادثة.كان فالدراجة ديالو وْصدْمو كاميو.الدراجة ما بقى فيها ما يتْشافْ ، هو تْهَرَّسْ من رجليه.
الثالث هو الأخ ديالي جمال .هادا مسكينْ غي فالغد ليهْ دْخلْ فيهْ بنّايْ كانْ هازْ مادْرِيَةْ (قطعة من الخشب كيستعملوها في البناء).الضربة الله يستر جاتو فلوجه الحمد لله بعيدة على العين ولكن فمّو مسكين ولّى فيه تقبة كبيرة حتى سْنانو تقريبا بانو كاملين.




مرة أخرى مْشاتْ الواليدة وأدّاتو للمستعجلات وخيْطوه بْشي 30 غرزة.
جمال تْعدَّبْ فايتة 3 شهورا.
واحد خونا بالله سْميْتو مراد .هادا كان ديما كينْفخْ في صدرو.لاعبْها زعما كبير.كان عندو صباط أكبر منّو وبيه يتعدّى على أي واحد ما يعرفوشْ.فالحقيقة كانْ فيهْ البُخْ حيت الى ضربو شي واحد راهْ دغيا يهرب ويمشي في حالاتو.على داكْ الشّي سمّيناه النملة المرعبة.
هادْ خونا بالله جاه شي مرض غريب .بدّاه بالرجفة ، من بعد ضربو بوصفّيرْ.بْقى حتى هو فلفراش شْحالْ من شهر.
واحد آخور سْميتو نور الدين.هادا عضّو كلب من حنْكو وبْقاتْ الإمارة شحالْ من نهار
المهم ما عاقلشْ على باقي أصحابْ الدرب .ما كاينشْ اللي ما تْصابْ بْشي حاجة وقعات ليه.
تفكرت واحد .تصورو الدار ديالهوم تْسرقاتْ .من زهرو هو ضربو شي شفّار بالموس .كان غادي يمشي فيها.
من بعد تْيَقَّنَّا باللي هادْ الشّي اللّي وْقعْ لينا راه دْعاوي المصليين اللّي تْكرفصْنا عليهومْ بالسْطولى ديالْ الما

يتبع الجزء الثاني غدا إن شاء الله
 

Houmidi59

::الفارس المغربي ::

غير متصل
#30
رد: مذكرات طفولية : اعترافات حوميدي الصغير

الحلقة 14 : حوميدي وفْعايلْ لبراهشْ (2)
الجزء الثاني : مين عمّي ادريس الدّيواني خرج لينا بالشطّابة
عمّي ادريس الدّيواني ما عندو مسكين أولادْ.عايشْ مع مْراتو بْحالْ المشْ والفارْ.ديما شي ينْك(g)على شي ولكن متفاهمين.هاد الكوبلْ كان محطْ الاهتمام ديالنا ولهادا حتى هوما ما سلْكوشْ من التبرْهيشْ ديالنا.
تْصورو كنّا نمشيوْ لدارو مورا صلاة العشاء على ودْ هادْ خونا بالله هو ومْراتو كينعسو بْحالْ الدجاج.غير يضْلامْ الحال يكونو مساكينْ في سابع نومة كي ما يقولو خوتنا المصريون.
نْقربو من الدار ونرجمو الباب بْلحجر .المتعة عندنا فالصوت العجيبْ اللي نسمعوه : بالعربية
ززززددددرررررررررررراااااممممممممممممممممممممممممم
بالفرنسية : zzzdddddrrrroummmmmmmmmmm
يا الله فاشْ نتخبّاوْ : الباب يتّفْتحْ ويخرج عمّي ادريس الديواني
لابسْ بيجاما وفوق راسو شاشية (طربوش) والمضحك فْيدّو شَطّابة.
خونا بالله يعْيى ما يْشوف ما يْبانْ ليهْ والو.هي هاديك نسمعوه يْغوّتْ :
_ شْكونْ ؟ شْكووووونْ ؟
لمْرى ديالو حتى هي تلحقْ بيه ولكن هي شادّة يدْ المهرازْ .حتى هي ما فْراسْها ما يْعاودْ :
_ أدريسْ هادي قنبولة رْماوْها علينا الجيرانْ
عمّي ادريسْ يبتاسم ويْرد عليها :
_ واشْ هْبلتي يا مخلوقة ؟ هادي ماشي قنبولة .سوْليني أنا اللّي كنتْ فالك(g)يرّا(الحرب) .كونْ كانتْ قنبولة كونْ اللّرْضْ (الأرض)دارتْ حفرة كبيرة
الزوجة باغية تعرفْ :
_ اوى يا مولايْ واشْتا (أشنو) هاد العجبْ اللي طاح علينا ؟
عمّي ادريس ما خاصّو صْداعْ وباغي مسكين يدخلْ باشْ يتخبّى فالكاشا:
_ هادو ما يْكونو غيرْ لمْشوشْ (لقْطوطْ) يدّابزو على البيدو (الطّارّو) ديالْ الصْليحْ (الزْبل)
حْنا كنسمعو والضحك قاتلنا . هي هاديكْ نْقلْدو صوتْ لْمْشاشْ :
مْييييييياوووووووووووووووْ... مْيييييياووووووْ
شي شْوية عمّي أدريس يْشيّرْ بْيدّو لْجيهْتنا :
_سمْعي يا خْليقة ها لمْشوشْ اللّي تْكلّمتْ لك عليهومْ
الديوانية مسكينة جاها لعجبْ : سبحان الله هاد لمْشاشْ كيتمشّاوْ على رجْليهومْ بْحالْ بنادمْ
شي شوية بْحالْ تْعقّلْ شي واحد فينا ولكن ما تبيّنْشْ باللّي راها عاقتْ: اصّبْ الله ينعلْ اللّي ما يحشمْ
يتبع بعد قليل
الجزء الثالث : الزعيم يبيع الحلوى فصْنيديقة
 

Houmidi59

::الفارس المغربي ::

غير متصل
#31
رد: مذكرات طفولية : اعترافات حوميدي الصغير

الحلقة رقم 14 : حوميدي وفْعايلْ لبراهشْ (3)

