قصة بالدارجة : حتى واحد ما زاد معلّم

Houmidi59

::الفارس المغربي ::

غير متصل
#1
شحال من واحد ما يعرفش ايدير شي حاجة ولكن مسكين الله غالب يحشم .النتيجة ما عمرو ما يعرف يدير ديك الحاجة .تلقاه مسكين يقول فنفسو غادي يضحكو عليا الى عرفو باللي ما نعرفش ندير ديك الحاجة .بكل صراحة بحال هاد النوع من البشر يجيبها ديما فراسو ويبقى في نظري كامبو من الدرجة الأولى .المهم هادي واحد القصة في هاد الموضوع

هاد القصة وقعات في بداية التمانيات.كنت ياالله فاش تخرّجت من مركز تكوين المعلّمين بالرباط.على كل حال كان التعيين ديالي في نواحي مدينة تاوريرت ، فواحد لعروبية اسميتها أولاد سليمان .خوكم ما عمرو ما أسمع بها.سوّلت شي ناس باش ينعتو لي كي غادي ندير باش نمشي ليها .واحد السيد الله يعمرها دار قال ليا : شوف أخويا أنت باينة عليك برّاني .الحل الوحيد هو تاخود طاكسي كورسة حتى لولاد سليمان .طبعا وصلني حتى لبلاصة الطاكسيات ومشى في حالو.قرّبت من واحد الشيفور كان يقرى واحد الجورنال قديم .هو في الحقيقة جوج وراقي ديال الجورنال .المهم سلّمت عليه وقلتلو : الله يخليك باغي نمشي لولاد سليمان .واش تبغي توصلني؟
شاف فيا مزيان .يمكن خونا بالله بحال الى بانْت لو كامبو .او هو يقول ليا : الطريق شوية بعيدة ومن الفوق مكرفصة حيت نصها بيست .انا صراحة ما نمشيش تمّا الى ماكانو عندي ست بلايص.
جاوبتو ما كاين مشكل ، نقدر نخلص هاد الست بلايص.غير اوكان بشحال توصلني؟
فكر شي شوية وقال لي : أخويا عندي المخسور غادي نرجع خاوي . لا لا ما مسلكانيش
_ واخا ، وباش تسلك شحال ؟
خونا بالله عجبو الحال أُو هو يقول ليا : دابا تكلمتي .أعطيني 100 درهم نوصلك حتى لباب المدرسة

يتبع غدا إن شاء الله
 
التعديل الأخير:

Houmidi59

::الفارس المغربي ::

غير متصل
#2
رد: قصة بالدارجة : حتى واحد ما زاد معلّم

إخواني الكرام خاصكوم تعرفو باللي 100 درهم ديال ديك لوقيتة عندها قيمة كبيرة .تصورو من وجدة لتاوريرت كان ثمن التذكرة فالكار 5 ديال الدراهم و20 سنتيم والمسافة 110 كيلومتر. هاديك هي خَمّمْتْ مزيان فالأجر اللي طالبو الشيفور .واه هاد المبلغ يوصلني لمراكش قالقطار ويمكن يشيط لي باش نشري كاسكروط او باش نتسارى فالطاكسي.خوكم حوميدي ما شي كامبو لهاد الدرجة باش دغيا يوافق .
_ عرفتي آش يجيك مْليح ؟
_ نعم أسيدي آش حاب الخاطر .(خونا بالله يسحاب ليه غادي نتشطر معاه فالركبة ، بحال البرد يقدر يحيّد ليا واحد عشرين درهم)
_ زيد كمّل قرايتك فالجورنال وأنا غادي ندير شي دورة ومن بعد غادي نرجع
السيد عرف راسو غادي يزكل كْلِيَانْ(client de marque) مهم :
_ أجي أصاحبي ...ماتكون غير على خاطرك .غادي نوصلك لولاد سليمان، أعطيني غير ستين درهم
بان لي السيد طاح فالشبكة ولكن واخّا هاكدا ، خليتو ومشيت.قبل ما نبعد عليه جاوبتو :
_ خليها 40 درهم أنا راجع ليك .
المهم باش ما نخليهش يرد علي ، دغيا بعدت عليه.هاديك هي ، قلت مع راسي نمشي لشي قهوة نشرب شي كاس أتاي منعنع. فالشارع الرئيسي كاين بزاف ديال لقهاوي ، اختاريت وحدة فالشوكة كانو بكري يسميوها الكعدة.ريّحت فالكرسي .قرّب مني واحد البرهوش لابس طابلية ما عمرو ما شافت الماء والصابون.
_ آش تشرب أسويدي ؟
شفت فيه :
_ جيب لي شي براد أتاي منعنع او شي حاجة ما نكول
_ عندنا أسويدي الخبز والكونفتير والزبدة
_ مزيان ، ردّيت عليه، جيب لي طبسي كبير
مشى الكارسون يجري وانا بقيت نشوف لكليان ديال القهوة.آه يا الخوت وانا لاحظ ما كاين غير بورزة.
مشكلة هادي طحنا فقهوة لعروبية .وانا استاذ متعلم ماشي بلاصتي هادي.دغيا غادي يعرغوني برّاني.المهم قلت مع نفسي غير نفطر نخوي لبلاصة .
على كل حال ، ياالله أنا نفطر وانا نشوف واحد السيد كان مورايا شاد الركنى داير يدّو على حنكو.راجل مَسْتيكي ( bien stiqué) مزيان .ما تكول عليه غير شي واحد من الطبقة الراقية.واحد لوقيتة شافني .بحال الى هز راسو ، خوكم رد عليه بابتسامة :
_ تبارك الله على الأخ ، أجي تشرب معايا شي كاس أتاي.
قرّب مني :
_ الله يبارك فيك أخي
وزاد قال لي :
_ حتى أنت يظهر ماشي من هاد لبلاد
_ عندك الحق أنا ماشي من بلاد بورزّة
اضحك مسكين وقال ليا :
_ أنا جيت من مكناس
_ شاي الله أسيد التيجاني
_ وأنت مين جيتي ؟
_ جيت من الرباط
انبهر السيد:
_ من العاصمة ؟ أشنو بغيتي من هاد القنت اللي البراني يبان فيه على بعد 100 كيلومتر؟
_ ما بغيتش أخويا ، هوما اللي بغاوني
_ كيفاش أخويا ما مفهمتش
_ وزارة التربية الوطنية صيفطاتني نقرّي فْشْي أعروبية ديال تاوريرت
_ سبحان الله العظيم ...حتى أنا
_ غير ما تكوليش صافطوك لولاد سليمان
_ والله الى بَصَّح
_ إوى آش درتي؟
مسكين شاف فيا بحال إلى بغا يبكي :
_ ما عرفتش أخاي .من البارح وانا هنا .ما عرفتش آش ندير .حارت لي واش نرجع ونسمح فالوظيفة او ...؟
_ واه .وفين قضيتي الليلة
_ فهادك لوطيل .أخويا الليل كامل وانا فايق
_ يا ك ما قوة البشر؟
_ واش من بشر ؟ لفراش كلو بق وبرغوت .والمشكل خدى مني 10 ديال الدراهم
بقيت نفكر واحد لوقيتة وانا نقول ليه:
أجي نديرو شي دورة ونسولو.الوالدة الله يذكرها بخير ديما تقول ليا اللي ما عندو لسان ما يتلف.أجي نشوفو هاداك مول الحانوت .يمكن يفيدنا
اقتربنا من الحانوت.كيفاش غادي نوصفولكم .هدا مولاه يبيع كلشي : لحليب ، الخبز ، ماطيشة ، اللحم ..كولشي حتى لكواش والصنادل
هادا عندو سوبر مارشي (super marché) يعني هادا سابق الأروبيين.ماشي بعيد يكونو خداو منو الفكرة
المهم قرّبت منو :
_ السلام عليكم
_ وعليكم السلام أسويدي .
_ اسمح لي باغي نسولك : ناويين نمشيو لولاد سليمان
شاف فينا بجوج وبدى يضحك :
_ ياك ما انتوما لَمْيُوطا الجداد (les nouveaux maitres)؟
شفت فصاحبي ، حتى هو زاد أصفار مسكين:
_ بحال داك الشي أخويا.ياك ما أنت المدير ؟
_ آش من مدير .المدير راه راه مْجَلْوَقْ فْشي قُنْتْ
_ فين ؟
_ الله أعلم
_ ما كاين مشكل .كو ليا لميوطا لقدام فين مشاو ؟
_ ياك انتوما اللي عارفين
_ واخّا .كاين شي مركوب لولاد سليمان
_ كاين ولكن ماشي اليوم.نهار السبت يجيو هنا الكاميونات ديال ولاد سليمان باش يتسوقو
_ وقتاش يرجعو ؟
_ مع العاصر .مورا العاصر ما تلقى حتى كاميو يدور
_ مزيان تبارك الله.شحال بعدى يدّيو لبلاصة
_ 5 ديال الدراهم....لكن تركب اللور مع (حاشاكم ) لبهايم
صاحبي الجديد صافي مسكين بقى غير شوية ويقدر يسكت ليه القلب.بدى يصرخ ويغوّت :
_ مصيبة مصيبة كيفاش غادي نديرو.اليوم راحنا يا الله لخميس .باقي يومين.آش صبرني نْبات فداك لوطيل ؟
ما تقلقش كاين المركوب ولكن شوية غالي
_ شحال زعما ؟
_ مية درهم
_ بزاف ولكن قابل .ياالله نمشيو
_ اصبر نمشي نجيب حويجي من لاكار خليتهوم قوسيني
_ انا غادي نجيب حوايجي من لوطيل
_ وهو كدلك

يتبع غدا إن شاء الله
 

Houmidi59

::الفارس المغربي ::

