قصة بالدارجة : حتى واحد ما زاد معلّم

Houmidi59

::الفارس المغربي ::

غير متصل
#41
رد: قصة بالدارجة : حتى واحد ما زاد معلّم

جات الدورة الثانية ، حتى هي بصْداعاتها.ها الامتحانات ، ها تعْمار النقط ، زيد عليهوم خاصنا نمشيو عاود تاني عند المدير ..عالمْ الله فين غدي نْديرو الاجتماع ؟
المهم الاخوان علي وعبد العزيز اتفقو باش يْطلعو المعدل هاد المرّة حيت قْلالين التلاميذ للي جابو المعدل وهاد الشي ما يعْجبش.
فعلا قالو لي الفكرة وأنا قلت ليهوم : عْلاش ما تعْطيوْ أسئلة ساهلة للتلاميذ ؟ راه مْية فلمْية غادي يْجيبو المعدل.
عبد العزيز علّى يدّو وقال لي : برافو خوي حميد.والله الى عندك الحق .
علي حتى هو بان باللي الفكرة ديالي عجباتو : صافي أنا حيت عندي التلاميذ يا لله فاش تْعلمو الحروف غادي نْديرْ ليهوم شي تمارين ساهلة...
فكّرْ شي شوية وزاد قال : ولكن آشنو يمكن نكتب ليهوم فهاد التمارين ؟
_ ساهلة ماهلة أمولاي علي
_ كيفاش زعما ؟
_ شوف أخويا علي أنا غادي نْصوَبْ ليك شي تمارين راه لمكلَّخْ ديال لمكلْخين غادي يخْدمهوم بسهولة
_ واه ..أتيني بيهوم الله يرحم الوالدين
عبد العزيز اللي كان مْتبّع الحوار ديالنا ، قال لي : درتي خير خاي عبد الحميد .هادي مناسبة باش خونا بالله علي يشوف راسو واش باقي مكلخ او لا.
صافي علي طْلعو الدم .
_ انا ما عمرو ما كنت مكلخ ، غير صابني ربي مع مكلخين
_ ياك ما لمكلخين أحنا ؟
دابا أنا ساكت ، هاد خونا بالله عبد لعزيز اللي كيتناقش مع صاحبو.
خلّيتهوم ومشيت للقسم وخْديتْ ورقة باش نكتب التمارين اللي يمكن تكون علاج لمْكلخين ديال خويا علي.خوكم عبد الحميد دغيا لقى تمارين في غاية السهولة
يا لله فاش رجعت لقيت علي غير بوحديتو ، بحال الى يتكلّم مع راسو : انا مكلخ ، ياك أخويا عبد العزيز ؟
كان خاصني نْهَدْئو شي شوية :صراحة بيني وبينكوم أنتوما بجوجكوم مكلخين.
رد علي : تبارك لله ، حتى أنت
_ شوف خويا علي واش انتوما باركين تتْعايرو والتلاميذ كيسمعو فيكوم
_ فاينا هوما ؟
_ شوف لْهيه مورا الساقية
_ والله الى عندك الحق
_ أجي راني صاوبت لك التمارين
المهم شرحت لو : هاد التمرين فيه كلمات فمستطيلات .غادي تطلب من التلاميذ يلونو البطاقة اللي فيها حرف الطاء مثلا بالأخضر واللي فيها الدال بالأصفر وهاكدا
_ واه والله الى فكرة هائلة ومنها التلميذ يتعلّم دغيا
_ نزيدك التمرين التاني : غادي تعطيلو كلمات ناقصهوم حرف .التلاميد غادي يكتبو الحرف الناقص.أنت غادي تعطي ليهوم الحروف باش هوما يكتبوها فبلاصتها
_ عظيم عظيم خويا حميد والله الى راك واعرررررررر
طبعا اقترحت عليه شي تمارين أخرى داك الشي ديال الأسهم والرسومات
فلْأخير مشى وهو فرحان .قال لي : دابا غادي نْوجّدهوم .
قبل ما يدخل للبيت ، عيّط علي : خويا حميد شوف ليا شي تمارين باش نْديرهوم فالرياضيات
باش ما يْطيّرهاليشْ ، قال لي : غادي تتْعشى عندنا هاد الليلة
جاوبتو : الى ما عْرضنا حتى شي واحد أخويا علي
المهم ديك الليلة تْعشيت معاهوم .العجيب فالأمر خونا بالله عبد العزيز ما سمّعناش صاحبو كشك.سَولْتو .جاوبني : خاي عبد الحميد أنا عارف باللي أنت ما عندكش مْعاه .ولكن الى بْغيتي راها وصلاتني واحد الكاسيطة كيتكلم فيها على بورقيبة (الله يرحمو)
_ زعما كتكلم على الرئيس التونسي
_ ايه اصاحبي هداك السيد راه مجرم كبير وكيتعدى وراه ما مطبّقش الدين الاسلامي.
المهم حْكى لي عليه شي عْجب ما عمرو ما سْمعت بيه
على كل حال سمعنا للكاسيطة .اللي سمعتو ما عجبنيش .فالْأخير قولتلو : أنا ما عنديش مع السياسة والسيد بينو بين اللي خلقو ومن الفوق ياك هو كيحكم فالتوانسة آش دّانا ليه ؟
علي لقى المناسبة باش يْناقش الموضوع : بالعكس أخي عبد الحميد خاصنا نْغيرو على الدين ديالنا
_ اسمع خويا علي السيد ره مسلم .يْصلي او ما يصومش هداك شغلو
_ خويا حميد واش كدّافع على الكفار ؟
_ لّا كندافع على الحق
عبد العزيز : صافي ، صافي .أجيوْ نتْعشّاو
فعلا لعشا كان بنين واللي عْجبني هو اللحم ما عمرو ما كْليت بحالو
_ أاشنو هاد اللحم ؟ هدا ماشي قنية ، ياك ؟
_ عندك الحق .وش نزيدك منّو ؟
_ اوى ما كرهتش
فعل خويا علي جاب اللحم اللي كان باقي مع لبْطاطا.مرميطة دايزه لكلام ما يْديرهاش حتى بركاش.
كْليت حتى نَتْفَخْتْ.
شي شوية جاب لينا عبد العزيز أتاي باللويزة .شربنا وحْنا ساكتين.
قبل ما نودّعهوم قلتلو : هاداك اللحم واش ديال لغزال ؟
رد علي أو هو يضحك : لّا أخويا عبد الحميد
_ صافي لْقيتو هدا ما يكون غير لحم لحْنشْ
بجوجهوم ضحكو : خويا عبد الحميد الشينوا هوما اللي كيكْلو لحْنش والْفاعي
_ اوى فيدوني الله يرحم الوالدين
_ أجي تْشوف .
_ هدا هو اللي كْليتْ
الَخّوت بْحالْ الى بغيتْ نتْقَيّى (حاشاكوم)
_ مْساخط الوالدين وكَّلتوني لحرام
_ ما تْقلّقش هادا راه الضّبْ
_ الضب ولّى الدب
_ خويا عبد الحميد هادا حيوان كيْعيش غير فالصحاري ولحمو بْحال لحم لقْنية
_ واش بعدا حْلالْ؟
_ نْعام أخاي حلال طيب
_ياك ما نْزيدك منّو ؟
_ لا أخوي باراكا عْليا.راني شْبعت
خلّيتهوم ومشيتْ في حالاتي باش ننْعس.
هاديك الليلة ما نْعسْتشْ مزيان حيت بايت الليل كامل وأنا كنحلم غير بالضَّب ولكن ضب بْحال شي هايْشة (وحش)
الصباح فقْت مْدَنْكرْ (ما شابعش نعاس)
هداك النهار مْشيت نْصيّد الحوت فواد ملوية.هاد المرة ما خلّيت حتى واحد من التلاميذ يمشي مْعايا.
وْصلت للواد .رْميت الصنارة وبْقيت كنْساين آش يمكن تْجيبْ ليا.
شي وْقيتة دازت يمكن نصْ ساعة حسيت بْشي حاجة تجْبد .انا نجبد وهي تجبد.
واه ياك ما فكرون سّي محمادين عاود تاني رْجعْ ؟
كنت غادي نسْمح فالقصبة ولكن فكرت مزيان .مين غادي نرجع يمكن لمكانسة غادي يضّحكو عليا
المهم بقيت نجبد على فورْ جهدي.شي شوية خْرجْ لعجب اللي كان مَّحَّني :فرْدة ديال صباط مْقطّع
كان خاصني غير الفردة التانية ويمكن نقول بأني رجعت بِخُفَّيْ حُنَينْ