الجزء الثالث : الزعيم يبيع الحلوى فصْنيديقة


الزعيم كانْ أكبر واحد فالدرب.كان عمرو تقريبا 20 عام وكان زعما هو اللّي يحكم زعما هو الآمر والناهي.كان هو المدرب ديالنا والمدافع ديالنا.
ولكن من بعد بانْ باللي هو أكبر خوّاف على وجه الأرض .كان القوة ديالو يْبيّنْها غير مْعانا حيتْ كان لكبير فينا عندو 14 عامْ.
هاد الزعيم حيت كان عندو شوية فلوس وكان يبغي يْدوّرْ النّاعورة بْشي بيعة وْشرْية ولكن هو ما يرضاشْ يْبيعْ .على داكْ الشّي ديما يختارْ شي واحد من أولادْ الدرب ويكلفو بالتجارة
باقي عاقل واحد النهار مْشى لْشي دار كانو ساكنين فيها النْصارى .هادي دار فيها حديقة كبيرة مْعمرة بالشجر ديالْ التوت.
دقْ فالبابْ .خرجاتْ ليهْ واحد لمْرى كبيرة فالسنْ.قال ليها : الله يْخليكْ أختي راها مْريضة والطبيب نصحها باشْ تاكول التوتْ
هاديك لمرى بْقى فيها الحال.أو هي تقول لو : ادخل اولدي وعمّر التوت مع راسك .
فعلا جابْ سطل كبير ديالْ الحمّامْ مْعمّرْ بالتوتْ.هاد المرة كلّف واحد صاحبنا سْميْتو قْويدر باشْ يبيعْ لو التوتْ.أعطاهْ كاسْ صغير وقالْ لو : شوف اللّي بْغى التوتْ ، عمّرْ لو الكاسْ وشدْ من عندو جوجْ دورو (ريالْ).
قبل ما يمشي نصحو : عنداك تبيع بلكْريدي.راني حاضيكْ
فعلا الزعيم يمشي ويْبعد واحد العشرة ميترْ.خونا بالله حاضي السلعة ديالو.
شي شْوية نْقربو من صاحبنا قويدر :
_ خويا قويدر الله يرحم الوالدين دوّقنا من التوت
مسكين يْشوف جيهتْ الزعيم ويْجاوبنا : ما نقدرشْ أخّوتي راه حاضيني
_ شْكون اللّي حاضيكْ؟
_ الزعيمْ
غير نشوفوه ، نمشيوْ نيشانْ عندو
_ ياكْ أخويا الزعيم أعطينا شوية توتْ
ولد اللّدينَ كان يعرف يسْتاغَلْنا :
_ غادي نعطيكوم التوت ولكن فلوسْ الماتشْ الجايْ ديالي.اوى الى متّافقينْ ، غادي كل واحد فيكوم ياخود كاسْ توتْ
فعلا كان هاد المجرم شادنا من اليدْ اللّي توْجعنا
المهم كان يمشي للمدرسة فلوقيتة ديالْ الخروج.مدرسة طارق بن زياد.خونا بالله يْبعّدْ شي شوية باشْ حتى واحد ما يْشكْ باللّي هو مولْ التوت.قْويدر مسكين كانْ يبيع اللّي كتّبْ الله.
هي هاديكْ كانْ يجمع حْصيْصة معتبرة.العجيبْ فالأمر ما كانشْ يْخلَّصْ قويدر .كان يعْطيهْ اللّي بْقى من التوتْ وفي غالبْ الأمورْ يبقى لخْماجْ ديالْ التوت.
الزعيم كانْ دْكي.كل مرة يْشوفْ شي دار ويْمتّلْ عليهوم دور الأخت لمريضة اللي خاصها التوت.
من بعد شي واحد عاقْ بيهْ وجا قالْها لينا.حْنا مْشينا نْبيعو التوت بْحالو .المشكل كان عْلينا نشْريوْ البيدو ب100 دورو والى بعْناهْ يا الله نربحو فيه 20 ريالْ.
الزعيم كان فالشْكارة ديالو بزّافْ ديالْ التّاحرامياتْ .لهادا هادْ المرة جابْ صْنيديقة وعمّرْها بالكاطو والحلوى والمسكة.هاد المرّة كلّفْ خويا جمال باشْ يبيع لو السلعة ديالو.الأخ ديالي كان معروف بالنزاهة ديالو وعدم الغش .على هاد السبابْ الزعيم تاقْ فيه ولكن لأول مرة اتّافق معاه باشْ يتْقاسمو الربح بالنّصْ.
خونا الزعيم دخّلْ حْصيْصة بهاد البيعة وشرْية ولكن الفضل كلّو فالمهارة ديالْ جمالْ
واحد النهار جمال طاحْ مريضْ والزعيم ما لْقاشْ اللّي يبيعْ لو .جا خويا حسن وقال لو : أنا نعرف نْبيعْ
الزعيم ما كانشْ يعرف هاد الأخ ديالي.فْديكْ لوقيتة كان في عمرو يمكن 8 ديال السنواتْ.
فعلا حسن بْقى يْبيع ولكن كان حلوى يْبيعها وحلوة ياكولها ، مسكة يْبيعها ومسكة ياكلْها.باخْتصار يْبيعْ حاجة وياكولْ حاجة.من بعد الزعيم عاقْ ومْشى يشْكي للواليدة ديالي ولكن مسكين الوالدة ضارتْ فيه وقالتْ لو : واشْ أنت عندك شي عقلْ باشْ تلعب مع الدْراري الصْغارْ ؟
خونا بالله بْقى هو يْبيعْ السلعة ديالو.
واحد النهار وْقع حدتْ يقتل بالضحك.حدتْ ما عمّرني ماننْساهْ
كان خويا حسن يلعب النّيبْلي (البِيْ) مع شي صحابو .كان الزعيم حْدى الصنيديقة ديالو يبيعْ كي العادة.شي شوية خرجاتْ الواليدة وعيْطاتْ على حسنْ: حسنْ ، أجي تْوصّلْ الخبزْ للفرّانْ
خويا حسن حيتْ كانْ خاسرْ وكانْ خصّو يْردْ النّيبْلي ديالو جاوبْ الواليدة : شوفي شي واحد يْوصّلْ ليكْ الخبزْ.راني مشغولْ.
الواليدة صافي كشْكْشاتْ .هي هاديك رغْباتْ الزعيمْ باشْ يْشدْ حسنْ ويْجيبو ليها.
فعلا الزعيم شدْ الأخ ديالي وسلْمو للواليدة.
الواليدة طاحت عليه طيحة وحدة وعْطاتو سلخة ديالْ المعقول.من بعد قالت ليه وْ هو مسكينْ باقي يتْوجّعْ : تْوصّلْ الخبزْ ولّى الّا ؟
حسن مسكين دموعو سايْلة ردْ عليها : نْوصلو أمّا (أمّي)
حسن هزْ اللّوحة اللّي فيها الخبز على راسو وخْرجْ قاصد الفرّانْ.فوسط الطريق ، حسن حطْ اللّوحة ديال الخبز وبْرجليه زْطم على الخبزْ وْ هوَ يْغوّتْ : ها الخبز ها الخبز ها الخبز
الخبز رْجعْ حالة ، مْعمَّرْ وْسخْ وحْجرْ وترابْ
للأسف الواليدة شافتْ اللقطة كاملة .الصراحة تْفقْصاتْ بالمعقولْ .حسن هرب والواليدة مسكينة رجْعاتْ الخبز للدّارْ.مسكينة عاودْ قادّاتو بعد ما حيْداتْ منّو لحجر والتراب.من بعد هي اللّي وصْلاتو للفرّانْ.
شي شْوية جا الزعيم باغي يْشدْ حسنْ ولكن خويا هاد المرة كان حاضي الزعيم.هي هاديكْ يْشيّرْ عليهْ بْصمّى (حجرة) جاتو الزغبي فالرّاسْ وسالْ دمّو.
الانتقام ديال حسن واعر .ما كْفاهشْ انه سكّرْ الزعيم ، مْشى خْدى حجرة كبيرة وحَطْها على الصْنيديقة .السلعة كولها مْشاتْ .
الزعيم مسكين شادْ فراسو ويبكي : رزقي ضاع رزقي ضاعْ


هذا المساء إن شاء الله الحلقة رقم 15 : حوميدي فالكوليجْ (كوليج باستور)


 

Houmidi59

::الفارس المغربي ::