غير متصل
#3
رد: قصة بالدارجة : حتى واحد ما زاد معلّم


فالطريق ، قال لي صاحبي المكناسي باش نقلبو على طاكسي.لكن مع الأسف لمدينة صغيرة ما فيهاش الطاكسيات، لكن وجدنا اللي يسلكنا: واحد الولد عندو كروسة.غير شافنا او هو يجي لعندنا :
_ بغيتو نوصلكوم شي حاجة للمحطة ؟
وانا نجاوبو : لا أولدي ولكن تجيبنا شي حوايج من محطة القطار.
المهم مشينا وحْنا نتحدثو .قال لينا الحمال : راني سمعتكم كتكلمو على الطاكسيات .فتاوريرت كاين غير الطاكسيات البويض.واللي عندو الباكاج كاين أصحاب لكرارس.
سَوْلو المكناسي : بشحال كتوصلو لحوايج ؟
ضحك الحمال وقال لينا : داك شي اللي كتّب الله مرة جوج دراهم ، مرة ستين ريال
بعدما خديت حوايجي ، رجعنا للفندق باش صاحبي حتى هو ياخود الأمتعة ديالو.بقيت واقف مع الحمال والمكناسي دخل للوطيل.دازت واحد الربع ساعة وصاحبي جا لكن يبان عليه غضبان
_ مالك أصاحبي ، ياك ما شفروك؟
_ الحمد لله مادّاولي والو ولكن مول لوطيل شفار كبير
_ كيفاش ؟
_ قال لي خاصني نخلصو لَمْبَاتْ ديال اليوم وحتى ديال غدا
_ اوى عندو الحق .على حقاش خاصك تديكلاري قبل الطناش.دابا راها الجوج ديال لعشية
اقتنع دغيا صاحبي لكن باقي زعفان :
_ يا الله نمشيو في حالاتنا لولاد سليمان
ابتسمت وردّيت عليه : برّد دمك عندي ليك خبيَر زين.مول الطاكسي اللي غادي يوصلنا نقّص لي من الثمان.اطلب مني غير 60 درهم وانا خليتها لو ف40 درهم.
صاحبي فرح : باز أخاي .أنا اللي نخلص ما تضرب هَمْ
_ لا لا نتقاسمو الركبا أنت وانا.ياك زعما غادي نديرو عشرة وحدة
_ عندك الحق
هاديك هي وصلنا لبلاصة الطاكسيات.خونا بالله ما بقاش يقرى الجورنال.كان حاط احداه برّاد أتاي وطبسي فيه حرشة فوق منها السمن ولعسل.اللي شاف هاد الشيفور يكول باللي كان صايم 10 أيام.
المهم سلّمت عليه :
_ السلام عليكم .هاني جيت
رد عليا :
_ مرحبا زيد تفضل .الخير موجود
_ معايا صاحبي
_ حتى هو يزيد ياكول
صاحبي ما بغاش :
_ انا باغي نمشي لولاد سليمان
_ اصبر عليا غير ناكول .
ضحك الشيفور وقال لي : ضبّرتي على راسك.ما عندي ما يتسالك.غادي نتخلص منكم غير 50 درهم.واش قابلين ؟
_ نعم قابلين
هو يقول لينا : عندي ليكوم واحد الطلب : بغيتكم تكتبو لي واحد لبرية
انا الاول اللي تعجّبت : ياك زعما تعرف تقرا؟
_ ما نعرف لا قراية لا كتابة
_ لكن شفتك كتقرى الجورنال
عاود ضحك خونا بالله :
_ خوك غير باغي يلعبها كبير باش ما يبانش قدّام لكليان ما قاريش
ردّيت عليه ما كاين موشكيل .انا اللي غادي نكتبها لك.
يا الله غير قول لي آش باغي تكتب
_ بارك الله فيك أسويدي
المهم كتبتلو الرسالة واعطيتهالو .مسكين خداها وبقى يسلّم عليها
_ دابا غادي تشري واحد جوى ديال لبرية .خاصك تعطيني العنوان ديال عمّك.
جاب الله كنا قراب من الحانوت .هاديك هي دغيا كتبت لو العنوان
_ دابا خاصك تشري التامبر وترميها فصندوق البريد
هاد المرة ضحك وقال لي :
_ هادي نفهم فيها .اليوم مشى الحال .غدّا ان شاء الله نمشي لابوست.
يا الله الشرفا نتوكلو على الله باش نوصلو لولاد سليمان قبل ما يطيح الليل.
ركبنا فالطاكسي بعدما درنا حوايجنا فالكوفر ديال الطاكسي.
الشيفور داز على البومبة ديال ليصانص وقال لبومبيست : دير واحد 10 يطرو ديال المازوت
الى ما خفتش نكدب كان التمان دياتلو ما يتعدّاش جوج دراهم
المهم خرجنا من تاوريرت شادّين طريق جرسيف بحال الى غاديين لفاس.بعد 17 كيلومتر ديال الطريق ، وصلنا لوحد القرية سميتها سيدي شافي.لكن ما دخلناس للقرية .الشيفور مشى مع واحد البيست .تمّا قال لينا : دابا بدات الطريق الواعرة

يتبع بعد يومين
 

Houmidi59

::الفارس المغربي ::

غير متصل
#4
رد: قصة بالدارجة : حتى واحد ما زاد معلّم

فعلا البيست اللي دخلنا ليها بيست واش من بيست.تصورو كلها حْفاري ومْعمرة حْجر.لدرجة أننا دَرْنا كْروفيزون .واحد لوقيتة بان ليا الشيفور بْحال الى نادم على هاد السفرة.قلت لو : ياك ما ندمتي أسويدي ؟ شاف فيا مسكين ، قال لي : فالحقيقة راني خايف الى شي رويضة أخرى تقولها. قلت لو : ما تقلقش وتوكّل على الله غادي نوصلو فالأمان. المهم دازت واحد الساعة بحال ما يكتبو الأدباء عصيبة شفنا فيها لعجب.شي مرات بحال تيبان ليا تهنا فالطريق.من ما لاحظت أيضا مسالك كثيرة خارجة من الطريق لكبيرة.باينة كتوصَّل لْشي بْلاصة.الشيفور اخبرني أن هاد المسالك كتوصل كل وحدة فيهم لْشي دار. لوقيتة اللي وصلنا لدوار اولاد سلسمان كانت الظلمة طاحت.هاد الدوار عبارة عن مساكن متفرقة وما تقشع والو الا بعض النقيطات ديال الضّو ، مما يعني أن خوتنا كيستعملو الشمع او القناديل.واحد لوقيتة سمعنا نباح الكلاب وحنا كنقتاربو من المدرسة.موراها بشي شوية ، سمعنا شي ناس يغوتو : شكون انتوما؟ رد عليهوم الشيفور : هادو لميوطا . قرّب منا واحد منهوم وقال لينا : مرحبا بالمعلمين ديالنا.اوى راكو تعطلتو علينا. خونا بالله عيّط على اصحابو وقال ليهم : يا الله جيبو لعشا لميوطا وما تنساوش أتاي. شفت فصاحبي وقلت لو : عندك السْوارتْ ؟ رد علي : ما عندي سوارت وأنت ؟ قلت لو : كون كانو عندي كاع ما نْسَوْلكش. يمكن سمعنا شي حد من الجماعة .هاديك هي اخبرنا بأن السوارت راهم عند لمقدم وغادي يجيبوهوم فالحال بواسطة قنديل قدرت نشوف المدرسة : بانو لي ثلاثة ديال البنايات وحدة فيهم قديمة بزاف على حقاش مبنية بْلَحْنِيَة.شي واحد من السكان اخبرني بأن المعلمين كانو يسكنو فيها ولكن فهاد لوقيتة راها شوية مخربة وخاصها الاصلاح.بالنسبة للأقسام راهم مجهزين من كل شي.قلت لو : فيهم الضو ؟ ضحك وقال ليا : الضو لقيناه لراسنا بعدا.اسويدي ماكاين غير الشمع والقنديل. باش نبين لو بأني حتى انا عشت فلعروبية قلت لو : ما كاين مشكيل حتى حنا غير مْخيْمين . المهم فتحو القسم وجابو لعشا وأتاي .كلينا غير أنا وصاحبي ، هوما غير يتفرجو فينا .شي مرات كانو تيْسَْولونا وصاحبي كان يجاوبهوم.انا صراحة ماشي عزيز عليا بحال هاد لفضول حيت من طبعي ما عمرو ما سوّلت شي واحد بحال هاد الأسئلة الشخصية.شي وقيتة واحد فيهم قال ليا : شفنا غير صاحبك اللي تيتكلّم.أنت بعدا مين من لخّوت ردّيت عليه وانا كنشرب أتاي : من ليهود .شافو فيا كولهوم : من ليهووووووووود قال ليا واحد فيهم : واش راك تهدر بنيتك ؟ قلتلو : داخلنا عليك بالله واش ما بايناش عليا مغرابي؟ مالكوم اصاحبي مع هاد العنصرية القبلية ؟ واش غي حنا رماونا عندوكم بقيتو معانا فالتحقيقات؟ الشاف ديالهوم قرّب مني وقال لي: اسمح لي أسويدي ما تدّيهاش منّا من قلة الصواب.غير اوكان قالو لينا بأن واحد من المعلمين جاي من الرباط .واش هاد الشي بصّاح؟ قلت لو : انا اللي من الرباط .واش كاين شي موشكيل؟ رد بالزربة : لا أسويدي بالعكس حنا فرحانين مين جانا واحد من العاصمة. تصورو هاد الكلمة خدمات علينا بزاف.هي هاديك قالو لينا : هاد الليلة راكو ضيوفنا .غادي تباتو عندي أنا الشيخ قدور معززين مكرّمين. آه ، نسيت نتكلم ليكوم على الشيفور .فديك لوقيتة اللي وصلنا فيها قال لي : خويا اعطيني رزقي انا راجع دابا لتاوريرت. ماكان عليا الا دفعت لو الثمن اللي اتفقنا عليه، لكن زدت اعطيتو عشرة ديال الدراهم : هادي حق الديرانجمو ديالك.شدها مني وركب فالطاكسي ديالو ومشى في حالاتو.اللي بان ليا ان هاد الشيفور ما عندوش مع هاد القوم أو ربما هوما اللي ما عندهومش معاه.
على كل حال ، مشينا عند الشيخ قدور.دار واش من دار عندو ولكن خسارة ما فيهاش الضو.طبعا لاحظتها عليه او هو يقول لينا : غادي نشري ان شاء الله موتور ديال المازوط باش يكون عندي الضو بحال لمدينة.ما قالش ليا وقتاش وعرفت أن الشيخ يقدر يموت قبل ما يوصلو الضو. من قضية الضيافة ، تهلاو فينا مزيان .جابو لينا شي كْواش باقيين فميكتهوم يعني جْداد.
صاحبي المكناسي تبْهض ، باينة عجبو الحال.أما أنا كان عندي عادي : واه شوف خويا حميد هاد لعروبية شحال يتهلّاو فالمعلمين. ما بغيتش نرد عليه ، خلّيتو الزغبي فرحان وعلى نيتو كما نقول . يا الله غادي نعسو ما عندي ما نزيدكوم
 

عبدالخالق الكوتاري

::مراقب مغربي ::
طاقم الإدارة

غير متصل
#5
رد: قصة بالدارجة : حتى واحد ما زاد معلّم

رائع أستاذ عبدالحميد والله العظيم قصصك و حكاياتك كتخليني سارح معاك وعقلي لا اراديا كيتخايل اطوار وحيتيات مغامراتك خويا حوميدي بحالي كنعيشها واقع وسبب ذلك تمكنك وجودة ابداعاتك وتميز قلمك و وما امر {الحقيبة العجيبة }ببعيد....!!!!!
 

Houmidi59

::الفارس المغربي ::