يتبع غدا إن شاء الله
 

bouchaib56

::مراقب مغربي ::

غير متصل
#42
رد: قصة بالدارجة : حتى واحد ما زاد معلّم

الأخ حوميدي يقف على وجع ونغص أستاذ التعليم الابتدائي
الذي قدر له ان يكون فقيه كتاب في دوار او مدشر
وربما سيلتقي فقيه كتاب القران
وتبدأ المحن والعذاب والمشاق
أما أستاذ وأسمح لنفسي بتسميته على الأقل لرد
الاعتبار له أقصد أستاذ يصعد من أسفل الجبل على
راحلة وهو محظوظ ان وجدها
فشابو بالعامية لحوميدي الذي أرجعنا الى ماض
مرير ومعاناة كلنا مررنا من هذه الطاحونة
 
التعديل الأخير:

bouchaib56

::مراقب مغربي ::

غير متصل
#43
رد: قصة بالدارجة : حتى واحد ما زاد معلّم

الأخ حوميدي يقف على وجع ونغص أستاذ التعليم الابتدائي
الذي قدر له ان يكون فقيه كتاب في دوار او مدشر
وربما سيلتقي فقيه كتاب القران
وتبدأ المحن والعذاب والمشاق
أما أستاذ وأسمح لنفسي بتسميته على الأقل لرد
الاعتبار له أقصد أستاذ يصعد من أسفل الجبل على
راحلة وهو محظوظ ان وجدها
فشابو بالعامية لحوميدي الذي أرجعنا الى ماض
مرير ومعاناة كلنا مررنا من هذه الطاحونة
 

bouchaib56

::مراقب مغربي ::

غير متصل
#44
رد: قصة بالدارجة : حتى واحد ما زاد معلّم

حوميدي رمز
معلم البادية
والناطق هنا باسمه
الله يكون في عون استاذ ابتدائي
وهذه هي خدمة الوطن
وخدمة المجتمع
الف تحية لمعلمين بالجبال
وبالمناطق الوعرة
والنائية
حيوا معي هذا المناضل
هذا هو المواطن الصالح

حيوا معي حوميدي المصور
لواقع المعلم المغربي
وهو كله بشاشة وخفة روح ودم
 
التعديل الأخير:

Houmidi59

::الفارس المغربي ::

غير متصل
#45
رد: قصة بالدارجة : حتى واحد ما زاد معلّم

دازت الامتحانات ديال الدورة الثانية في ظروف مزيانة.لهادا كانت النتائج فالمستوى ، لكن نتائج التدويرة الثانية كانت عكس التدويرة الأولى تقريبا ميْتة.ما نكدبوش على الله شربنا لحليب واللبن وكلينا الزبدة والجبن.
النهار الأول ديال العطلة كنّا مستعدين باش نسافرو: علي وعبد العزيز لمكناس وأنا لرْباط.هاد المرة ما خْديتش معايا اسمهان.طرَّقتْ عليها فالقسم.حتى علي خلّى الموطور ديالو فالسكن.فالصباح شدّينا الطريق كعْبة (على الأرجل) لمحطة القطار.هاد المحطة تبعد على قرية اولاد سليمان ب9 كيلومتر، وسْميتْها العقرب .تقريبا ساعة ونصْ باش وصلنا.كانت ديك لوقيتة الوحدة .صلينا الظهور والعاصر جمعا.راني باقي عاقلْ جْمعنا الشيح والحرمل.الواليدة غدي تفراح بزاف ، حيت عزيز عليها لعْشوب.
جا التْران وركبنا.كان خاوي .
نْسيت باش نقول ليكوم ما كُنّاشْ مْقطْعين التذاكر .هاد لاكار (المحطة)مافيهاش الكيشي.(guichet)
الكونترولور (controleur)والو ما بانش .
وصلنا لفاس .هنا التْران يوقف تقريبا 45 دقيقة، فيها يْغيْرو الراس (la locomotive)ديال القطار .استغلينا هاد المناسبة وكْلينا الكاسكروط اللي كنّا جبْنا معانا.
المهم القطار قلّع وجا الكونترولور الجديد .قطّع لينا التداكر .العجيب فالأمر حْسبنا الثمن من فاس .لمكانسة صدْقات ليهمو .يا الله خلْصو شي 6 ديال الدراهم للواحد.أنا خلّصت 20 درهم.على كل حال يمكن هادي داخلة فنتائج الدورة الثانية.
وصلنا لمكناس.نزل علي وعبد العزيز وأنا بْقيتْ بوحْدي.ديك لوقيتة كانت الساعة التْمنْية ديال الليل.
باش نْفَوّتْ (نْدَوَّزْ) الوقت ، قْريت واحد القصة كنت جبْتها مْعايا فالصّاك.
مع ديك لحْداشْ ديال الليل وصلنا للرباط.الواليد والواليدة كي العادة كانو فالمحطة ينتظروني . بعد العناق والسلام ركبنا فالطومومبيل ديال الواليد ومْشينا ديريكْتْ لليوسفية الغربية.
كانو الإخوة والأخوات فالدار .السلام والعناق مرة تانية.المهم حطّو لعشا وتْعشينا.فديك لوقيتة الواليدة سوْلاتني على كل العائلة اللي كاينة في وجدة.أعطيتها الأخبار على كل واحد فيهوم.
دابا خاصني نفتح الصّاك باش كل واحد نَعْطيه الكادو ديالو.
هاد القاعيدة باقيا لْحد الآن كنْديرْها مينْ نمشي للرباط.
المهم كل واحد عْطيتو الكادو ديالو .الواليدة ديك لوقيتة ما زال متْدَكَّر جبت ليها واحد الشواية ديال اللحم كانت فاش جات من اسبانيا.تصورو ما زال الواليدة مْحافظة عليها لْحد الساعة.جبت ليها سربيس ديال لفناجل (tasses)، لكن خسارة مع مرور الوقت ما بقى منهوم غير جوج او تْلاتة ديال لفناجل.
شي شوية عْطيت للواليدة الشيح والحرمل .الواليدة طارت بالفرحة .ياك قلتها ليكوم راه عْزيزْ عليها لعشوب.
العطلة فالرباط قضيتها فلَمسارية ومشيتْ حتى للدار البيضاء مع واحد ولد خالة الوالدة كان جا للرباط.
هذا الَخّوت نيميرو ما ضايرش.تْصورو هادا كيعْرج من رجليه وعندو صبّاط ديال لحديد كيسْتعملو باش يتمشى .هاد المسخوط ساكن فنواحي بركان فواحد لعروبية سْميتْها الركّادة .
زعما بْلاد ناعسة وما فيهاش الحركة.خونا بالله كيقْنط .باش يهرب ويْبَعدْ، يْديرْ السبَّة باش يْسافر.السبَّة عندو ساهلة : يرْخف شوية البولونْ(le boulon) ديال صباط لحْديد .يمشي عند أبّاه
_ أبّا الصبّاط ترْخفْ ، ما بْقيتشْ نقْدر نتْمشّى
_ ولدي آش المعمول؟
_ المعمول أبّا خاصني نمشي للرباط
_ واخّا أولدي
اللي كاين خونا ميمون يْوجّد الصّاك ديالو فيه شوية كسوة ولفلوس .يمشي ديريكت فالكار للرباط.
كنت أنا ويّاه متْفاهْمينْ بزاف.على هاد السبب كان تقريبا يمشي للرباط فلوقيتة للي حتى أنا نْكون فالعاصمة.
كان عندو واحد عمّو ساكن فحي التقدم ، يعني ماشي بْعيد على اليوسفية .غير يوصل ، يْحط الصاك ويْجي ديريكت لعندي.ميمون كان كْريم ، ما عمرو ما تْحاسبْ مْعايا.هو اللي يْخلّص الطوبيس ولّا الكار ، حتى المكلة غير هو.
آش نقول ليكوم : الله يْعمّرها دار.لكن مسخوط فالتحراميات.
من المغامرات اللي وقعات لي مْعاهْ ، نهار اللي مْشينا لْكازا.رْكبنا فالكار ، طْلعْ واحد خيْنا كيْبيع شي باكيات ديال القهوة .واحد السيد غريب ، يا الله عندو جوج باكيات.بْدى يدور فالكار ويْزَكّي (يْغَوَّتْ) : القهوة فالباكيْة والباكية فالقهوة.شْكون بْغى ؟ شكون بْغى ؟
حتى واحد ما بغى يشري .خويا ميمون شاف فيا وقال لي : هاد لقهوة تْبان زينة
_ واه ، كيفاش زينة .راها ما طالقة ريحة
ابتسم ميمون وقال لي : داك الشي اللي بان لي
_ اوى ؟
_ اوى غادي نضّحْكو شوية على هاد البيّاع
المهم عيّط لو : أرواح أمولْ القهوة
مول القهوة جا.
_ بَشْحال القهوة ؟
مول القهوة فْرحْ : غير بْميتين ريال للباكية.الى بْغيتيهوم بْجوج غادي نْخلّيهوم لك بتلْتامية دريال.
ميمون شاف فيا وقال لي : خْسارة عندو غير جوج باكيات ، أنا خاصني بزاف
مول القهوة ماكانش ناوي يْطيح فْكامبو بْحال ميمون
_ شَدْ هادو غادي نمشي نْزيدك
غير مْشى ، بْدى ميمون يْشَمْ الباكية:
_ والو الريحة أخويا عالم الله واشتا(أشنو) كاين الداخل؟
ميمون فْتحْ الباكية .عْرَفتو آش لْقينا الداخل ؟ الرَّملة
فْتْحنا الباكية الجاوجة (التانية) حتى هي فيها غير الرملة.
_ خويا ميمون ، دابا آش المعمول
_ غادي نفضحو
_ هاهو جاي
الزغبي غير شاف المنظر ديال الباكيات محلولين ، ما صاب لا يْزيد للْقدامْ ولا يهْرب
من الزهر ديالو طْلعْ لكريسون(le graisseur) وجرّى عليه .
الكار قلّعْ والناس اللي كانو راكبين فالكار كولهوم قالو لميمون تبارك لله عليك قْضيتي عليه
شي وحد كان من الركّاب قال لينا : هاد السيد راها فايتة 6 شْهور او هو كيبيع فالقهوة والعجيب فالأمر ديما عندو جوج باكيات فْيدّو.؟
المهم وصل الكار لبلاصة بنجْدية .نزلنا من الكار.ميمون سوّلني فين يمكن نمشيو ؟
جاوبتو : غادي نمشيو عند واحد خالتي ساكنة فحي بوركون
_ تعرف الدار ؟
_ لّا ولكن اللي عندو اللسان ما يتْلفْ