غير متصل
#32
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير
الجزء الأول : حوميدي فالكوليج
حوميدي مشى للكوليج باشْ يْكمّلْ قْرايتو.باقي عاقل النهار اللّول ديال التسجيل مْشيت مع صاحبي رابح .لقينا الاعداية عامرة بالتلاميد جايّينْ باشْ يتسجلو.المهم بعدما نْقلنا فورقة اللوازم اللي خاصنا، أرجعتْ للدار باش الواليد يعطيني لفلوس.
فلعشية ولّيتْ للكوليج وفعلا تسجلت ومشيتْ نْقلّبْ عْلى سْميْتي فاللوائح.اول مرة كنكْتاشف باللي سنة الملاحظة فيها بزّاف ديال الأقسام ماشي بْحالْ المدرسة .تصوْرو كنت فاللائحة رقم 18 أو 19 .يعني أن عدد التلاميد كانو بالعرّام
بالنسبة للأساتذة الأغلبية ديالهومْ كانو نْصارى من غير الأستاذ ديال العربية والأستاذ ديال الاجتماعيات.
بالنسبة للفرنسية هاداك العام قرّاتني مادامْ بيلانْجي (Belinger).هاد السيدة بالفضل ديالها تْنَمّاتْ لي القُدُرات ديالي فاللغة الفرنسية.كنت أنا هو المفضّلْ ديالها وكنت بعضْ المراتْ كنْجيبْ ليها القصص المصورة اللي كان يشْري لينا الواليد وكانت حتى هي تْسلّفْ لي القصص ديالها.
اللّي كان يعجبني هو أنّكْ خاصكْ تتكلّم مع الأساتذة باللغة الفرنسية والّا ما غاديشْ يفهمو لكلام ديالك.ربما هذا من الأسباب اللّي جعْلاتْ المستوى ديالْنا فهادْ اللغة عالي ، ماشي بْحال هاد الجيل اللّي ما يعرفش يكتب حتى الإسم ديالو يالفرنسية.
بالنسبة للعلوم واحد الأستاذ إسباني سْميْتو بَايا (Paya).هاد المسخوط كان يتكلّم اللغة العربية بطلاقة.تْصوْرو أنه كان يفهم لكْلامْ بيناتنا ويْديرْ راسو ما قاشعْ والو.كان يبغي الدفتر ديال التلميد يْكونْ نْقي ومنْضّمْ والا يْقطّعْ لو الدفتر ويعْطيه واحد جوج صقْلاتْ (طرشاتْ) يْردّوك تْشوفْ النجوم.الحمد لله خوكم الحوميدي ما عمرو ما صفعو .عْرفتو عْلاشْ ؟ على حقّاشِْ كنت نلبسْ النْضاضر وبالطبع يقدرو يْطيحو .اوى شْكون غادي يْخلّصْ الزّاجْ الى تْهرّسْ من غيرو.
الأستاذ ديالْ الرياضيات كان طالْياني وسْميتو أرمينْغو(Armingo) .هادا اللي كان يعجبني فيه النهار اللّي يعطينّا أوراق الواجبات.هادا عكسْ الأساتدة يْعيّطْ على التلاميد اللّي عندهوم أعلى نقطة.يبقى ينزل حتى يوْصلْ للتلميذ اللّي فالنقطة ديالو واحد.
كان هاد الأستاذ ذكي مين يوْصل لْهاد لمساليينْ ، يرفع صبعو بْحالْ راهْ يقْرى التشهُّدْ ويقول لْداكْ التلميد : "لا شَغِيكَ لهُ"
بالنسبة للإجتماعيات هادا باقي عاقل عايه سْميْتو السنوسي .كان قاتلنا غير بالخرائط.واه ما كاينشْ النهار اللّي ما نرسمو فيه جوج خريطاتْ أو ثلاثة .على كل حال استافدنا منّو بزّاف فهاد الميدان.
أستاد التربية البدنية كان مدرّب سابق.تبارك الله صحيح وكْحلْ كي الفاخْرةْ .هادا حتى هو نْبدّيوْ الحصة مْعاهْ بالجْرى حتى تقْطعْ فينا النفسْ.من بعد يقول لينا : يا الله كولشي ينعس فالأرض .من بعد نْديرو شي حركات ديال الكبش مينْ يْدوزْ عليه الموسْ ماضي.
اللّي بقى من الوقت يرمي لينا كورة ولكن ممنوع اللعب بالرّجلين.
الأستاذ ديال الرسم ما باقيشْ عاقل على سميتو ولكن ما عمرو ما ننْسى أنه كانْ فنّانْ كبير وشْحالْ تعلّمنا مْعاه نرسمو لقْطوطا والدجاج ولحميرْ ولبْقرْ ...ياكْ ما كان باغينا نتْخرجو فلّاحا ؟ اوى عندو الحق ماشي المغرب راه بلد فلاحي ؟
الأستاذ الأخير هو ديال اللغة العربية والتربية الاسلامية.هادا قْريت عندو يمكن 3 ديال السنوات ومن الصدف العجيبة كان جارنا.ولكن هادْ خونا بالله كان مبْلي بالقرعة والكاسْ.ديما يْجي للكوليج خابطها بالمعقول.راه يشرح الدرس أو هو يتْمايلْ.شي خَطْراتْ نْقولو
فْراسنا : صافي غادي يْطيحْ فاللّرْضْ.
الأساليب ديالو فْشي شْكلْ.مثلا مينْ يغضب كيْقولْ لتلميد المشاغبْ : أبَابّاكْ أباباكْ.
حنا مساخيط الوالدينْ بْقينا نْعيْطولو أباباكْ.
آه يا خّوتي مين يْشدْ شي تلميد مشاغب من حنكو ويضربو مع الطابلة أو يْشدْ شي واحد من شعرو، القسم كلّو ينفجَرْ بالضحك وعلى الخصوص مين يْسمعنا جملتو الشهيرة : أنا غادي ندّيكْ فينْ تَتْربّى يا ولد الكلْبى
واحد النهار جا مسكين طافي .كان الزغبي شارب حتى ما قدرشْ يْحلْ عينيه.غير دْخل للقسم ، طاح على المكتب ونْعسْ.حْنا لْقيناها من الجنة والنّاس وبْدينا فالصْداعْ.شي شْوية جا الحارس العام وْشافْ المنضرْ .اوى اللّي كانْ فيّقْ الأستاد وْقالْ ليهْ : أستاد الى راكْ عيّانْ غير سيرْ فْحالك.
الأستاد يسْحابْ ليه شي تلميدْ باغي يْبرزْطو ، نقَّزْ عليه وْ شدّو من حنْكو وْ هو يغوّت كي العادة أباباكْ أباباكْ جيتي حتى لعندي أو باغي تتْربّى .أنا غادي ندّيكْ..........
من داك النهار المسؤولين أعطاوه التّيساعْ.
من الذكريات معاه واحد النهار كان عندنا درس على الخمر .باقي عاقل كان شاربْ شي شْوية .مسكين شافْ فينا وقالْ : عنداكو يْبانْ ليكوم راني سكْرانْ.الخمر راها حْرامْ وأنا لا أشربُ الخمرْ وإنما أشرب عصير التفّاح والعنب
زعما بْحالْ الى حْنا ما عارفينْشْ باللّي الرّوجْ كيتصْنع من العنب والويسكي من التفاح
من الذكريات أيضا هو النهار اللّي واحد الصديق ديالنا تْخبّى فالخزانة ديال القسم .هاد الخزانة كانت تقريبا ديما مْبلْعة (مغلوقة).كانو الطاولات مْحادّينْها.المهم هاد المسخوط دخلْ للخزانة وسدْ على راسو.
شي شْوية دخل الأستاد باشْ يْقرّينا.راه مسكينْ يشرح وإذا بهْ يسمع شي واحد يْعيّطْ لو "أباباكْ أباباكْ
عْيَى ما يْشوف شْكونْ .والو ! المشكل أننا متْنا بالضحك والأستاذ صافي طْلعْ لو الدم.اللّي كانْ هو أنه بْدى يْنقّز على أي واحد يْشوفو يضحكْ ويْشدّو من حنكو بعدما يسمعو العبارة الشهيرة أنا غادي ندّيكْ فينْ تتْربّى يا ولد الكلبى
انا حيتْ كنت جارو ما عمرو ما قرّبْ منّي ولكن مينْ يْشوفني نضحكْ يْهزْ راسو ويقول لي : غادي نْكولها لبّاكْ
بالطبع أنا ما كنتشْ مْسوّقْ لو حيت الواليد ما عمرو ما تْلاقى مْعاهْ واخّا راهْ جارنا
داز عام الصراحة رائع والفضل كلّو للأستاد السكرانْ.
الى اللّقاء غدا مع الجزء الثاني من مذكرات الطفولة : حوميدي داكْ البرهوشْ الصغير
حوميدي فالكوليج (الجزء الثاني)
 

bouchaib56

::مراقب مغربي ::

غير متصل
#33
رد: مذكرات طفولية : اعترافات حوميدي الصغير

جميلة تلك اللحظات في الكوليج استاذ الرياضة دخلكم سوق راسكم
استاذ اللغة الاسبانية لاشغيك له هذا كان يربيوه اتلامذكم على هاذ الكلمة
استاذة اللغة الفرنسية كتبادل معك بالقصص جيعانة هاذ الاستاذة
استاذ اللغة العربية اسكايري كانت حتى الوقت سكرانة يربح جوج فرانك
اساتذة اوربا كلهم اتناوبوا عليكم
سر في سرد قصتك راك غادي رائع امنور اونورتينا اونور منتديات المغرب بك
 

bouchaib56

::مراقب مغربي ::

غير متصل
#34
رد: مذكرات طفولية : اعترافات حوميدي الصغير

أخي حوميدي اليوم عندك اللي ابغى يشبع ضحك
فعلا من خلال اتشايطين اديالكم مع المسنين اقتلتيني بالضحك
افعايلكم مايديروها اولاد اليوم والمشكل وصلت بيكم الى اختيار المسنين المساكين لاصحة لهم
حتى المصلون ادعاوا فيكم
يالطيف افعايلكم مايديروها الشياطين
 

Houmidi59

::الفارس المغربي ::

غير متصل
#35
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير
الحلقة رقم 16
حوميدي فالكوليج (الجزء الثاني)

