قصة بالدارجة : حتى واحد ما زاد معلّم

Houmidi59

::الفارس المغربي ::

غير متصل
#21
رد: قصة بالدارجة : حتى واحد ما زاد معلّم

الحاج قدور هاد المرة تْهَلّى فينا مزيان.يا الله فاش دْخَلّنا جاب لينا أتاي مع كاوكاو واللوز والبيسطاش.لفقيه أسّي محمّادين كان حاضر معانا.كانو شي ناس حاضرين معانا ، عرفت فيهم جوج ديال الناس : صاحبي كبريتي مول الكاميو ومول الحانوت على ودّاش كنشريو من عندو الشمع والزيت وشي تْفاتفْ.
المهم لفقيه قرى شوية ديال القرآن ، مرّة مرّة كان يتحفنا بْشي أمداح .أصحابي شفْت فيهوم بانو لي غير كَيَتْخابْرو بيناتهوم.المشكل كانو بْعاد مني باش نسمع آش كيقولو.لكن غير بالأيشارة قلت ليهوم يَسكتو شي شوية راهوم الناس عاقو بيهوم .هي هاديك فهمو راسهوم ، اوى سدّو مركومْهوم (فمهم)
واحد لوقيتة هْمسْت فالودنين ديال لفقيه(حيت كنت أحْداه)
_ أقرى لينا شوية من سورة المائدة أسّي محمادين
_ أشنو الجزء للي بغيتي نقرى ؟
_ اللي كاين
_ علاشْ بغيتي نقراها أسّي عبد الحميد
_ باش الحاج قدور يفهم راسو ويْحط لينا نتعشّاو
لفقيه ابتسم عندك الحق الساعة راها التسعود وانا فهاد لوقيتة كا نْكون كنشخر
فعلا لفقيه غير سالا من قراءة جزء من سورة البقرة والذي يقول "كلوا واشربوا حتى يتبيّن لكم الخيط الأبيض من الأسود" جابوا لينا الشلال.جا الحاج قدور وقال لينا : سْيادنا ديرو مجامع ديال 8 ديال الناس
صاحبي علي وصاحبو عبد العزيز كانو معايا فالمجمع.لفقيه حتى هو كان مْعانا.
لعْشا كان رائع : فالبداية كْلينا الشربة (الشعرية) ديال لسان الطير .يا خوتي شْحال مْعمْرة لحم .ما نكدبش عليكوم الى قلت ليكوم كنت كنْصيد فالْحيمات بحال شي صيَّاد.
جاشي واحد خْدى الطبسي (خاوي يْسَطْوي)
من بعد جابو لينا طبسي فيه اللحم بالسفرجل .أنا صراحة ما عمرو ما كْليتْ السفرجل وكانت فرصة باش نذوقو.إيه كون شافتني الواليدة غادي تجْدَب عْليا وها اللي غادي تقول لي :
دْوي المسخوط نْهار اللي نْطيّبْ السفرجل ما تبغيش تاكلو وتمشي تكول البيض بماطيشة ودابا راك كتْعمّر بيه لكْريشة
ضحكت ونا كنتفكر الواليدة.شاف فيا لفقيه وابتسم : أسي عبد الحميد ياك ما تفكرتي شي حاجة ؟
ردّيت عليه : إيهْ تفكّرتْ الواليدة (لله يسمح لينا من الوالدين) ما عمرو ما كْليت السفرجل ديالها وهاني دابا كاناكول فيه .ياك ما الدعاوي ديالها يا الله فاش وصلو؟
صاحبي علي قال لي وهو يهزْ في راسو : أخويا حْنا مْوالْفين مع كولْشي .اللي جا كنكْلوه غير يكون حلالا طيبا
_ واه باينة عليك أخويا علي شَفْتك بحال الى نَقّيتي الجهة ديالك ومْشيتي دابا لَسّيكتور ديالي
_ ياك خويا ما عندكش مع السفرجل ؟
_ واه ولكن حَيَّدْ يَدّكْ من هاداك الطرف ديال اللحم
صاحبنا عبد العزيز جاوبني : خلّيه ياكول ياك ربّي عْطاه.زايدون هاديك راها غير شحمة يا الله فيها فْريتيتة ديال اللحم
_ انا بْحال الى سمعت باللي الشحمة حرام
صاحبي علي انداهش : مالك أصاحبي خالعْ فيا .وقتاش كانت الشحمة حرام ؟
خوكم الحميدي غادي يفسرها ليهوم: الشحمة مضرة للجسم واللي يضر راه حرام .ياك أسّي لفقيه ؟
_ نعم أسي عبد الحميد ولكن .....
_ ماخاصشْ بْنادم يْكَتَّر منها .ياكْ أسّي محمادين
_ نعم أسي عبد الحميد ولكن ....
_ الشحمة ديال العَنْزي شْوية واعْرة .ياكْ أسّي لفقيه
_ غير شي شوية ولكن ...
هاد المرة صاحبي علي طْلع لو الخز : صافي أخويا انا ما باقيش واكل الشحمة .هانا نْحَط هاد الطرف ديال الشحمة
_ جيب نْشوف
وانا نكلو
_ كيفاش تقول لينا حْرام وأنت تاكل الشحمة ؟
_ بْغيت نقول حرام غير على صْحاب اللحية


يتبع غدا إن شاء الله








 

bouchaib56

::مراقب مغربي ::

غير متصل
#22
رد: قصة بالدارجة : حتى واحد ما زاد معلّم

قصة حوميدي مشوقة لذا وجب على كل من قرأها يدلي برأيه
انا شخصيا أراها امتع من فيلم سينمائي لما فيها من فرجة
وفي بعض الاحيان اتخيله يخاطبنا كقراء
جميل منك اخي حوميدي هذه القصة بالدارجة لاول مرة في تاريخ القصة بالمنتديات العربية
لك مني الف تحية
والكل هنا ينتظر منك متابعة تسلسل القصة



هاحوميدي كيكنش لينا في قصة واعرة كاينة والا لا؟:v9v9net_117:
ايوا خوتنا صفقوا عليه معانا:23_34_3:
 
التعديل الأخير:

Houmidi59

::الفارس المغربي ::

غير متصل
#23
رد: قصة بالدارجة : حتى واحد ما زاد معلّم

كانت الساعة العشرة مين خرجنا من عند الحاج قدور : علي ، عبد العزيز ، لفقيه وأنا. أسي محمادين (ما عندوش اللحية ) قال لصْحاب اللحية :
_ أنتوما مع الإخوان المسلمون ؟
رد عيه عبد العزيز : لّا أسيدي حْنا مع حزب الله
لفقيه بْحال الى ما مفهمْش والو : واش حزب الله ديال لبنان ؟
_ أهْ ياوَدّي آش دّانا لبنان .حْنا غير فالمغرب
_ واعْلاش مْربْيين اللحية وأنتوما ما زالين شباب ؟
هاد المرة علي هو للي رد على لفقيه : على حقاش السنة النبوية كتقول هكْدا
المهم بان ليا هاد الموضوع غادي يحْماض .أرى نْديرو لو شوية كنور.على هاد الشي الحوميدي هو اللي غادي يْكَمّل النقاش: _ شوف أسي محمّادين ، أنا غادي نشرح لك : هاد جوج خّوت مالقاوش لالام ديال لحْسانا فالحانوت ، اوى ربّاو اللحية
عبد العزيز ما عجْبوش الحال : ياك أخويا عبد الحميد ردّيتينا ضحكة عند اللي يسْوى واللي ما يَسْواش
_ أشهدْ أسي محمادين راهم عليك
_ صافي أخوي ما قلنا والو .أنت عزيز عليك تْلاقي السْلوكا وحْنا ماباغيين صْداع
أما علي قال لي: الله يْسامحك
_ آمين خويا علي
هاديك هي لفقيه قرّب من الخيمة ديالو او هو يودعنا ودْخل في حالاتو.زدْنا فالطريق وحْنا ساكتين .وصلنا للدار وقلت ليهوم : تصبحو على خير
رد عليا عبد العزيز : وعليكم السلام ورحمة الله تعالى وبركاته.
المهم دخلت لبيتي ولبست البيجاما ودخلت فالفراش .شي شوية شْعلْت الراديو باش نسمع شوية الأخبار ونتْموسقْ شي شوية.وباشْ يجيني النعاس قْريت واحد الجزء من قصة بوليسية كانت عندي.شي شوية جاني النعاس وطحْت كاوْ
الصباح بكري ، سمعت لحسْ: هادو التلاميذ صابحين على النبوري.الساعة يا الله السبعة.المهم غْسلْت وجهي وسخَّنْت الما باش نشرب قهوة حيت جبْت معايا نيسكافي.
فتحت باب القسم وقلت للتلاميذ صباح الخير أوليداتي
ردّو عليا : أصباح الخير أسويدي
واحد فيهم كان فيَدّو صينية ديال أتاي ، واحد حْداه صينية خْرى فيها جوج طباسا ديال لعسل والسمن وخبزة صغيرة
بجوجهوم قالو لي : الحاج الميلود صيفَطْلكْ لفطور
_ دَخْلو هاد الخير للقسم
مشيت قرّبت من السكنى ديال صْحابي .يظهر باللي ما زال ناعسين.دقّيت الباب .عاودْت الدقّان.والو.
شي وقيتة بْحال الى سمعت شي همْس .من بعْد سمعت عبد العزيز يْغوّت : أخويا عبد الحميد ها العار الى ما تخلّينا نَعْسو شي شْوية
_ واش ما شبعتوش نعاس ؟ ياك ما لحْداش ديال الليل وأنتوما ناعْسين
_ أنت اللي شْبَعْتي نعاس .أحنا قُمْنا الليل فتلاوة القرآن والصلاة.
شو فْ لَكْ لخّوت دابا كيْدفعو الهدْرة.زعْما هوما متدينين وتابعين طريق الله.
قبل ما نْخَلّيهوم قلت ليهوم : نَعْسو مع خاطركم ، خلّيوْ ليا الخدمة .ياك العمل راه عبادة او أنا غالط ؟
المهم قلت للتلاميذ ديالي يدخلو .التلاميذ ديال علي وعبد العزيز دخّلتهوم للقسم اللي حّدى ديالي وقلت ليهوم يخرجو كتاب القراءة ويقراو بيلّما يفيقو الأساتذة
رْجعْت لقسمي وبْديت الخدمة .بما أني كنت كنْدَرَّسْ الفرنسية ، دَرْت ليهوم مراجعة فالرياضيات.أعطيتهوم شي تمارين فالجمع والطرح والضرب.لقيت باللي الأغلبية ديالهوم خاصهوم الضرب...بْغيت نقول زعما لعصا.
واحد فيهوم قال لي : أسْويدي لميوطا اللي كانو هنا ماقرّاونا والو
_ واشْتا (أشْنو) كانو يْديرو بالسلامة ؟
_ كانو يْخَلّيونا فالقسم ويمشيو للسكنى ديالهوم
_ إوى ؟
_ كانو يشربو تاي ومن بعد يمشيو يصيْدو الحوت
_ باينة أنتوما كنتو كتْنَقيوَه وتغَّسْلوه
_ وااااه أسويدي
باش ما نكتروش فالهدرة قلت ليهم : اسمعو أوليداتي أنتوما غادي نْبَدّي معاكوم من اللّوَّلْ.راكو إينيقْشيعابْلْ فالحساب
مساكين غير هزّو رْيوسْهوم.شافو فيا .شَفّوني هادْ لَخْلا.
المهم عَيَّطْتْ على 4 ديال التلاميذ وقلت ليهوم : خودو السطل الصغير وعمْروه بالحجر الصغير (الكَياصْ)
واحد فيهم قال لي :سْويدي واش غدي نلعبو لَبّاط ؟
_ بْحال داك الشي أولدي
عشرة مينوت دازت ، جابو لحْجر .عْطيت كل واحد مجموعة ديال لحجر وقلت ليهوم غادي نديرو عمليات الجمع والطرح غير بلحجر.
_ أجي أولدي أنت شحال عندك من حجرة ؟
_ عندي أسْويدي 16
_ وأنت أوليدي شحال عندك ؟
_ عندي سويدي 19
_ مزيان.دابا أنت اللي عندك 19 عْطي لصاحبك من هاديك البركة 9
شفت فالثاني : شوف أولدي صاحبك زادك 9 ديال الحجرات .هادي اسْميْتْها عملية الجمع.دابا أشحال عندك من حجرة ؟
التلميذ ماقْدرْش يْجاوب
_ غير أحسب اللي عندك غادي يْبان لك الجواب
_ صافي أسويدي عندي 25
رجعت للأول :أنت اولدي أعْطيتي لصاحبك 9 ديال الحجرات .يعني هاد العملية أسميتْها عملية الطرح.قول لي أوليدي : شْحال بقى ليك من حجرة ؟
التلميذ دغْيا حْسَب: باقي لي يا ستاذ 10
دابا شقتو غادي نخدمو غير بلحجر ونحسبو .آش ظْهر ليكوم أوليداتي
هاديك هي وزّعتوم مجموعات ديال جوج التلاميد وكل واحد فيهم كان يعطي لصاحبو مجموعة ديال لحجر .من بعد كل واحد فيهم يحسب.
على كل حال دوّزْنا ساعة .فالأخير فهمو المعنى ديال الجمع والطرح.
واحد فيهوم قال لي : سْويدي بْغيتْ نَدّي مْعايا لَحْجَر باش نتْعَلَّم
_ خود اللي بغيتي ولدي.ياك لحجر فابور
التلاميذ ضحْكو
جات الاستراحة وخوتنا ما زال ناعسين.
المهم شْربت أتاي بعدما سخَّنْتو .فْديك الساعة جا عندي الحاج قدّور وقال لي بعد السلام : أسّي عبد الحميد تْبارك الله عليك.راك نشيط .التلاميذ شْحال كيشكرو فيك
دَرْت راسي بْحال الى ما فاهم والو : رشّقتْها لهوم حيت عْطيتهوم لحجر باش يلعبو
_ لاواه أسويدي البَزْ قالو لي الميط كيعرف يْقرّي
المهم شربنا أتاي وكْلينا الخبز مع لعسل والسمن.
_ أسي عبد الحميد البارح كنت باغيك تكتب لي رسالة لولدي
_ ماشي دابا راه عندي الخدمة ولكن لَعْشيا أجي عندي ونكتبها لك بكل فرح وسرور
_ بارك الله فيك .أنت باينة ولد العائلة وماشي بْعيد تكون شْريف
_ عندك الحق سي قدّور .خاصني غير لكابوس والنجمة
بطبيعة الحال ، الحاج ما قفّل والو(حتى أنتوما باينة عْليكوم)
صفّقت للدراري باش يدخلو : يا الله أوليداتي غادي نْديرو شوية لفرنسوية
بّديت نتْكلّم معاهوم بالفرنسوية.بانو لي حالّين فَمْهوم.
_ ملكوم أوليداتي؟
_ أسويدي ما فهمناكش.باش راك تهدَر؟
شفْت فيهوم مبهوض : واه ماعمرو ما قريتو الفرنسية
_ ما عمرو يا سْويدي
_ واخا غادي نلعبوشي شوية
_ بلحجر اسويدي
_ الّا أولدي
_ غادي نْديرو التمثيل