يتبع غدا ان شاء الله


 

bouchaib56

::مراقب مغربي ::

غير متصل
#46
رد: قصة بالدارجة : حتى واحد ما زاد معلّم

اجمل قصة اتحفنا بها الاخ حوميدي تعبر بجد عن طبيعة تواصل معلم يرسل لاول مرة ليدرس في البادية
ويبدأ النضال من اجل خدمة ابناء الوطن الوطن المغربي
وذون ملل ولا عياء ولا تذمر والابتسامة العريضة على ملامحه
فتحية لمعلمنا بالبادية بالجبال بالصحاري
احييه واقبل رجليه قدم الكثير من التضحية من اجل فلذات اكباذنا
فمن يقوم الان دقيقة ليحييه ويكرمه؟
 

Houmidi59

::الفارس المغربي ::

غير متصل
#47
رد: قصة بالدارجة : حتى واحد ما زاد معلّم

حْنا ماشيْينْ ونْسَوْلو حتى وصلنا لواحد الزنقة طويلة مْعمْرة بيسْرياتْ (épiceries)...صراحة زنقة كلها حركة ونشاط.وأنا نقول لصاحبي : هادي هي الزنقة المعلومة.دابا شوف معايا النمرة 114 .
دغي لقيناها.جايا فواحد الباطيما عالية يمكن فيها 8 ديال الطبقات.ميمون حيت مسكين كيَعْرج قال لي : آه يا خويا شكون اللي غادي يْطلّعْني هاد ليطاجات كولهوم؟
خاصكوم تعرفو أن قلال الباطيمات اللي كانو فيهوم السانسور وهادي راها واحدة ماشي منهوم
جاوبتو غير صْبر تقدر خالتي تكون يا الله فالطبقة 2 أو 3 .
عندو الزهر خالتي كانت تسكن فالطبقة الأولى .المهم طلعنا .دقّيتْ فالباب .خالتي هي اللي استقبلاتنا .دخلنا.للأسف لوْلاد ماكانوش .كانو بجوجهوم مْسافرين.يا الله كاين معها بنت وحدة.
يعني الَخّوت ما يمكنش نْباتو .خاصنا نْرجعو أو نْشوفو شي أوطيل.
المهم شْربنا القهوة والحليب واكلينا حلويات متنوعة.
هاديك هي نَضنا باش نْودعوهوم .خالتي مسكينة قالت لي : ولدي حميد علاش ما تباتوش معانا هاد الليلة ونْقَصْرو جميع؟
_ ما عْليهش خالتي راحنا شوية مزْروبين حيت خاصنا نرجعو للرباط هاد لعشية
ميمون حتى هو فاهم : عندو الحق أخالتي حتى أنا خاصني نرجع هاد الليلة لبركان
_ اوى خاطركوم ولكن لابد ترجعو شي نهار.نِّيتْ يكون هنا عبد الحفيظ .شْحال كان باغي يْشوفكوم
_ إن شاء الله خالتي
خرجنا من الباطيما.غير بعَّدْنا دارْ فيا ميمون الجن : خويا حميد ، فين دوركي (دابا) غادي نْباتو ؟
_ نْشوفو شي أوطيل يْكون رخيص
ميمون شَفتو بْحال الى كان يْفكّر فْشي حاجة .
_ صافي خويا حميد لْقيتْ لك الحل .كاين واحد خيْتْنا عندها نْباتو
_ شكون هاد خيْتْنا هادي ؟
ضحك ميمون واحد الضحكة يمكن إلى سمعوه السكان ديال درب لمعاريف كاملين.
_ خويا حميد راني نْسيتْ ما حْكيتْ لك على المغامرة التالية ديالي
_ واه ؟
_ مين جيت فالكار تْلاقيت مع واحد البنت هي بركانية وتسكن في كازا.
_اوى ؟
_ اوى فرحات مين عرفتني من بركان
_ اوى ؟
_ اوى ، عْطاتْني العنوان فين هي تخدم
_ مزيان أرا نْشوف
قْريتْ العنوان هادا مطعم (للأسف ما عاقلْشْ على الاسم ديالو).لكن فين يمكن يكون ؟ الله علم .
سوَّلْنا شي ناس دايزين.والو حتى واحد ما قْدَرْ يْدَلْنا على الجهة اللي يمكن نمْشيوْ ليها.
شي وْقيتة بانتْ لي نْسَقْسي (نسْألْ) بوليسي.البوليسي عْرَفْنا باللي ماشي من لبلاد. قال لينا :
غادي تمشيوْ فالطوبيس رقم ....(ماعاقلش) مين توصْلو لْكاراج علال.غادي تلقاوَه فداك الشارع.
شْكرْناه ومشينا نْقلْبو على الطوبيس .الحمد لله بزاف ديال الناس كيمشيوْ للمحطة ، لهادا دغيا لقينا الطوبيس.
الطوبيس الَخّوت كان عامر .قبل ما نطَّلْعو قلت لميمون الجن حْضي جيوبكم
المهم نْزلنا فْكاراج علال ، تْمشّينا شي شوية ولْقينا المطعم .دخلنا لْقيناه تقريبا خاوي.كاين شي ناس كيشربو داك الشي اللي ما يتْسمّاش.
واه ريحة خانزة ...هادي أفْلس من مرميطة ديال اللوبيا بايتة 3 أيام.
قلت لميمون : أجي نخَّرْجو .هاد الريحة زوكْماتْني (دَوْخاتْني)
يا الله فاش خْرجْنا ، سوَّلتو : هاد الآنسة عندك سْميَتْها ؟
شاف فيا واضْحك : واه ...والله ما عندي سْميتْها
_ واش راك تْزَعَّقْ (تتْفَلّى)
_ أخويا حميد مطاح ليشْ على البال
_ واخّا ، وْهي تعرف اسْميْتَكْ ؟
_ واه
_ اوى كمْلاتْ الباهية.ها واشتا (أشنو) غادي نْديرو .غادي تدخل للمطعم وتْغَوَّت : واش كاين شي وحدة هنا تعرف ميمون لعْوجْ ؟
ميمون ما عجبوش الحال : انا ما قابلش
_ ما كاين مشكل .ياالله شوف لينا شي حل
_ الحل ديالك زينْ ولكن الجملة خاصها شوية ديال التصحيح
_ كيفاش زعما ؟
_ نْبدْلو ميمون لعوج ونْكولو : مميمون لْبركاني لْبو كوصْ (beau gosse)
مْشاتْ خويا ميمون
ميمون دْخل للمطعم وبْدى يغَوَّت الجملة المعلومة.شي شوية جاتْ عندو واحد خيَّتْنا غليضة وسمرا .لله يسْتر فَكْرتني بواحد الجملة قالها فركوس "ني جولي ني فوني طو (ni joli ni venez tôt) بمعنى آخر لا زين لا مْجي بكري.
شَدّت ميمون من يدّو (ماشي من اليد اللي تْوَجْعو هههه) وقالت لو : واه أخويا البركاني فْضحْتينا.أجي بْركْ هنا غادي نْجيبْ ليكْ ماتكول.
ميمون ديما مولا خير : راه مْعايا ولد خالتي
_ الى كان بْحالْ فيكورْتَكْ (كَمّارْتكْ) غير عيَّطْ لو دغْيا قْبَلْ ما حتى هو يفضحني
أنا حيتْ سْمعت كولشي ، قرّبْتْ من ملكة الجمال وقلت ليها : مساء الخير آنستي كيْسْعدْني.......
قاطْعتْني : كْلَسْ وباراكا عليا بالفوحان .ولد خالتك واخّا هْبيل راه جايب راسو عليك
_ عندك الحق مْبَصّاح ما جايبْشْ رجليه بجوج مْعاه
بيني وبينكوم ما غاديش تفهم بحال هاد الجمل .أنا اختصاصي فهاد النوع ديال الجمل .لهادا مْشات الأخت ودغيا جابت لينا جوج طْباسا ديال لبْروشيت (brochettes) مع جوج طباسا فْريتْ
. (frites)