حوميدي نجح للسنة الأولى إعدادي بعد ما خْدى الملاحظة ديالو بامتياز.بالنسبة لهاد السنة ، كانو عندنا تقريبا نفس الأساتذة .كاين فقط تغيير فالرياضيات.هاد المرة قرّانا أستاذ مغربي باقي شاب .باقي عاقل على سميْتو سّي بومهرازْ.هاد الأستاد الله يعمّرْها دارْ.الصراحة جعلنا نبغيوْ الماطْ ولحساباتْ.
واحد النهار قال لينا : شْكون معلّم فالعربية ؟
واحد من التلاميد سْميْتو الغربي رْفعْ صبعو.
عاود تاني قالْ لينا : شْكونْ معلّمْ فالاجتماعيات ؟
غير الغربي اللّي رفع صبعو.
من بعد الاستاد قالْ لينا : شكون معلّمْ فالعلوم ؟
خونا الغربي عاود رْفعْ صبعو
المهم من بعد بانْ باللي هاد خونا بالله معلّمْ فكلْ المواد.
سّي بومهراز شافْ فيهْ وقالْ لو : أنت معلّمْ فالعربية وفالفرنسية وفالاجتماعيات وفالعلوم والفلْفيزيكْ والشّيمي والرسم والتربية البدنية .عْرفتي الجائزة ديالكْ ؟
الغربي نتْفخْ بحالْ الطاوسْ وابتاسمْ وردْ على الأستادْ : الله أعلم ولكن باينة شي حاجة زينة
سّي بومهرازْ اضحكْ وشاف فينا وْردْ عليهْ : غادي تمسح السبورة مدة شهر
خونا بالله ما كانشْ ناوي على هادي:
_ أستاذ واشْ هادا ما يستاهل تلميد معلّمْ معاكْ؟
_ ولدي ما غاديشْ نكدبك الى كنتي فعلا معلّمْ فالعربية والفرنسية والفيزياء والعلوم والكيمياء والرسم والاجتماعيات ولكن أولدي أنت قُبْ فالماطْ.
كلنا ضحكنا عليه.الغربي ما فادو غير احْدرْ راسو .
بالنسبة للسنة الثانية دازت عادية لولا واحد الأستاذ غريب الأطوار كان يْقرّينا اللغة العربية .هدا أفلس من الأستاد السكران.هادا خاطيه الشراب ولكن ما عمرو شفت متزمّتْ بحالو.تْصوْرو هاد خونا بالله كيعتابر القسم كلّو فيه النجاسة لدرجة أنه يْصلّي فوق المكتب.
بالنسبة للواجبات ما عندو غير الشفوي.هاد المسخوط كيكتب الأسئلة فلوراقي .على كل تلميذ يختار ورقة.الأستاذ يطرح عليك السؤال وانت ما عليك الا تجاوب فالحال.اللّي لاحظت عليه هو الميل ديالو للبنات.
على فكرة فهاداكْ العام اول فوج ديال لبنات جا لإعدادية باستور.فالحقيقة كل قسم فيه 4 أو 5 ديال لبنات مع تقريبا 35 تلميد .لبنات كانو محط الاهتمام ديال لولاد.
واحد الصديق ديالي سْميْتو قويدر .هادا أصلو جزائري وكان يسكن فالدرب ديالنا.
هاد خونا بالله عْشقْ شي بنت كتقرى فالسنة الأولى .المشكل هو فالسنة الثانية.خونا بالله بْغى يْعاود العامْ غير باشْ يبقى مع الحبيبة ديالو فْقسم واحد.
كان مسكين كيرسل ليها فالرسائل كل يوم.خوكم الحوميدي كان يكتب ليه الشعر باللغة العربية الفصحى.
من مغامرات هاد خونا بالله أنّه كان يبغي شي بنت ساكنة فواحد الدريبة.هاد البنت كانت قليل فين تخرج.الى خرجات غير باشْ تْوصّلْ الخبز للفرّان أو تْجيبو.خونا بالله حْفضْ الطريق ديالها.كان مسكين يمشي حْدى الفرّانْ غير هي تدخل يبتاسم ليها ويرمي ليها ورقة مطْوية هي رسالة كيعبّر فيها عن الحب والهُيامْ ديالو.بالطبع خوكم الحوميدي هو اللي كان يكتب لو كولشي.
المهم واحد النهار قويدر بقى واقف حدى الفرّان من الصباح حتى تقريبا لْوقت لغْدى .المهم خونا بالله تْقلّقْ على الحبيبة ديالو مينْ ما شافهاشْ.جا عندي مسكين حيت كنت الشاعر والناصح ديالو :
_ خويا حميدْ الباتول ما دّاتْشْ الخبز للفران
_ اوى هادي حاجة عادية.يمكن راهوم ما عجنوش الخبز.
_ خويا حميد ما يمكنشْ.هي ديما تمشي للفرّانْ
_ اوى زعما عْلاشْ ما مْشاتْشْ اليوما ؟
_ انا خايف على الباتول ديالي .يمكن راها مريضة .
_ شوفْ انا عندي فكرة : سير من جهة دارهومْ وْدقْ وهْربْ .شي شْوية غادي امّا هي تْحلْ البابْ أوْ شي واحدْ.ما عْليكْ غيرْ تْسوْلو
_ آه يا خويا حميدْ واشْ بغيتي أبّاها يقتلني؟ الله يستر دايرْ كي الحلّوفْ
_ حلّوفْ يمكن ولكن والَدْ خروفة ، ياكْ ؟
المهم قويدر دارْ بالنصيحة ديالي ومْشى جهة دار الحبيبة ولكن ما زْعمْشْ يدق.بْقى خونا بالله يمشي ويرجع.دازتْ تقريبا ساعة والبابْ يتْحلْ.
أبّاها خْرجْ.غير شافو خونا المغروم جْمدْ فبْلاصتو.
الأبْ مشى عند قويدر وقال ليه : ولدي راكْ أضّيّعْ وقتك .اليوم تْغدّينا كسكسو
بالنسبة للسنة الثالثة يعني لبْروفي(brevet) .هاد السنة كانت مميزة وفيها الجديد.
من الجديد هو أن قويدر عاود العام ولكن الزغبي ما طاحشْ فالقسم ديال الحبيبة .المشكل ما عمرو ما يْطيحْ فيه ، حيت ختنا بالله انتاقلت لشي كوليج آخور بْلا ما تعلم الحبيب.
الجديد التاني هو الامتحانات اللي أول مرة كيوقع فيها تسرب في مادة العلوم الطبيعية.تصورو هاد المادة بانت قبل ما نْدوزوها.هي هاديك قالو لينا هاد الامتحان ما غاديشْ يتّحسابْ ليكوم.غادي يعتامدو على المراقبة المستمرة.
خوكم الحوميدي كان فارع الطرح فالمراقبة .لهادا تْفائلْ بزافْ.
الجديد الثالث هو أنّ الأستاذ السكران هو اللي قرّانا السنة الثالثة ديال الإعدادي.هاد المرة كانْ يْجي للقسم خابَطْها خاصة عندما تنتصر المولودية الوجدية.
كان مسكين يجمعْ بزاف لوْراقْ وْ يصنع بيهومْ كرة ويقول لْشي تلميذْ رْمي لي الكورة وْغادي نْورّيكوم كي دار سْميري باشْ ماركا البيتْ على الجيشْ الملكي.التلميد يرمي لو الكرة والأستاد مسكين (باينا يْشوفها دوبلْ) يضربْ فْلخْوى ويطيحْ فالأرضْ.حْنا فالقسم ميْتينْ بالضحكْ.
ولكن قبل ما يْبان باللي مواد الامتحانات تْسرْباتْ وحد الحدثْ ما عمّرني ما ننْساسْ.تْصوْرو كنّا نْدوْزو مادة الرياضيات.كان يحرسنا واحد الاستاذ الله يستر ما عمّرني شفتْ شي واحد مسْمومْ أكثر منّو.عينيه الله يستر دايرين بْحالْ زوزو.الحمد لله كيلبس نْضاضرْ كوحلْ والّا راه يخلع بالشوفة ديالو.شي مرّاتْ يْحيّدْ النْضاضرْ ، راه اللّي شافو يسْحابْ ليه راه مْعاهْ دراكولا
المهم خونا بالله حارس وْحاضي التلاميدْ.
شي وْقيتة واحد خونا بالله (ولد عمْةْ الواليدة ديالي) بْغى مسكينْ ينقل من شي ورقة خرّجْها من جيبو.من سوء الحظ ديال هاد الكامبو شافو الأستاد.
اللّي كانْ هو أنه جا لْعندو نيشانْ.حيّد لو الورقة ويجبدْ معاه بْجوجْ صفعاتْ حتى خونا بالله بانو ليه النجومْ. قبل ما يْخلّيه قالّو : قلْ ليا ميرْسي (شكرا)
الفاميلة مسكين ما فادو غير جاوبْ : ميرْسي
من بعد الاستاد المسموم شاف فيه وقالْ لو : عْرفتي عْلاشْ طْلبتْ منَّك تقولْ ليا شكرا؟
الزغبي ردْ عليه : لا ميسْيو
اضحكْ عدو الله : على ودّاشْ ما بْغيتْشْ نْديرْ معاك القانون.
وزادْ شْرحْ ليهْ : كانْ عليا نْحيّدْ ليك الورقة ونطلب منك تخرج .انا راني تْصرّفْتْ معاكْ بْحالْ لعْربْ: ضْربتك وما بْغيتشْ نخرج عليك.
الصراحة هاد الموقف جْعلني نْغيّر شوية الموقف ديالي من هاد الأستاد.بْديتْ نْشكْ واشْ ممكن شي واحد زعما مسموم يتْصرّفْ بْحالْ هادْ التصرّفْ.
لعشية باقي عاقل كانت عندنا مادة الاجتماعيات.واحد خوتنا بالله أستادة جديدة كانت تحرسنا .فالهيأة ديالها تشبه لْشي عروبية لدرجة أنها بالكسوة ديالها تْبانْ كبيرة فالسنْ.
هاد خوتنا بالله كانت حاضيانا بالمعقول.
شي وقيتة الفاميلة حيت مبْلي بانت لو يْجبدْ شي ورقة ديال النْقيلْ من جيبو.
اللّي كان أنّ خربوشة شافتو .مْشاتْ عندو نيشانْ وخْداتْ منّو
الورقة : ما تحشمشْ يا الغشاشْ تنقلْ من الورقة.شوف غادي نْقيّدها عليكْ
خونا بالله بْغى يرغبها ولكن مسكينْ زادْ قفّرها.باقي عاقل قال ليها : ياكْ أخالْتي ما عمّرني ما نْعاودْ
المشكل خربوشة كَشْكْشاتْ وْغلْغْلاتْ وقالت لو بْحالْ الى تْغَوّتْ :
_ أنا خالتكْ ؟ الله يخْليكْ
يا الله برّى يا داكْ القرد الشارف والله ما تبْقى هْنا
عْيى ما يْزاوكْ ولكن خرْجاتو وْ هي تركل فيهْ.
مسكين واخّا تلْغى الامتحان خونا بالله كان مْحمّضْها فالمراقبة .كي ما نقولو بالوجدية (ياكْ أشروقْ ؟) جابها فالطْبكْ