يتبع بحول الله غدا
 

Houmidi59

::الفارس المغربي ::

غير متصل
#24
رد: قصة بالدارجة : حتى واحد ما زاد معلّم

استعملت طرق كثيرة باش نْعَلّم هاد التلاميذ.المهم النتيجة كانت ما بيهاش.على كل حال كاين شي وحدين يْسلْكوها لا فالفرنسوية ولا الرياضيات ، لكن شي بعْضين غادي يبْقاوْ ديما سْطولا أو كما يقول المثل الشعبي "هاد ما طحْنَتْ الرْحا
جات لحْداش ونَصْ، خرَّجْتْ التلاميد من القسم :
يا الله أوليدتي سيرو فحالكم ما ترجعو حتى للجوج باش تقراو العربية .
في ديك الساعة خوتنا المسلمون يا لله فاش فاقو .
_ صباح الخير
رد علي عبد العزيز : وعليكم السلام
شفت فيهوم وضْحكت .علي قال لي : خويا عبد الحميد فالاسلام ما عندناش لا صباح الخير لا مساء الخير هاديك ديال النصارى واليهود
_ واه ...وقْتاش هاد الشي كان ؟
_ الاسلام هو الإسلام ومن بكري الناس كيقولو السلام عليكم ويردّو وعليكم السلام
_ اسمح لي أخوي أنا من نهار نعْقلْ على راسي في الصباح عندي صباح الخير وفي العشية مْسالْ الخير
_ اوى خاصك تْبَدّلْها الى بغيتي ترجع مسلم
_ عْلاه واش ما رانيشْ مسلم ؟
_ أنت مسلم ولكن خاصك الإيمان
_ تبارك الله دابا خاصني نقول السلام عليكم وعليكم السلام وْراني مومن ، ياك ؟
عبد العزيز هو اللي جاوبني : أخاي عبد الحميد خاصك اتّبّع السنة
_ عرفتو واش يْجيكوم مْليح راكو ضيّعْتو التلاميذ .هاد الصبحية راهوم ما قْراوش.خاصكوم تْعَوضو داك اللي فات
طبعا ما ردّوش علي .مشاو كل واحد دْخل للقسم ديالو .ما لقاوش التلاميذ .
جا عندي علي : أخاي حميد.فين مشاو التلاميذ ؟
_ خويا علي :ا لتلاميذ من السبعة كانو فالمدرسة .واش بغيتيهوم يبْقاوْ حتى تْفيق على خاطرك ؟
_ ولكن يا الله فاش فَقْت من النعاس
_ اوى خويا خاصك تْفيق بكري
المهم بقينا فالهدرة الخاوية.هي هاديك جا الحاج قدّور .شاف علي واقف أحّدايا .قالّو : صباح الخير اسي علي .كيف أصْبَحتو ؟
_ صباح الخير سيد الحاج .الحمد لله ولكن شوية عيّانين من التقْصيرة ديال البارح
_ فين مشاو التلاميذ ؟
جاوبتو : مْشاوْ لديورهوم
_ ولكن ماقْراوش العربية
_ _ راك تْشوف الحاج راه الأساتذة كانو عيّانين
_ اوى تْبارك الله .انا غادي نمشي نعلم المدير
_ عندك الحق اسّي قدّور وما تنساش تقولّو يعطيك استعمال الزمان ديالْنا
الحاج قدّور مْشى في حالاتو .جا عبد العزيز بحال الى ما فْراسو والو : مالو اسّي قدّور؟
ردّ عليهْ علي : ياك سْمعتي كولشي ؟
شاف فيا علي : دابا آش المعمول ؟
_ عندكوم الموطور .سيرو عند المدير .راه عندو الإدارة فْتاوريرت.منها حجّة ومنها زيارة.
جيبو المراجع واستعمالات الزمان والماتِرْيال ديال الخدمة
_ المتريال ديال الخدمة ؟
_ مالكوم أصْحابنا ؟ المسطرة والمزواة والبركار والطباشير والصويرات
ضحكو بجوجْهوم : أخويا أنت قاري علينا بزّاف
ردّيت عليهوم : بْحال الى نْسيتو زعما باللي أنا أستاذ وأنْتوما غير مْيوطا

يتبع غدا
 

Houmidi59

::الفارس المغربي ::

غير متصل
#25
رد: قصة بالدارجة : حتى واحد ما زاد معلّم

دازت يومِْين ، كنت مع التلاميذ ديالي في القسم.دْخل عندي الحاج قدور.بعد السلام خْبرني بأن السيد المدير باغي يْشوفنا ضروري فأقرب وقت وما كْرهش تكون غدّا.أعطاني واحد الورقة كما يقول المصريون على شاني وبسْ.
في ذيك لوقيتة كان خونا علي وصاحبو عبد العزيز كيْقَرّيو بجوجهوم في الحجرة الثانية.
خوكم عبد الحميد قْرى الرسالة بعدما الحاج قدّور مْشى في حالاتو.للأسف ما رانيش مْدَكّرها ولكن المضمون ديال الرسالة ما زال في راسي.المدير إسيادنا ما عجْبوش الحال من تصرفات أصحاب اللحيةوقال لي غادي نْصيفط ليهوم استفسار لأنهم ما كيقوموش بالواجبات ديالهوم.العجيب فالأمر هو أنه عيَّنِي مدير مساعد ديال الفرعية.بالمناسبة هاد الفكرة ديال مدير مساعد كانت من بكري غير او كان ماكانتش مْفَعْلة يعني ماكانش عليها تعويض.
المهم مْشيت عند خوتنا لمْيوطا .لْقيتْ خويا علي بارَكْ يشرح للتلاميذ ، أما خونا علي كان زعما يقرى شوية القرآن
_ السلام عليكم ورحمة الله تعالى وبركاته
شافو فيا بجوجهوم : أهلا سّي عبد الحميد
_ اوى ردّو غير السلام بعْدا .واش حْنا ماشي مَسَّلْمين ؟
قال لي علي : وعليكم السلام
زاد قال لي : واش كاين شي خْبار ؟ شَفْنا الحاج قدور كان عندك
_ إيه أخويا علي ويظْهر أن المدير راه مْوَجّاد ليكوم استفسار
_ كيفاش زعما استفسار ؟
شرحت ليهوم بطريقتي الخاصة: كالْكوم المدير واش راكوم في أولاد سليمان باش تخَّدْمو ولّا تَتْعَبْدو ؟
_ ما يمكنش يقول بْحال هاد الهدرة .
_ عندك الحق هو قالها شوية قاسحة .اوى سْيادنا قال ليكوم ما راكوش تْقَرّيو التلاميذ وما شي بْعيد الحاج قدور وصَّلو كولشي
_ آش المعمول دابا ؟
_ غدّا إن شاء الله نمشيوْ لتاوريرت
شاف فيا عبد العزيز : وأنت فاشْ غادي تمشي ؟
_ ما تضْربْ همْ كاين اللي يْوصّلْني حتى لتاوريرت
_ إوى حْنا غادي نسَّبْقوك فالموطور
جات وقيتة الحراسة .خَرَّجْنا التلاميذ يرْتاحو شي شوية.دخلت للقسم ديالي باش نْسَخّنْ القهوة.هي هاديك جا عندي صاحبي علي : أجي تشْربْ معانا القهوة راها موجودة
_ ما عليهشْ حتى أنا عندي ما نشْربْ
علي شدْني من يدّي : والله حتى تْجي تشْرب معانا
ما كان عليا غير نتَّبْعو
فالبيت اللي ساكنين فيه كان عبد العزيز يْعَمَّر الكيسان .مَدْ لي كاس وزاد قال لي : تْفَضَّل خويا عبد الحميد .هادي كيكة جبتها معايا من عين تاوجطاط وهادي زْبيدة ديال البكري
سبحان الله العظيم لخّوت رْطابو .هادو ناوْيينْ شي حاجة .المهم دارْت بْحال الى ما عايقش بْشي حاجة.كْليت وشربت .كْليت ليهوم نَصْ الكيكة والزبيدة طاحْت عليها كي لَعْمى.بانو الخوتْ غير كيْبْتاسمو (ابتسامة صفرا لعْيادو بالله)
علي قال لي : سّي عبد الحميد الى بْغيتي غير خود داكْ الشي اللي بْقى من الكيكة
_ حتى الزبدة ناخودها
عبد العزيز هو اللي ردْ عليا : خودها خويا عبد الحميد بالصحة ولهْنا
شَفْتكوم بْحال الى باغْيينْ مَنِّي شي حاجة
علي جاوبْني : حاشا غير اوكانْ شفْنا راسنا باللي دَرْنا لافوطْ معاك
_ ياكْ بَعْدا ؟
_ نْعامْ خويا عبد الحميد ومن دابا راحْنا خوت وغادي نتْعاشرو بتْلاتَة بينا
_ سمحو ليا أنا طالع عْليكوم فلَغْراد(le grade) يا الله فاش جاتني الترقية من عند المدير

_ ما فْهمْناش .كيفاش زعما ؟
_ أنا دابا المدير ديالكوم فهاد الفرعية
علي وعبد العزيز بانو بْحال الى فرحانين : مبروك ، مبروك تَسْتاهل ماأكْتَر
_ شوفو راه الاستراحة سالات يا الله نمشيو نخّدمو
عندك الحق أسعادة المدير
كل واحد مْشى لقسمو .فْديك لوقيتة جا عندي كبْريتي :
_ صباح الخير سّي عبد الحميد .واش عندك شي مَشْية
لتاوريرت ؟
_ عندي ولكن غَدّا
_ مزْيان أسويدي.غادي نْدوز عليك مْع التسعود .ياك مزْيانة ؟
_ توقيت زين هي هاديك نكون فْطرْت
_ خلّيتَك على خير
مشى مول الكاميو وأنا كنقول فنفسي : هاد السيد ما يكون غير الحاج قدور خَبرو بالسفر ديالي
جا وقت الخروج ومشاو التلاميذ .خاصني نتواضّى باش نْصلّي الظْهورْ.
يا الله ساليت من لَوْضو ، جا عندي لفْقيه :
_ أسي عبد الحميد ، غادي تتْغَدّى عندي ان شاء الله.
_ الأساتذة حتى هوما ؟
_ أسّي عبد الحميد الله يهديك .هادوك الجوج ما غاديش نتْفاهمو معاهوم
_ شكون اللي ما غاديش يتْفاهم مْعاهوم ؟
_ الجماعة كاملة
_ ولكن هادو أساتذة راهوم يْقَرّيوْ أولادكوم
_ شوف سّي عبد الحميد، ما يْقَرّيو حتى زَفْتة .النهار كامل او هوما ناعسين
_ دابا راهوم يقريو
_ أنت اللي راك تْقَرّي بْنِيْتَك .هادوك جاو هْنا باش يتْعَبْدو
باش ننْهي النقاش : واخّا أسّي محمادين.غير سير أنا لاحق بيك للجامع باش نْصَلّيو الظهور
فْديك لوْقيتة جا عندي عبد العزيز ومْعاه علي : سمعنا كولشي
جاوبتْهوم : دارتو فيا خير
المهم ما بغاوش يمشيوْ مْعايا للجامع .خلّيتْهوم ومشيت باش نْصلّي ونَتْغدّى عند لفقيه

يتبع غدا إن شاء لله




 

bouchaib56

::مراقب مغربي ::

غير متصل
#26
رد: قصة بالدارجة : حتى واحد ما زاد معلّم

ممتنون بالشكر لحوميدي في هذه القصة المشوقة
استمتعنا بلذة فيلم مسلسل عن الثقافة
المغربية الأصيلة
ننتظر منه المزيد
 

Houmidi59

::الفارس المغربي ::

غير متصل
#27
رد: قصة بالدارجة : حتى واحد ما زاد معلّم

غير صلّينا الظْهور ، مْشيت مع لفقيه باش نتْغدّاوْ.أسّي محمادين واخّا ماعندوش هو رجل كْريم وفكّرني بْحاتم الطائي.هاد خونا بالله دْبح لضْيوفو العَوْدْ ديالو وسّي محمادين نفّد حكم الضيافة فلْعَلْعولْ (الديك) ديالو.زعما هو اللي كان يْفَيْقو فالصباح بكري.
شَفْتو أخّوتي لمْغاربة شْحال كْرامْ وعلى الخصوص فالبادية .مساكين كيْفرحو بالبرّاني بزاف.لفقيه حتى هو ماشي من البلاد وها هو كيفْرح بالضيف.داك النهار بْغى مسكين حتى هو يْدير لعْراضة على حقّاش كنت كتبت لو رسالة لْخوه فالبرانس.
المهم كْلينا وشبعنا وحْمدنا الله وانا نقول ليه : الله يخلفْ أسّي محمادين . رد علي : بالصحة والراحة يا سّي عبد الحميد اُو غيرْ اقْبَل علينا.هدا هو الموجود
أنا من طبعي دائما صريح .لهادا قُلْتْلو : أسّي محمادين ، دابا شْكون اللي غادي يْفَيْقك مين الديك الله يرحمو مات ؟
لفقيه شاف فيا وضْحَكْ : سّي عبد الحميد ويْني أنمت نَمْرة.
عاوَدْ تاني ضْحكْ وْقال لي : فالحقيقة هاداك الديك بْدى يشرفْ (يكبر فالسن) ، المشكل شي مرّات ما كَيْوَدَّنْش فالوقت
_ اوى الزغبي (ماشي نوال) أعْدمتيه
_ على وجه الأستاذ ديالنا ماشي خْسارة
_ واخّا أسّي محمّادين ولكن خاصّك شي رافايْ (réveil)
_ عندك الحق هاد السوق نشري واحد.راهوم قالو لي كاين شي ساعة فيها الدجاجة
_ واه ولكن ما تْعَوَّلْشْ عليها
_ كيفاش ما نْعَوّلشْ عليها ؟
_ زعْما توْلدْ لك البيض
لفقيق طاح بالضحك : أسي عبد الحميد أنت كضّحك أكثر من بلْقاس وعبد الجبار لَوزير
_ هداك الشّي موْهبة
المهم ودّعت لفقيه حيت قرْبات الجوج والتلاميذ غادي يْكونو فالمدرسة.فعلا لقيتهوم .جاوْ يَجْريوْ لْعَنْدي.واحد فيهوم قال لي : أسويدي لَميوطا مْشاوْ فالموطور.
واه .هادو زعما فين يْكونو مْشاوْ ؟
سوَّلْت واحد التلميذ كبير ، جاوبني : أستاذ راهوم مْشاوْ لتاوريرت
_ ولكن ما عندهومش فين يباتو ومن الفوق ما غاديش يلْقاو المدير
_ أسويدي سْمعْتْهوم يقولو باللي غادي يْباتو فْسيدي شافي
_ بْغاوْ يْكَمْدو لعْظيماتْ
_ لّا أسويدي
_ آه...
_ سْمعْتهوم يتكلْمو على شي واحد سْميتو الحمداوي
بْقيتْ نْخَمَّم شي شْوية : صافي هاد السي الحمداوي كيخدم فالحمّام (سيدي شافي)
_ نْعام أسويدي
المهم التلاميذ ديال علي وعبد العزيز دخّلْتهوم للحجرة الثانية وقلت ليهوم غادي تكتبو داك الشي اللي فالسبورة حيت بانتْ لي مكتوب فيها الدروس.
رْجعْت للتّلاميذ دياولي باش نْقَرّيهوم.هاد المرة كانو التلاميذ ديال المستوى الخامس.خْدَمنا شوية الرياضيات وشوية الفرنسية .
جْوايَهْ الربْعة صيفَطْهومْ لَدْيورهوم
_ اسمعو مزيان غدّا ما غاديش تْجيو تقْراوْ راهْ عنْدنا اجتماع فتاوريرت
بعدما خرجو التلاميذ شْعَلْت البوطا باش نْدير شي كاس أتاي .
انا ديما عندي الزْهَرْ.شي شْوية سْمَعْتْ شي واحد يْعَيَّطْ عليا.خْرجْتْ من القسم.بانتْلي واحد البنت كبيرة : أسْمحْ لي أسويدي
بّا كالكْ أجي تَتْعشّى عنْدنا .
شفْت فيها .بْحال الى ما فاهم والو.هي تْرَدّ عليا : أنا خوتْ (الأخت) ماجيد