قبل ما تمشي قالت لينا :غادي تبْقاوْ هنا حتى نْجي باشْ ندّيكوم للدار.راه عندي شْغول مهم خاصني نقضيه.
ميمون ردْ عليها : لكن ما تْعَطْليشْ علينا
_كون هاني . شوفو الى باقيين جيعانين غير طلبو اللي بغيتو .حتى نْجي ونْخلّصْ




يتبع غدا إن شاء الله
 

Houmidi59

::الفارس المغربي ::

غير متصل
#48
رد: قصة بالدارجة : حتى واحد ما زاد معلّم

بْقينا فْلبْلاصة ديالنا تقريبا جوج ديال السْوايع.لكن مامْشاتْشْ خْسارة.الحاجة اللّولى كْلينا حتى شْبعنا .خويا ميمون يمكن الى كارنيفور (carnivore) ، كل ما نْحسّو بالجوع يْدومانْدي لبْروشيتْ.خوكم ديما تابعو اللي بْغاها حتى أنا باغيها.شي وقيتة السَّرباي قال لينا : أخوتْنا راه لبروشيت تْقاضى شوفو شي حاجة أخرى.ميمون الجن ماشي من العاكْزين جاوبو : اوى بْغينا لكبدة.
الصراحة عندو (كنتكلّم على السرْباي)الزْهَرْ ، فْديك لوْقيتة جاتْ البركانية.مْشاتْ ديريكت عند السرباي .الظاهرْ خْلعْها .شافت فينا ، فالحقيقة راها خْنْزْراتْ فينا .شي شْوية اعطات للسيد جوج وْراقي ديال 100 درهم.بحال الى فهمتْ بأن ما زال خاصها تْزيدلو ولكن الله غالب
المهم جات لعَنْدنا وقالت لميمون : أخويا واشْ داركوم ما
يْوكْلوكْش ؟
ضحك ميمون وردّْ عليها : يا أختي أنا كتَفْتحْ لي الشهية مين نْسافر .كونْ نجْبر نكول حتى لحجَرْ
_ الله يستر .تاكولْ كي الغول ، كاعْ ما بايناشْ عليك
شافت فيا وانت أخويا اللي طايح عليا كي لبْروصي ؟
_ أنا غير مشجِّعْ
_ تبارك الله جوج بحالك غادي يْسيزيوْ المطعم كامل
المهم ضحْكات وقالت لينا : سَمحو ليا ماكنتش مصْوابة معكوم.يا الله نمشيو للدّار
خْرجنا من المطعم وتمشّينا واحد 100 مترو.شافت فميمون وقالت لو : يمكن ناخْدو طاكسي أحسن
ميمون مسكين الرجل اللي باقا صْحيحة دغيا عْياتْ : واه
أختي راني عْييتْ
هي هاديك ارْكبنا فطاكسي أحمر .تقريبا شي نصْ ساعة ديال الطريق .هد خيْتْنا ساكنة فلْقُنْت الخالي ديال كازا.
ميمون بْحالْ الى دخلو الخوف.هي هاديك قال لي غير بَشْوية باش ما تسمعناشْ: خويا حميد .عالم الله فين غادي تدّينا.يمكن غادي تكْريسينا(تقتلنا).
جاوبتو : ما تْخافش .الى حْماضتْ الدعوة راه عندنا النيميرو (الرقم) ديال الطاكسي ومن الفوق ياك راه شافنا مول المطعم والسرْبايْ.
_ عندك الحق
شي شوية وقفات الطاكسي فواحد الزنقة مظْلامة.نْزلنا .خلْصات مول الطاكسي .وقفات حْدى باب ديال العمارة وقالت لينا : اسمعو يا دوك المساخيط ما تْحشْمونيش مع عمّي.راني تْكلَّمْتْ لو عليكوم .انتوما جيتو من بركان تْقلْبو على الخدمة وانا كنعرفكوم حيت انتوما جيران ديالنا قْدامْ.
ميمون هو للي ردْ عليها ما تقلْقيش .انا وخويا حميد فاهمين
قبل ما ندخلو ، سوَّلْتها : سَمْحي لي الله يخَلّيك .حْنا من المفروض نعَّرْفوك ، ياكْ ؟
_ هادي باينة .ياك ما خويا أنت كامبو؟
_ يمكن أختي على حقّاش لا أنا لا ميمون نَعَّرفو سْميْتك
شافت فيا وهي منداهْشة : اسمح لي أخويا هادي عندك فيها ...أنا سْميْتي زبيدة
_ زوجة هارون الرشيد ، تْبارك الله
شافت زبيدة فميمون ، بْحال الى زعما تقولّو : ياك ما صاحبك زانْزان(أحمق)
حتى ميمون ما فاهم والو .
قالت لي : ما فْهمْتكش أخويا
_ هدا هارون الرشيد خليفة عباسي كان متزوج بزبيدة
_ ايه أخويا أنت قاري
_ نْعامْ أختي : قاري ونْقَرّي
_ زعما أنت معلّم ؟
_ معلّم ومْعَلَّمْ
_ اوى اسْمح لي الى قلت لك كامبو
_ ما كاين مشكل ، راه بعدا كالْها واحد الفيلسوف بْكري
_ أشنو قال أخويا حميد ؟
_ قال الكامبو مينْ يْشوف راسو فْلَمْرايا يَسْحابْ لو راه يتْكلَّمْ مع كانبو
زبيدة التزْمت السْكات ، ميمون الجن هو اللي زاد قال لي : هاد الفيلسوف كي سْميْتو ؟
_ سْميْتو سيدي بَلْيوط
زبيدة شافت فيا بْحال الى ما فاهمة والو .المهم دخلنا واطْلعنا الدروج.الحمد لله ميمون راه عندو الزْهر .غير الطبقة الخامسة .يا الله وْصلْنا ميمون طاح فالعتبة ديال الباب.