يتبع غدا الجزء الثالث والأخير من مذكرات حوميدي فالكوليج ومع الحلقة رقم 17
 

Houmidi59

::الفارس المغربي ::

غير متصل
#36
رد: مذكرات طفولية : اعترافات حوميدي الصغير

مذكرات الطفولة : اعترافات حوميدي الصغير
الحلقة رقم 17
حوميدي فالكوليج (الجزء الثالث)

كنت فالدار كنقرى كي العادة قصة.جا لعندي صاحبي لشهب وقال
لي :
_ الأساتذة راهوم دايرين الاجتماع .
_ واه؟
_ يا الله نمشيوْ باشْ نشوفو واشْ نجحنا
الصراحة طيلة 3 ديال السنوات ما عمرو فكّرتْ نمشي نْشوفْ النتيجة ديالي لسبب واحد وهو أن الأستاد ديال العربية اللي هو جارنا كان ديما يْجيبْ ليا هاد النتيجة ومن الفوق مفصَّلة.
هاد المرة قبل الاجتماعات ديال الأساتذة اخبرني باللي راه عندي المعدل يمكن 13 أو 14 وراني مْشيتْ للجذع الأدبي.خوكم الحوميدي واخا كان عندو مع العلوم ولكن النقط ديال الفرنسية كانو مرتافعين بزّاف.هادا هو السبب اللي جعل الموجهين يْوجْهوني للآداب العصريةالمزدوجة.
المهم صاحبي لشهب ما بغيت نعلمو باللي راني ناجح.هي هاديكْ مْشيت معاهْ لْكوليجْ باستور.فالطريق لْقينا صاحبنا رابح بوخنونة .هاد المرة ما بْقاتشْ خنونْتو تْسيلْ.
غير وصلنا بان لينا الكوليج يغلي بالطلبة.ما كاين غير المجموعات وكولهوم شادّاهومْ الخلعة.مساكن شي وحدينْ غيرْ يْبانْ ليهوم شي أستاد خارج دغْيا يلحقو بيه:
_ أستاذ أستاذ الله يخليك واش نقدرو نعرفو النتيجة ديالنا ؟
الأستاذ يبتاسم ويقول ليهوم : راحنا باقي ما سالينا الاجتماعات .رجعو فلعشية يكون الخير ان شاء الله.
هادي من بعد عرفتها : التلميذ اللي يسمع بْحالْ هاد لكلام راه ساقطْ وْغادي يْعاود العام.تصوْرو بعض المرات فالمجموعة يكون غير تلميذ واحد جايبها فالطْبكْ(زعما خاسرْ) الأستاذ ما يبغيشْ يعطي على ودّو النتائج.
لشهب شاف الأستاذة ديال الفرنسية وقال لي : هاهي مادام بْلانْشارْ(madame Blanchard.أجي خويا حميد نمشيوْ لعندها قبل ما يْشوفوها لخّوتْ.
هاد الأستاذة كانت واعرة مع التلاميد ولكن مْعايا كانت مزيانة .ماشي بْعيدْ كانت تبغيني.المهم قلت لو : واخا خلّيني أنا نتكلّمْ مْعاها
هي هاديك قرّبْتْ منها وبعد ما حيّيتْها قلت ليها بالفرنسية : من فضلك بغينا النتائج ديالنا .
شافت فيا وقالت لي : ليكْ أنت واخّا؛ هادوك ما معاناشْ
المشكل أنا عندي النتيجة ديالي ولكن ما يمكنشْ ليا نقولْها ليها.
جا قرّب منها لشهب ومْعاهْ رابح.من بعد جاوْ شي تلاميد حتى وصلو ل10.
الأستاذة شافت فيهوم وقالت ليهوم : ما غاديشْ نعطيكوم النتائج.أمّا أنت (خوكم الحوميدي) راكْ ناجح وعندكْ لوحة الشرف
التلاميد قالو لي : مبروك عليك أخويا
شي واحد لاحظ عْليا : ما تْبانشْ عْليكْ الفرحة
فعلا حيتْ راني كنت فرحت شْحالْ هادي ولكن خاص شوية الديبلوماسية : عندك الحق أخويا .شوفْ انا ما نقدرشْ نفرح وأصحابي باقْيينْ مساكنْ شادّاهومْ الخلعة من السقوط
شاف فيا وباينا عجباتو النظرية ديالي وقال لي : الله يعطيكْ الصحة .هادي هي الرّجْلة
جاتْ الطْناشْ ورجعنا للدار .صاحبي لشهب وصاحبي رابح وجهْهوم اصْفارْ.باينة عليهوم شاكّينْ فالنجاح ديالهومْ.هي هاديكْ قرّرْت نخبرهوم ونعترف ليهوم باللّي الأستاذ مصطفى (جاري ) هو اللّي أعطاني النتيجة.من بعد ما نعّتْ ليهوم بابْ دارو، مْشيتْ في حالاتي.
باقي عاقل فلعشية ، تلاقيتْ صدفة جارنا الأستاذ.عيّطْ لي : عبد الحميد واشْ أنت اللّي صيفَطّيلي 6 ديال التلاميد باشْ نخبرهوم بالنتيجة ديالهوم
_ لّا أستاذ
_ إوى شوفْ تْشوفْ
_ فالحقيقة أستاد جوج تلامد صْحابي بْقاوْ فيا هوما اللّي ورّيتهوم بابْ داركْ
الاستاذ ضْحكْ وْقالْ لي : هادو اللّي جاوْني ستة
زاد عاودْ تاني ضْحكْ وقال لي : ما عمرو في حياتي ما كنت ننْوي يتْلاقاوْ 6 ديال لمْناحيسْ
شفت فيه ما فاهم والو.
زادْ قالْ لي : شوف أولدي عبد الحميد راني ما بْغيتْشْ نخبرهوم بالنتيجة ديالهوم حيتْ ب6 بيهوم ساقطينْ
المشكل فلعشية جا عندي لشهب وقال لي : خويا حميد راني نْجحتْ .
مسكين شفْني .واشْ نخبرو بالحقيقة ؟ الحوميدي تعلّم يقول اللّي كاين بلا نفاق ولا كدوب.هادا راه تْعلْمو من عند النصارى
_ شوف أخويا لشهب راك جايبها فالعشْ
_ ما يمكنش راه قالها ليا الأستاد
_ حتى أنا راه قالها ليا الأستاد
_ شْكون الأستاد ؟
ابتاسمت : الاستاد اللّي ورّيتْ كومْ بابْ دارو
ضحكْ : آه دابا فهمت .راني ما مْشيتشْ عندو
_ شْكونْ اللّي مْشى عندو
_ رابح بوخنونة جمع شي 5 ديال التلاميد ومْشاوْ عندو
_ اوى ؟
_ إوى قال ليهوم يكون خيرْ
هي هاديك أخبرت خويا لشهب باللّي كاين.من بعد هو حكى لي باللي عاود تاني رجع للكوليجْ واتْلاقى مع الأستاذ ديال الاجتماعيات وراه خبرو بالنتيجة ديالو
من الذكريات ديال هاد المستوى ، هادي مْشاتْ من بالي ولكن يا الله فاشْ تفكرتها.تْصوْرو هاد الواقعة كانت قبل ما نْدوزو الامتحانات ديال البْروفي.كنت نلعب مع صاحبي عبدلي (هادا كان يقرى فالسنة الثانية إعدادي).شي وْقيتة دازْ حْدانا واحد الرجل عندو لحية ولابس جلابة .باينا عليه حالة الطلّابْ (سعّايْ).المهم قرّبْ من جهتنا وقالْ لي : أرى يدّكْ
أعطيتو يدّي وْقلّبها مزيانْ .من بعد قالْ لي : أنت ولدي الخطوط اللي فيدّك تْكولْ باللي غادي تكتب حْوايجْ الناسْ مينْ تكبرْ.
زادْ قلّب يدّي التانية : فاشْ تقرى ؟
_ هاد العام عندي لبْروفي (brevet)
_ غادي تاخدو هاد العام ولكن خاصك تدبح قْنية باراكا لسيدي عبد الرحمان مول البرهان
_ واخا ندبح
_ الله يرضي عليك أولدي .أنت كتسمع الهضرة
هاد الكانبو اللّي ما فخبْروشْ هو أن الواليدة مْربْية لقْنية ومن الفوق حوميدي كيعجبو يْزرّدْ بلحم الكُنْ.
صاحبي عبدلي خاف يْمدْ يدّو وقال لهادْ بولحية : يدّي مْوسخة
_ ما عليهشْ أولدي .انت غادي تنجح ولكن خاصّك تدبح قْنية بْحالْ صاحبكْ
_ ما عندناش لقنية فالدارْ
_ اوى ولدي خاصك تشري قنية وتهديها لسيدي التهامي مول الفرّانْ الحامي
المهم غير مْشى ، رجعت للدّار نجْري وحْكيتْ للواليدة اللّي وْقعْ لي مع الرجل الطّلّابْ.الواليدة بانتْ عليها الخلعة : الحمد لله اللّي ما قطّعْشْ ليك يدّيكْ
شفت فيها مبهوضْ : أعلاشْ أمّا ؟
_ هاداكْ أولدي بنْ نَسْنَسْ .هاداك يْقَلَّبْ على الكنز ولكن خاصّو شي واحد يْكونْ زوهْري
_ كيفاشْ زوهري ؟
_ الزوهري يكون خطْ يدّّيهْ مْسرّحْ
_ ولكن أمّا خطوطْ يدّيا كولْهومْ عيوَجْ
_ على داكْ الشّي حْمدْتكْ ياربّي وشْكرتكْ
_ ولكنْ أمّا راه قالْ لي غادي ننجح
_ تنجح أولدي الى راجعتي دروسك وخْدمتي مزيانْ فالامتحانْ
_ أمّا واشْ تدّبْحي لينا شي قنية مين ننجح ؟
_ غادي ندبحها اليومْ.يا الله سيرْ طْلعْ للسطح وجيبْ شي وحدة سْمينة ودّيها لْعمّكْ عْلِي يدبحها
هادالحادثة كنت تقريبا نْسيتها .تفكرتها مين قالْ لي صاحبي عبدلي راني سْقطتْ فالامتحانْ
عْرفتو باشْ جاوبتو ؟
_ واشْ دبحتو لقنية
_ لّا
_ كانت باينة ما غاديشْ تنجح
مسكينْ شافْ فيا : وْ أنْتْ داركوم دبحو شي قْنية ؟
_ ماشي غيرْ وحدة ...بْلا حْسابْ
العام اللّي موراه صاحبي عبدلي شْرى قنية بعد ما جْمع حْصيْصة .المشكل عاودْالعام ...لا ماشي عاود العام.طردوه !!!!!!
موراها مْشى للخاريج ومن ديك الساعة ما تْلاقيتْ بيه