_ ماجيد للي يقرى عندي فالرابع ؟_ نْعامْ أسويدي
_ ولكن ما نعْرفش الدار
_ غادي يْجي لْعنْدك خويا مور لعْشا
_ واخّّا.بْالسلامة أبنتي


يتبع غدا إن شاء الله







 
التعديل الأخير:

Houmidi59

::الفارس المغربي ::

غير متصل
#28
رد: قصة بالدارجة : حتى واحد ما زاد معلّم

[font=&quot]يا الله فاش صلّيت لعْشا ، جا ماجيد ومْعاه أبّاه[/font][font=&quot] :
_ [/font]
[font=&quot]مْسالْخير سْويدي.راك موجود باش تمشي تتْعشّى معنا[/font][font=&quot]
_ [/font]
[font=&quot]راني موجود .يا الله بسم الله[/font][font=&quot].
[/font]
[font=&quot]مشيت معاهوم فواحد الطريق كولْها مظلامة .من غريب الصدف هاديك الليلة كانت السْما مْغيمة والكَمْرة ما بْغاتشْ تْبانْ.مرّة كنسمعو غير نباح لكْلاب [/font][font=&quot]([/font][font=&quot]حاشاكوم).مْشينا كما تقول جدتي (لله يرحمها) خير الله من الطريق.بحالْ الى بعّدْنا من الدوّار.المهم وْصلنا لواحد الدار منْعَزْلة فيها الضو ضاوي مزيان[/font][font=&quot] .
[/font]
[font=&quot]سوَّلْت مول الدار : عندكوم التْريسينْتي ؟[/font][font=&quot]
_ [/font]
[font=&quot]نْعامْ أسْويدي .راني شْريتْ موتور يخْدم بالمازوتْ[/font][font=&quot]
[/font]
[font=&quot]شفْت مورايا : هاد الصداع اللي كانسْمع ديال الموتور.الله يحْسنْ أعْوانكم ، راسْكوم غادي يتْفَلَّق[/font][font=&quot]
[/font]
[font=&quot]ضْحكْ أبّاتْ ماجيد : لّا اسويدي حْنا مْوالفين مع صْداعو[/font][font=&quot]
_ [/font]
[font=&quot]اسمح لي تْفَضَّلْ [/font][font=&quot]
[/font]
[font=&quot]دخلنا لواحد البيت طويل ومعمّر سْدادرْ وطْوابلْ.كانو شي ناس يتكلْمو.غير شافوني وقْفو [/font][font=&quot]
[/font]
[font=&quot]قلت ليهوم : السلام عليكم ورحمة الله تعالى وبركاته[/font][font=&quot]
[/font]
[font=&quot]كولهوم ردّو : وعليكم السلام أسّي عبد الحميد[/font][font=&quot]
[/font]
[font=&quot]واحد فيهوم عْرفتو مزيان ، قال لي : مرحبا بالرباط وبمّاليه[/font][font=&quot]
[/font]
[font=&quot]مشيت قرّبْت من السيد : أنت ماشي مول الطاكسي اللي أدّانا كورصا ؟[/font][font=&quot]
_ [/font]
[font=&quot]نْعام أسويدي [/font][font=&quot]
[/font]
[font=&quot]زاد قال لي : اللي ماعرْفكْ خسْركْ أسْويدي[/font][font=&quot]
_ [/font]
[font=&quot]اوى شي كورصة أُخرى ؟[/font][font=&quot]
_ [/font]
[font=&quot]لا أسويدي راني معروض للسْبوع ديال ولد أختي[/font][font=&quot]
_ [/font]
[font=&quot]زعما أنت من الفاميلة[/font][font=&quot]
[/font]
[font=&quot]ابتسم وقال لي : أنا ما كنْعَمَّرش معاهوم حيت أنا ساكنْ فلَمْدينة[/font][font=&quot].
[/font]
[font=&quot]واحد لوقيتة جا داخل لفقيه أسّي محمادين .غير شافني جاأحْدايا[/font][font=&quot]:
_ [/font]
[font=&quot]راكْ هْنا؟الحمد لله ، على حقّاش ما كنعرف حتى واحد يفهمني بْحالك[/font][font=&quot]
[/font]
[font=&quot]لفقيه قْرى آيات بينات من الذكر الحكيم وديك اللحظة شي واحد كان يْوجّد أتاي منعنع.[/font]
[font=&quot]المهم ، دازت ساعة ، حطّو لعشا.كْلينا وشْرينا. لفقيه قْرى لجزء الخير من سورة البقرة ودْعى معا أصحاب الدار والضيوف وتْفَرّقنا.[/font]
[font=&quot]اسّي محمادين اقترح علي باش نرافقو فالطريق .كان سْمع باللي غادي نمشي لتاوريرت ، هاديك هي أطْلبْ مني نْجيبْ لو شوية ديال الخضرة ولحليب[/font]
[font=&quot]وْصلت للمدرسة ، لقيت واحد الكلب (مسكين ) واقف بْحال العسّاس.غير شافني وجا لعندي يتْناقز.دخلت للقسم واعْطيتو شوية ديال الحرشة كانت باقية لي.لكلاب هنا ماشي بْحال المدينة ما يكلو غير للحم .هادو اللي لْقاوه يهَّرموه .تصورو شفْت كلب (حاشاكوم) كياكول النخّالة .والله العظيم الى جاتني عْجب.[/font]
[font=&quot]تْفَكّرت واحد العلبة ديال السردين كانت عندي .مْشيت فْتحْتها واعطيتها لو .ما نشقاش نقول ليكوم كْلاها في رمشة عين .فْرَحْ بزّاف وسْمعتو بْحال الى قال لي : سير سويدي تنعس أنا عاسْ عليكْ هاد الليلة[/font]
[font=&quot]ديك الليلة نْعستْ مزيان.فَقْت مع هاديك التَّسْعة .فْتَحْتْ باب القسم وأنا نلْقى صينية فيها لحليب والقهوة وخبيزة صغيرة معاها السمن ولعسل.[/font]
[font=&quot]ما بان لي حتى واحد .دخّلْتْ البركة باش ناكول على خاطري.[/font]
[font=&quot]شي وقيتة دازَتْ كنْت كنَتْصَنّتْ للأخبار ديال الراديو ، سمعت لَكْلاكسون ديال الكاميو: هدا كبريتي جا[/font]
[font=&quot]مشينا لتوريرت ودَزْنا على سيدي شافي.كانت الفرصة باش نتْلاقى مع أسّي الحمداوي.أعْيا فيا باش نشّربو شي برّاد أتاي.اعتدرتْ لو وقلت لو : اسمح لي راني شوية مشغول.خاصني نوْصَل عند المدير.اوهو يرد علي : غير دابا شوية كانو أصحابك هْنايَ الله فاش مْشاوْ فالموطور.يمكن تقَّدْرو تْلَحقوهوم فالطريق.[/font]
[font=&quot]بالفعل لْحقناهم قبل القنطرة ديال السكة الحديدية .ضوبلناهم ودخلنا لمدينة.هاديك هي مشيت عند المدير بعدما اتفقت مع مول لكاميو نكون عندو مع الجوج.[/font]
[font=&quot]المدير كان في ديك لوقيتة فالسوق .كان زعما يشري الخوردة.قالها لي واحد المعلم : واش راك غادي عند المدير ؟ راه فالسوق كيَتْخورَدْ مع راسو[/font]
[font=&quot]ردّيت عليه : ما عْليهش غادي نسْتَنّاه احدى باب الإدارة[/font]
[font=&quot]شي شوية وْصل علي وعبد العزيز.[/font]
[font=&quot]قال لي عبد العزيز : فين مشى المدير ؟[/font]
[font=&quot]_ مْشى للسوق[/font]
[font=&quot]_ يا الله أخويا علي حتى حْنا نَمشيو نشريوْ لينا شي قْوامج[/font]
[font=&quot]علي شاف فيا : تمشي مْعان خويا حميد[/font]
[font=&quot]_ لا أنا خاصني نتكلّمْ مع المدير[/font]
[font=&quot]_ اوى شُغْلك هذا[/font]
[font=&quot]فعلا مْشاو وبْقيت بوحْدي شي رْبَع ساعة.المدير جا وشافني:[/font]
[font=&quot]_ صباح الخير أستاذ عبد الحميد.راك جيتي دغيا[/font]
[font=&quot]_ ياك ما نمشي ونرجع حتى لْغَدّا ؟[/font]
[font=&quot]_ لا بْغيت نقول راك لْقيتي المركوب[/font]
[font=&quot]_ لْقيتو أسعادة المدير[/font]
[font=&quot]دخلنا للإدارة.المدير سوَّلْ على علي وعبد العزيز.خْبَرْتو باللي راهوم فالسوق يتْقَضّاوْ شوية خوردة.زَدْت قُلْتْلو : واش ما تْلاقيتيشْ معاهوم فالطريق؟ يا الله فاش مْشاوْ[/font]
[font=&quot]شي وْقيتة دخْلو علينا هازّين ميكات ديال الكسوة[/font]
[font=&quot]قال ليهوم المدير : تْفضْلو [/font]
[font=&quot]المهم تْكلمنا على الخدمة .المدير أعطنا استعمالات الزمان وقال لينا:[/font]
[font=&quot]_ راني شفتكوم بْحال الى كنتو كتخّدمو بلا قانون
[/font]

[font=&quot]ردّيت عليه : كيفاش بْلا قانون ؟[/font]
[font=&quot]ابتسم : ما تْقَلّقْشْ أسّي عبد الحميد.بغيت نقول باللي كان خاصكوم استعمال الزمن باش تخّدمو [/font]
[font=&quot]عبد العزيز شاف فاستعمال الزمن ديالو وقال للمدير : واه الجمعة ما فيهاش الخدمة .مزيان باش نصليو صلاة الجمعة[/font]
[font=&quot]المدير علّق على كلامو : ولكن السبت خاصكوم تخَّدمو[/font]
[font=&quot]المهم تفاهمنا مع كل شي.الغريب فالأمر المدير ما تكلّمش على الاستفسار .فقط قال لينا : أحْضيوْ راسكوم من سكان لقبيلة راهم كولهوم بركاكة[/font]
[font=&quot]علي جاوبو : عارفين هوم سعادة المدير.راهوم وصْلوها ليك سْخونة .ياك ؟[/font]
[font=&quot]_ شكون هي اللي سخونة ؟[/font]
[font=&quot]أنا اللي رّيت عليه : دجاجة بكامونها أسعادة المدير [/font]
[font=&quot]المدير ناض وقال ليهوم : ياكْ ما كْليتو الدجاجة بْلا بيا[/font]
[font=&quot]علي ابتسم وقال ليه : سعادة المدير ما كاين لا دجاجة ولا فلّوس .اللي كين بغينا نتكلمو على لخْبار ديال اولاد سليمان [/font]
[font=&quot]المدير حتى هو ضْحَك : داب انا كنْسال ليكوم دجاجة[/font]
[font=&quot]_ ما تكون غير على[/font]
[font=&quot]خاطرك.نْهار اللي تّجي غادي نَدَبْحو ليك بيبيا[/font]
[font=&quot]يتبع[/font][font=&quot]
[/font]
[font=&quot]
[/font]
 

bouchaib56

::مراقب مغربي ::

غير متصل
#29
رد: قصة بالدارجة : حتى واحد ما زاد معلّم

شكرا لحوميدي الذي جعلنا نعيش معه لحظات ممتعة
في حبكة ونسج من الواقع المغربي
 

Houmidi59

::الفارس المغربي ::