اللي حلْ لينا الباب عمْها.واحد بولحية يمكن الى عندو ديك التْمانين عام.رَحَّبْ بينا.دخَّلْنا للصالون.بْقيتْ أنا وميمون غير بوحْديتنا تقريبا شي نصْ ساعة ، لأن زبيدة دغيا خرجات .عمْها دْخلْ لواحد البيت وسَدْ على راسو.
ميمون زاد خاف : اوى خويا حميد زبيدة سمْحات فينا ومْشات .عالم الله فين طحْنا
_ ما تْخافش .ياك هداك غير شيباني .ما غاديش نْحيرو مْعاه.
المهم أحْضي راسك وكون موجود الى وقعت شي حاجة
_ واه خوك ما عندو ما ينفعك حتى الى هْرب غادي يْديرْ لك المشاكل
_ ما تخافش وتْوكّلْ على الله
هي هاديك ، ربي ديما مع الناس اللي يتوكلو عليه.شي شْوية دخْلو جوج شُبّان عندهوم ما بين 18 و20 عام.غير شافونا ، رَحبو بينا وقالو لينا : باينا أنْتوما جيران زبيدة ؟
رد عليهوم ميمون : نْعام أخويا ونْتوما أوْلاد عمْها ، ياكْ ؟
لكْبير فيهم جاوبنا : أنا عبد القادر(*) وهدا خويا عبد الباسط (*)حْنا من بركان ورْحلنا هادي فايتا 15 عام .انا ما نعقلْ والو على بركان
_ بركان راه زعما عاصمة ...العاصمة ديال لكْليمانْتين
_ تبارك الله
بْقينا نتْكلْمو على بركان وعلى مَّاليهْ.دازت تقريبا ساعة .جات زبيدة وْحطّو لعْشا.كْلينا وشْبعنا.
المهم قالت لينا زبيدة : واش جاكوم النعاس حيت شافت ميمون بْحال الى كان يْغَمَّضْ عينيه
جاوبناها باللي فعلا راحنا عيّانين
قالت لينا تَبْعوني .مْشات للبيت اللي كان فيها عمْها وحلّأتْها وقالت لينا : دخْلو هنا تْنَعسو .هاهو لفراش .
سدّات الباب .
ميمون حيت كان فيه لعيا دغيا طاح فالسَدّاري اللي حْداه ونْعَسْ.
خوكم الحوميدي ما جاهش النعاس .عْرفتو عْلاش ؟ خونا بالله عمْ زبيدة موتور ديال الشخير ، يمكن الى ديزيل (diezel). الحاجة التانية ، الضّو ما كاينش .عْييتْ نْشوف ما قْشَعْتْ والو.الحاجة التالتة مْشيتْ نْحلْ الباب لْقيتْها مشْدودة بالساروت.
دار غريبة يا لخّوت واصْحابها حتى هوما.شي شوية سْمعت خوتنا بالله كتضحك هي ووْلاد عمها .إيه ناشطين لك مع ريوسْهوم.
شي شوية الشيباني بْحال الى بْغى يْجيف : الشخير ديالو تْبَدّلْ .الصراحة خْلَعْني..قلْتْ مع راسي : صافي خيْنا يقدر يعْكُلْها (يْموت) واللي فالدار يَتَّهْمونا باللي حْنا اللي قتلناه.
مْشيتْ عند ميمون وهَزّيتو باش يْفيق.والو ميمون كي الحجرة يتْكَرْكبْ ، بْلا ما يْفيقْ.
المهم بْقيت عاسْ شي جوج سْوايع.شي شْوية زبيدة مْشات تنْعس ، اولاد عمْها طْفاو الضو ديال البيت .حتى هوما نَعْسو.
من بعد ما تسمع غير لَمّاتر (les moteurs)ديال الشخير : الشيباني من جهة معاه ميمون ومن الجهة لخْرى لبْراكْنة بْجوجهوم.
الى بْقيت هاكدا غادي نتْصَطّى.وْأنا تْجيني فكرة واعرة كنت قْريتها فواحد المجلة وهي ان بنادم اللي يشْخر ما عليك سوى تْحط لو أصبَاع يَديه فالما.دغْيا يسْكت .
الحمد لله زبيدة كانت اعطاتنا قرعة ديال الما مع كاس.
جرَّبت العملية مع الشيبوخ (الشيباني) فْلَبْلاصْ سْكَتْ.حتى مع ميمون نجْحت
بقى لي غير دوك الجوج شْخيرهوم كان شوية بْعيد عليا ، يعني نقدر ننعس
شي شوية كنت نحسب الخرفان (compter les moutons)، هي هديك طَحْت كاوْ
الصباح ميمون هو اللي فاق بكري .هو اللي فيّقْني : نوض أخويا حميد واش ولّيتي شْكارة ؟
زبيدة حتى هي فاقت مع النبّوري.حلّتْ علينا الباب وقالت لينا : صباح الخير.
حْنا نشَّربو القهوة ، اعتدرت لينا : سَمْحو لي الى سَدّيت عليكوم الباب .على حقّاش ما كنتش تايقة فيكوم
_ حتى يا أختي ما نعستش مزيان على ودّاش ما كنتش تايق فيكوم
_ اوى بجوج عندنا الحق
_ يمكن أختي ولكن كولشي من راس ميمون الجن
_ مالك خويا حميد أنا واشتا (أشنو) درْت
_ لا والو أنت بركاني وأنا بركاني (يعني باركة علي)



يتبع غدا إن شاء الله
 

Houmidi59

::الفارس المغربي ::