غير متصل
#6
رد: قصة بالدارجة : حتى واحد ما زاد معلّم

فقنا فالصباح بكري.كانت يا الله الساعة الستّة.لعروبية معروفين بلفياق بكري بلا ما يشريوه بالذهب (ههههه).جا الحاج قدّور وقال لينا : صباح الخير سيادنا لميوطا.ياك أنعستو مزيان؟ ما بردتوش هاد الليل؟
شَفْت فيه واحد الشوفا واعرة، بحال الى باغي نضّارب معاه.قلت لو بما معناه : هاد كلمة لميوطا ما كتعجبنيش او فيها شوية ديال الاحتقار.عنداك يتسحاب ليك حنا ضياف وتبقى تسبنا.
مول الدار صفارمسكين لدرجة أنه مابقاتش نقطة الدم تْبان فوجهو.مسكين تلفات ليه الهدرة على حقاش ما كانش ينتظر بحال هاد الرد.بغيت نقول ليكم أنني فالشباب ديالي كنت ديريكت مع البشر : كنت نقول الرأي ديالي بصراحة وبدون اختيار الكلمات المناسبة.كنت أريد أن أكون عفويا بمعنى الكلمة.حاليا ما بقيتش تنْفاعل دغيا وبعض المرات نْدير عين ميكة .
المهم الحاج قدّور شاف في وانا كنبتسم .هي هاديك بدا يضحك وقال ليا : اسمح لينا يا أستاذ حنا موالفين ديما تنعيطو على المعلمين لميوطا ولكن أنت جاينا من الرباط .أنت أستاذ كبير وغادي نتهالّاو فيك مزيان....
قاطعتو : ربّي هو اللي يتهلّى.انا اللي باغي الأساتذة كولهوم كيف كيف .ما بغيتش نسمع كلمة لميوطا من اليوم
ردّ علي : ما يكون غير خاطرك
جابو لينا لما وتوضّينا وصلّينا الصبح.من بعد جابو لينا الطبْلة فيها صينية ديال أتاي معها شي طباسل ديال السمن ولعسل فوق من واحد لحرشة ياكول فيها شعب.
افطرنا مزيان انا وصديقي علي وحمدنا الله وقلنا لمول الدار : لله يخلف. ثم طلبنا منو السماح للذهاب الى المدرسة لاستقبال التلاميذ.
فالنهار تبان المدرسة بحال شي فاكُوَات ديال التْران بالعربية عربات القطار .بانو التلاميذ يكونو شي عشرين واحد : بنات وولاد.غير شافونا ، جاو لعندنا يجريو باس يبوسو لينا يدّينا.صاحبي علي كان يرد على كل بوسة فاليد : استغفر الله العظيم ، استغفر الله العظيم.
أنا فقط اكتفيت بمصافحتهم بعد ما قلت ليهم : شوفو اوليداتي سلّمو باليد بحال الناس لكبار.
المهم وزعنا التلاميذ بيناتنا هو خْدى التلاميذ ديال التحضيري والقسم الثاني وانا خْديت باقي التلاميذ.دخَّلْنا كل فوج للقسم .هاديك هي سجّلت الأسماء ديالهوم وديال الآباء ديالهوم والاسم ديال خوتهوم .المهم سجلت كل المعلومات المتعلقة بهم.من بعد كتبت لكل واحد اللائحة ديال الكتب والأدوات المدرسية اللي خاصو يشريها .من بعد اختبرتهوم فالقراية ، لقيتهوم ربنا خلقتنا : والو انيقشيعابل يعني هاد لبراهش ما قراو تقريبا والو .
مشيت عند صاحبي ، قلت لو :
_ اوى منضْرى كيدايرين التلاميذ اللي عندك ؟
_ وا لعجب هادو ما عمرو ما قراو.
_ ولكن أصاحبي هادو يا الله فاش داخلين للمدرسة
_ عنداك الحق .غادي نبدّي معاهم من لَوَّل
_ داك الشي اللي غادي نْدير حتى أنا
رجعت للقسم ديالي .كان عدد التلاميذ عندي 12 فيهم 5 ديال لبنات.
قلت ليهم : اليوم الجمعة ما كاينش لقراية ولكن ما فيها باس اليوما جيت غير باش نتعرّف عليكم.غدا ان شاء الله تمشيو لتاوريرت باش تشريو الأدوات والكتب ويوم الإثنين تبدى الدراسة.
يا الله راكوم محرّين
التلاميذ خرجو يجريو شاد كل واحد فيهم الورقة اللي عطيت لو .
رجعت عند صاحبي : اوى اصاحبي واش ما باغيش تتفاك مع هاد البزاقيل (لبراهش) ؟
جاوبني : خويا الساعة راها يا الله العشرة ديال الصباح.الوقت عندنا حتى لطناش
قلت لو : خرّج التلاميذ ،نشوفو آش نديرو
_ عنداك الحق .أنّيت خاصنا نْخمْلو ديك البيت بش نسكنو فيها
_ أخويا أسكن فيه أنت أنا بعدى غادي نسْطالي فالقسم ديالي حيت مهبّب وداخلو الضو
_ الضو ؟
_ الضو ديال الشمس أ صاحبي


يتبع غدا إن شاء الله
 

غير متصل
#7
رد: قصة بالدارجة : حتى واحد ما زاد معلّم

تبارك الله عليك عرفتي تنقرا و تنتخيل راسي معاك في القصة
شهتني فداك الوقت الزين كان كلشي رخيص و زوين ماشي بحال دابا هههه انا محدرتش غير ماما تتبقى تعاود لياا
 

bouchaib56

::مراقب مغربي ::

غير متصل
#8
رد: قصة بالدارجة : حتى واحد ما زاد معلّم

قصة رائعة جديرة بالترجمةالى اللغة العربية
وانا جد معجب بطريقة سرد القصة وكأننا مع مولود فرعون
في قصته ابن الفقير
خاصيات تجمعكما في هدا الاطار
 

bouchaib56

::مراقب مغربي ::

غير متصل
#9
رد: قصة بالدارجة : حتى واحد ما زاد معلّم

عندك اخي حوميدي خيال قصصي متنوع
وتعرف كيف تختار له الكلمات التي تليق بقصاص
ماهر في حبكة وواقعية وهدا شيئ جميل
 

Houmidi59

::الفارس المغربي ::

غير متصل
#10
رد: قصة بالدارجة : حتى واحد ما زاد معلّم

شي تلاميذ ما مْشاوشْ لدْيُورهم ، وحْدين بْقاو جيهَت المدرسة.باينة هادو باغيين يعاوننا وداك الشي اللي بغاه صاحبي علي.المهم ، عيّط عليهم : أجيو أوليداتي عاونوني نخمّل هاد البرّاكة.
خليتهوم ودخلت للقسم .جاب الله كان معايا واحد الراديو (خدّام بالحجرة ) .قلت مع راسي نسمعو شوية ديال الأخبار .ما كاين أخبار كاين غير الأغاني .ما فيها باس الى تْموسَقْنا شي شوية.
أنا مْوَرّاك على مقعد ، عايش مع أغنية كانت دايرة خبْلة ديك لوقيتة .واحد المغنية يمكن الى سورية ، مْشاتْ لي سْمِيَّتْها.اوى ، سمعت شي ناس يْدقّو فالباب
_ شكون ؟
سمعت واحد فيهم ردّ علي : ما دّيرْهاش قلة صواب منّا أسيدي الأستاذ جينا طالبين منك تساعدنا
شَفْت فيهم : دخلو مرحبا بيكم .آش حَبْ الخاطر أسْيادْنا ؟
لكبير فيهم قال ليا : أسْويدي بْغيتْ نَكْتب شي بْرِيَة لْوَلْدي....
جاوبتو : ما كاين مشكل .شَفْت واحد أحداه : وأنتَ ؟
رد علي بالزربة : حتى أنا بغيت نكتب بْرِية ما شي لولدي لْعَمّي
ردّيتْ عليه : حتى أنت ما كاين مشكيل ....
بان لي واحد شوية حشْمان : وأنت ياك ما باغي نكتب لك حتى أنت بْرية لجدّاك ؟
ابتسم وقال لي : لا أسويدي ...أنا بْغيت تكتب ليا طلب
_ طلب ديال آش ؟ سَوّلْتو
_ طلب ديال الخدمة
_ قاري بعدا شي شوية ؟
_ لا أسويدي ولكن عندي البيرمي
_ آه يعني تعرف تسوكْ.ياك ما تسوكْ التراكتور ؟
مسكين ما غضبش ما زْعَفش ما طارْطْلوشْ ...في نظركم أشْنو دارْ ؟ فقط ضْحكْ ، زادو تبعوه صْحابو .واحد منهم قال ليا : سويدي الدوار كاملين يسوكو التراتْكور (يعني التراكتور) حيت ساهل وما فيهش الكود
انا اللي ضحكت : لَعْجَبْ هذا .على هاد لحساب عندو طريق ديالو يمشي فيها بحال التْران.
شافو فيا مبهوضين .ما عرفو آش يكولو.
_ ما كاين مشكيل ، ردّيت عليهوم.غادي نكتب ليك الطلب أولدي.اللي باغي يكتب شي حاجة راني موجود.
جاب الله كان عندي دفتر باقي جديد (فيه 50 ورقة ) .المهم كل واحد هو يفتي وانا نكتب حتى ساليت فلوقيتة اللي كان الظهر (الآذان الأول) ينادي للصلاة.الدفتر ما بقى منو والو
هاديك هي مشيت نتوضى مورا القسم .صاحبي علي لقيتو حتى هو يا الله فاش سالا من التخمال:
_ إوى سيدي عبد الحميد أجي تشوف السكن ديالي خاصو غير لفراش وهاهو دار بحال ديور لمدينة
_ لا ما عمْرو ما يرجع بحال ديور لمدينة
شاف فيا علي مَنْداهش : واعْلاش أخاي ؟
_ عْلى حقّاش خاصّو الضّو
_ الضّو ؟
_ ما لك أصاحبي شفتك دغيا تنسى
_ لا لا فكّرتيني بواحد الحاجة مهمّة .خاصني نْديرها : هاد الدار خاصها المرحاض
_ إوى دابا كمْلات الباهية .

يتبع غدا


ملاحظة : تفكرت هاديك المغنية هي ميادة الحناوي كانت يا الله فاش بانت .أما الأغنية هي حبّينا واتحبينا
 

Houmidi59

::الفارس المغربي ::

غير متصل
#11
رد: قصة بالدارجة : حتى واحد ما زاد معلّم

مْشينا أنا وصاحبي علي للمسجد اللي كَيْتواجَد على بُعد واحد 300 متر من المدرسة .ليقناه يا الله فيه عدد قليل من المصلين يمكن يكونو 10.الغريب فالامر كل واحد فيهم شاد قُنْت أو مْوَرَّكْ على سارية.بان ليا لفقيه شاد واحد الورقة كيشوف مسكين فلمصلين واستنتج أن هاد الخطبة ديالو مشات مع لهوا (لهواء) لكن يظهر أنه لمحنا وقال فراسو هادو هوما لميوطا الجداد خاصني نْجيب راسي
فعلا الإمام وقف وخطب خطبة حماسية ومشكولة كما يجب .انا وصديقي علي كنا له آذان صاغية ، بينما خوتنا المصليين شي وحدين كانو ناعسين ، شي كان يهْدَر(يتكلم) مع صاحبو ...المهم كنا حنا بجوج اللي متبعين الخطبة.
بعد الانتهاء من الصلاة ، دعانا الحاج قدور الى بيته لتناول الطعام (الكسكس) ودعا بالمناسبة لفقيه ديال الجامع وشي ناس ما باينش عليهم الزلط.
فالدار جاب لينا الحاج قدور واحد القصعة ياكلوها سكان بوزنيقة كاملين (بوزنيقة ديال سنوات الثمانين ).أما اللبن الى تهْرق يقدر يوَلّي واد
المهم انا وصاحبي شبعنا .هاديك هي بقينا غير حنا رَبْعَة انا وصاحبي علي ولفقيه والحاج قدور.هْدَرْنا شوية على الفلاحة وشوية فالسياشة (السياسة)وشوية فالدين.هنا باقي مْدَكّر الحاج قدور قال للإمام : أسيدي محمّادين هاديك الخطبة ديالك راني ما فهمت منها والو .علاياش كانت تتكلم ؟
انا اللي جاوبتو : أسي قدّور هاديك الخطبة كان الموضوع ديالها هو الصدقة والمنافع ديالها فالحياة ديال الانسان الدنيوية ومورا ما يموت يعني الآخرة ديالو
زاد خويا علي قال ليه : والصدقة ماشي غير المادة حتى الكلمة المزيانة والمعاملة الحسنة راها صدقة
الحاج قدور تْعَجَّبْ : اوى سيدنا لفقيه عنداك ما تقول .هادي شحال وانت تخطب علينا وحْنا فدار غفلون
هاديك هي خوكم الحوميدي بغى يْوَلّي مفتي وخاطبت لفقيه : اسمعْ يا سّي محمّدين هاد القرية سكّانها أميين.ماشي لازم تكون الخطب ديالك بالعربية الفصحى.عْلاش أخويا ما تخطبش عليهم بالدارجة ؟ ياك باغي تْوَعّي الناس ؟ اوى خويا شْرح ليهوم وتكلّم ليهوم على مواضيع تْهَمْهوم
_ بْحالاش أسويدي ؟
_ عندك الزكاة ، الصلاة ، الصيام : هادو أركان خاصهوم يعرفوها مزين.زيد عليها المبادئ الأساسية بحال التعاون ، الاتحاد ، الصدق وقول الحق..........
شاف فيا الحاج قدور : عْلاش أسْويدي ما تبقاش تخْطب علينا كل جمعة؟
_ لا هادا ما شي الاختصاص ديالي انا استاد تنْقَرّي ونعلّم ولكن نقدر نْساعد لفقيه فإعْداد الخطب ديالو
_ وهو كدلك ، جاوبني لفقيه
شَفْت فيه مسكين بحال الى رجعتلو الروح .مسكين قال فنفسو " صافي غادي يْجَرّيوْ عليا ويْديرو فبلاصتي معلّم."
كانت الساعة تقريبا الربعة مين خرجنا من عند الحاج قدور.مشينا ديريكت للجامع حيت لفقيق غادي يْوَدّن لصلاة العصر.
صلينا معاه .هاد المرة يا الله حنا ثلاثة .المصلون الآخرون كل واحد مشى لشغلو.
هاديك هي اعرض علينا لفقيه باش نشربو معاه برّاد أتاي منعنع فالهواء الطلق.كانت مناسبة باش نسولوه على المنطقة وسكانها ولكن الأهم على وسائل النقل الموجودة.
بخصوص هاد الباب ، ضحك لفقيه وقال لينا : المركوب هنا قليل وعزيز
طبعا شْرح لينا مزيان وقال لينا : كاين جوج كاميونات كيخرجو كل سبت مع الثلاثة ديال الصباح.السفر ماشي غير متعب تقدر تقول فيه نوع من الاهانة حيت كتركب اللورمع البهايم (حاشاكوم) الثمن راه رمزي غير خمس دراهم.
صاحبي علي عجبو الحال : اوى بعدا احسن ما نخلصو خمسين درهم
المهم قال لينا لفقيه غادي نعْلم أسّي كبريتي مول الكاميو باش يدوز عندكوم .لكن خاصكوم تكونو فايقين غادي يكون عندكوم مع الجوج او نص
صاحبي علي شاف فيا وقال لي : خويا حميد غادي نمشي دابا ننعس باش نفيق بكري
 