غير متصل
#30
رد: قصة بالدارجة : حتى واحد ما زاد معلّم

استعمال الزمان اللي أعْطانا المدير ساعدنا بزاف فالخدمة.غادي نعطيكوم واحد النظرة عليه: فالصباح مثلا من 7:30 حتى ل09:45جوج معلمين يخدمو والثالث يرتاح مع راسو.بعد ربوع ساعة ديال الاستراحة ، واحد من الجوج معلّمين يبقى خدّام والثاني يمشي يستراح مع راسو ويشدّ بلاصتو المعلم الثالث حتى ل12:25 .مع الطناش والنص المعلم الأول عندو روبّو (repos)
المعلم الثاني بزيد يخدم حتى ل14:30 مع المعلم الثالث.
بطبيعة الحال كل نهار بحال هاد الطريقة ، غير اللي كاين الأساتذة يتغيرو فالتوقيت
واللي عجابنا ما كنّاش (ماشي الدفتر ) نخدمو لا جمعة ولا سبت.بالنسبة للجمعة راها العطلة الأسبوعية ديالنا وبالنسبة للسبت كولشي يمشي يتسوّق لتاوريرت
يعني نخدمو يا الله 4 أيام فالصيمانة
دازت الأيام عادية ما فيها مشاكيل.كنّا تقريبا معروضين 3 أو 4 مرّات فلأسبوع ولكن دائما بالليل منْ غير الجمعة اللي كنّا نتغدّاو كسكسو عند الحاج قدّور.
لوّقيتة اللي نخرج فيها مع العشّرة ديال الصباح كنت كنمشي للواد (ملوية) باش نْصَيَّد الحوت.كاين البوري بزاف.كانو يْرافقوني التلاميذ باش زعما يْعاونوني.الواد تبارك الله فيه الخير .يا الله نرمي الصنارة دغيا تشَدْ.والعجيب فالأمر الطعم اللي كنت كنْدير اللْبابة ديال الخبز فيها زعفران .
واحد الساعة تقريبا نرجع معايا 10 ديال الحوتات وبعض المرات حتى 20 حوتة نعطي للتلاميذ شي براكة منهوم ونرجعو للمدرسة.
مساكين هاد التلاميذ كانو هوما ينظفوهوم وما على خوكوم الحوميدي غير يوجّد المقلى باش يقليهوم ويتبرع مع راسو.
مع الطناش يكون لغدا موجود ناكول للي مكتّب الله من الحوت .
اللخوت بجوجهوم اتافقو باش يْديرو العشرة بيناتهوم .فالحقيقة انا جْبَرْتْها من الجِنَّة والناس: هوما بجوجهوم سقرامة وما كيعتْقوش المسكين، أنا العكس ديالهوم كنبغي نْبرّعْ راسي وكنتصدّق على المسكين
المهم ، كانو يْجيوْ عندي السكّان باش إما نكتب ليهوم الرسائل أو نقرى ليهوم وصفة الدواء ، المهم كنت كنساعدهوم.زيادة على الدْعاوي ديال الخير كانو يْجيبو ليا البيض والخبز والسمن ولعسل...كنت مْبرّع معاهوم
خوكوم الحوميدي ديما قلبو أبيض كان تيْعيَّط على الأساتذة باش يْشاركوه الأكل والشراب
واحد النهار قررت باش نمشي للرباط .هاديك هي درت شهادة طبية ديال 7 أيام.مَنْها نشوف الوالدين واللخّوت ومنها نقضي غراضي.الفكرة اللي جاتني نشري حتى أنا موطور باش نبقى نمشي عليه لتاوريرت وقتاش ما بْغيت ماشي حتي يْجي عندي كبريتي أو سّي الميلود.
فعلا فالرباط مّشى معايا الواليد عند واحد صاحبو كيبيع الموطورات جّداد ديال الخاريج.أنا عاقل شْريتو ب5000 درهم .واه الخوت نص مليون.خوكم ما عندوش لفلوس لهادا خّديتو كْريدي نْخَلْصو ف10 شْهورا كل شهر ندفع 500 درهم
بعد أسبوع ركبْت القطار باش نمشي لتاوريرت.الواليد قال لي : غير توصل ماتنساش تصاوب لاصورانس وتشري الكاسْك.
مين وصلت لتاوريرت كانت الساعة التسعة ديال الصباح.مْشيت كي العادة للقهوة المعتادة (الكعدة) باش نفطر مزيان .
طبعا ما نْسيتْشْ نصائح الواليد وطبقتهوم بالحرف.
المهم مع ديك الجوج بعد ما قضيت شي أغراض وشْريت ما ناكول من معلّبات على الخصوص على حقاش ما عندنا ثلاجة، توكلت على الله ومشيت قاصد اولاد سليمان فالموطور الجديد ديالي.على فكرة سمّيت لاموطو ديالي اسمهان .
وصلنا اسمهان وانا للمدرسة .شافوني التلاميذ جاو يجريو : مبروك أسويدي الموبيلة
واحد المسخوط قال لي : أسويدي لاموطو ديالك أحْسن من هاديك اللي عند لميوطا
عبد العزيز وعلي شافو لاموطو وقالو لي تعطينا نّديرو بيه شي دورة
خوكم مْقَزْدر أكثر منهوم : واأنتوما وقتاش سلّفتوني الموطور ديالكوم نْدير بيه شي دورة
_ زعما ما باغيش ؟
_سمعو مزيان الخوت واحد الحكيم بكري كان يقول : جوج حوايج ما عمْرو ما خاص بنادم يْسَلَّفهوم مْراتو والطوموبيلا ديالو
شافو فيا وبْداو يضَّحْكو.المهم ما عمرو ما طلبوني على الموطور ديالي
واحد النهار جا عندي واحد السيد سميتو سالم .مسكين بان ليا يبكي :
_ مالك أسّي سالم بْحال الى طاح عليك الضّيم ؟
_ نْعم أسويدي وأنا جاي طالب منك تْساعدني
مسكين شَدّ يَدّي وبْدى يْبوس فيها ويقول لي : ها العار الى ما تعاونّي
_ لا حول ولا قوة الا بالله
المهم دخَّلتو للقسم واعطيتو كاس أتاي (بارد) وقلت لو : ما يكون غير الخير.يا لله أحْكي لي آش كاين
سالم حْكى لي قصْتو .خونا بالله طايح فورطة كبيرة.اللي وقع أنه اَضْهَس ولد صغير بالكاميو ديالو.الجادارميا أدّاوْ لو الكاميو والبيرمي
_ دابا أسويدي راني حابس وما يْسَلّكْني غير أنت اللي عندك مع الرباط.
فكّرت شي شوية : واخّا غادي نمشي غدّا لتوريرت وغادي نتّاصل بالواليد باش يعطيوك البيرمي والكميو ديالك
يا الله فاش ساليتْ من الهدرة ونقَّزْ على يدّي يْبوسها وهو يقول : الله يرحم الوالدين الله يرحم الوالدين
المهم مْشى في حالاتو
فالليل جا هو بْداتو باش يعرض عليا نتعشّى عندو ولكن أنا جاوبتو الى ما يمشيوش المعلمين اسمح لي ما غاديش.
رد علي مسكين : مرحبا بيهوم حتى هوما
_ أوي لله يْخَلّيك سير أعْرضْ عليهوم ، باش نمشيو جميع


يتبع غدا ان شاء الله



 

Houmidi59

::الفارس المغربي ::

غير متصل
#31
رد: قصة بالدارجة : حتى واحد ما زاد معلّم

في الصباح بعدما قرّيتْ الحصة من التْمنيَة للعشرة ، شدّيت أنا واسمهان الطريق الى تاوريرت.بالطبع عْطيت التعليمات ديالي لصحابي علي وعبد العزيز (ياك أنا مدير ؟)
ساعة تقريبا وصلت ، هاديك هي مْشيت ديريكت للبوشطة (البريد).فديك لوقيتة باش تتكلم فالتيليفون خاصك تعطي النمرة للمستخدم ، هو يتّاصل بمركز الهاتف ويْدَوّزْ ليهم النمرة.من بعد ربع ساعة ويمكن حتى ساعة تْجي المكالمة ويْعيّط عليك الموظف ديال البريد ويقول لك : سيرْ للْكابينْ رقم ...
زهري داك النهار التيليفون دغيا صونا.الواليد كان على الخط
_ الو الواليد كي دايرين لاباس بخير؟
الواليد ديما مْقَلَّق مسكين :
_ ياك ما كاين شي صْداعْ مع دوك الناس ؟
_ ما تقلقش كاين غير الخير.بالعكس راني معزز مكرّم
_ اوى هاد التعييطة ؟
_ غير بْغيتكْ فواحد السيرْفيس (service)
_ كول آش بْغيتْ
المهم شرحت لو للي كاين .باينة الواليد كان ناوي نطلب منّو شي تقرقيبة (لفلوس).راكو عارفين البورسة(المنحة) ما كافياش خصوصا كنت نْصيفط منها 500 درهم لكْريدي ديال لموطو.الواليد واعدْني باللي غادي يْريكْلي المشكل في أقل من ساعة .
خلّصْتْ ثمن المكالمة ومْشيت نْشري بعض المستلزمات اللي ما كايناش فلعروبية.مَنْ بعدّ مشيت عند داك مول الحانوت اللي يوقفو عندو الكاميونات ديال أولاد سليمان.غير شافني قال لي : صباح الخير خويا لوستاد.تشرب شي كاس أتاي؟
ردّيتْ عليه : سّي عبد الله هذا راه وقت لغْدا .واشْ نتْغَدّاوْ معاكْ ولّا نمشيوْ في حالاتْنا ؟
سّي عبد الله ماكانشْ ناوي على هادْ لعْراضة، بْقى يْقَفْقَفْ.
_ ما تخافش أنا اللي غادي نْخَلَّص لغْدا.صيفَطْ هاد البرهوش اللي خدّام عندك يمشي يْجيبْ لينا كيلو كفتة مع برّادْ أتايْ
_ هي اللي ما تْعاودْشْ
المهم يا الله فاش غاديين نتْغدّاو ، جاوْ واحد الجّوج (بورزّة) .سّي عبد الله عْرضْ عليهوم باشْ يتْغدّو معانا.مساكن حشمو، شي شْوية دخلو باش يْعاوْنونا فالكفتة.واخّا هاكدا كْلينا وشبعنا.
مين شربنا أتاي ، واحد من دوك الجوج مدّ لي 50 درهم وقال لي : والله يا أستاذ حتى تْشَدْ هاد البراكة معاوْنة فلَغْدا
الصراحة ما صَبْتْ ما نْكولْ : ولكِنْ......
قاطعني فالهدرة : الله يْكثَّر خيرك حيت عْرضْتي علينا بْلا ما تعْرفْنا
_ ولكن اللي عْرَضْ عليكوم هو صاحبكوم
_ عارْفين أسْويدي ....سّي عبد الله كيَعْرضْ على بْنادم مين الخير ما يْكونْشْ ديالو
_ آه فهمت
المهم مْشيت رْجعْتْ للبوشطة .يا الله فاش دخلت ، قال لي المستخدم : راه الواليد ديالك فاش عيّط .قال ليك قول لصاحبك يمشي للدرك الملكي ويقول ليهوم من طرف ال....... (واش بغيتو تستفدو حتى انتوما ؟)
هذا خْبارْ زين.دابا خاصنا نرجعو لأولاد سليمان حيت راها تقريبا الرَّبْعة وخاصني نوصل قبل المغرب
خوكوم الحوميدي دائما حاضي راسو عمّرْت ليصانص باش ما نحصلش.الطريق كانت سهلة وبدون مشاكيل.
فلوْقيتة اللي وصلت كانت المدرسة خاوية .لمْيوطة كانو فالبرّاكة ديالهوم .جا عندي الكلب اللي رْجَعْ صاحبي.بان ليا فرحان مين شافْني.حلّيتْ لو واحد لقابْسة ديال السردين وزدتْ لها الخبز مْقَطَّع واعطيتو ياكول.
شافني واحد خَيْنا كان فايَتْ احْدى المدرسة وشافْ المنظر ديال الكلب يكول : واه تْبَرّعْ غي أنْتَ أخويا
ودّنْ المغرب ومْشيتْ نْسَخّن الما باش نتْوضّى. يا الله صلّيت الفرض الله يقبل وانا نسمع شي واحد يْعَيَّطْ.
ردّيت عليه : ادخلْ اسّي سالم
بان لي مسكين متْرّدّدْ : اوى سْويدي كاين شي خْبارْ
_ كاين وغير الخير
مول الكاميو فرحْ : الله يعطيك كل ما تتمنى أسْويدي
واخّا هاكْدا بْغى يَعْرف .انا ما خلّيتوشْ يسْتَنّى :اوى سيدي من غدّا سير عند الجدارمية باش يردّو لك الكاميو والبيرمي ديالك.ما عليك الّا تقول ليهوم راه صيفطني عندكوم ........ (فْلان)

سّي سالم ما كْراهش يمشي بالليل باش يجيب الكاميو ولكن ما يمكنش .خاصّو فاش يركب باش يوْصل لتاوريرت.
جاوبتو ما تقلقش : غدّا ان شاء الله غادي يمشي علي لعند المدير .تقدر تمشي مْعاه فالموطور ديالو


يتبع غدا ان شاء الله
 

Houmidi59

::الفارس المغربي ::

غير متصل
#32
رد: قصة بالدارجة : حتى واحد ما زاد معلّم

فالصباح بكري،جا سالم باش يمشي مع علي لتاوريرت.لْقانا يا الله فاش دخّلْنا التلاميذ للقسم عبد العزيز وْأنا.في ديك لوقيتة علي كان يْسَخّنْ الموطور.قبل ما يمشي قال لي : واش نْدوز عند المدير ؟ ردّيت عليه : فكرة مزيانة هي هاديك يعرف باللي راك سالتْ
علي ضْحك وقال لي : ياك أنت هو المدير ديالنا هْنا ؟اوى أنت مسؤول على الغياب.
جاوبتو : عندك الحق أمولاي علي غير سيرْ وتْسارى مع راسك .الى عاق بيك المدير غادي نقول ليه كان خاصني المَلْحَة ، صيفَتّو يشْريها ليا
سالم هو اللي ضْحك : سّي عبد الحميد راك واعرْ وحتى واحد ما يقدرْ عليك
المهم لخّوت مشاوْ، عبد العزيز دْخلْ للقسم ديالو وْأنا دْخلتْ لقسمي باش نْقَرّي التلاميذ ديالي.
جات العشرة لوقيتة ديال الاستراحة، خرّجْنا التلاميذ للساحة باش يلعبو.جا عندي عبد العزيز جايب صينية فيها بْريق ديال القهوة وقال لي : تشْربْ معايا شي كاس قهوة بْلحْليبْ ؟
_ واه مينْ جاكْ لحْليب ؟
بْدى يتْلَعْتمْ : غي غير أو كان جابو .....
_ شكون جابو ؟
_ واحد الولد يقْرى عندي وقال لي باش نعطيه ليك _ اوى خويا بْغيتي تَكْرَفْ عليه (تستولي)
_ لا حاشا
_ وا مسلم أخويا أنت تبارك الله عليك.زعما تْصلّي الفجر وما عنْدكْشْ مع الأمانة
_ صافي أخويا حوميدي .هاهو لحليب غير خودو كاملْ
_ ما كاين موشكيل غيرة مرَّة مينْ شي واحد يعْطيك شي حاجة ليا خاصك تْوصَّلْها لْمولاها.
تْفاهَمْنا؟
_ واخّا سّي عبد الحميد.
المهم ، شربْنا القهوة بالحليب وكْلينا الخبز والزبدة البلْدية.
أحنا هكْدا جا الحج قدّور :
السلم عليكم يا أساتذة
_ وعليكم السلام الحاج قدور
_ زيد تشربْ معنا شي كاس قهوة
_ لا الله يخْلفْ
_ آش حبْ الخاطر آ لْحاج ؟
_ أنا باغيك أسّي عبد الحميد فْشي كْليمة
مْشيتْ معاه حتى بَعَّدْنا على عبد العزيز.قال لي بدون مقدمات : هاد النهار راني عارض على ناس محترمين فيهم القايد ولخليفة وناس كْبار فالعمالة .
شَفْتْ فيه وانا ساكت
زاد قال لي : بْغيتك تحضرْ مْعانا .أنت من الرباط ، تقدر تخْلَعْهوم
ضْحكْتْ : عْلاهْ واشْ أنا غول ؟
شوف الحاج قدّور ، الانسان كيحتارموهْ الناس بالمبادئ ديالو بْكْلمتو وبالصدق ديالو
_ عارف أسّي عبد الحميد وحْنا بْغيناك تحضر مْعانا
_ وهو كذلك ألحاج
الحاج قدّور ودّعْني بعدما اتَّفق معاي نْصلّي الظْهور فالجامع ومَنْ تَمّاكْ نَمْشيوْ جْميعْ لْدارو
قبل ما يَمْشي ، سَوَّلتو : لَميوطا يْجيوْ ؟
ردْ علي بالزربة : أسّي عبد الحميد لله يهديك هادوك أصْحاب اللْحايا غادي يْجيبو لينا غير المشاكيل
المهم خلّيتو ومْشيتْ للقسم ديالي.شي وْقيتة جا عندي عبد العزيز.بْغى يَعْرف آشْ كان باغي منِّي الحاج قَدّور
جاوبتو : والو ...غير عْرضْني نَتْغَدّى عندو هاد النهار
_ وَحْنا ؟
_ أنتوما زعما علي وأنْت ؟ قالك أسيدي حَسْنو ديك اللحية ومرحْبا بيكوم