غير متصل
#49
رد: قصة بالدارجة : حتى واحد ما زاد معلّم

يا لله فاش فْطرنا ، ودّعنا زبيدة ومْشينا في حالاتنا للرباط.فالطريق قال لي ميمون : خويا حميد شفتك بْحال الى زربان
جاوبتو : خاصني نْبَعّد على هاد القوم شْحال ما قدّيتْ
_ أخويا مالك معاهوم
_ باز ليكْ رامْيِينَكْ كي الكلب وباقي أدّافع عليهوم
المهم بقى ميمون يَشْرح لي الفكرة ديالو ولكن انا كان خاصني نخرج من الدار البيضا باش ما كاين
وصلنا للرباط مع ديك العشرة ديال الصباح.ميمون مشى لدار عمّو اللي ساكنين فْحيْ التقدم ، وأنا مشيت عند الواليد.
لقيت الواليدة شوية مقلقة حيت هي اتّاصْلات بْخُتْها فْكازا وقالت ليها باللي ولدها لعزيز عبد الحميد راه ما بْغاش يْبات عندها.
على كل حال الوالدة خاطيها لفضول وما سولتنيش فين كنت .هكْدا ما زدناش فالهدرة
تْقاضات العطلة وخاصني نرجع لوجدة .ديك الليلة رْكبت فالقطار ديال الليل .من الصدف العجيبة تْلقيت مع واحد الوجدي .دغيا تعارفنا.الحديت ديالنا كان على وجدة وسكانها.
شي وْقيتة بقينا نْلاحضو شي مناضر شحال ضحْكاتنا ، مناضر ديال شي ناس ناعسين وْ حالّين فَمْهوم ، وْشي وحْدين بْحال الى يزَدْهو بْراسهوم.
الصراحة كان التْران عامر لدرجة ، أن بزاف ديال الناس كانو واقفين.حْنا كنا منهوم.
مين وْصل القطار لفاس، بزاف ديال الناس نزْلو.كانت مناسبة باش نرتاحو واخا كانت الساعة تقريبا الجوج ديال الصباح.
السفر كان متعب ، على داك الشي طحت كاو وما فقت حتى وصلنا لوجدة.صاحبي حتى هو نْعس قبل مني.
فالمحطة ديال وجدة ودّعت صاحبي الوجدي بعدما اعطاني العنوان ديالو .خونا بالله يسكن في لازاري.
كي العادة مْشيت عند خالي باش نشوفو ولكن المهم نوصّلْ لو سلام الواليدة.
يا لله شربت كاس قهوة ، ضْربتها بنعسة ما فقت حتى لْخمسة ديال لعْشية.غير غسلتْ وجهي ، مشيت عند صاحبي ادريس.من الزهر لْقيتو فالدار.بالدخْلة ، عطاني الرسائل الجداد اللي وصلوني.
لْقيتْ عليهوم نظرة ، كولهوم بْنات.هاد المرة مراسلة جديدة من جزر الموريس .باقي عاقل على الاسم ديالها : شاهناز.فالرسالة الاولى ديالها قالت لي باللي هي مسلمة وكتفهم شوية العربية.رسْلت لي الصورة ديالها .من الشّوفة الاولى باينة جميلة .صاحبي ادريس قال لي : خويا حميد مين تْرد عليها ، قل ليها واش عندها شي خُتْها تبغي تتراسل معيا
ديك الليلة قصْرت عند صاحبي الزاوش .هاد المرة ما كانوش عندهوم الضياف.
فالصباح مشيت للجوطية باش نشري ما نحتاج.مع الوحدة ركبت فالتْران ماشي لتاوريرت ولكن لمحطة العقرب.من هديك لمحطة مْشيتْ على رجلي مدة ساعة ونصف باش وصلت لدوار اولاد سليمان.
المهم فالدرسة لاحظت باللي اصحابي المعلمين بقي ما جاو.شي شوية سمعت كلب ينبح .بعدها سمعت شي واحد يْعيَّط عليا بسْميْتي.
الحاج قدور جا وفيدّو صينية مغطية .
_ مرحبا بسيدي عبد الحميد.كي خلّيتي الوالدين ؟
_ الحمد لله كولشي بخير
_ ها لعشا ديالك وبالصحة والراحة
مشى وْخلّاني.الظاهر الحاج قدور عْرف باللي راني عيّان من السفر.
االمهم حيَّدْتْ لَغْطى على الصينية.لقيت ماكلة زينة : قْنية بالبطاطا وزلافة ديال الجبن
كليت وشبعت .من بعد شْعلت الراديو باش نسمع الأخبار.
شي شوية جاني النعاس ومْشيت في سابع نومَة.
فلْغدْ ليه جا عبد العزيز وعلي.بعد العناق والسلام، تكلمنا على الاحوال ديال العائلة .
شي شوية ، الاخوان مْشو يْنعسو حيت السفر عيّاهوم.
يوم الاثنين استأنفْنا العمل ديالنا.
لعراضات حتى هوما بْداوْ.هاد المرة الواد ما بْقاشْ يْجيبْ السفرجل ولكن اللفت.
الصيادة حتى هي حْلات .ولّينا نمشيو للواد تقريبا 5 ديال المرات فالأسبوع
لفقيه ما بْقاش يْجي لعندنا .حتى حْنا قليل فين كنا نمشيوْ للجامع.
دازت هاد المرحلة عادية .جا شهر ماي والتلاميذ بْداوْ يتغيبو .كل واحد كان يقول لينا باللي راه يْعاون أبّاه اما فلحْصاد او راه مقابل لغنم.المهم التلاميذ تقريبا شدّو العطلة.
حدت مهم فديك الفترة وهو زيارة السيد المدير لأولاد سليمان.
واحد النهار كان علي مشى لتاوريرت .هي هاديك دازْ عند المدير.هي هاديك خَبْرو السيد المدير باللي راه ناوي يْديرْ شي زيارة لينا باش يكتب تقرير يْهمْ الترسيم ديالنا.
علي جابو فالموطور .فْديك لوقيتة اللي وصل كنت كنْقرّي التلاميذ الرياضيت.باقي عاقل كان عندي الدرس على النقود.
باش التلاميذ يفهمو الدرس كان عندي أوراق نقدية وورقية بيها شْرحْت الدرس.
المدير تبّع الشرح ديالي بْواحد الاهتمم كبير.فْلَخَّر قال لي : سّي عبد الحميد الطريقة ديالك عجْبتني بزاف.
هو فالحقيقة كان كيْشوف لفلوس اللي كانو فْيدّي.
المهم مشى من بعد فتَّش علي وموراه عبد العزيز.مين سالا كانت الساعة الجوج ديال لعشية.
شي شوية عيّط لو لفقيه باش يتغدى عندو.انا الوحيد اللي عْرضني باش نتغدّى معاهوم.
فلعشية المدير ما بْغاش ينمشي مع علي فالموطور ديالو.سوّلتو علاش ؟ رد علي أنه جاتو الدوخا وكان غادي يتْقيّى.
الحل بالنسبة ليه نْوصلو انا بْلاموطو ديالي.
كانت ربما مناسبة باش نمشي مرة أخرى عند الفاميلة ديال صاحبي ادريس
مين وصلت لعندهوم ، ما لقيت غير حفيظة اللي قالت لي تفضل ادخل.خوكم الحوميدي عندو بزاف مع الأصول ، رد عليها : سَمحي لي غادي نْدير شي دورة حتى تْجي الوالدة ديالك
فعلا درت واحد الساعة وارجعت.خرجات حفيظة وقالت لي نفس الجملة السابقة.فالحقيقة ما بغيتش ندخل ومشيت للمرة التانية نْدير شي دورة.بعدها رجعت .خرجات عاود تاني حفيظة.هاد المرة ما قالت ليشْ ادخل.هي هاديك خْرج خوها وقال لي : تْفضّل سّي عبد الحميد
دخلنا لصّالون وقال لخْتو جيبي لينا القهوة
شي شوية جات حفيظة وحطّات الصينية ومْشات وهي كتبتسم لي
شربت القهوة .خو حفيظة (احمد) فال لي اسمح لي واحد الدقيقة غادي نقضي واحد الغرض ونرجع دغيا
المهم قلت لو : تفضل
دازت تقريبا نص ساعة ، خونا بالله ما بانش.
وْانا نْعيق خونا بالله باغي يبني لي شي قالب مع اختو حفيظة.انا نفكر فالأمر وحفيظة دخلات لعندي
_ الله يْخليك حدّك تمّ
_ مالك أسّي حميد ما تْخافش انا باغي غير نتكلّم معاك
_ داك الشي اللي فراسك أنا عارفو
_ كيفاش ؟
سدّيت عليا الباب ديال الصالون.وقلت ليها سيري أختي شوفي مع من تتكلمي انا فيا النعاس



يتبع غدا ن شاء الله
 

Houmidi59

::الفارس المغربي ::