Houmidi59

::الفارس المغربي ::

غير متصل
#12
رد: قصة بالدارجة : حتى واحد ما زاد معلّم

صاحبي علي مشى دغيا للبيت ديالو .لكن ما عندوش لفراش .
جا عندي وقال ليا : خاصني فاش ننعس.
رديت عليه : اصبر شي شوية .مع المغرب غادي يجي عندنا الحاج قدور وغادي نمشيو نباتو عندو كيف العادة.
علي ما عجبوش هاد الراي : لا يا خويا انا باغي ننعس فبيتي
قلت لو : اوى سير تنعس ، ما لك جاي تشكي عليا؟
صاحبي علي ما لقى ما يقول.حنا هاكدا وفجأة سمعنا شي واحد يعيّط : سيدي عبد الحميد .
عرفتو من صوتو : الحاج قدور
_ تفضل الحاج راحنا فالقسم
دخل الحاج قدور ومعاه 3 ديال الرجال جوج منهوم هازين لكواش ولْحوفا والثالث هاز واحد الصاك كبير
_ اسمحو لي يا أساتذة راني جبت ليكوم فاش تنعسو ولعشا
ردّيت عليه : انت اللي اسمحنا الحاج راحنا شقّيناك
_ أبدا ، جاوبنا الحاج قدور ، انا بالعكس ما كرهتش نتهلّى فيكوم أكثر ولكن الله غالب
المهم نتلاقاو غدا فتاوريرت
جاوبتو لا تضرب هم غدا ان شاء الله غادي نمشي لوجدة نجيب حوايجي
حتى أنا خاصني نمشي لمكناس باش نجيب لحوايج تاعي
الحاج قدور شاف فينا وقال : ولكن راه المركوب كاين غير السبت والحد .خاصكوم تكونو هنا باش ترجعو معانا
علي كانت عندو فكرة واعرة : اسّي قدّور انا غادي نمشي لمكناس باش نجيب معايا الموطور ديالي .راه يصلح لي هنا .
المهم مشى الحاج وصحابو .تقاسمنا لفراش .علي خدى فراشو وقرّر يبات معايا فالقسم .قال لي خاصنا نفيقو بجوج فالصباح بكري
قاطعتو : لا خاصنا نفيقو بالليل مع الجوج ديال الصباح
_ عندك الحق
و هو يشوف الصاك : آش تمّا؟
فتحت الصاك وخرّجت منو واحد المرميطة باقية سخونة وجوج خبزات قد الرويضة ديال لتراكتور وشوية عنب ولتشين (برتقال)
علي فتح المرميطة : الله على ريحة .شحال بنينة هاد المرقة
_ اصبر أخويا اقرى عليها المعوذتين راه يمكن هاد الخوت دايرين لينا السحور
_ عنداك الحق .غادي انا نقرى قل أعوذ برب الناس وانت اقرى قل أعوذ برب الفلق.من بعد نتوكلو على الله وناكلو المرميطة
_ بعدا آشنو كاين فيها؟
ضحك علي وقال ليا : انت يا ولد الرباط موحال الى موالف مع هاد الماكلة.
هدا راه السفرجل بلحم الجدي
_ فعلا ما عمرو ما كليتو ولكن نجربو .أنّيت حسيت بالجوع وبالبرد .حيت باقا اسخونة جيبها نكلوها
حطّينا لمريقة فوق الطاولة.آهيا لخّوت صاحبي علي ما كدابش .كانت أكلة شهية ولكن كان خاصها غير شي براد أتاي واحنا للأسف ماعندنا ماتريال.
لكن المعجزة وقعات .واحد لوقيتة سمعنا شي حد يدق فباب القسم.
مشيت نشوف وهي تْبان ليا واحد البنت شابة معاها ولد صغير يقرى عندنا .كانت شادة فيدها صينية ديال اتاي ، خوها فيدو طبسي(طبسيل) ديال الكاطو.
شفت فيها وهي تحدر راسها وقالت لي : سي عبد الحميد بابا صيفط ليكوم أتاي
رديت عليها قولي لباباك الله يخلف عليه وانت الله يزوجك باللي تحبي
مشات دغيا تجري هي او خوها
شاف فيا علي وقال لي : هاد البنت باغيا تتزوج ، ما تصلح لها غير أنت
_ لا يا خويا علي أنا جيت باش نخدم ماشي باش نتزوج.خودها أنت واستقر مع هاد القوم راهم يصلحو ليك
_ شوف اخويا حميد ، أجي نشربو أتاي وباراكا علينا من الهدرة الخاوية
_ عندك الصح ولكن نقرى بعدا المعوذتين
_ هي للي ما تعاودش


يتبع
 

Houmidi59

::الفارس المغربي ::

غير متصل
#13
رد: قصة بالدارجة : حتى واحد ما زاد معلّم

صاحبي علي دغيا جاه النعاس .بقيت انا فايق ، الرفيق ديالي هو الكتاب كيف العادة.المهم قريت شي صفحات ديال قصة بوليسية لكن ما ممدكرش العنوان ديالها.على كل حال ، كان جوا تقريبا هادئا لا تسمع فيه لا نباح الكلاب من حين لآخر.هذا طبعا يعني مرور الناس بالقرب من المدرسة.
حوالي الساعة التاسعة حسّيت بالعيا فألتحقت بصديقي علي الذي كما يقول المصريون كان في سابع نومة.
زاد شْخيري على شْخيرو
حتى سمْعوه سكَّان البيرو
هاديك الليلة طَحْت كاو وحْلَمْت شي حَلْمات ما فيهم ما يتعاود.الحمد لله فَيَّقْني صاحبي:
_ عبد الحميد نوضْ راها الجوج ونص
مشيت غسلت وجهي وشربت من أتاي اللي كان باقي فالبرّاد .لبست حوليجي وجمعت صاكي واخرجنا أحْدى الباب نْساينو الكاميو.مرّات حوالي نصف ساعة تْقَزْبَرْنا فيها بالبرد.علي بْدى يْشَكْ فالأمر :
_ ياك ما خونا بالله نْسانا
_ ما يمكنش خويا علي.اللي كاين هو أن بزّاف ديال الناس غادي يمشيو هاد اليوم.المشكيل هو واش نلقاوْ جوج بلايَصْ لينا ؟
_ عنداك الحق أخويا عبد الحميد، ولكن أنا خايف هاد الكبريتي ينكرنا
_ ما تخافش راه ولدو يقرى عندى.الى بْدى يفهم غادي نْجَبَّدْ وْدينات البرهوش ديال ولدو
مرّات واحد العشْرا مينوتْ، سمهنا حسْ كاميو يْقَرَّبْ جيهتنا
علي فْرح : هاهو جا الكاميو .
المسخوط ديال الشيفور ماكانش شاعل ليفار(les phares) .ما عرفْناش كيفاش لْقيناه أحْدانا.هاديك هي قال لينا بحال ايلا يْغَوَّتْ : يا الله طلقونا راحنا مزروبين
شَفْتْ فيه مزيان زعْما حَنْزَزْت فيه : أسي محمد واش راك عارف معا مَنْ راك تتكلم ؟
السيد ما كانش ناوي بحال هاد السؤال ، واخّا هاكدا ردْ عليا: شكون أنتوما بالسلامة ؟
صاحبي علي شَدَّاتو الخلعة : صافي خويا حميد راك قَفَّرتيها.موحال الى يبغي يْرَكَّبْنا.
شوف أنا غادي نعتَدرلو باش يسمح لينا نركبو.....
قاطعتو : اسْكتْ أصاحبي وخَلِّيني نْفَرْجك فيه.
صراحة الَخُّوت خاص بنادم تكون عندو كرامة ، وايّاكوم تفرطو فيها.آش غادي كاعْ يَوْقَعْ لينا ؟ غادي يكول لينا دَبْرو على راسكوم
يقول المثل المغربي : كَبَّرْها تصغار.داك الشي اللي دَرْتْ مع خونا بالله
_ اسمع آداك بنادم راك تكلم مع أستاذ جايك من الرباط .راه غير تيليفون من عندي تمْشي ديريكت لَزَّنْدارا (الحبس) والكميو ديالك يَدِّيوَهْ للْفوريان
خونا بالله صْفار مابْقتلوش نقطة ديال الدم فوجهو.خْرَجْ يجري من الكاميو وقَرَّبْ مَنِّي :
_ ما تَدّيهاش مني قلَّةْ صواب .اللي ما عرفك خسْرك أسويدي
باغيين ان شاء الله تمشيو لتاوريرت ؟
دابا تْأكَّدْت باللي السيد الى طلبت منو يوصَّلني حتى لزاكورة ما يقدرش يقول ليا لّا
جاوبتو بتهكم : واش بان ليك راحنا نَتْفَجُّو فالكَمْرة ؟
_ اسمح لي أسويدي
فتح لينا الباب القدَّامي بعدما كَرْكَب جوج ديال الناس كانو راكبين معاه .قال لينا : تفضلو ومرحبا بيكم.
المهم ركبت أنا وصاحبي علي والكاميو قلَّعْ متوجها الى تاوريرت.
ماهي الا ساعة دخلنا المدينة وتوجهنا مباشرة الى السوق.مين نْزلنا حلّّيت البزطام باش نْخَلْصو .ماخلّانيش المسكين : لا حاشا نتخلَّص من الأساتذة.
طبعا ما كيعرفنيش مزيان : أسمع أداك بنادم واش بان ليك ماعنديش لفلوس.الى باغي أَدِّير الخير هادوك الناس اللي مْركَّبهوم بحال لبهايم (حاشاكوم) ماتْخَلَّصْ منهم حتى دورو (ريال)
شاف فيا ما عْرف آش ايدير.المهم شد 10دراهم وقال ليا الله يخلف.
المهم خلّيناه باقي شادّاتو الرعدة ومشيت أنا وصاحبي علي للحمّام.منها نتْنَاقَّاوْ شي شوية ومنها نْرَيْحو من عناء السفر.
لقينا واحد الدوش فطريق لاكار.فيه الناس دايريت التُّور ، زعما باغيين يْدَوْشو
قال ليا علي : خويا حميد الى وصلنا الدور ديالنا غادي يكون الظهور ودَّنْ
ردِّيت عْليه : زعما خاصنا نَفَّتْنو على راسنا ؟
عندك الحق .
مْشيتْ قَرَّبْت منْ مولْ لاكيسْ : خويا بَشْحال الدوش عندكوم ؟
رد عيا : 3 ديال الدراهم أسويدي.
_ كي دايرين لبيوت ؟
_ اوى غير سلّكْ أسويدي
_ ما عندكومش زعما شي حاجة أحسن ؟
_ كاين أسويدي واحد جوج بيوت فيهم البانيو ، لكن الثمن شوية غالي
_ شحال زعما ؟
_ 6 ديال الدراهم أسويدي
_ هدا ماكان .اوى سير وجَّدهوم دغيا
_ راهوم موجودين أسويدي
مشيت عند علي : أجي أولدي علي اليوم غادي تْكَمَّد عْظيماتك فالبانيو