يتبع غدا إن شاء الله







 

Houmidi59

::الفارس المغربي ::

غير متصل
#33
رد: قصة بالدارجة : حتى واحد ما زاد معلّم

أعتذر للإخوة والأخوات عن هذا التأخير المباغت ذلك أن خط الانترنيت كان منقطعا عندي بسبب أشغال الصيانة طيلة يومين أو أكثر
هذا هو السبب لعدم تواجدي خلال هذه المدة
شكرا على تفهمكم



الجزء الأول : عبد الحميد والزردة



عند الظْهور مْشيت للمسجد كي المعتاد.يا الله سلينا من الصلاة ، قال لي لفقيه : نمشيو عند الحاج.راه ما يكون غير يستنّى فينا.
تبعتو وأنا ساكت.وصلنا .دخْلونا لواحد البيت طويل ، يمكن فيه فايت 10 متر ديال الطول.البيت عامر بالناس .أنا ولفقيه شدّينا القُنتْ حيت ما كاينش فين غادي نْرَيْحو(نجلسو).
شي شوية ، جابو لينا الشلال.من بعد جا الحاج قدور وقال لينا باللي كل مجمع خاص يكون فيه 8 ديال الناس.
آش غدي نقول ليكوم الإخوان فحْياتي ما عمرو ما حْضرت لشي زردة بْحال هادي.عييت ما نكول وفلخَّرْ اسمحت .تصورو 12 نوع ديال المأكولات اللي تْحطّت لينا فالطبْلة.
فاللّوَّلْ جابو لينا الدجاج بالزيتون.من بعد جابو لينا قْنية بالبَطاطا .موراها جابو لينا بيبي بالبصلة.من بعد جابو لينا دجاج مشوي .شي شوية جابو نص حولي مشوي .من بعد جابو لحم الراس مْفَوّرْ.دازت واحد لوْقيتة جابو لينا الطعام بلحم الجدع.من بعد كْلينا الكبدة مشوية .من بعد جابو طبسي كبير ديال السّفّة مع كيسان كْبار ديال اللبن.شي شوية ، جابو جبنة كبيرة مع الحرشة .من بعد جابو لينا القطْبان ديال لحم لخروف وفي الأخير طبسي كبير مْعمَّر فواكه متنوعة : تفاح ، بنان ، بوعويدة ، عنب ، ليمون....
هاد لعراضة تدّي مولاها لسْبيطار .لكن خوكوم واخّا كان غير ينقبْ من كل نوع غير شوية دغْي تْكوفَلْ.
هاد لعراضة دارت فيا خير، حيت موراها صمت 3 أيام متتابعة .
المهم بان ليا واحد خيْنا كرشو خارجة وصحيح كي الغول .واحد لوقيتة كان يتكلم معاه الحاج قدور وشيّر علي بْيدّيه بش نْجي عندو .الحاج قدّمني لبوكريشة : هدا هو السيد اللي تكلّمْت لك عليه.أسي عبد الحميد اللي جا من الرباط.خونا بالله مدّ لي يدّو باش زعما يْسلّم عليا وقال لي : انا كنعرف الرباط مزيان .فين كتسكنو؟
_ فاليوسفية
_ الغربية ولّا الشرقية
_ الغربية
_ أنا كنت نمشي بزّاف ليعقوب المنصور
خيْنا بقى يتْكلّم لي على شي قْنوت فالرباط ، كولهوم كنعرفهوم مزيان.
شي شوية قال لي واش نت فالتعليم ولّى جاي فْشي مهمة ؟
ردّيت عليه : فالتعليم وبلا كدوب
بوكريشة شاف فالحاج قدور وقال لو : تْهالّى فسّي عبد الحميد راه يقدر يْنفعك
باش ما نكتّرشْ الهدرة معاهوم قلتلهوم : سَمحُو ليا أنا غادي نمشي نخدم حيت التلاميذ يْكونو فالمدرسة فهاد لوقيتة.
رجعت للمدرسة ، بْحال الى حسّيت بلَعْيا .دخلت للقسم بعدما سرَّحْت (يعني صيفطت هوم لديورهوم) التلاميذ.نْعسْت واحد الساعة باش منها نهضم ومنها نرتاح
مين فقت ، كان العاصر يا الله فاش ودَّن.صليت الله يقْبلْ.وقلت مع راسي : فين يمكنْ لي نقضي هاد لعشية ؟



الجزء الثاني : لفقيه والصْيادة


هاديك لعشية مورا العاصَرْ ، قررت نمشي نْصيد الحوت .نْسيتْ باش نقول ليكوم باللي واد ملوية كيْدوز على ولاد سليمان .الصراحة منظر طبيعي معتابر.هاد البلد واخا قليل فاش أطّيح فيها الشت ولكن فلاحية ، حيت السكن كيسقيو .

من عجيب الصدف كان لفقيه جاي لعندي .هاديك هي قلت لو :

_ سمح لي يا سّي محمادين أنا غادي نْصيّد الحوت

لفقيه ابتسم : انا كنت غي ناوي نْريّح شوية معاك ونشربو أتاي.ولكن نمشي معاك

_ اوى ناوي تصيد شي حوتات ؟

_ ما كنعرفش نصيد

_ الله يهديك الفقيه ، أنت مصيّد قبيلة كاملة والحوت زعما تْحيرْ فيه.ما يمكنش

سّي محمادين ما صاب ما يْكولْ.هاديك هي قولت لو :

_ اسمع ألفقيه الصيادة ساهلة .ما عليك غير تتوكّل على الله وترمي الصنارة

لفقيه عجباتو الفكرة.فالطريق حكيت لو شوية على الصيادة : انا يا الله فاش بْديت نصيّد.

رد علي : ياك الرباط فيها لبحر

جاوبتو : واخا فيها لبحر ما عمرو مشيت لو باش نصيّد

وصلنا لواد ملوية واختاريت واحد القنت الما فيه صافي الحوت كيْبان

الفقيه قال : تبارك الله على خيرات مولانا

_ اوى شفتي يا سّي محمادين .ها القصبة .اوى لوحْ مزيان وشدْ القصبة .بْقى شاد مزيان غير تْحسْ بالسبيب يْجبْدك للماء .راها الحوتة تْشادّت .ما عليك غير تجبد الصنارة لعندك .اوى كي جاتك ساهلة ؟

_ واه سااهلة

في ديك الساعة شي تلاميذ كانو رافقونا باش يعاونونا كانو يْحاولو يْصيدو الحوت غير بيديهم.الحقيقة شي وحدين قدرو يْشدو شي حوتات .خوكم الحوميدي ما عندوش مع هاد الطريقة شكلا ومضمونا .يعني ما عاجبانيش .على داك الشي كنت نرد دوك الحوتات فالْمَا وانا كنقول لتّلاميد: الصيادة ماشي لعبة راها هواية وانا الحوتة الى ما شديتهاش بالصنارة ما نقبلش حتى شي طريقة باش نصيدها.

مساكين شافو فيا بْحال الى ما مافهين والو أو ربما يكونو يقولو فْنفسهوم : هدا شي أحمق أو مْسطّي

واحد لوقيتة سمعنا لفقيه يغوّت ويعيّط لي : سّي عبد الحميد صافي السيبب راه يجبدني.يمكن شديت شي حوتة والظاهرة كبيرة

أجي دغيا عاوني راني ما قْدرتش عليها

آه يا الخوت انا ولفقيه نجبدو .والو يمكن الى لفقيه راه شاد شي بالينة .عيطت للتلاميد: أجيو جبدو معانا

المهم كولشي يجبد .سبحان الله فكروني بديك القصة ديال موسى مع ولدو ومراتو زينب بغاو يخرجو الكبش من الكاراج.المهم بقينا صابرين والله كان معنا .شي وقيتة الهايشة خرجات .فالأول ما بان لينا غير راسها من بعد عرفناها : فكرون كبير .فكرون ما عمرو ما شفت بحالو اللهم فشي شريط تلفزي .هاد الفكرون الخوت يمكن يوزن قنطار أو أكثر.

ولد لحرام طْلق علينا واحد الريحة خانزة .التلاميذ اللي عندهوم تجربة قالو لي : سويدي الفكرون ديال الما كيطلق هاد الريحة باش يدافع على راسو .فعلا طْلقاناه .المشكل خْدى لينا القصبة والصنارة

شفت فلفقيه : اوى اسي محمادين صيدنا بكري معاك الحوت

جاوبني مسكين بحال الى حشمان : أسي عبد الحميد انا قلت ليك ما كنفهمش فالصيادة ديال الحوت

_ ماشي ما تفهامش ...انت ماعندكش الزهار مع الحوت عندك غير مع لخّوت

لفقيه بدى يضحك : شحال تعرف تهدر أخوي

_ يا الله نرجعو في حالتنا .ها الليلة ما فيهاش الحوت

مين وصلنا للمدرسة لقيت علي يا الله فاش كان يوقّفْ الموطور ديالو.غير شافني ، قال لي : كاين شي حوت ؟

_ والو أخويا .بالحق شدّينا وحد الفكرون شحال كبير

_ فين هو ؟

_ مشى أخويا علي ...وخْدى ليا الصنارة

علي ضحك حتى بْغى يْطيح : زعما مْشى معاك لفقيه وما قْضيتي والو

_ راك تْشوف أخويا علي لفقيه اللي كنّا نسْتانّوْ براكتو جاب لينا فكرون

لفقيه اللي كان ساكت ، هاد المرة بحال الى ما عجبوش الحال :سّي عبد الحميد ياك ما ردّيتيني منحوس ؟

_ حاشا أسي محمادين ...ولكن يمكن أنت اللي ما عندكش الزهر أو ربّي رسْلكْ باش تنقدْ الحوت من كروشْنا

حنا هاكدك وعبد العزيز يْطل من الباب : هاد الليلة رني مْصايب ليكوم قْنية بالبطاطا

شفنا فيه متْعجْبين

زاد قال لينا : اوى مالكوم.راني مْشيت حتى أنا نْصيَّدْ .زهري طح فهاد لقْنيَة

شَفْت فلفقيه : أسّي محمادين واش كين شي قْنية فلبْلاد؟

_ لا أعلم ولكن تقدر تْكون حيت كاين الغابة من هاد الجيهة

المهم لفقيه مشى بعدما وعدنا يكون عندنا من بعد صلاة العشاء.

أنا مشيت للقسم باش نْوجَد الخدمة ديال الصباح ، أمّا عبد العزيزوصاحبو رجعو للبيت ديالهوم.

شي شوية جا عندي علي : أجي أخاي عبد الحميد تْقَصر معنا قبل م نتعشّاوْ

مشيت معه.فديك لوْقيتة كان عبد العزيز كيتصنت لْشي حديتْ ديال كشك.

ما فادني غير نسْمعْ.ربما هد الشيخ دار فيا الخير .هكْدا ما فيا ما نتْناقش معاهم.واحد نصْ ساعة دازت وأنا نسمع شي واحد يْعَيَّطْ علي

خْرَجْت .لقيتْ سالم واقف .بعْد ما سلّمْ علي قال لي وهو فرحان : الله يرحم الوالدين أسي عبد الحميد .ما عمرو ما ننسى خيرك.

راهم ردّو لي الكاميو والبيرمي.دابا غادي نبقى نمشي وانا مْهنّي.