غير متصل
#50
رد: قصة بالدارجة : حتى واحد ما زاد معلّم

دازت واحد النصْ ساعة ، جا أحمد وقال لي : ملك أخويا حميد سادّ على راسك الباب ؟
جاوبتو : لوْقر مزيان
شاف فيا وسْكتْ
بطبيعة الحال : قررت من داك النهار ما نعاود نجي عند هاد القوم.وبالفعل ماعمرو ما تلاقيت بيههوم.يمكن دازت تقريبا شي 10سنين كنت كنْقرّي فتاوريرت.جات عندي واحد لمْرا بْحال الى عقلتها .مين تْمعنْتْ فيها ، عْرفتها : حفيظة .هي عقْلاتني ولكن ما بغاتش تبيَّن لي.
المهم كانت جات تْسَوّل على بنت ديالها زعما تقرى عندي.الغريب فالأمر انها كتشبه ليها وانا ما عمرو ما كنت لاحظت الشبه .
باعتباري رجل تعليم درت معاها الصواب وقلت لها كوني هانية انا المهمة ديالي وهي التربية والتعليم.
مشات ولكن الحمد لله ما عمرو ما رجعات.كنت نْشوفها وقت الخروج والدخول حْدى الباب ديال المدرسة كتْساين بنتها.
فالصباح قلت لمّالين الدار : بسّلامة والله يْهنّيكم.
حفيظة بْحال الى حشمانة قالت لي : اوى مرّة مرّة زرنا أسّي حميد.
ردّيت عليها : موحال أخْتي هد آخر نْهار تْشوفوني فيه.
ما كدبْتش .ما عمرو عتّبْتْ لديك الجهة.
صاحبي ادريس حْكيتْ لو اللي صار لي معاهم.المسخوط مات بالضحك وقال لي : هوما هوما ما عمرو ما يتْبَدْلو
شفت فيه متْعجَّبْ : كيفاش زعما خويا ادريس
_ داك الشي اللي وقع لك راه وقع لشي وحدين من الفاميلة
_ خويا هاد خيتنا الى بغات تتزوج ما عليها تكتب اعلان فركن الزواج
_ شكون اللي غادي يقبل عليها
بقى الجواب ديالو بدون تعليق.
على كل حال قبل ما نرجع لأولاد سليمان ، مشيت عند المدير .لقيتو كيكتب التقرير ديالنا.غير شافني قال لي : جابك الله .التقارير موجودين خاص غير التوقيع ديالكوم
_ اوى اعطيهوم لي منها نقراوهوم ومنها نوقعوهوم
المهم اعطاني التقرير وشي مذكرات وقعتهوم فلبْلاصة
قبل ما نمشي فْحالي سوّلتو واش كاينشي جديد ، قال لي باللي العام الجاي يمكن يْغيٍّر لي الفرعية بواحد الفرعية قريبة من المدينة وجاية مع الطريق.
خبر زين ، عْجبني بزاف.بالنسبة للمكانسة قال لي هوما غادي يبْقاو فبْلاصتهوم.
خليتو ومْشيت عند عبد الله ربما نلْقى شي بْراوات .
فعلا ، لْقيت يا الله واحد العشرين رسالة .
مول الحانوت ما عمرو فْحياتو شاف بْحال هاد العدد ديال الرسائل يْجي لبْنادم واحد.شْرحت لو باللي انا شخص مهم من الرباط ولكن مافهم والو.
خلّيتو حاير ومْشيت في حالتي لأولاد سليمان.
مين وصلت كان علي وعبد العزيز كل واحد شاد قسم خدّامين .غير شافوني ، خرجو بجوجهوم
_ اوى كاين شي جديد ؟
_ كاين التقارير ديالكوم
_ فينا هوما خويا حميد
كل واحد فيهم شد التقرير.يمكن اول حاجة هي النقطة اللي كانت تهم هوم
علي بان فرحان : الحمد لله أربي .عْطاني 12 .صافي خوكم مْرسّم
عبد العزيز حتى هو باين فرحان ولكن بْحال الى ما عجبوش الحال
_ مالك اخويا عبد العويز ياك ما ما أعْطاكش ال12 ديالك ؟
_ بالعكس عندي ال12 ديالي ولكن .....
_ ولكن أشنو ؟
_ واش كاين شي رسائل ؟
_ الرسائل والو ، غير انت خويا علي جاتك بْرية من مكناس
_ لله يْسمعنا خبار الخير
شد لبرية وفْتحها.خليتو يقراها ودخلت للقسم باش نستراح قبل ما نْشْد الخدمة مع الطْناش والنصْ.
دازت الأيام كي العادة .الجديد ان السكان ما بقاوش يْجي عندي حيت جا وقت لحْصاد وما بْقاوش مْساليين.
الامتحانات قربات وخصوصا بالنسبة للشهادة.
هديك هي قررت نخدم معاهم نهار الجمعة فالصباح والسبت فلعشية باش نراجع معاهوم كل ما يتعلق بالامتحان.
النتيجة كانت جد مشجعة داك العام من 8 ديال التلاميذ فالقسم الخامس نجحو 7 .يا الله واحد هو اللي سْقط.
باقي نعقل فشهر جوان كانو الانتخابات ديال 82 (الانتخابات الجماعية) كانو دايرين صندوق فأولاد سليمان.كنت انا هو المشرف عليه.
العجيب فالأمر كان مرشح واحد هو الحاج قدور .يعني المنافسين ما كاينش
وخّا هكْدا ، الحاج قدور جا للمدرسة وبْقى يقول لكل واحد قبل ما يْحط الورقة: غير تنتخب ، سير نيشان للدار باش تفطر .زعما الحاج كان مْوجد ليهوم فطور فاعل تارك.
شي وقيتة الحاج كان يغبر باش يْشوف واش الضْياف خاصهوم شي حاجة.
المهم نهار الانتخابات سالا وخاصنا نْديرو عملية الفرز .حيتْ ما كاينشْ الضو مْشينا لتاوريرت باش نحسبو الأصوات
بلا ما نقول ليكوم ان الحاج قدور هو اللي نجح ...هادي باينة
يوم 30 يونيو وقّعنا المحضر وكل واحد فينا توادع مع صْحابو .علي وعبد العزيز وْأنا مْشينا لأولاد سليمن باش نْجيبو حْوايجنا.كان الجو حار وناشف وكان شهر رمضان .يعني التنقل صعيب .
مين وصلنا كنت غادي نْجيف بلعطش..عْييت ما نْكب الما على راسي دغيا ينشف.السّي محمادين عْرض علينا باش نبقاو ونباتو ، لكن حْناا كان خاصنا نمشيو
فعلا غير وصلنا لتاوريرت درْت لاموطو باكاج وبْقيتْ نسْتنّى التْران اللي يْجي من وجدة ويمشي لرْباط.
التْران يمشي من تاوريرت مع السَبعة ، يعني مع المغرب .فْطرت فالمحطة غير بلحليب وشوية تمر.
الحمد لله مورا المغرب كان الجو رائع.لقيت متعة فالسفر واخّا ان الهبش (البشر) كان بزاف.ديك لوقيتة كانت الدرجة كاتريام (الاقتصادية) لكراسى لوح والشراجم فيهه الشباك بحال الحبس .
لكن اللي كان يعجبني هوما اصحاب كاسكروط: ها اصحاب القهوة ، ها مول الخبز والبيض، ها مول الليمون.المهم مع رمضان وخاص بنادم يتسحَّر ، الخير كان موجود
مين وصلنا للرباط كانت الساعة الخمسة يعني الصباح .
ركبت فالطاكسي وصلاتني لليوسفية فين تسكن العائلة ديالي.
حلّيت الباب بشْوية بلا ما نفيَّقهوم وطحت فلفراش (كاو)

يتبع غدا ان شاء الله الحلقة الأخيرة
 

Houmidi59

::الفارس المغربي ::