يتبع غدا إن شاء الله
 

Houmidi59

::الفارس المغربي ::

غير متصل
#14
رد: قصة بالدارجة : حتى واحد ما زاد معلّم

خرجنا من الدوش كَيَخْْرجْ لَفّوار من جسمنا وحسّينا بالجوع.قلت لصديقي علي : نمشيو نفطرو فالكعْدة.
في عين المكان عيّطنا للكارسون وطلبنا منّو يْجيب لينا شي برّاد عْشاري مع الحرشة والسمن ولعسل.كلينا حتى شبعنا.
هاداك الشي كلو تْقام علينا يا الله شي خمسة ديال الدراهم.أنا حيت موالف بالبوربوار عطيتو مسكين درهم.كان غادي يسكت ليه القلب واه بْياسا بيضة .
الزغبي (ماشي نوال) كانو يعطيوه غير البياسا الصفراء يعني 20 سنتيم ، هادو زعما الكراما.
على كل حال نصحتو وقلت لو سير خبّيه فالكوفر : راه الدرهم الأبيض راه ينفع فاليوم الأسود.
فرح الكارسون وقال لي : المرة الجاية غادي نوجّد ليك مْسَمْنة كبيرة وغادي نْغَطّسْها فلعسل.كادو من عندي
خليناه ومشينا نشوفو السوق ديال تاوريرت.
هاد السوق داير بحال داك الشي ديال الكوي بوي.خاصهوم غير ليزانديان (les indiens).تصوروا غير اللي راكب على بغل أو حمار ، ما كان غير بورزّة .لَغْوات من كل جهة :
_ ها اللفت ديال لكرارمة
_ شكون بغى لزرودية (خزّو) ديال كامبرتو؟
_ خوتنا ها الريكلام ديال لَمَّاعَن : درهم لبْياسة
المهم الحركة دايرة .واحد لوقيتة بانو لينا شي خيام موسخين وخارج منهوم الدخان .مين قرّبْنا عرفناهم : مطاعم فيها الملفوف وأتاي .الناس عاطيينها للزرود.
صاحبي علي سالو رْيوكو .عرفتو باللي تْشَهّى الكبدة .
_ خويا حميد ناكلو شي قطيبات.انا للي نخلّص.
_ أنت اللي تخلّص .واخّا
ولكن واش تقدر تخلّص حتى الدوا من الفارماسيان؟
شاف فيا بتعجب : الدْوا؟
_ نعم يا خويا هاد لعجب اللي فالنار يوَصْلك ديريكت لسْبيطار بلَهْلا يْكازيه لك
علي دابا كيفكَّر بْكرشو ما شي بعقلو : ولكن شَمْ أخاي الريحة.شْحال بْنينة هاد الكبدة .باينة ديال الجدع (الجدي)
ياك أخويا حميد غير جوج قطيبات
المخلوق شَفْني : واخّا ولكن اصبر
مشيت عند واحد الشواي وقلت لو شحال اخويا لقطيب ؟
رد علي : عشرين ريال للواحد.
هزّيت قطيب : ولكن انت غشّاش
_ آه
_ داير كبدة شحمة كبدة شحمة
_ ولكن أسويدي كولهوم كيبيعو بحالي
_ ما تخافش انا ماشي من المراقبةولكن عندي شي اصحابي منهوم يقدرو يجيو ياكلو الكبدة عندك .
_ مرحبا بيهم أسويدي
_ يمكن ما فهمتنيش .بغيت نقول يقدرو يْحَنْشو لك شي بروسي(procès)
_ لاواه أسويدي واش راني دابح الحلوف ؟
_ لا حاشا ولكن هاد الشحما تقدر تكون ديال الحلوف
_ والله أسيدي الى الشحمة ديال لخروفة
_ شوف يجيك مْليح خلْي غير وْحيدة فلَقْطيب
باش تطْلق البنَّة .
الشوَّاي دْبال وصْفار
_ غادي نزيدك 10دورو فكل قطيب

_ زيدني درهم وغادي نتْهَلّى فيك
_ واخّا يا الله وجّد لينا 6 ديال القطبان مع برّاد أتاي منعنع
مشيت عند صاحبي علي كان قريب يْجيفْ حيت الريق ديالو كُلّو سال .
صافي أولدي علي أجي غادي تاكول الكبدة وانا اللي غادي نْخَلَّص عليك



يتبع غدا إن شاء الله

 
التعديل الأخير:

Houmidi59

::الفارس المغربي ::

غير متصل
#15
رد: قصة بالدارجة : حتى واحد ما زاد معلّم



هذه الحلقة ممتازة



بعدما كْلينا وشبعنا، توجّهنا جهة الخوردة.ياخّوتي هداك عالم آخور.لعْرارْم ديال الكسوة: سراول ، قامجّات ، تريكّويات ، لباسات ديال لعيالات ، لباسات ديال الدراري الصغار.كل واحد من البيّاعا يْبَرَّحْ لسّلعة ديالو.المهم الحيحة نايضة.
فتاوريرت لعيالات دايرين خبْلة .الأغلبية ديالهوم كيعزْلو فالخوردة.صاحبي علي بْغى يشري شي حاجة للعائلة ديالو :
_ أخاي عبد الحميد ، أجي نشوفو لينا شي سراول .
اضحكت : واه واش ليك ولاّ للفاميلا ؟
_ ليا وللفاميلا
_ أجي نشوفو هداك خونا بالله ، ماكاين عندو حَدْ .ربما تْكون أقْدام الخير عليه.
قرّبنا منّو _
_ السلام عليكم ورحمة الله تعالى وبركاته
كان يشرب أتاي .ناض بالزربة :
_ وعليكم السلام أسْويداتي.آش حبْ الخاطر
علي رد عليه : بْغينا شي قوامج وشي سراول
_ الخير موجود أسويدي.أعزل مع راسك
خويا علي بْدا يهْبشْ فالعرّام .دغيا لقى شي سراول عجبوه .قال ليا :
_ آش ظْهر لك أخاي عبد الحميد ؟ ياك جاوْ معايا
_ ياه...ماشي غير جاوْ مْعاك أنت غادي تمشي مْعاهوم بعيد
_ باراك من لمْلاغة عافك
_ واخّا .مزيان مزيان....دابا خود ليك شي قوامج ...شوف هادو راهم لاموضْ.يا الله انا شفْتهوم فالرباط
_ تبارك الله على خويا حميد .غادي ناخود منهوم
المهم خويا علي شرى ليه حويجات .خلّصنا لخْواردي ومْشينا في حالاتْنا
واحد لوقيتة بانو لي شي كوستيمات :
_ هادو اللي يصلحولي أنا .
قرّبنا من مول البيع.سبحان الله العظيم ، فنظركم شْكون لقينا ؟ المدير ديالنا ولكن باينة عليه تالف .غير شافنا أو ربما شافني فْرحْ وقال : جابكوم الله
ردّيت عليه : لّا جابني علي
ضحك وقال ليا : سّي عبد الحميد راها راشقة ليك ، ياك؟
_ ماشي قْريب نموت بالفرحة
_ أسي عبد الحميد أنت من الرباط وكتفهم فالملابس.شوف ليا شي كوستيم يْجي معايا.
دَرْتْ واحد النظرة على الكوستيمات.مابان لي غير الديموضي.يمكن هادو اللي كانو لابسينهوم ماتو هادي قرون .
ولكن خاصني نْدَبَّر على المدير.هاديك هي قلت مع راسي خاصني ندَّخلو بْشي مقدمة واعرة
_ سعادة المدير أنت خاصك شي كوستيم مميّز
_ كيفاش مميز؟
_اللي شافك يعرفك باللي أنت مدير
_ عنداك الحق اسّي عبد الحميد، إوى ؟
_ لقيت لك واحد الكوستيم ما ضايرش
_ أتيني بيه
_ هاهو
علي كان غادي يطيح بالضحك .زْطَمتْ على رجليه.دغيا خونا بالله قْلَبْها غْوات:
المدير شاف فيه : مالك أسيدي علي ؟ (ماشي الما المعدني ، يمكن ديك لوقيتة كان باقي ما يتباع)
_ لا والو غير ضَرَّتني كرشي.
كانت فرصة باش نْصَدْرو( يعني نْبَعْدو علينا) بعيد علينا : سير أولدي علي .هاهوماك المراحيض جنْب السور ديال سوق لغنم .سير وخود راحتك
المدير شاف الكوستيم وفعلا بان ليه مميز : هاد الكوستيم ما عمرو ما شفت بحالو
بيني وبينكوم حتى أنا .هاد الكوستيم غريب فيه شي حْوايج فشي شكل.تصورو حْسبانو لو فايتة 15ديال لَجْياب ، غير لْداخل كاين 10 .أما لونو ماغاديش تصدقو : وردي ايه كوستيم وردي .
المدير لْبَس الفيستا وقال لي : كي جيتك ؟
_ بحال (la panthère rose)

_ ما فهمتْش .شكون هادا ؟
_ هادا واحد الممثل واعر كان يلبس غير الكوستيمات بحال هاد اللون.راه كيبان فالتلفزة وفالسينيما
البيّاع ماخاصّوش يْفَلَّت هاد البيعة ويمكن يتْهَنَّى من هاد الكوستيم.
هاد الكوستيم ما يلبسو غير كْلونْ(clown)
المدير صافي عجْبو الكوستيم : غادي ناخْدو
وانا نقول للبائع : شوف خاصّك أدّير معاه شي ثمن زوين
_ نْعامْ سويدي ما تكون غير على خاطرك
شافْ فالمدير وقال لو : على وجه أسِّي عبد الحميد : غادي نْخَليه لك غير ب30 درهم
المدير دارْ عندي : سيدي عبد الحميد (صافي راني طْلَعْت فلَكْراد)
كي جاك الثمن؟
_ معقول خودو قبل ما يندم
المدير خلّص وخْدى الكوستيم ديالو .قبل ما يودّعني ، شْكَرني وقال ليا : ما عمرو ما ننسى خيرك أسي عبد الحميد
ردّيت عليه : عندي ليك نصيحة : سير دابا أدّيه للديكريساج (dégraissage) باش تنظفو من بعد سير عند شي طايور (tailleur) باش يْقادّو على حْسابك
يا الله غادي تنقام عليك واحد 10 ديال الدراهم
المدير بانت عليه الفرحة : زعما هاد الكوستيم غدي يَتْقامْ عليا ب40 درهم
_ نْعامْ أسيدْ المدير .هاد الكوستيم كون تشريه من برّا ما يمكنش تدّيه قَلّْ من 300 درهم
فديك لوقيتة رجع علي هاز ميكة اخرى معمْرة كسوة ديال لعيالات:
راني شريت شي حْوايج للواليدة ولَخْواتاتي
المدير ضْحك : أداك الزغبي عْلاش ما سْتَنِّيتي حتى تْشاور الأستاذ عبد الحميد.راه يفهم مزيان .زعما راه جاي من الرباط
علي ما لقى ما يقول بْدَى غير يَتْلَعْتَمْ : ما ..ما ..يسحابليش .....
او هو يْعيقْ باللي غادي يَفْلَطْها
_ زعما بغيت نقول انا باغي غير على قَدْ الحال ماشي بْحالكوم أنتوما أصحاب الألِبّة
المدير عجبو الحال : عندك الحق أوليدي ما تمشيش فين تْفَلَّقْ
رَدّيتْ عليه : هو راه مْفَلّق شحال هادي وراه قالها سيدنا بوزيط
_ شكون هاد بوزيط ؟
_ حْكيم كبير عاش عاش فقبيلة لَفْلالْقَة
علي مسكين مشى معايا فالهدْرة : مَن تمّا جات التفليقة ، ياك ؟
_ نعام أولدي علي وسكان ديك لقبيلة كان كل واحد فيهم كيَتْسَمَّى بوتفليقة
المدير حتى هو بْغى يشارك فالموضوع : قول لينا أمولاي عبد الحميد( صافي زاد لَكْراد طْلَع ) أشنو قال لحكيم بوزبوط ؟
_ ماشي بوزبوط راه بوزيط صَحَّح لو علي
ابتسمت : سعادة المدير أنت إنسان عملي واللي يهمّك هو القولة ديال لحكيم.اوى قالك أسيدي : لا يفلق الكامبو فَلْقَتَيْن .......بل ثلاثة أو أكثر
المدير خْتَم الحوار : والله الى عندو الحق