الى اللقاء مع الحلقة رقم 18 ومع مذكرات حوميدي
عودة ثانية الى السحر وكتاب الطوخي
علاقتي مع خديجة بنت الطّاشْرونْ
حوميدي يكتب الشعر وخاصة الهجاء
 

Houmidi59

::الفارس المغربي ::

غير متصل
#37
رد: مذكرات طفولية : اعترافات حوميدي الصغير

مذكرات حوميدي : اعترافات حوميدي الصغير
الحلقة رقم 18

الجزء الأول : عودة ثانية الى السحر وكتاب الطوخي

سبق لي تكلّمت ليكم على تجربة حوميدي مع السحر وعلى كتاب الطوخي اللي شْراه.غادي نْزيدو نتْكلْمو على مغامرات أخرى.من بين هادي واحد النهار جا عندنا ولد خالتي من الدار البيضاء.غير شاف لكتاب ، عجبو وقال

لي :
_ هاد لكتاب م**** وانا الصراحة كنْشوفْ هادي ديال الاختفاء واشْ زعما ممكنة ؟
_ شوف أولد خالتي اللي فْهادْ لكتاب راه مْجرّبْ.
بيني أو بينْكوم ، أنا يا الله مْجرّبْ جوجْ أو ثلاثة وبْغيتْ نْبيّنْ لولد خالتي باللّي راني سحّار محترف.هي هاديك قلتلو:
_ اصْبرْ ...غادي نْوجّدْ ليكْ الخلطة السحرية.
_ وقتاشْ توجدْ ؟
_ ساهلة غادي نخلطو هاد المواد فالما وْغادي تغْسلْ بيهوم الجسم ديالك كاملْ .من بعد ما غاديشْ تبقى تْبانْ
_ وااااااهْ والله الى واعرة.دابا غادي نْديرْها.
خوكم الحوميدي خاصّو يْبيّنْ لولد خالتو ماشي غيرْ أجي وْديرْ السحر:
_ شوف أولد خالتي خاصني نشري هاد المواد ونْدقها ونغربلها .من بعد نخلّطها مع الما
_ واخّا ولكن خاصني نحضر باشْ نشوفك تْخلّطها
_ واخّا ...أجي فلعشية وجيبْ معاكْ فوطة جديدة حيت هاد الفوطات فيهوم الميكروباتْ والميكروبات غادي يْخسْرو العملية
_ خويا حميد نشري فوطة دوبلْفي (جديدة ) غير تنجح العملية. دابا خاصنا ندخلو للصّحْ :
_ عندك شي فلوسْ ؟
_ كيفاشْ لفلوسْ ؟
_ لفلوسْ باشْ نشريوْ المواد ديال السحورْ.
خوكم ما عندو حتى دورو (ريال)
_ ما كاين مشكل .ها 10 ديال الدراهم.ياكْ كافية ؟
_ كافية ويْشيطْ الخير.
المهم صدّرْتْ (صيفطْتو يْبعّدْ علي) ومْشيتْ نْقلّبْ على خويا حسنْ.الحمد لله لْقيتو جايْ يجْري وْ ينْهتْ :
_ مالكْ خويا حسنْ على هادْ الحالة ؟ ياكْ ما البوليسْ يجْريوْ عليكومْ ؟
_ لا ، غيرْ فْرعنا دار الشيخ وراحنا هاربينْ.
_ واهْ ؟ واشْ دخّلْ كومْ أنتوما البزابيزْ مع قضية الشيخ وْقادا ؟
_ اوى أخويا حميد الشيخ جالعندنا وقال لينا باشْ حتى حْنا البزابيزْ نبْقاوْ مرّة مرّة نفّرْعو لو البابْ
_ ما كاينْ مشكل.
المهم حْكيتْ لو اللي وْقع مع ولد خالتي حمّي.حسن تبارك الله عليه ديما فاهمها أو هي طايرةْ.
_ هادْ الخوبْري (كامبو) عندو لفلوسْ .ياكْ أخويا ؟
_ ها العربون.زعما راه عْطاني 10 ديال الدراهم ؟ _ أنا الدور ديالي واشْتا(أشْنو ) هو ؟
_ غادي نْبيْنولو باللي فعلا ما راحْناشْ نْشوفوهْ.
خويا حسن ضْحكْ وقالْ لي : وااااهْ غادي نْقَصْرو عليه
_ نقصرو عليه والى بْغى ربّي ندّيوْ منّو شي بركة.
حسن ديما عايق وْفايقْ : شوفْ طنّي طنّكْ (فيفْتي فيفْتي)
حتى خوكم الحوميدي راهْ يْقرّي الديبْ : ما كاين مشكل ولكن خاصني نْحيّدْ المصاريف ديالي وبركة لكتابْ
_ المصاريف راحنا فهمناها ولكن بركة لكتاب ؟
_ أنا غادي نشرح ليكْ.شوفْ : هادا لكتاب راني شاريه غير بْلكْريدي وْراني باقي ما خلّصتو.
حسن واخّا طولانْطي (ذكي وْقافزْ) دغْيا اقْتنعْ :
_ انا متّافق معاكْ.
هي هاديك خلّيتو ومْشيتْ عند صاحبي بونور للدّار.الحمد لله لْقيتو يا الله فاشْ فاقْ من النعاسْ:
_ اوى الدّومينْكو (من ألقاب بونور) واشْ بايتْ قصّارْ فْشي
عرسْ ؟