غير متصل
#51
رد: قصة بالدارجة : حتى واحد ما زاد معلّم

دازت العطلة الصيفية شبه عادية الله مّا حدثان مهمّان (بالنسبة ليا) الأول وْقع أثناء التواجد ديالي بشاطئ المهدية.كنت مشيت رفقة العائلة باش نتبحْرو ونبدلو الجو.هناك تْلاقينا بواحد الجار قديم ديالنا.كان مع الزوجة ديالو.من خلال الهضْرة مْعه عرفنا بأنه حارس عام بواحد الاعدادية بوجدة.
الهضْرة جابت الهضرة ووصلنا للموضوع ديالي : زعما خوكم باغي ينتقل لوجدة.السيد الحارس العام فرّحنا وقال لينا : ساهلة ماهلة .
فهمنا بأن السيد يقدر يْنقّلني فرمشة عين.لكن ماشي دابا حيت راحنا فشهر غشت والادارات معروف عليها فهاد الشهر تكون عطلة والبيرمنونس(permanence) ماعندها ماتقضي.
على هاد الشي خونا بالله اتّافق معايا باش نْجي عندو فالبداية ديال شهر شتنبر وغادي يْطرّق هاد المسمار غير بمكالمة هاتفية.
الواليدة هي اللي فرحات بزاف .مسكينة ما خلّات ما شكراتهوم ودْعات معاهوم.الواليد عرض عليهوم ياكلو الحوت فواحد المطعم مختص فالأسماك.يمكن الى تْقامت عليه لعْراضة بغْسيل الفندق.
المهم رجعنا وكلنا فرحانين
الحدث الثاني هوالرابيل اللي جاني .الصراحة تقرقيبة كبيرة .حيت انا مرضي الوالدين أعطيت للواليد النص ديالها ودوّرت مع الواليدة والأخوات والاخوان واحد عمي حتى هو واللي بقا تكّسيت بيه .
فبداية شهر شتنبر مْشيت لوجدة وانا راشقة لي حيت غادي نخدم فوجدة. المهم مشيت عند خونا بالله بعدما شْريت حلويات .اوى الخوت ما خاصنيش ندخل بْيدّي خاويين
خونا بالله استقبلني فدارو .بعد الاسئلة على أحوال العائلة قدّم كاس عصير مع حلويات (ماشي للي جبت لو )
المشكل خونا بالله ما بغاش يدخل فالموضوع. انا غير صابر .شي وقيتة صافي : ديسيديتْ (قرّرْت).
_ أخي البكاي راني جيتك على الانتقال ديالي لوجدة
_ الانتقال ؟
_ راك كنت كولت لي غادي نّقْلك لوجدة
_ اسمح لي هاد شي صعيب ومن الفوق خاصو الوقت
_ ولكن ....
_ شوف أسي عبد الحميد خلّيلي المعلومات ديالك وانا غادي نْشوف.ما يْكون غير الخير ان شاء الله
سبحان الله العظيم السيد الحارس العام ما بقاش عاقل داك الشي اللي قال للواليد.عّرفتو كانت تبان لي نقْلب عليه الطابلة أو ندْفلْ عليه.
تصورو السيد ضَار فيا بْلا حْيا بْلا حشمة .
المهم لْعَنْت الشيطان(فالحقيقة لعنت جوج شْياطن هو وابليس) ومْشيت في حالاتي.
فين يمكن لي نمشي ؟ عند صحابي ؟ ما يمكنش حيت راني معصَّب.الحل هو نمشي عند خالي الحاج .هو ولمرى ديالو ينعسو بكري .هي هاديك ما كاينش اللي غادي يبرزطني.
لْغدْ ليه صونيت للواليد فالكوميسارية فين هو خدّام.اخْبرتو بالأمر اللي وقع.
الواليد بْحال الى زْعف ولكن ما قال لي والو من غير غادي يشوف شي ناس يمكن يقدرو يديرو شي حاجة فالانتقال ديالي.
جا ت 16 شتنبر اليوم ديال توقيع المحضر مْشيت لتاوريرت.كان عندنا اجتماع مع المدير.الاخوان كلهوم كانو حاضرين.السيد المدير افْتتح الاجتماع بالترحيب ومن بعد قْرى علينا التنظيم التربوي الجديد.التعيين ديالو كيف ما كنت قلت ليكوم ولّى فرعية سْميتها اولاد زايد.هاد الفرعية ماشي بعيدة على تاوريرت ، يا الله 15 كيلومتر.حتى هي يْدوز عليها الواد.
فالنهار التاني قرّرْت ندير شي دورة لعين المكان.مْشيت فالموطور.بعدما قطعت الواد وصلت لواحد القرية صغيرة .اول حاجة هي زيارة المدرسة.
المدرسة أحسن من ديال ولاد سليمان هادي لبْني ديالها واخّا قديم ولكن نقية وواسعة.زعما هادي ديال الاستعمار.شفت الحجرات بانو لي مْتيسْعين ونْقيّين.
شي شوية جا عندي واحد الرجل كبير ، باين عليه الوقار.قدّم لي نفسو باللي هو الحاج عبد الرحمان.
قال لي : واش أنت هو الاستاذ الجديد؟
مين عْرفْ باللي أنا هو، قال لي : تْفضَّلْ نْورّيك السكنى ديالك.
اتْبعتو .تْمشينا واحد ال200 متر ، وصلنا لواحد الدار فيها جوج بيوت وكوزينة ومْراحْ (ساحة)
دخلت وتْفرّجت على الدار.الصراحة عجباتني بزاف.
_ كي جتك الدار يا أستاذ؟
_ دار ما بيهاش
_ لكن راه الضو ماكينش
_ ما عْليهش
_ الماكلة غادي تْوصلك كل نهار فالطناش والنص مين تخرج من الخدمة وفلعشية مورا المغرب
_ الله يخْلف عليكوم
_ هاد النهار غادي تتغدّى مْعايا
_ ان شاء الله
لَغْدا عند الحاج عبد الرحمان كان رائع .كنت غير أنا وهو.ماكان حدْ معانا.
ليامات لْوالى كنت نمشي للمدرسة باش نستقبل التلاميذ وفلعشية نمشي نقصّر عند الحاج عبد الرحمن ونْباتْ عندو
الصراحة الحاج عبد الرحمان رجل ديال الخير
شي يوماينْ جا استاذ خور .هاد الاستذ كان عندو المستوى الاول والثاني وْانا كان عندي الثالث والرابع والخامس فرنسية.كان خاص يلتحق بينا الاستاذ ديال العربية. المهم الشهر تقريبا غادي يموت والاستاذ ما بانش.
واحد النهار جا عندنا المدير وقال لي : سّي عبد الحميد غادي تشد العربية والفرنسية
ردّيت عليه : ولكن بزاف عليا .التلامد هنا كْتارْ ماشي بْحال فأولاد سليمان
_ انا عارف وخاصك تقبل والا يمكن لك ترجع لأولاد سليمان
هادي هي الهضْرة اللي ما تعجبنيش
_ شوف أسّي الصغير (اسم المدير) انا غادي نبقى هنا .غادي نقرّي غير الفرنسية.بالنسبة للعربية ، شوف اللي يقرّيه لك هنا
المهم تْزايدنا فالهضرة.خونا بالله هدّدْني باش يكتب بيا.انا مْعاند أكتر منّو ، جاوبتو : اكتب وما تقصّرش
سبحان الله العظيم حدث مهم وقع واحد3 أيام مورا زيارة المدير.جا عندي معلم وقال لي سير دغيا لعند لمدير راه جاك انتقال
خوكم بالله سمح فكولشي لحوايج ديالو الحاجة اللي أدّى معاه هي الحبيبة ديالو اسمهان
ركبت فالموطور ومشيت ديريكت عند المدير
_ مبروك عليك اسّي عبد الحميد راهوم عينوك فتاوريرت
الصراحة بْحال الى تصْدمت شي شوية.خوكم كان عوّال يخدم في وجدة وما عمرو ما كان ينوي يخدم فتاوريرت
المهم شدّيت التعيين وقريتْ سْميَتْ المدرسة: مدرسة الرازي المختلطة.
من عجيب الصدف الادارة متْلاصقة معاها ما علي غير نْدير 10 ديال الخطوات وْانا راني فيها
مْشيت دخلت للمدرسة الجديدة.استقبلني واحد المدير شوية كبير فالسن.بعدما رحّب بيا قال لي راه عندك المستوى الأول هو اللي باقي
قْبلت وْأنا ما عارفش بأن هاد القسم فيه 55 تلميد وكولهوم مْكلْخين.حيت خوتنا فالله اختارو التلاميذ النجباء ورْماوْ لي الديشي(déchets).
هادي قصة أخرى ديال معلم لمدينة.ما غاديش نْزيدْ اكثر .فقط غادي نقول ليكوم اني أخبرت الواليد اللي قال لي : دابا تهنّيتي من تكرفيصْ لعروبية.اوى اجمع شوية لفلوس باش حتى انت أدّير دارك

نهاية القصة الأولى : مذكرات معلم فلعروبية
 
أعلى