يتبع غدا إن شاء لله



 
التعديل الأخير:

Houmidi59

::الفارس المغربي ::

غير متصل
#16
رد: قصة بالدارجة : حتى واحد ما زاد معلّم

كانت الساعة تقريبا العشْرة مينْ خْرجْنا من السوق انا وصاحبي علي.مْشينا لبْلاصة الكيران باش كل واحد فينا يركب الكار اللي غادي يوصلو للمكان اللي راه قاصدو : صاحبي علي لسبع عيون (مكناس) وانا لوجدة.
تاوريرت ماعندهومش محطة ديال الكيران ، عندهم بحال شي حفرة .الكار اللي يجي يطيح فيها.حتى الكيران فديك لوقيتة كانو قْدام ونيفْهوم خارج .تصورو حتى هوما كان فيهم لبلايص ديال الدرجة الاولى ولبْلايص ديال الدرجة الثانية بيناتهوم فرق ديال جوج دراهم .كان فكل كار جوج صفوف صف فيه جوج كراسى وصف فيه 3 ديال لكراسى .يا حسرا هاد الكيران (بونيف) ما بقاوش يْدورو.عْرفتو كان صَوْتهوم قوي حيت كان الموتور ديالهم فولفو (volvo)
فديك الساعة يا الله خلَّصْت مْيَة ورَبْعة دورو (ريال) باش نمشي لوجدة .الدرجة الممتازة أسيادنا
المهم ودّعت صاحبي علي اللي ركب فالكار اللي دغيا قلّع حيت كان عندو الروطار.ديال وجدة بْقى واقف فالمحطة (عفوا لحفرة) واحد نَصْ ساعة
المهم مين وصلنا لوجدة كانت الساعة الطْناشْ ، يعني وقت لَغْدى.
انا الصراحة نَحشم نمشي لديور الناس واخا من الفاميلة فلوقيتة ديال لغدى.لهاذا مشيت لواحد المحال كيبيعو فيه الساندويتش .هداك المحال سميتو وينْبي(مازال باقي فوجدة) كليت عندو مورصو دجاج مع لفريت والروز غير ب12 درهم .الْرخى لله غير اللي مابغى ياكول .
ولكن الصراحة فديك لوقيتة كانو لفلوس قْلال .يعني انا كنت كنتخَلَّص 1300 درهم.هذا ما كان.
بعدما شبعت ، مشيت عند واحد خالي كيسكن في حي الطوبة .مساكين غير دخلت او هوما يسخنو المرميطة .عييت ما نقولهوم راني مْغَدّي ولكن هاد خالي (الله يرحمو) كان عايق وفايق .قالها لي نيشان
_ راني عارف باللي راك داير شي كاسكروط ولكن هادوك الكاسكروطات ما عمرو ما يشبْعو
كانت هادي فرصة باش نتناقشو فيها
_ على هاد لحساب أخالي حتى أنت كْليتي لكاسكروط؟
شاف فيا وضْحك : مازال ناكلو مرّة مرّة
قَرّبْ مني وزاد قال لي : خاصّك تكول الصوصيط (صوصيس)ديال "كافي" أنا باقي كنحماق عليهم
_ واه ، واش هداك اللي حْدى سينيما فوكس ؟
_ مْسيخيط....أدْوي العَفْريت ، كتعرفو ؟
_ شكون اللي ما يعرفوش أخالي
باش حتى هو نْطَيّرهالو زَدْتْ قولتلو : ولكن عندو الماكلة عَيَّانة ومْوَسْخة
خالي ما بغاش يْتَيّقْ : لّا أنا كنعرفو مزيان ويا الله البارح كْليتْ عندو .يَمْكنْ يَدّيك كانو مْوسْخين
صافي ها اللي ما بغيناش .هاديك هي جاوبتو : شوف أخالي هداك صاحبك كافي شَفْتو واحد النهار الدُّود كيَهْدرْ (بمعنى مَنْتاشَر) فواحد الكسرونة مْعَمْرة كفتة
خالي بْغى يقاطعني : صافي ، صافي.....
انا اللي قاطعتو : الدودة شبعانة كفتة خارجة تْزَكّي (تْغَوّتْ) أجيوْ تاكلو الصوصيط
_ اوى صافي بَدّلْ هاد الديسكْ
_ خالي واش يَدّي موسخين؟
_ جيبي لو الماكلة باش يسكت شي شوية
جاتْ مْرات خالي جايبة جوج طباسا(طباصل) واحد فيه اللوبيا كّريني (اللوبيا البيضا) باللحم والثاني فيه فلفلة بماطيشة
_ كول أولدي كول ولكن بالحق كرَّهتيني فهاد كافي .غادي نْشوف "حْتيتي" حتى هو عندو المعقودة وانا عزيزة عليا المعقودة
_ خالي حتى هو طْبَاسَاه......
_ شوف غادي تاكول ولّا غادي نْكُبْ(نْصَبْ) عليك داك الطبْسِي ديال اللوبيا


يتبع غدا ان شاء الله
 

Houmidi59

::الفارس المغربي ::

غير متصل
#17
رد: قصة بالدارجة : حتى واحد ما زاد معلّم


كْليت وشبعت وأحْمدت الله وقلت لخالي : الله يخلف ويجعل البركة.هاديك هي ، قرّرت نْدير شي دورة للحومة ديالي لقديمة ، الحومة ديال أيامات الطفولة والمراهقة.مين وْصلت ما لقيت حد .كان الدرب بالعبارة الوجدية يْسَطْوي.شَفْتْ وقلت مع راسي غادي نمشي عند صاحبي الزاوش .هذا توجورْ فالدار.فعلا لقيتو يتفرّج فالتلفزة شي فيلم هندي.غير حلْ الباب ، قال لي: أدخل دغيا راه الشامي كابور داير خبلة.
رديت عليه : واش فيها أشاباريخ ؟
_ لا ولكن فيها واحد الممتّلة واعرة : إيما ماليني.
المهم دخلت والصراحة تْنَبْهَضْتْ : واهْ التلفزة كولور.أخويا عندك الحق ماتخرجش من الدار بْحال الى راك فالسنيما
صراحة الخوت التلفزة اللي كانت فديك لوقيتة كانت غير لبيض ولكحل ، كانو الناس قْلالين اللي عندهوم التلفزة بالألوان.
صاحبي من الناس الأوائل اللي شْراوها
_ شوف أخويا حميد هادي ماركة ما ضايراش هادي طوشيبا.
_ بَشْحال شْريتوها ؟
_ غالية أخويا ...واش نكولك نَص مليون
_ أخويا عندك الحق أنا بعدا مانشْريهاش بهاد الثمان.الحمد الله كاينة السينيما نتْفَرجو فيها أفلام هندية ، كاراطي ، كوبوي وحتى داك الشي ديال هركول (Hercule) وشمشون (Samson)
صاحبي الزاوش ضْحَك وقال لي : أنت أخويا حيت أبَّاك بوليسي كتَدْخُل للسنيما فابور .تَقْدَر تمشي كل يوم.
_ شوف صاحبي أجي نْديرو شي دورة للجوطية.شْحال هادي ما تفرّجْت فعبد الله الماكانا وما اسمعت الدْياسك ديال أحمد ليو وعلي التينيساني.
_ عندك الحق ..حتى هاد موكي ما بْغاش يتزوج بْكامانا ويْهَنّي السوق .
_ واه شكون هاد موكا ؟
_ لا راه موكي .أصاحبي راه هو البطل يعني شامي كابور
يا الله غادي نخرجو من الدار وانا نسمع الواليدة ديال صاحبي:
_ راك فالبلاد أولدي حميد .كي دايرين الوالدين؟ كي دايرين أخّوتك وأخْواتاتك ؟
_ الحمد لله بيخير وراهم كلهوم مْسلْمين عليكوم
_ مرحبا بسْلامهوم.ولكن أولدي فين غادي ؟ غادي تبقى حتى تَشْربْ أتاي
_ماعْليهش أخالتي فاطنة.هاني فاش عاد تغدّيت
_ المهم غادي تتْعَشّى عندنا
_ واخّا ما يكون غير خاطرك
خْرجْنا من الدار ومْشينا مع طريق مخْتصرة وَصْلَتْنا دغْيا للجوطية.
الجوطية ساحة كبيرة مْعَمْرة طوبيسات وأصحاب لَكْرارس ولَحْلايقية
أحْنا اللي يْهَمْنا هوما صحاب الحلقة.مْشينا ليهوم ديريكت.قَرَّبْنا وسْمعنا عبد الله الماكانا يْدير الدورة ديالو ويَهْدَرْ (يتكلم) مع الجوقة : غادي نغني ليكوم على الواليدين وعلى المرضي والمسخوط.الحمد لله أنتوما كاملين مرضيين ما فيكومش المسخوط.عْلى داك الشي غادي نطْلبْ من كل واحد فيكوم يعْطيني باش نْعَشّي هاد الكوبل (couple) ديال الدوستي.كيف ما راكو تْشوفو : الرجل أعمى ولَمرى مقطوعين ليها الرجلين.
شوف عْجَبْ الدنيا هو يْصوكْ بيها الكرّوسة وْهِيَ تَكيديه (تٌوَجِّهُهُ) هادا راه الدوستي ما شي ديال السونيما (السينيما) هادا راه الصّح
عبد الله المكانا دار دورة وحْدة أجْمع فيها الخَشْ ديال لفلوس .آشْ غادي نقول ليكوم : الطبسي اللي كان شادّو بْيَدّيه تْعَمَّر بالدراهم وبالرّْبعات والعشْرات
المهم لحْلايقي جْمعهوم فميكة واعطاهوم لفرقة الدوستي.
شاف فينا : إوى أنا أَخّوتي ما تعطيوْني والو ؟
الناس ما عْجَبْهومش الحال .بقاوْ يْحَيْحو عْليه :
_ اسمعْ يا بنادم غَنّي ولّا خَلّي
_ أخويا اللي عندنا أعْطيناهْ لكْ
_ اطْلقْنا لَفْراجة
عبد الله الماكانا أكْلَبْها لْدَرب ليهود : صافي الَخّوتْ غادي نغَنّي لكوم قصيدة المرضي والمسخوط.
المهم سمعنا لقْصيدة والصراحة عجْباتني بزَّاف.لهادا قرّرْت نْدَوَّرْ مْعاه
_ هاك أخونا عبد الله تَسْتاهَل هاد لَمْيَة دورو.
جا عندي يجْري : هادا هو مرضي الوالدين.هدا هو اللي داعْية مْعاه أَمّو.شوفو مْيَة دورو .
يا الله رَفْعو اليد ليمْنى وضَرْبو بيها اليد ليسْرى وكولو معايا "تَربحْ"
سير أولدي الله يَعْطيك كل ما تتْمنى الله يْفَرَّشْ طريقك بلفلوس والله يْبَعَّد عليك أولاد لحرام
الناس غير سَمعو بهاد الدْعاوي بْداوْ يَرْميوْ لفلوس : ها لمْيواتْ ها لْميتيناتْ
المهم خونا بالله جْمَع حْصيْصَة ما عَمرو ما يرْبَحْها واخَّا يْبيعْ مْيَةْ كيلو بوبّوشْ
صاحبي الزاوش قال لي : أجي نْشوفو شي حلْقَةْ خْرى.
بَعَّدنا شي شْوِيَة .شَفْنا واحد الجماعة دايرين بواحد السيد باينة عْليه غَرَّايْبو (من الغرب).هاد السيد قصير ، عندو موسطاش طويل وما عندوش الشعر .صْحيحْ ولد لَحْرام .كان عندو طَبْلة عالية فوق مَنْها قراطس ديال الجورنال .فديك لوقيتة كان شادْ واحد من لَقراطس وكيمزَّق فيه .باقي عاقل على كلامو أو تقريبا:
_ ازعمْ تاكول اللحم .ما يَدّيها غير كْريم او زْعيم.شوفو مزيان آش غادي يخْرج من هاد الجورنال .هاني انْقَلَّبْ.شوف شوف خويا...
ها الرَّبْحة ها الرّبْحة
خونا بالله جْبَدْ فْلوس مْكَمْسينْ.حَلْهوم : ورقة ديال 50 درهم وورقة ديال 10دراهم
ورّاهم للشعب : هاك أولدي راك رْبَحْتي 60درهم.بالصحة.
قَرَّبْ منو واحد الراجل .باينة هو اللي رْبَح هاد البركة ديال لفلوس.
صاحبي الزاوش سَوْلو : شْحال أخويا لْعَبْتي ؟
هاداك السيد ابتسم : ياك ما ناوي تربح ؟
جاوبو صاحبي : وعلاش أخويا واش ما عندناش الزهر ؟
ردْ عليه : لا أخويا وجهك غير ديال الربح.لقريطيس كيْبيعو بْنَص درهم
صاحبي الزاوش باغي يربح : خويا حميد سَلَّفْني واحد لَمْيَة دورو باش نلْعَب
_ شوف خويا محمد خاصَّ تلعب بفْلوسك باش ربّي يْرَبْحك
_ عندك الحق.راها عندي جوج دراهم غادي نشري 4 ديال لقراطس