شي شوية ، قال لي : غادي تمشي تتعشى معايا

_ لا اسمح لي راني معروض هاد الليلة

_ واخا خلّيها غدّ ا

_ غدي نْصوم 3 أيام أخويا سالم

_ مالك أسّي عبد الحميد مع الصيام ؟

_ كنت حْلفْت وْحَنَّتْ راسي .دابا خاصني نصوم

_ واخا أسيدي نْخلّيوْها حتى لمورا الصيام

يتبع غدا إن شاء الله
 

Houmidi59

::الفارس المغربي ::

غير متصل
#34
رد: قصة بالدارجة : حتى واحد ما زاد معلّم

دازت أيام وأيام ، كلها تقريبا عادية.فالخدمة كان تحسّن كبير من طرف التلاميد.العلاقات ديالي مع سكان القرية زادت زْيانتْ حيت بْقاوْ يْجيو عندي إمّا نكتب ليهوم الرسائل أو نقْراهم ليهوم.بالنسبة للعْراضات، كنّا تقريبا كنتعشاو عند السكان 3 مرات أو 4 في الأسبوع.العجيب فالأمر من غير الحاج قدور كولهوم عشّاونا بالسفرجل واللحم.أنا صراحة طْلعْ لي هاد السفرطل فالراس: واه ديما السفرجل.
واحد الليلة أعْرضنا واحد السيد ساكن بعيد على القرية.قلت مع راسي هادا مْية فلْمية بعيدْ على السِكْتور (ماشي عبد القادر) موحال الى يكون لعشا بالسفرجل.
المفاجأة كان لعْشا بالسفرجل.
صافي خوكم الحوميدي كَشْكَشْ وبغى يْقَرْبَلْها: الَخّوت مالكم مع السفرجل ؟ واش ما عندكوم بْطاطا أو خزّو و جلبانة ؟
مول الدار ابتسم ورد علي بواحد لكلام ما عمرو ما ننْساه ، كلام ما يقولوه غير الحُكاما : الواد جاب السفرجل
بقيت نشوف ، ما صَبْت ما نقول .المهم بعد هاد لَعراضة ، قرّرْتْ ما نبقى نتْعشّى حتى عند شي واحد حتى يْشوفو لينا شي عْشا من غير السفرجل.
جا شهر ديسمبر شهر البرد القارس.جوج كاشات وباقي كنْحس بالبرد.خاصني نْشوف ليا شي حاجة باش نْكمَّد لَعْضيمات.
الحل هو نمشي لوجدة .طبعا عندي لاموطو نمشي وقتاش ما بْغيت.
واحد الجمعة ، كان الجو دافي ، خلّيت لمْكانسة باقيين ناعسين ومْشيتْ.يا الله فاش وْصلت لتاوريرت .قلت مع راسي ناخُدْ معايا لاموطو فالكار.تصوْرو لْقيت مشكل معاها.فديك لوْقيتة كان الباكاج كيْديروه فالسطح ديال الكار.المهم تْفاهمت مع لَgريسون .قال لي : خاصك تْخَلّص على لاموطو 10ديال الدراهم
الصراحة ما بْغاتشْ تْنهْضمْ ليا: واه لبلاصة فالكار لوجدة غير بمْية والصرف ولاموطو آلف ، زعما الضوبل.كي درتي ليها أخويا ؟
لكْريسون (عدو لله) شدْني من اليد اللي توجعني : أخويا الى جاتك غالية عْلاش ما تمشيشْ ساهتْ بيها حتى لوجدة ؟
_ واه أخويا راه بعيد الحال وخاصني بزاف ديال الوقت
_ اوى خلّصْ واسكتْ
داك الشي اللي كان.اعطيتو ألف فرنك.غير شَدْها قال لي : اوى طلَّعْها لْفوقْ الكار
_ كيفاش ؟ ياك زعما راني خلّصتك
_ هاديك لبلاصة.واش راك حاسبني حمّال ديالك ؟
_ واخّا .آشْ المعمول ؟
هي هاديك جا قرَّبْ مني واحد الشِشْتور (شمكار) ، قال لي أنا نْطلَّعْها للفوق ، غير دوَّرْ معايا
_ شْحال بْغيتي ؟
_ عْطيني مْيَة دورو (ريال)
_ تْبارك الله زعما بْلاصة لْوجدة
_ اوى خاطرك
او هو يمشي في حالاتو
_ أجي أخويا ونعطيك 50 دورو
دار راسو ما سْمعنيش.زاد خلْفَة
_ شوف خويا نعطيك 80 دورو
شاف فيا واضحك : غير زيد داك الدرهم.راني نقدر نندم ونطلب ليك ألف فرنك
_ يا الله أجي طلّعها
شد لاموطو وطْلعْ بيها للفوق.الصراحة كشْفاتو وماشي بْعيد جاتو تْقيلة
واحد النص ساعة الكار قلَّع.
مع ديك الطناش وْصلنا لوجدة.الناس نزْلو وخوكم حوميدي وْقَفْ يعطيوْ لو لاموطو ديالو.لكريسون طْلَع فوق الكار وبْدى يَرمي الصيكاتن والشكايَرْ.
عيَّطْتْ لو : الشريف هاديك لاموطو مْعاك
جاوبني المسخوط : أرى واحد لمْية الى بْغيتي نْهَبَّطْها ليك
_ ياك خلّصْتك لبْلاصة دْيالها؟
_شوف أخويا هاهي ، دَبَّرْ راسك مْعاها
صافي طْلَع لي الخزْ للرّاس: عْرْفت آشْ دّيرْ مْليح.لوحْها بْحال الصيكان
بقى يَضْحك : حشومة غدي تْهَرَّسْ
_ اوى أخويا يا الله هبَّطْها
_ والو ، خاصك تعطيني مْيَة دورو
شفت مع راسي وقولتلو : جاتك غير نزَّلها
المهم مْشيت لسْطاسْيون ديال ليصانصْ حيت مين طلْعوها خْووْها من كرشها.كالكْ أسيدي خطر .
ما عْلينا.فديك لوقيتة واحد لمْخَنفَسْ قرَّبْ منّي:
_ ألشريف شي درهم نَشْريو خبزة ديال كَرانْ
_ هاكْ وتْلَفْ
مسكين فيه شْوية الخير :شوف أصاحبي عندي ليك حلْ يْهَنّيك من تْبَرزيط لاموطو ديالك
شفتْ فيهْ : إيهْ
_ عْلاش مادّيرْهاش باكاجْ فالتْران
_ والله الى عندك الحق.هاك ها مْية دورو سير تَكولْ الكَرْعينْ عند كافي.
مسكين غير شدّ لفلوس ما ضارشْ موراه .خلّيتو حتى ما بْقاشْ يْبانْ عاد مْشيتْ في حالاتي.
كيف العادة دزْت عند صاحبي وينبي باش ناكول ساندويتش ديال الدجاج.من بعد مْشيتْ للدرب ديالنا لقديم.عندكوم الحق عند صاحبي الزاوش.كان ناعس.غير شاف لاموطو خْرَجْ دغيا
_ ياك خويا حميد شي دورة ؟
_ لا اسمح لي .تركب مرحبا .تْسوكْ اُوهُو
_ واخّا يا الله دير بينا شي دورة لْسيدي يحي
_ عندك الحق هاد النهار الناس يمشيو يْزورو الولي الصالح . بيني او بينكوم هادي فرصة نْكَيْلو شوية ديال الشمع.
كتعرْفو ان الناس لَقْدام باقيين كيْآمْنو بالبركة ديال الأوْلية الصالحين.مْساكين باش تْنَقْضى ليهوم حْوايجهوم ، يمْشيوْ يْزورو سيدي يحي دّايّينْ لو الشمع.الشمع كيْبيعو ليهوم لمْقدّم اللي مْكلَّف بالضريح.مْع لْعشيا يجْمع الشْمع اللي فالضريح وفالصباح يْعاود يْبيعو
خوكم الحوميدي هو اللي خاص اللي يْضَوّي عليه أمّا سيدي يحي راه مات وشْبعْ موت.هاديك هي قلت لصاحبي : يا الله نزورو الولي ونْشوفو آش يمكن يعطي لينا
صاحبي محمد باقي نية : آه يا خويا أنا باقي ما دّيت الباك .غادي نطَّلْبو باش ننجحْ.ياك أخويا حميد يبغي؟
_ يبْغي ولكن خاصّك تشري لو الشمع والشمع لكبير
_ نَشْريلو حتى الحسكة أخويا حميد
_ اوى حتى اسمهان راها عطشانة
_ اسمهان ؟
_ لاموطو ديالي .ياك ما يَسْحاب ليك كتْمَشّى بالْمَا
_ انا عارف
_ اوى أرى واحد الستين باش نشريو يوطْرو (لتر)
_ خويا حميد شحالْ ولّيتي قرْزازْ(سقرام)
_ أخويا تْقامتْ علي بْغْسيل الفندق وما زال راني كنْخلص لكْريدي ديالها.من الفوق غير باش جبتها من تاوريرت راني خلّصْتْ عليها ثمن 4 ديال لبلايص لوجدة
_ صفي صافي غادي نْعاونك بجوج دراهم
_ أرى قْبَل ما تندم.يا الله سيرْ دغيا عند أسّي الطيّب وشْري الشمع
_ حتى لضّريح عادْ نشْري
_ أنت باغي لمْقَدّم يضّرْبَك لَّوْدن
_ خويا أنا باغي ننجح
_ عندك الحق .يا الله أرْكب وعنداك أطّيح.اسمهان كتجْري
_ شْكون اسمهان؟
_ خُتْ فريد الأطرش


يتبع غدا ان شاء الله



 

Houmidi59

::الفارس المغربي ::

غير متصل
#35
رد: قصة بالدارجة : حتى واحد ما زاد معلّم

وصلنا لسيدي يحي والعاصر يودّن.حطّيتْ لاموطو عند الكارديان ودخلنا للجامع باش نْصَلّيوْ الله يقبل.الجامع موجود ومْلاصقْ مع الضريح.خويا محمد مْشى غير بوحدو عند لمقدّم باش يشري الشمع .انا ما بْغيتش نمشي مْعاه بْقيتْ واقف كنْشوفْ شي نْسا جايْبينْ مْعاهم شْراوَطْ (قطع من الثوب) كيْعلْقوها فْشَجرة قْريبا طايحة فالأرض.شوف الخرافات شْحال طْغات على بنادم.قالك أسيدي لمْرى اللي كيموتو ليها لولاد صْغار كتعلّق الشريط وبَّرَكة سيدي يحي بنيونس الولد يْعيش.
شوفو الشرك بالله فين وْصل .
المهم شي شْوية جا صاحبي الزاوش غضبان وزعْفان.
_ مالك أخويا؟ ياك ما لمْقدّم باع لك شي شمع بيريمي (périmé) ؟

_ ولد لحرام باع لي الشمع بْثَمنْ مْضوبَلْ
_ اوى لافوط ديالك أخويا.كان عليك تشري الشمع من عند أسّي الطيب ، راه كيْبيع الباكية غير بجوج دراهم
_ دارْها بيا .تْصَوَّر باعو لايا ب4 ديال الدراهم
باش ما ندخلوش فكتْرة الهدرى قلت لو : صافي الله يْسامح ، غادي يْجيك الفرج من عند سيدك يحي
آش غدي نقول ليكم الضريح تقريبا كلّو عْيالات وماكانش اللي ما جايباش معاها برهوش أو جوج أو ثلاثة.كاين شي وحدات ناعسات فالضريح وكاين شي وحدات باركاتْ يْبوسو فالضريح ويَطَّلْبو.شي دعائات فْشي شْكل
_ أسيدي يحي بنيونس جيتك طالْباتك وقاصدتك ما تْخيَّبني ما تْردْني بْلا غراضي.بْغيتك تْرَدْ لي راجلي اللي مْشى وسْمح فيا هادي 6 شْهور.بْغيتك تْجيبو ليا مْكتّف مْسَلْسَلْ.راكْ تْسالْني جْدِي غادي ندّبْحو فالعتبة ديالك.
هادي واحد لَمْرى دايرة حايك مْغَطيها يا الله تْبان ليه عين وحدة هي اللي كانت تطلب الولي باش يْرَجّع ليها زوجها
المهم هدا غير مثال والطلبات غير هوما : كاين اللي تطلب تْفارق مع راجلها، كاين اللي باغْيا الضْناية (النسل) كاين اللي باغيا تتزوّج ، كاين حتى اللي باغية شي مَسْياسة (شرْتْلة) ديال الذهب.
زعما سيدي يحي يقدر يْلبي كولشي ، ما عليكوم غير تْجيبو بعدا لفتوح : شوية دراهم والشمع.
قبل ما تدخل للضريح خاصك تْحيّد صبّاطك .خويا محمد شاف فيا وقال لي :
_ خويا حميد الصبّاط عندي باقي جْديد يْقدْرو يْخونوهْ (يسرقوه) لي
_ زعما باغي تدخل بصَبّاطِكَ ؟
_ وعْلاش لّا
_ ما يمكنش أولدي .شوف القاعة كُلْها زْرابي .غادي تْوَسَّخْ لفراشْ
صاحبي محمد اقتنع باللي خاصّو يْحيّدْ صبّاطو ولكن جاتو فكرة غادي يْخلّيه معاه ويدخل بيه للضريح
خوكم الحوميدي دار بْحالو ودخلنا للداخل
يا خّوتي اللي شفنا راه فايت لعجب .النْسا ضايْرين بلَقْبر وكا يْسَلْمو وكاين واحد الفتحة صغيرة مْعَمْرة شْمع وحْداها صْنيديقة صغيرة فيها لفلوس.
خليتْ خوي محمد كيْقدّم الطلب ديالو لسيدو يحي وانا مْشيت جيهت لاكيس ، بْغيت نقول هاديك الفتحة .الحمد لله حتى واحد ما رادلي البال .خْديت شي بركة ديال الشمع ودَرتْها فْجيابْ الجاكيطة .لفلوس ؟ ما خْديتْ والو على ودّاش الصندوق فيه قْفل كبير .حاجة من جوج إما ناخود الصنيديقة أو نْخليها فبْلاصْتها
فالحقيقة انا ماشي خوّان (سارق) ولكن حْشومة يْضيع هاد الشمع على وَدّ خرافات
شي شْوية جا عندي صاحبي محمد باش يْحط الشمع.وَرّيتو الفتْحة:
_ حطْ الشمع هنا .كولْ لسيدك يحي " ها شمعي ، ها تخْمامي ها باش تاتيني يا سيدي يحي
خويا محمد حيتْ فيه النية دار داك الشي اللي قلت لو عليه
خْرجْنا من الضريح ولْبَسْنا الصبابط .دزْنا من حْدى لمقدّم .قال لصاحبي : الله يْقضي الغراضْ أولدي
شي شْوية جاتني الفكرة باش نشَّربو الما ديال الضريح.كاين واحد العين فيها الما شْحال حْلو.لمهم شْربنا ورْتاوينا
_ دابا نْرجعو في حالاتنا، ياكْ ؟
جاوبت صاحبي : يا لله راه قْريب يْودّن المغرب
وْصلْنا للدار فلوقيتة اللي كانت خالتي فاطنة (أم محمد) تْوَجَّدْ أتايْ
_ إوى فين مْشيتو بالسلامة ؟
_ مْشينا زَرْنا سيدي يحي
_ شايالله يا سيدي يحي بنيونس مول البرهان
_ واه أخالتي فاطنة عندو البرهان
_ نْعامْ أولدي عبد الحميد.راه اللي مْشى عندو ما عمرو ما يْخيبْ
محمد صاحبي بْغى حتى هو يْأكّدّ الكلام ديالْ أمّو:
_ يامّا راني طْلبتو باش نَنْجحْ فالباك
خالتي فاطنة ضحْكات وقالت لو : الله يْحَوْركْ .سيدي يحي يْنجْحكْ فالباك واشْ أنت هْبَلْتْ ؟
_ وعْلاشْ أمّا ما يْنجَّحنيش فالباك ؟
ضَحْكات وشافتْ فيا :
_ ولدي عبد الحميد خْدا الباك ديالو بْلا ما يزورْ سيدي يحي بنيونس .ياك أولدي ؟
_ نْعامْ أخالتي
شافت فولدها (محمد) : الى باغي تنجح خاصّك تقرى وتراجع دروسك
أنا اللي تْعجَّبْت : لكن أخالتي فاطنة : ماشي سْمعتك تقولي اللي قْصَدْ سيدي يحي ما عمرو ما يخيبْ ؟
_ واه.... نا اللي خاصني نمشي نْزورو ماشي هو
_ كيفاشْ زعْما ؟
_ أنا نعرف نتكلّم مع سيدي يحي وغادي ندّيلو الشمع والسكر
محمد بْغى يْزيد فالهدْرة وانا نْضَربو لْرجليه : يا الله أخويا محمد نَشرْبو تاي.الزيارة راها جوْعاتنا