تْكسّلْ علي شي شْويةْ.مع هو صحيحْ كي الفردْ ، بانْ ليا بْحالْ الى راهْ يْديرْ الرياضة .واخّا هاكْدا جاوبني : خويا حميد واحد الفار ما خلّاناشْ نّعْسو هادْ اللّيلة.
الصراحة بْحالْ هادْ الهضْرة ما يقولها غيرْ أحمق أو شي واحد مْسالي.خويا بونور راه فيه هاد جوج صفاتْ :
_ اوى خويا أحكي لي قصة الفار لاحادرْ (ربما) نكتب عليها شي قصيدة شعرية دايزها لكلام
_ سيرْ بعّدني حتى نفطرْ .راني باقي طافي.
_ خوك حميد راه فاطر بكري وْدابا راه فيه الجوعْ
شافْ فيا : باغي تفطرْ ؟
_ ما كْرهْتْشْ
_ سيرْ أطّبّكْ .أنا برّاد و6 ديالْ السفنجاتْ يا الله يَكْفيوْني
_ واخّا غيرْ أرْهجْ يا الحلّوفْ.مينْ تْكمّلْ (تْسالي) أجي لْعندي للدّار باشْ نمْشيوْ للجوطية.
لمْسارية تعجبني مع صاحبي بونور وعلى الخصوصْ مينْ نبغي نَشْري شي حاجة.هدا هو السبب عْلاشْ بْغيتو يْكونْ مْعايا. خوكم حوميدي مْشى للجوطية وشْرى ما يحتاجْ ورْجعْ ويمكن دخلْ للدارْ ودارْ كاسْكْروطْ، عادْ بونور بانْ : يا الله أخويا حميد نمْشيوْ للجوطية. شفْتْ فيهْ وضحكتْ : واشْ باقي شي وقت للجوطية ؟ شوف خلّي حتى لْعْشية. بونور ما عجبوشْ الحالْ : صاحبي راكْ تضحكْ عليا. هي هاديك ، مْشى أو هو يْسبْ وْ يخطي . بالنسبة للمواد ما عاقلش بالضّبْط عليهوم ولكن نقدر نْأكّدْ ليكوم أنهو شي حْوايج مستعملة بزّاف بْحالْ زعفران والملح والمسكة الحرة.خوكم حوميدي خلّطهوم مع الما.حسن كان حاضر ويْشوفْ. شي وْقيتة ، قالْ لي : حميدْ ...عْلاشْ ما نْجربو هاشْ حْنا بعدا؟
فعلا هادي فاتتْني : خويا حوسيني والله الى عنداك الحق.أجي أنا اللي غادي نغسلْ بهاد الما.
خويا حسن أنا كنعرفو مزيان .هو ديما مْعاندْ : ديما يبغي العكسْ
_ أنا اللي نْدوّشْ بهاد السْحورْ
ما عليا غير نْجاوبو : ما تْكون غير على خاطركْ
حسن قام بعملية الغسل وخوكم الحوميدي مْتَبْعو خطْوة خطْوة.شي شْوية درتْ راسي بْحالْ الى تْفكّرتْ شي حاجة وبْغيتْ زعما نمْشي نْجيبها.هي هاديك مْشيتْ وْتْخبّيتْ مورا الباب واحد الدقيقة أو جوج.حسن كانْ باقي يدْهنْ فالماء المسحور. خوكم حوميدي رْجعْ وبيّنْ أنّه مبهوضْ : حسنْ وْيرّاكْ (فينَكْ) ؟ ما رانيشْ نْشوفكْ .
حسن ماشي منْ دوك الناس اللي يْتيقو دغْيا : باراكا من التْسحْسيحْ (لكدوب) واشْ بْغيتْ أدّيرْها مْعايا حتى أنا ؟
ما كان عليا غير نقْلبها لْدربْ ليهودْ : صاحبي راني غيرْ نْورّي لكْ كيفاشْ خاصّكْ أدّيرْ مين يْجي خونا بالله. فلعْشية جا حِمّي وفْيدّو فوطة جديدة.غير دْخلْ قالْ ليا : صافي كولْشي موجودْ ؟ مْشينا نيشان للمرحاضْ.خونا بالله جاتو عْجبْ :
_ خويا حميد بيت الما خايبة ما تصلاحْشْ للدّوشْ. كانْ عليا نقَّنْعو : الجنون ما كاينْينْشْ فالحمّامْ.

هادْ لخّوتْ كيبغيوْ غير لبْلايصْ لمْوَسْخة.
_ دابا راني فْهمتْ.
_ يا الله ادْخلْ ، حيَّدْ الكسْوة ديالكْ وْغْسلْ بلْما المسحورْ.منْ بعدْ ديرْ عليكْ الفوطة واخْرج .
خونا بالله سدْ على راسو الباب .بْقينا أنا وخويا حسنْ نْسايْنوهْ حتى يخرج لينا.شي شْوية حسن غْمزْ لي بْعينيهْ مينْ شافْ باللّي حِمّي غادي يخرج :
_ حميد شوفْ شوفْ البابْ يتْحلْ
_ واهْ ما بانْ لي حتى واحد يْحلْ فيهْ
ولد خالتي مسكين غير سْمعْ الهضرة ديالنا ، صافي تيّقْ .هي هاديك خرج وحْنا نْشوفو فيهْ يتْهكّمْ علينا.مْشى مورانا وْقرّبْ من خويا حسنْ وجْبدْ مْعاهْ بركلة.الصراحة حسن ممثل بارع .آه يا خوتّي مينْ تْكوّرْ جاتني ضحكة كانتْ غادي اطَّيَّحْني فالأرضْ.حسنْ غيرْ ضارْ لْعندي وقالْ لي والغضب باين فوجهو : واشْ هْبلتْ ؟ (حْماقيتي) عْلاشْ ضْربْتني بْركلة ؟
_ والله ما ضربْتكْ.

حسن مْشى للْكوزينة يشرب كاسْ ما.أنا بْقيتْ واقفْ نضْحكْ عليهْ: _ باينة يا خويا ما يْكونْ غيرْ ضرْبكْ جنْ. حسنْ ردْ علي قبل ما يغْبرْ فالكوزينة :الجنْ هو أنْتَ
حمّي عجبو الحالْ وبْغى يْعاودْ تاني يْزيدْ يْقصّرْ علينا.هادْ المرّة قرّبْ منّي وْ أنا كنْشوفْ فيهْ وبالطبع ضْربني لْضهْري
_ آيْ شْكونْ ضربني ؟
هاد المرّة حْمّي تْكرشَخْ بالضّحْكْ: غيرْ أنا حْمّي. حسنْ جا يجْري: فيرّاكْ خويا حيمّي ؟ ما رانيشْ نشوفكْ
خوكم الحوميدي حتى هو مْعاون خوهْ حسنْ : حتّى أنا ما رانيشْ نْشوفكْ خويا حِمّي ويرّاكْ مدْسوسْ ؟
حمّي هاد المرة تْأكّدْ باللي راهْ رْجعْ آنْفيزيبْلْ(invisible). حوميدي خاصّو يْوقّفْ هادْ المهزلة: خويا حيَّدْ الفوطة باشْ ترجعْ تْبانْ.

حمّي حيَّدْ الفوطة.هادْ المرّة حسنْ ضْحكْ عليهْ وْقالّو : لبسْ الكسْوة ديالكْ.راكْ عرْيانْ. دابا حيمّي باغي الوصفة السحرية .جاب الله خوكم الحوميدي كانْ دايرْ حْسابو: كنتْ مْوجّدْ قرعة كبيرة فيها الماء المسحور .هاهي خويا حمّي .راها تْقامتْ عْليا بْ400 دورو . _ واهْ غالية
حسن باغي ياخود حقّو :
_ راها تْقامتْ علينا أكْثرْ.هاديك الميتينْ (10 دراهم) ديالك يا الله شْرينا بيها غيرْ مادّة وحدة .
بْقى يْشوفْ .من بعد ما فادو غيرْ جْبدْ لفلوسْ : عندكومْ الزْهرْ هي اللّي عندي. خويا حسن ديما عندو الردْ :
_ انت اللّي غادي تْبَرّعْ .حْنا راحنا خاسْرينْ مْعاكْ.
شافْ فيا حسنْ وقالْ لي :
_ أرى بعدا 200 دورو باشْ نْخلّصْ العطّارْ
شفتو يا إخْواني وأخواتي هادا حسنْ حيلي مع راسو.ما فادْني حتى أنا غيرْ نْمدْلو 10 ديالْ الدراهم. خونا حمّي لْبسْ الكسوة ديالو وقالْ لينا : غدّا أن شاء الله غادي نرجعو للدّار البيضا. تمّا غادي نْديرْ التجربة ديالي مع بيضاوة.
خوكم الحوميدي زادْ نصحو : اسمع هاد القرعة راها تخدم ليك شْهرْ أو كْترْ.كل مرّةْ عمّرْ سْطلْ بالما أو زيدْ عليهْ معيلْقةْ من الماء المسحورْ.عنداكْ تنسى الفوطة .ما عمْرو ما تْصبّنْها. خويا حمّي مْشى راشقا ليهْ ، حاسبْ راسو قاضيها
هههههههههه.