يتبع غدا إن شاء الله



 

Houmidi59

::الفارس المغربي ::

غير متصل
#18
رد: قصة بالدارجة : حتى واحد ما زاد معلّم


صاحبي الزاوش شْرى 4 ديال لقراطس ، ناوي مسكين يطيح فْشي ورقة خضرا.لقرع شاف فيه مزيان وضْحك : انت شجاع حيت غامرتي باللي عندك.ماعندي م يْتسالك. يا الله نفتحو القرطاس اللّول.

فتحو.......ماكاين والو .فْتحْ التاني ....حتى هو والو .فْتح الثالث ...والو .

بقى الرابع .صاحبي قال لي : خويا حميد ما فيهاش .مْشات جوج دراهم .

رديت عليه : خويا محمد لافوط ديالك.واش كاين شي واحد باقي يثيق فالشْلاهبية بحال هادو؟

في ديك لوقيتة لقرع فْتح القرطاس التالي : والو

_ ما عندكش الزهر أولدي وانا كنْتأسّف لك بزاف.زيد ألْعَب ، راك تقدر تربح

_ ما بقى لي والو فجيبي

_ خْسارة ...لكن ما عْليهش

صاحبي محمد صافي طْلَع لو الدم : يا الله نمشيو في حالاتنا

لقرع شدّو من كتفو : أنت أوليدي كَنْشوف الزْهَر جايك دابا .اختار شي قرطاس وغادي تشوف .

صاحبي أرفَدْ واحْدة ومَدْها لو : خوذ هادي ومية فلْمية غادي تخرج خاوية

شاف فينا لقرع : آش ظْهر ليكوم الخوت ؟ غادي نَتْراهن معى هاد السيد : الى خْرَجْ القرطاسْ خاوي أحْداكم غادي نعطيه 100 درهم

محمد فرح : مْشات .

دار صاحبي من جهتي وهْمَس فْوَدْني : هاد لقرع يمكن الى أحمق.واش لقراطس ربْعة خارجين خاويين ، هادا زعما هو اللي يكون فيه لفلوس؟

صراحة أنا بدّيتْ نْشَكْ فالأمر .واهْ هاد السيد يْغامر بعشرة آلاف سنتيم .ما يمكنش

المهم شجّعْتو : يْكون الخير أخويا محمد

صاحبنا بّدى يقطع فالجورنال وهو يتْكلّمْ : دابا الزهر يْبان ، دابا الزهر يبان.

واحد لوقيتة شفنا بعينينا ورقة خضرا مْكَمْسة بين يدّيه : شوفو آشْ قولت ليكوم.خونا عندو الزهَرْ ولكن خسارة ماعندوش نص درهم.هاهو منَّع 50 درهم

صاحبي الزاوش تَفْقَسْ .قال لي باينة عليه زعْفان : شفتي أخويا حميد أنت اللي ما بغيتيش تْسَلَّفْني درهم .كنت غادي نربح.

لقرع شاف فصاحبي علي وزاد ضْحَكْ : أنت منحوس باينة فيك على حقّاشْ أنت اللي ما باغيش تربحْ

رد عليه صاحبي : ولكن كيفاش بْغيتيني نربحْ؟

_ شوف أولدي لقراطس ما زال عندي .وقتاش ما بغيتي تلعب مرحبا بيك

المهم مشينا في حالاتنا .لكن واحد الحاجة لَفْتاتْ الانتباه ديالي .هداك خَيْنا اللي من قبل رْبَح 70 درهم بان لي كيْقَرَّبَ من مول اللعبة

_ محمد ، خَيَّسْ (شوفْ)مزيان فداكْ خَيْنا (أخونا) واش ما راكشْ عاقَلْ عليه؟

صاحبي حَنْزَزْ مزيان (أمعن النظر) او هو يقفز : أيِّه هادا هو اللي رَبَحْ هادي واحد رْبَع ساعة

_ اوى أحْضيهْ مزيان.بان لي باللي خونا بالله راه صاحب لقرع.

حْضيناهْ مزيان شفْناه يْقَرَّبْ من القمّار وبْحال الى مَدْ لو شي حاجة .هاديك هي مشى في حالاتو.فالحقيقة غير بعَّدْ منٌّو لأنّه مْشى لواحد القُنْت وبْدا يتفرَّج .

انا وصاحبي مْشينا جيهتو : أجي أسّي محمد معاك البوليس .اي حركة منّاكْ غادي نَدّيوَك لَلْبوستْ

طبعا انا اللي تْكَلَّمْت معاه

زاد صاحبي الزاوش قالو : هادي شْحال وحنا حاضيين كوم كتْشَلَهْبو عباد الله يا مجرمين

خونا بالله خاف وبْدى يَتَّرْعد : والله ما أنا مول الفكرة

_ تْكَلَّمْ غير بشْوُية

صاحبي شدُّو من يدّو : أرى بَعْدا ديك البركة اللي رْبَحْتيها مَن قْبيلا

_ شوفو جْيابي خاويين والله الريال ما عندي

_ باينة المسخوط .زعْما راك ردّيتيها لصاحبك .ياكْ كاين هاد الشي ؟

هَزْ راسو وقال : نْعام أسيدي

شاف فيا صاحبي : دابا شنو غادي نْديرو مْعاه ؟

_ نَدّيوَهْ لَبّوسْتْ

_ أنا مْزاوَكْ والله مانْعاودْ

_ أعْطينّا شي باراك ونقدْرو نْديرو عين ميكة

_ واخَّا غير صَبْرو عليا غادي نمشي عند صاحبي ونْجيب ليكوم حقْكوم

المهم خلّيناهْ يمشي.لكن ولد لحْرام دارها بينا .مْشى وغْبر فوسط الزحام .

قال لي صاحبي الزاوش : ما عندنا ما نْديرو .يا الله نمشيو للدار راها الواليدة تْكون مْوَجْدا لينا لعْشى

_ عندك الحق .ولكن أجي بعْدا نشوفو لقْرع فين وْصَلْ مع التْبَلْعيطْ ديالو.

فْديك اللحْظة كان يْقَشَّر واحد القرطاس ديال الجورنال وكي العادة يْخاطب الناس لَمْجَوْقْا عْليه: سْيادْنا هدا حَسّيتْ باللّي عندو الزْهر.غادي يربح

هاديك هي خرَّجْ من يدّو ورقة ديال 50درهم : هاهي ورقة خضرا.

هاك أوليدي بالصحة والراحة

خونا بالله خْدى الورقة الخضر ومْشى حتى هو بعَّد ولكن بْقى يَحْضي لَقْرع

شفْت فصاحبي : خويا محمد هادو عصابة ما نقَدْروش عليهوم يا الله نمشيو نْبَعْدو.راهوم الى فاقو بينا يَقَّدْرو يَمْحيو لينا الآتار

المهم مْشينا في حالاتنا للدار.فالطريق شرينا قرعة مونادا و4 خبزات .

مين وصلنا للدار لقينا واليد صاحبي جا من فرنسا .مْشى يَجري عند أبّاه وعَنْقو .

لْقيتْ راسي غير بوحْدي.خونا بالله نْساني ومْشى دْخَل وسَدْ الباب.

دازت رْبْع ساعة ، ما خْرَجْ حَدْ.هاديك هي مْشيت عند خالي (هذا أصغر أخْوالي).كان شيفور ديال الكار ويقولو عليه الناس انه بارع فالسياقة.للأسف ما لقيتوش فالدار.كان بايَتْ في بركان.

المهم لْقيت اوْلادو وديك الليلة قَصَّرت معاهم تقصيرة رائعة

ولكن تقصيرة بْلا عْشا....تقصيرة كلها ضحك ونكت وتقشاب

يتبع غدا إن شاء الله
 
التعديل الأخير:

Houmidi59

::الفارس المغربي ::