يتبع غدا إن شاء الله
 

Houmidi59

::الفارس المغربي ::

غير متصل
#36
رد: قصة بالدارجة : حتى واحد ما زاد معلّم

هديك الليلة ، مْشيتْ نْقصّر عند جيرانّا لقدام، عند صاحبي ادريس وْخوه الحاج.هادو جوج تْوام ولعْجب واحد ما يشبه لاخور.فالحقيقة اللي صاحبي بزاف هو ادريس.إيه ، شحال مشيتْ أنا ويّاه لحْلاقي وشحال دخلنا من مرة للسينيما.هدا ادريس كنّا نْعيْطولو ادريس التوبيس.هاد التسمية جاتو من واحد المغامرة وقعت ليه.
واحد النهار جا عندي وقال لي : خويا حميد من اليوم غادي نبقى نركب الطوبيس فابور بْلا ما نْخلّصْ
ردّيتْ عليه : واهْ؟ كي درتي ليها ؟
شْرحْ لي : واحد السيد كونترولور (مراقب) فالطوبيس عندي سْميْتو.غادي نركب فالطوبيس للي جا عندي يطلب الورقة غدي نقول لو " أنا ولد أحْميدة"
_ شْكون أحْميدة ؟
_ آ حميد واش راكْ مْتَبَّعْ معايا ؟ أحميدة الكونترولور
_ دابا فهمت ولكن ماشي خطر هاد
اللعبة ؟
ضحك خويا ادريس وقال لي : صاحبي راني ركبت هاد لنهار جوج ديال المرات بْلا ما نخلّص
_ اوى آش غادي نقول لك ، غير عنداك يْجي النهار للي غادي تندم على هاد الفعلة.
فعلا داك النهار جا .يا الله دازت واحد السيمانة ولقيت خويا ادريس مْبوقَل وْعينو زرْقا
_ ما لك أخويا ادريس واش دْخل فيك
طوبيس ؟
_ لّا دْخل فيا كونترولور
_ واه ياك أنت زعما ولد أحميدة الكونترولور
_ أخويا حميد راني طحت فالكونترولور أحميدة
_ احْكي لي بالتفصيل
ادريس حْكى لي ما وقع لو .فْداك النهار كان سالَتْ كي العادة.جاه المراقب وطْلب منو الورقة .خونا بلله قالّو : أنا ولد أحميدة الكونترولور.
تََمْ تَمْ (مباشرة) جْبَدْ معاه بْصقلة (صفعة) وواحد الديريكت لوْجه.ادريس طاح فالأرض.زادلو ركلة أُو هو يقول لو : يا ولد لحرام فين جيتْ ولدي أنا ماعندي وْلاد وراني ما زال كاعْ ما تزوجتش.
المهم ادريس بقى يرغب ويْزاوَك باش
طلقو .
ادريس أخْتمْ القصة ديالو : أخويا حميد هد السَلْخة ما عمرو ما ننساها.هي هاديك كولشي ساق لو لخبار.موراها سمّيناه ادريس التوبيس.
المهم هاديك الليلة قصّرْت مع صاحبي ادريس .الموضوع ماكانش على الكونترولور.كان موضوع جديد عْجبني بزاف وهو فكرة المراسلة .القضية ساهلة كانت واحد الجريدة كدّيرْ اعلانات ديال المراسلة .اللي بْغى يتْكاتبو معاه (لبْنات) ما عليه غير ينشر اعلان مع تصويرتو .خوكم حوميدي كان بوغوس في ديك لوقيتة كان عندو الشعر طويل مْدرّكْ لو الودنين (مْخَبّي ) كانو عندو لي بّاتْ (les pattes)هادي كْويبّة ما يعرفوها غير الجيل ديالي.
المهم كتبنا الطلبات وزدنا ليهم التصاور .خَليتْ لَبرية لصاحبي باش يْصيفطها.طبعا مع فلوس التامبر حيت ادريس ديك لوقيتة كان باقي ما خدّامش.
دوّزْنا ليلة غير ضحك ونكت .ما نْعسنا حتى ل3 ديال الصباح.
فقنا مع ديك لحْداش .المشكل خاصني نرجع لتاوريرت وانا باقي ما شْريت الكاشا.الحمد القضية سَلْكات : والدة صاحبي ادريس أعْطاتني جوج هيدورات.قالت لي : هادو احْسن من 10 ديال لكْواش وزادت لي واحد بوشْراوط .
مع الطناش ديال النهار ركبت فالتْران (القطار)بعدما درْت اسمهان باكاج.تْقامت علي يا الله 6 ديال الدراهم.
وصلت لتوريرت مع الجوج ديال لعشية.هي هاديك مْشيتْ عند صاحبي الشريف باش نتغدّى.كْليت طبسي ديال للوبيا باللحم الغنمي ، مع برّاد أتاي.هاد لغْديوا يا لله خلّصتْ فيها 20 درهم.
خوكم عبد الحميد كي العادة اشْرى شوية كونْصيرْف(conserves).بعدما جْمعت حوايجي فلاموطو شَدّيتْ الطريق لوْْلاد سليمان.
وْصلْت لسيدي شافي .هاديك هي قلت مع راسي نمشي نْحط لاموطو عند صاحبي الحمداوي ، نمْشي نْكمَّدْ لعْضيمات فالحمّام.
يا الله دْخلت لْقيتْ واحد السيّد مقابل لاكيس.باينة عْرفني .قال لي : سْويدي باغي الساريج أو البانيو؟
_ شْحال ثمانْ كل واحد؟
_ الساريج جوج دراهم والبانيو ب4 ديال الدراهم
_ أرا ليا البانيو
المهم دخلني لواحد البيت صغيرة فيها بانيو .الما شحال سخونْ ولكن غير تدخل فيه دغيا يعَّجْبك الحال.بْقيت فالبانو يمكن ساعة او جوج.جا عندي مول لاكيس .دقْ الباب : سْويدي راها الخمسة ديال لعْشية

_ واه اسمح لي غادي نْشَللْ ونخرج
مين خْرجت كان ضْلامْ الحال.الحمداوي قال لي : غادي تْبات عندي.
فعلا مع الظلمة صعيب علي نمشي فطْريق كلها بيست وحْفاري


يتبع غدا ن شاء الله

 

Houmidi59

::الفارس المغربي ::

غير متصل
#37
رد: قصة بالدارجة : حتى واحد ما زاد معلّم

هاديك الليلة قْضيتها عند صاحبي الحمداوي.الصراحة تْهلّى فيا مزيان والحاجة اللي عجباتني فالسيد أنه ولو مرّة واحدة ما تْكلّم ليشْ على الخدمة.
فالصباح بكري شدّيت الطريق لأولاد سليمان.وْصلت مع ديك التْمَنْية .لْقيت التلاميذ فالقسم، مْقابلهوم عبد العزيز:
_ صباح الخير خويا عبد العزيز.ياك ما هاد الليلة ما صلّيتيش لفجر؟
_ وعليكم السلام.الله يهديك أسي عبد الحميد ، أنا ما عمرو ما نْفَلّتْ قيام الليل وصلاة الصبح
آش غادي نْديرْ مع هاد خيْنا .هو شوية متْزَمَّتْ ولكن يبقى أخ وصديق:
_ اسمح لي خويا عبد العزيز ، فالحقيقة خاصني نشكرك حيت شدّيتي ليا التلاميذ
_ ما كاين مشكل
المهم دخلت للقسم ديالي باش نْقَري كي العادة.
النهار داز عادي وبدون مشاكل.المهم مر شهر نونبر وتبْعو دجنبر .جات امتحانات الدورة الأولى .كيف ما تعرفو خاصنا نْعمْرو النقط فالإدارة .هاديك هي واحد النهار جا عندنا لمقدّم واعطاني رسالة قال لي من عند المدير.فتحت الرسالة وقريت باللي خاصنا نحضْرو الاجتماع حْنا بتْلاتة لفرعية ضيعة دوبْوا(la ferme Dubois) باش منها نعْمرو النتائج ومنها ندَّرسو المشاكل .طبعا أخبرت لخّوت باش غدّا إن شاء الله نمشيوْ لتاوريرت.
فالصباح علي وعبد العزيز ركبو فالموطور ديالهوم وانا تابعهوم فالموطور ديالي.كان نهار مشمّس .وصلنا هاديك العشرة ديال الصباح.أنا خلّيت الموطور ديالي عند واحد السكْليست وركبت فالكار اللي يمشي لضيعة دوبوا.
مين وصلت للفرعية لْقيت لمعلمين كانو تقريبا شي 30 واحد مجتامعين .غير دخلت قال لي المدير : خود أسّي عبد الحميد باش تْعمّرْ النقط
المهم مْشيتْ لواحد القسم باش ناخود راحتي.شي شوية لحق بيا عبد العزيز وعلي.المهم قْضينا تقريبا ساعة.
قبل ما نمشيوْ في حالاتنا جا واحد السيد ظاهر عليه الوقار.قال لينا المدير هدا سّي عبد الرحمان ماشي المجدوب وراه هو شيخ لقبيلة هنا ، راه عارضنا كاملين باش نتغدّاو عندو فالفيرما (la ferme) ديالو.
المشكل كولهوم عندهوم فاش يركبو من غير أنا .
أنا نْفكّر ، سْمعت شي واحد يْعيَّط عليا.مين دورْتْ مورايا لْقيت واحد المعلم عْرفت من بعد أن سْميتو عبد الحق.قال لي : أجي يا أستاد تركب معاي فالموطور.
فالفيرما ديال الحاج عبد الرحمان تْغدينا وتْسارينا فالبساتين والحقول.تبارك الله عندو لفلاحة زينة : ها الشجر ديال اللتشين (الليمون) ها الشجر ديال الرمان ، ها الشجر ديال السفرجل.الحاج جاب لين الشْكايرْ (لخْناشي) وقال لينا عَمرو معا ريسانكوم راه الخير موجود
الصراحة أنا دّيت معايا جوج ميكات وحدة مْعمْرة ليمون والثانية معمرة رمان.
فلعْشية رجعنا لتاوريرت.عبد العزيز وصاحبو مْشاو ديريكت لأولاد سليمان وأنا قررت باش نْباتْ فتاوريرت.
من الصدف كان وحد صاحبي ادريس تْكلّم لي على شي فاميلة عندو فتاوريرت.قال لي غير سير عندهوم غادي يتْهلّاو فيك .
داك الشي اللي درت.مين وْصلت أعطيتهوم الليمون والرمان .فرحو بزاف واستقبلوني بحال شي ضيف عزيز.كولهوم سولوني على عائلة صاحبي ادريس واعطيت ليهم التفاصيل.
المهم دارو لعشا وتْعشّينا.
كانو هوما 4 ديال الناس : الأم وجوج بنات وولد.الولد يا الله في عمرو واحد 18 عام .ما قاري ما خدّام.لبنات متْقارْبات فالسن عندهوم ديك 20 عام.
الَخوت بانو ليا بحال الى طامعين فْخوكم ، يعني ناويين الزواج .غير شفتهوم كيبتاسمو لي وانا نْعيق.
المهم دَرت بْحال الى ما فاهم والو.
فالصباح بكري مْشيت لأولاد سليمان بعدما حلْفو ليا باش نرجع لْعندهوم في أقرب وقت.
جا النهار اللي غادي نّشدّو فيه العطلة ونْوزعو فيه النتائج.نتائج الدورة كانت ضعيفة لكن بالمقابل نتائج التدويرة كانت جد إيجابية.تصورو أنه داك النهار جمعت جوج دجاجات وديك وقْنية و20 بيضة من التلاميذ .كل تلميذ نعطيه النتيجة ديالو يمشي يجري لدارهوم ويرجع جايب معه شي حاجة
من بعد عرفت السبب : مساكين ما كانوش يعطيوهوم النتائج فالورق كانو غير يعطيوها ليهوم شفويا
فهداك النهار أعرض علينا الحاج قدور ودار لينا غْدا فاعل تارك.ديك لوقيتة العطلة كانت تْبدّي من 22 ديسمبر وتْسالي حتى ل5 من الشهر ديال يناير يعني 15 يوم ديال العطلة.
أول نهار ديال العطلة مْشيت ديريكت للرباط.اسمهان مْشات معايا حتى هي على حقاش كانو من قبل قالو ليا مين شْريتْ الموطور باش نْرجَّعها بعد 3 شهور على ودْ الديكالاميناج.
العطلة كانت رائعة وخاصة مع الوالدين والاخوة والأخوات.الصراحة 15 يوم دازت دغيا.رجعت وانا ما سخيش ولكن لابد من الرجوع



يتبع غدا إن شاء الله

 

Houmidi59

::الفارس المغربي ::