الجزء الثاني : علاقتي مع خديجة بنت الطّاشْرونْ


حوميدي كان مغْروم بواحد البنت سكْناتْ حْدانا.الصراحة هادْ البنت كانت كتطْلقْ شعرها واللي شافتو كتبْتاسم لو.المشكل كانت اللّي جا عندها تْبيّنْ لو باللّي هو الحبيب ديالها.سْميتْها خديجة وكانت زينة واخّا كتْميلْ لسْمورية.كان عندها واحد خوها ما عمرو ما شفتْ شي واحد أكْلخْ منّو.تْصَوْرو هاد خونا بالله كان هو الرسول ديال خديجة لكلْ واحد فينا وحْنا كنّا نْصيفْطوهْ ليها بالرسائل ديالنا. هاد البنت كانت مْسيْرة تقريبا كاعْ أولاد الدربْ.كلْ واحد كانْ يحْسابْ ليهْ أن خديجة ديالو.العجيب فالأمرْ هاد لمكلّخ ديالْ خوها أيْ واحد يْسَوْلو ويْقولْ ليهْ : شْكونْ هي حْبيبْتي ؟ يْردْ دغيا : خديجة. مسكين واشْ كانْ عارفْ اللّي كاينْ أو الزغبي هادا ما طحْناتْ الرْحا.
واحد النهار كان الدرب خاوي.لخّوتْ مْشاوْ يلعبو شي ماتْشْ ديالْ الكرة.حوميدي كان يكتب الشعر كي العادة ولكن هاد الشعر ديال الحبْ.

يا الله فاشْ كتبتْ قصيدة ، خْرجتْ ومْشيتْ قاصد دار خديجة. دارْ خديجة كانت فدْريبة.كانْ أبّاها رجل سمينْ وقْصيرْ.كانتْ عندو موبيلا (موطور) قديمْة تسمع الموتورْ ديالها على بعد كيلومتر.الحمد لله غيرْ نسمعوهْ ، دغيا نهربو باشْ ما يلْقاناشْ مع الحبيبة.آهْ نْسيتْ نقولْ ليكوم أنّه كان عندها جوج خْواتاتْ : مليكة ورْقية. مليكة كانت كبيرة فالسنْ .يمكن عندها 18 عام.هادي كانت الشّوفة ديالها غير فالزعيمْ.ولكن هادْ خونا بالله ما كانشْ مْسالي ليها.رْقية هادي برهوشة صغيرة.ديكْ لوقيتة كانْ فعْمرها 9 أو 10 سنين.حتى هي يمكن قصة الحب عجْباتها.من زهرها المنحوسْ حتى واحد ما قْشعها. المهم ، يا الله فاشْ قرّبْتْ من الدارْ بانْ ليا خوها لمكلّخْ : خويا مصطفى جابكْ ربّي.عيَّطْ لي على حْبيبْتي.
دغيا مسكين دْخلْ للدارْ.شي شْوية خرجاتْ لغْزالة طالقا شْعرها ودايْرا الحَمّيري (لعْكرْ)آهْ يا خّوتي اللي شافها تْشدّو تْبوريشة.خوكم الحوميدي بْدى غيرْ يْقَفْقَفْ غيرْ بّوحدو.قرْباتْ منّي وقالتْ لي : صباح الخيرْ. قلت ليها :
أنا ؟
_ راني مْعاكْ أنْتَ.
حوميدي تْلفْ ويمْكنْ تلْفاتْ ليهْ الرّبْعة.واخّا هكْدا حلّيتْ الورقة وبْديتْ نقرى.للأسف ما عاقلشْ آشْ قلتْ ليها.حاجة وحدة ما عمرو ننْساها هو أن خوتْنا بالله ضحْكاتْ حتى بانو حْلاقمْها.منْ بعدْ شدّاتْ يدّي.صافي الرجْفة جاتني .خوكم الحوميدي كانْ يشْطحْ التْويسْتْ(twist) بلا موسيقى.بْقيتْ نْشوفْ فيها أو هي تْشوفْ فيا.هي ابتاسمتْ وخوكم حتى هو ابتاسمْ.فاشْ وجهْها قرّبْ منّي حسّيتْ بْواحدْ الصفْعة للرّكبة (العنق) وسْمعتْ خوها لكبيرْ يقول ليا : ياولد لحرامْ واشْتا راكْ أدّيرْ.

خوكمْ الحوميدي ضْربها بْفرطة (هرْبة).ما وْقفْ حتى لْقى راسو فالجوطية وجهو احْمرْ وعْروكاتو سايْلةْ.شي شْوية بانْ ليا بونورْ يتفرّجْ فْعبد الله الماكانا .غير شافني قالْ لي : خويا حميدْ واشْ راكْ هاربْ من البوليسْ ؟
_ خويا بونور هادا عَزْرينْ جاني.
هي هاديكْ حْكيتْلو القصة .بْقى ساكتْ شي شْويةْ.من بعد قالْ لي : _أنا ماكنتشْ عارفْ باللّي عندها خوها
تْلمّسْتْ الضربة وجاوبتو : لا أنا ولا الرّكْبة ديالي.



الجزء الثالث :حوميدي يكتب الشعر وخاصة الهجاء


حوميدي كْتبْ الشعرْ فلوقيتة ديال الطفولة والمراهقة ديالو.كْتبْ فالحبْ ولكن مجرد أبيات بالدارجة المغربية وبعض المرات باللغة العربية .حتى الهجاء راهْ خوكم الحوميدي مْعلّمْ فيه لدرجة لخّوتْ غيرْ يْشوفوني نغْبرْ شي مرّاتْ تْشدْهومْ الخلعة.كلْ واحدْ واشْ يْكولْ.من بين القصائد اللي باقي عاقل عليها على واحد خونا بالله سْميْتو قويدر.راكو باقْيينْ مْدكْرينْ خونا بالله المغروم بلبْناتْ.اوى سَمْعو هادي :
شْكونْ يعرفْ قْويدرْ

مول الدربوكة ولبْنيدَرْ

عندو أسماء كثيرة

كيفْ التْشيشَة فْلكْديرة

وجهو خّوتي مْكوّرْ

كي الكَرْعة غادي تْنوّرْ


المشكل هادْ الشّي اللّي خوكم عاقل عْليهْ. واحد صاحبنا طْلعْ لو الدمْ غيرْ على هادْ البيتْ شعري.بيتْ عادي ولكن خونا بالله ما بْغاشْ يتَهْضمْ ليهْ :
شْرى جاكيطة بْميتينْ

قالّكْ خلّصْ فيها ألْفينْ

واحد خونا بالله سْميْتو خْناتة نْزلتْ عليهْ بالمعقول.هادا مسكينْ غيرْ شوية ويبقى يبْكي بْحالْ هادوكْ اللّي عندهومْ الموتْ فالدارْ.
على كل حال كنا عايْشينْ فالجاهلية ، خوكم حوميدي دا رْ فْعايلو:لا من الشاعر لا فالحبْ ولا شاعر في الهجاءْ.
حاصولْ يا ربّي اغفرْ لينا دنوبْ الطفولة واالمراهقة.سبحان ربك ربّ العزّة عمّا يصفون والحمد لله ربّ العالمين



انتهت مذكرات حوميدي في الطفولة

 

bouchaib56

::مراقب مغربي ::

غير متصل
#38
رد: مذكرات طفولية : اعترافات حوميدي الصغير

اذا انتهت مذكرات حوميدي الجزئية لم تنته بعد المذكرات القادمة
كلها تشويق ومتعة وفرجة
اخي حوميدي فرجتيها علينا الله يفرجها عليك دنيا واخرة
مازلنا من السحر الى علاقتك بخديجة والرواية لسيرتك الذاتية
لم تكتمل بعد
فالى الحلقات القادمة مع
houmidi59

منتديات المغرب





 
التعديل الأخير:

غير متصل
#39
رد: مذكرات طفولية : اعترافات حوميدي الصغير

انا فهمت شي بسيط .. بعض المصطلحات للهجة المغربية وقفت عائقاً .. لك فهمت خط سير القصة حول الطفل حوميدي الي بي متاخراً عن الدكتوراه .. ولكن شظف العيش ، هي التي ربما اخرته عن رغبة ابيه ..
والباقي بشوف مترجم هنا مغاربة وبستعين بصديق .ههههههههههه
 
أعلى