غير متصل
#38
رد: قصة بالدارجة : حتى واحد ما زاد معلّم


دازتْ أيّامات ديالْ شهر يناير باردة .لَعْراضات نقْصو.الحاج قدور ما بقاش يعرض علينا نهار الجمعة كي العادة باش ناكلو كسكسو.صْحابي علي وعبد العزيز رجعو راشقا ليهوم ولكن شفْت بحال اللحية ديالهوم زادت كبْرات وحْياهوم زاد نْقصْ.هاد المرة قالو لي باللي خاصني ما نبقاش نسمع الموسيقى لأن داك الشي حرام.خوكم حوميدي داك الشي عندو فالدّم.ما نقدرش ننعس الى ما كانتش الموسيقى .على كل حال ، ما بقيناش تقريبا نتلاقاو من غير فوقت العمل.
واحد الجمعة ، مشيتْ لوجدة منها زيارة للفاميلة والأصدقاء ومنها نشري ما نحتاج .هاد المرة سافرت فالقطار لوجدة وطبعا خْديتْ معايا اسمهان.المشكل هو أني وصلت مع لعشية ، يا الله مع المغرب.وانا نتفكر صاحبي ادريس والطلب ديال المراسلة اللي كنا درناه فالجورنال.مْشيت ديريكت عند صاحبي.لْقيتهوم يشربو القهوة.
_ جيت فوقتك خويا حميد .هدا ما قال لي ادريس بعدما ساعدني باش دخّلتْ الموطور للدار
عمّي المختار (الوالد ديال ادريس) فْرَح مين شافني
_
مرحبا بولدي حميد.هاد لليلة غادي تْباتْ عندنا.
_ نعامْ أعمي المختار
هي هاديك طلعنا لبيت لولاد فالطابق الأول .غير دخلنا للبيت ، جاب لي صاحبي صندوق ديال لبراوات وقال لي :
_ شدْ خويا حميد البركة ديال الرسائل اللي جاوك
شفت فيه بحال الى مبهوض : واه كاعْ هاد الرسائل
_ أنت راه ما جاك والو .أنا راه الضوبل ديالك
_ اوى خويا نحمدو الله ونشكروه
المهم بقيت نشوف الرسائل وحدة وحدة بلا ما نفتحها .يا الله كنت نقرى مين جات.لقيت أخوتي باللي 50 رسالة أو أكثر كلها من الدار البيضاءوالباقي من طنجة وفاس ومكناس ومراكش وحتى من الصويرة.كولهوم من عند لبنات من غير وحدة للي مولاها ولد وهي اللي جاتني من الصويرة
المهم درتهوم فالصاك باش نجيب بيهوم الوقت مين نكون فأولاد سليمان.
ادريس جاب الرسائل ديالو وبْدى يقْرى عليا شي وحدات باينة عجْبوه.
_ اسمع أخويا حميد لهادي : صديقي الغالي أكتب لك هذه السطور متمني أن تجعلني صديقة في حياتك وتخصص لي مكانا في قلبك ..... وَ وَ ...كلام كلّو حْلاوة وعسل
غير سالا من القراية ، قال لي : كيجاتك هاد الرسالة ؟
جاوبتو : قمْبولة
_ كيفاش واش واعرة ؟
_ لا ما تخافش ولكن ...
_ ولكن واشْتا (أشْنو)
_ انا باين ليا بْحال اللي كتب لك هاد الرسالة شي ولد
_ مل يمكنش؟
_ اوى الله يجعلنا من الكدابين
_ حاشا خويا حميد واخّا أنت عنّاب (كثير الكذب) فْلَمْلاغة ولكن فالمعقول أنت ديما كتْقول الحق.
_ دابا راني كنتْكلّم معاك فالمعقول
بْدى ادريس يْخَمَّمْ .شي شْوية قال لي : كيفاش عْرفتي باللي ولد ماشي بنت ؟
_ غدي نكولك.راه عندي تجربة كبيرة مع لبْنات.شوف أخوي ادريس لبنات كيحشمو .ما يمكنش غير تجي تقول ليك بحال داك لكلام ، زعما بغيتك تكون صاحبي.
باش يتْأكّدْ من الهدرة ديالي ، قلت لو : واش الرسائل اللي جاتك بْحال هادي ؟
ردْ عليا بالزربة : لّا غير هادي كلها عادية
_ اوى شفتي
_ دابا آشْ المعمول؟
_ اوى غادي تختار اللي باغي تكتب ليهوم وتطلب منهوم يْصيفْطو لك الصورة ديالهوم .
_ اوى ؟
_ اوى أخْتار لفريكيسة فيههوم
ادريس عجْبو الحال : خويا حميد انت مَجهاد علي .أنت راك تعلّمتْ هاد الشي من الرباط
_ بْحال الى علمك الله
المهم شي شوية بانت لي حتى أنا نقرى شي رسالة من هداك العرّام اللي عندي.علاش ما نقراش الرسالة ديال الولد ؟ فعلا فْتحتها وقريتْها.رسالة جد مختصرة وكيقول فيها بأنه عارف أن رسالْتو غادي تلقى في سلة المهملات بْلا ما نقراها.وكيْزيد يقول بِأنّي يستحيل نرد عليه حيت هو ولد وماشي بنت
هاديك الليلة قرّرت باش نكتب لو رسالة ونقولو باللي راه غالط مْيَة فلَمْية والدليل راني قريت الجواب ديالو وراني قْبَلْت يْكون صديق ديالي فالمراسلة.
أخبرتو بأني معلّم في نواحي وجدة وأني نسكن فالرباط وكنْكون فالعاصمة فالعطل والأعياد.قبل ما نختم الرسالة طْرحت عليه شي اسئلة شخصية باش يْردْ عليها في رسالْتو القادمة
شي شوية مَدْ ادريس يدّو لصّاك ديالي وجْبَدْ رسالة غليظة ، يعني فيها لوراق بزاف .قال لي : حميد افتح هادي باينة فيها شي كنز .
قبل ما نفتحها قْريتْ شكون اللي كاتبها :الاسم والعنوان بالفرنسية والاسم باقي عاقل عليه لحد الآن : كْلود (Claude)
كلود هادا اسم يقدر يْكون ولد ويقْدر يْكون بنت.فْتحت لبريا لقيت فيها 3 ديال لي كارت بوسطال(cartes postales) ديال باريس.خاويين م مكتوب فيهوم والو
ادريس شاف فيا وقال لي : سعْداتك خويا حميد .هادي نصرانية باغيتك .تقدر تتزوج بيها وتمشي للخاريج.
ما بغيتْشْ نْردْ عليه قْريتْ ورقة مكتوبة فخط شحال زين .المهم الملخص ان الكاتب ديالها رجل فعمرو واحد الخمسين عام كان قنصل في تونس لمدة 4 سنوات .على ما يقول انه تعرف على العرب عن قرب وشافْ باللي هوما ناس مزيانين وفيهوم الخير .دابا راه مستاقرْ فالرباط فتمارة حيت كاري فيل على لبحر.خونا بالله كيطلب نكون صديق ديالو باش نتكاتبو ونتبادلو الآراء والأفكار.
صاحبي ادريس هاد المرة ضْحك حتى طاح من الضحك: خويا حميد هاد الشارف أنا شاك فيه
_ كيفاش زعما يكون أمرى(مرأة) ؟
_ واش هْبَلْتْ .ياك زعما راجل .شوف هاديك التصويرة اللي طاحت من لَبْرية .
فعلا تصويرة ديال رجل كبير .سبحان الله داير بْحال واحد الممثل مصري كان كيعجبني بزاف اسْميْتو أنور وجدي.فالتصويرة خونا بالله معاه جوج كْلاب بول دوغ (bull dog)
_ خويا حميدهاد خيْنا باينة الى تْلاقيتي معاه يقْدر يقتلك ويعْطيك ماكلة لكْلاب ديالو.
هادا راني قْريت عليه راه ساديك (sadique)
درْتْ راسي بْحال الى أنا كامبو وقلت لو : اوى شفْتي خويا ادريس هادا سديق .داك الشي اللي باغي حتى أنا
بْلا ما نخلّيه يْزيد فالهدْرة قلت لو : هدا غادي نْرد عليه حتى نمشي لوْلاد سليمان باش حتى وحد ما يْبرْزطْني


يتبع غدا إن شاء الله

 

Houmidi59

::الفارس المغربي ::

غير متصل
#39
رد: قصة بالدارجة : حتى واحد ما زاد معلّم

قْضيت يوم السبت وصباح الأحَد عند الاصدقاء والعائلة.لعْشية ديال الأحد شديت الطريق لوجدة .وصلت مع المغرب لتاوريرت.بالطبع مْشيت عند عائلة صاحبي ادريس.من الصدف الجميلة كانت عندي واحد السُّخْرة (أمانة) خاصني نْوصَّلها ليهوم.هادي بعدا حاجة مزيانة ماغادي نشْري ليهوم والو ومن الفوق ماغاديشْ ندخل بْيَدّي خاويين.
فالصباح بكري ركبت على الموطور ديالي ومْشيتْ ديريكت لأولاد سليمان .كانت الساعة تقريبا العشرة مين وصلت للمدرسة.جيت نيشان مع وقت الدخول ديالي.
قرّيت التلاميذ ديك الصبْحية .جات الطْناش والنص ، خرجو التلميذ .كي العادة تْوضّيتْ وصلّيتْ الله يقبل.
علي وصاحبو ما بانوش ليا حيت كانوا فالبيت ديالهوم .أنا جْبرْتها من الجِنّة والناس.النيت خاصني نْدير شوية لاسْييسْت (القيلولة).
مع ديك الجوج والنّص فَقتْ ، باش نْقرّي التلاميذ ديال فوج لعْشية.
فديك لوقيتة شفْت علي وعبد العزيز .جاوْ بْجوجهوم لعندي.
قال لي علي : شفْتي هاد الناس .ضاهْرة حْماقو
شفْت فيه ونا متْعجّبْ: كيفاش زعما ؟ راني ما فْهمت والو
رد علي عبد العزيز : البارح عَرْضونا باش نتغدّاو عندهوم
علي قاطعو : عْرفتي شكون للي عْرضْ علينا؟ اوى سيدي راه الحاج الميلود
زاد قال لي عبد العزيز : المهم كْلينا وشْربنا الله يقبل.هاديك هي خونا بالله بْدى يْسوّلنا واش أنتوما مْزوْجين؟
زاد كمّلْ علي : قلنا لو أحْنا باقيين ما تزوّجنا لأن المانضة قليلة والزواج خاصو لفلوس
كمّل عبد العزيز : خونا بالله قال لينا أن عندي 3 ديال البنات زينات كيعرفو كاع أشغال الدار ، خاصهم غير شي رجل بحالكوم
علي قال لي : خويا حميد راه حتى أنت سوّل فيك
عبد العزيز زاد قال : اوى خونا بالله قالك ها البنات راهوم ديالكوم ، أما الصْداق لا تضّربو هم أعْطيوني غير بشوية عليكوم .انا ما طالبش بزاف غير نص مليون باراكة.
علّقْ علي : زعما غدي نْخلصو بالتقسيط المريح
اضحكت أخوتي مزيان : اوى سعداتكوم راكو لْقيتو لمْرى اللي غادي تسْتركوم وتقبل على حْماقكوم
عبد العزيز بْحال الى غْضبْ : خويا عبد الحميد الله يخلّيك أخطينا من لمْلاغة.راحنا دابا كنتكلمو فالمعقول
_ اسمح ليا خويا .المهم ياك عندكوم الحق ترفْضو.اوى كولوها ليه نيشان
_ داك الشي اللي درنا
_ اوى راكو سدّيتو الموضوع
قبل ما يمشيو قال لي علي : حْنا من اليوم ما باقيينش نمشيو نتغداو و نتعشاو عند شي واحد منهوم
_ اوى خاطركوم
المهم دخلت للخدمة ديالي.جات الربعة ، مشاو التلاميذ في حالاتهوم.
دخلت للقسم ديالي .كي العادة اشعلت الراديو باش نسمع شوية الأخبارومنها نقرى الرسائل ديال المراسلة .

آه يا لخّوت لقراية ديال هاد الرسائل دازت جوج سوايع .هاد لبنات حيت عرفوني بوكوس (beau gosse) بغاوْ يتعارفو معيا.المهم أختاريت واحد العشرة منهوم منها تكون عندي هواية ومنها نتعارف على اصدقاء جْداد.

مورا المغرب كتبت رسالة لصاحبي القنصل .رسالة مطولة تكلمت لو فيها على كولشي وما نسيتش نقولو بأني كنْجي للرباط فوقت العطل.

التامْبر ، نْسيت ما شْريتو مين كنت في تاوريرت.لكن ماشي مشكيل حيت كنعرف واحد للعيبة كنا كنديروها حيت ما كانش عندنا لفلوس باش نشْريو التامبر.ساهلة ماهلة تاخود التامبرديال شي بْريَة والتامبر راه مطبوع .ما عليك غير تمسح بيه الجبهة ديالك .دغيا الطابع يمشي وها هو عندك تامبر جديد.أما كيفاش تْحيْدو من لبرية ما عليك غير تخلّي موقراج (الغلّاي)على البوطة حتى يغْلي الماء ديالو مين يخرج البخار من الأنف ديالو تْوجّه لبرية لهاداك البخار .لبرية غادي ترطابْ اوى التامبر دغيا يتحيّد بلا ما تقطّع لبريّة

هذا هو الديباناج والا فلا

ما بقى لي غير نْصيفط لبراوات مع شي واحد يكون غادي لتاوريرت باش يْلوحْهوم فصندوق البريد

من الزهر ديالي كبريتي كان غادي يمشي لكرسيف (مدينة على بعد 50 كيلومتر من تاوريرت) كانت مناسبة باش يدّي معه الرسائل ديالي.

أيامات البرد واخّا كانت طويلة ولكن دازت بسلام.كي العادة الخدمة هي الخدمة ، لخوانجية صحابي هوما هوما، الصْيادة فالواد نقصات حيت الحوت ما بقاش يْبان.الضاهر مشى لْقونْت آخور فيه السخونة.لعْراضات كنت كنمشي ليهوم ...ماشي بوحدي لكن مع علي وعبد العزيز.واخا أنهم ما بغاوش يمشيوْ ولكن شكون اللي يكره الخير ؟

وجدة مشيتْ لها واحد 4 أو 5 مرات.باش نجيب الرسائل ديالي .من بعد لْقيت الحل عند واحد مول الحانوت سْميْتو بنبوزيان.كانو السكان ديال تاوريرت داير العنوان ديال الرسائل ديالو عندو.

جا وقت الربيع واخضارت الارض وجا معاها الخير.هاديك لوقيتة شبعنا حليب ولبن وزبدة

امتحانات الدورة التانية حتى هي قربات .خصنا نوجدو ليها



يتبع غدا إن شاء الله
 

bouchaib56

::مراقب مغربي ::

غير متصل
#40
رد: قصة بالدارجة : حتى واحد ما زاد معلّم

قصتك قصة ياحوميدي
تمارة اوتعذاب مدارس البادية
واللي ضحكني تزوار اتنابر في الحقيقة
ماكاين بوسطة والبنات خاصهم الجواب لرسائلهم
اللي اعرض عليك باغي لصق ليك بنتو
امركم غريب الله يرزقكم الصبر
متعة القصة اتفكرني ملي شيروا بنا البوادي واحنا عاد متخرجين من المدارس النموذجية
اسطاجينا ب20تلميذ وراونا حلاوة الجنة وفي البادية وجدنا60تلميذ غير المعوق على خوه
قصتك هذه عبرة للأساتذة القادمين
 
أعلى