غير متصل
#19
رد: قصة بالدارجة : حتى واحد ما زاد معلّم

في الغد ، مشيت للسوق باش نشري اللي نحتاجو.مع الطناش شدّيت القطار لتاوريرت.هناك تغديت في أحد المطاعم حيت ما كاين غير الشْوى .بعدها ، مشيت للقهوة ودومانْديت على براد أتاي منعنع.انا هاكدا كنفكر وإذا بْشي واحد يضرب كتفي .دَرْت من مورايا : صاحبي علي ومعاه شي واحد بولحية
فرحت بالمجيء ديال صاحبي المكناسي
_ خويا علي ماكنتش ناويك تْجي اليوما
_ هاني جيت وجبت معايا الموطور
_ يعني غادي نركب معاك ، ياك خويا علي ؟
_ للأسف خويا حميد.هدا اللي معايا أعطيتو الكلمة
شفت فصاحب علي لكن ما فهمت والو
علي ابتسم : هذا معلم جديد غادي يخدم معانا.راه غادي يْهنيك من العربية
مدّيت يدّي وسلمت عليه : متشرفين خويا....
_ عبد لعزيز من عين تاوجطاط
_ أنا ....
_ أنت عبد الحميد.عارف كولشي
المهم مشينا جميع لَبْلاصة الكاميونات ديال اولاد سليمان.بالضبط عند مول الحانوت اللي كنا من قبل سوَّلْناه .هداك السيد اسميتو عبد الله .
دخلت للحانوت.غير شافني اعْقل علي : أنت هو لوسْتاد اللي جا من الرباط ؟
_ نعم ، آش حابْ الخاطر
_ والو أسويدي غير او كان راهوم سَوْلو عليك شي ناس
_ شكون اللي سَوَّلْ فيا
_ شي واحد اسميتو كبريتي
_ ايه عْرفتو .فينا هو ؟
_ قالك أسْتَنّاه هنا غادي يْجي مع العاصَر
المهم صحابي الجداد خَلّاوني ومشاو شادّين الطريق لَوْلاد سليمان
بقيت واقف شي نصْ ساعة .هي هاديك جا صاحبي مول الكاميو.بعدما دار حْوايجي فالكوفَر ، حلْ الباب القدّامي وقال لي : تفضَّل أسِّي عبد الحميد
ركبت ومْشينا .
فالطريق تكلمنا على أمور عادية لا علاقة لها بالتعليم.مرّة كنت كنسمع صوت لمْعيز والخرفان وكلام ديال بنادم .مساكين هاد الناس بْحالهوم بْحال الحيوان ومن الفوق كيْخلْصو لبلاصَة ديالهوم
المهم وصلنا الى أولاد سليمان .نزَّلْت حوايجي واعطيتو 10 دراهم لكن هاد المرة حْلَفْ ما يْشَدْها لكن قال لي : أسي عبد الحميد راني محتاجك فْشي قضية واش نقدر نْجي عندك غدّا
_ مرحبا بيك
مشى في حالتو .حَلّيت باب القسم ودَخَّلْت حوايجي .جْمَعْت جوج طوابل ودَرتْ ـ فوق من هوم اللحاف والكاشة والوسادة.من هاد الليلة هنا نبقى ننعس
جْبَدْت مسجلة كنت شْريتها جديدة مع باتْري12 فولت حيت ما عندهومش الضّو وطبعا البطاريات العادية دغيا يتْقاضاو
جبت واحد القنديل كانت عْطاتو لي خالتي فاطنة (ام صديقي الزاوش) واشعلتها حيت القسم بان ليا شوية مظْلام.
المهم انا هاكدا وأنا نسمع شي واحد يْعَيّْط عليا:
_ أسي عبد الحميد
_ شكون ؟
_ أنا الحاج قدور
_ زيد الحاج الدار دارك
دخل الحاج قدور وفيَدّو صينية فيها برّد أتاي تابعاتو بنت شادة صينية فيها حرشة كبيرة فوق منها جوج طباسل ديال لعسل والسمن
_ جيت نشرب معاك أتاي أسويدي
_ مرحبا باللي جا وجاب
ضحك الحاج قدور : أسويدي كلامك شحال حلو
ردّيت عليه : باراك الله فيك حنا هاكدا فالعائلة ديما كنتكلمو بالآداب ولكن اللي تْعَدّى علينا نْسَمعوه اللي ما عمرو سَمعو
الحاج ضْحَك : لَهلا يَجْعلنا منهوم
_ كون هاني الحاج .ما يمكنش نَوْصلْ معاك للعِيبْ.أنت باينة عليك مولا خير
_ الله يجعلنا ديما فالصواب
هي هاديك سمعنا حَسْ موطور قريب ولكلاب كيْنَبْحو
الحاج وقف .
_ م تقلاقش هاد راه صاحبي علي ولمعلم الجديد مْعاه
اوى نْعَيْطو ليهوم يشربو معانا أتاي
_ هوما غادي غير يْشَمو الريحة غادي يدخلو
فعلا ، دْخال خوي علي وصاحبنا الجديد عبد العزيز
_ مرحبا بالميوطا .تفضلو شربو معانا أتاي
عبد العزيز ابتسم وقال لي : شكون هوما لميوطا ؟
_ هوما انتوما بجوج
_ إوى وانت ؟
_ أنا الشاف ديالكوم
كلنا ضْحكنا
المهم الحاج قدور ودّعنا وقال لينا : مور لعْشا غادي تتْعشَّاوْ عندي ان شاء الله.غادي يحضر لفقيه سّي محمادين
صْحابي بجوج بعدما شربو وكْلاوْ ، مشاوْ للبيت ديالهوم باش يْفَرْشوها.اللي بان ليا ، هاد الكوبل غادي يْديرو العشرة بيناتهوم.اوى ما عندي ما نقول .هوما تقريبا من مدينة وحدة وبجوجهوم عندهوم اللحية غادي يتْفاهمو غير خاصني نحْضي راسي الى يتْفاهمو عْليا
على كل حال ، سَدّيت باب القسم ودخلت فالكاشة باش ندْفى وشْعلت المسجلة باش نسمع شوية ديال الموسيقى.فديك لوقيتة كانت واحد المغنية شلحة كتغني .سْمعنا بأن عمها هو اللي بغى يشهرها والصراحة عندها أغاني زينين منهم هادي اللي كتقول فيها جوني مار (j'en ai marre) يمكن راكو عرفتوها نجاة عتابو
ولكن شكون اللي غادي يْخلّيك تتْموسَقْ
شي واحد كان يْدَق فالباب :
_ شكون ؟
_ غير حنا أخويا حميد علي وعبد العزيز
_ اصَبرو غادي نْحَلْ ليكوم لباب
_ مالك أخويا سَدّيتي الباب على راسك ؟ واش ناوي تنعس؟
_ لّا غير او كان حسّيت بالبرد
_ ياك ما ما باغيش تمشي عند الحاج قدّور؟
_ فعلا ما غاديش نمشي حيت راني عيّان
_ حْنا غادي نمشيوْ
_ اوى بْصَحتكوم
عبد العزيز شاف المسجلة : عندك المسجلة ، مزيان.
كول ليا راه عندي واحد الكاسيط واعر .واش نقدر نْجيبو باش نسمعو لو ؟
_ ما كاين موشكيل جيبو خويا
مشى للبيت ورْجع دغيا :هاهو الكاسيط
_ شكون مولاها ؟
_ عبد الحميد كشك
_ اشنو كيْغني ؟
ضحكو بجوجْهوم ورد علي علي : هادا داعية كبير كيْوَعّي الناس فالدين
_ زعما كيفاش نتوضّاو ونْصليو
_ لّا أكثر من هاد الشي
_ ياك ما يتكلّم فالسياسة ؟
_ بْحال داك الشي
_ اسمعو الخوت دِّيوْ عليا هاد كشك انا معنديش معاه
_ غير اسمعلو بعدا عاد حْكم عليه
_ واخا يا الله سَمعونا الله يرحم الوالدين


يتبع غدا ان شاء الله
 

Houmidi59

::الفارس المغربي ::

غير متصل
#20
رد: قصة بالدارجة : حتى واحد ما زاد معلّم

صراحة الاخوان هادي أول مرة نسمع هاد الداعية كيتكلم على الدين بتلك الطريقة.عندو زعما ما يقول ولكن .....شي حْوايج ما عندوش .ما غاديش نقول ليكوم أشنو هي باش ما نخرجش عن المحور ديال القصة ديالي.على كل حال .وقّفت المسجلة وردّيت الكاسيط لصاحبها : شوف أخويا عبد العزيز أنا مغربي ومسلم ومتبّع كلام الله والرسول.نّهار اللي نحْصل فشي حاجة ما فهمْتْهاش الحمد الله كاين الفقْها والعُلاما ديالنا يقدرو يجاوبوني، من الفوق الكتب الدينية غير هي .
شوف تبارك الله كتاب الفقه والسنة فيه كولشي وراه عندي موجود الى بغيتو تقراوه
الاخوان ما عجبهومش الحال وانا بطبيعة الحال ما يهمنيش.المهم قال لي صاحبي علي : (زعما باغي ينصحني) خويا حميد هاداك الشي اللي كتسمع فيه المجون والفسق خاصك تتقى الله وتسمع كلام الله وتقرى القرآن
ردّيت عليه : ما تقلقش عندي القرآن كنقراة مرّة مرّة وعندي الكاسيط ديال عبد الباسط الى بغيتي نسمَّعْها ليك
عبد العزيز بغى يَتْدََخلْ : اسّي عبد الحميد داك الشي اللي قلتي مزيان ولكن باش قلبك يعمر بالتقوى والايمان خاصك تسمع بحال هاد الكاسيط راه فيه مسائل تجهلها على الدين ديالنا
اضْحكت : واخا خويا عبد العزيز غير او كان ماشي دابا .انا دابا باغي شي حاجة باش نَتْرولاكْسا يعني نرتاح
_ اوى هادي مزيانا ليك ؟
_ اسمح لي راها عَصْباتني شي شوية
_ أعوذ بالله واش كاين شي واحد يسبْ الدين
_ انا ما سبيت دين ...واه واش بغيتوني نكذب عليكوم ؟
الى بغيتو الصراحة : هاد خَيْنا ما عنديش مْعاه
شوفو الله يرحم الوالدين : صافي ما بقيتش نسَّمعو
يا الله بَعْدوه عليا
_ واخا أخويا .حتى حنا ما بْقاش عندنا مْعاك
يا الله تبقى على خير
سَدّيت عليا الباب وتْكوفَشْت(يعني دخلت تحت الكاشة) وشْعَلْتْ المسجلة .هاد المرّة قلت علاش ما نسمعش شوية كلام الشيوخ؟
كاين واحد المغني جزائري صراحة عندو أغاني كيعجبوني .هو يغني بالقصبة والبندير
لخّوت صافي تْيَقنو بأنه لا رجاء في إصلاحي.اسمعت واحد فيهوم قال لصاحبو : هادا راه من الرباط راه مْوالف مْعا لَقْصاير .ماشي بْعيد يْكون حْنَشْ
زوينة هاد لْحَنْش .صافي الى قَرْبو مَنّي غادي نْعَضْهوم بالمعقول
المهم ، وَدّن لعشا .سَخَّنْت الما باش نتْوضّى ونْصَلّي لعشا (الله يقْبَلْ)
مين ساليت من هاد المهمة الدينية.بحال الى حسّيت بالجوع .الحمد لله خوكوم الحوميدي ديما عندو ما يَتْكالْ.كنت فوجدة شْريت شوية ديال الكونسيرفْ (المعلّبات) ديال الحوت والكورْن بيفْ (الكاشير ما كانش فْديك لوْقيتة)
صاوبت ليا واحد ساندويتش من الحرشة ودَوَّزْتو مع أتاي اللي بْقى
دازت نصْ ساعة ، شي ناس قَرْبو من القسم .بْحال الى سْمعت صوت الحاج قدور :
_ فينكوم يا الأساتدة ؟
بان ليا من الشَّرْجَمْ علي وصاحبو خارجين :
_ راحنا موجودين
_ ولكن فينا هو اسّي عبد الحميد ؟
_ ما بغاش يمشي راه شي شوية عيّان
_ خاص ضروري يْجي أسّي عبد الحميد راها لَقْصارة بْلا بيه والو
لَخوت دخْلاتهوم الغيرة .شوف لك على المَسَّلْمين ديال آخير الزمان : قال الله ويْديرو خدمة الشيطان
_ أسيدنا حتى حْنا ما ماشْيِينْش لْعَنْدك ، ردّ عليه عبد العزيز بْحال الى غَضْبان
الحاج قدّور كان حكيم :
_ خاطركوم .أنا ما دارتش ليكوم لموس فالرقبة
صاحبي علي شوية تْكاكا مع راسو :
_ انا بعْدا غادي نَمْشي مْعاك
_ مزيان اسّي علي ولكن خاص الأستاذ عبد الحميد إيجي مْعانا
صاحبي علي قَرّب من القسم ، عَيَّطْ عليا : خويا حميد خويا حميد .الحاج قدور راه فالباب
حَلّيت الباب :
_ الحاج قدور اسمح ليا راني شوية عيّان.ما غاديش نمشي مْعاكوم
_ لاواه....... لابد تمشي مْعانا .زايدون انا باغيك تكتب ليا واحد لبْرى لْولدي باغي نْصيفَطْ لو شوية فلوس
_ واخّا أسيدْ الحاج هاني جاي معاكوم
الحاج شاف فصاحبنا عبد العزيز : وأنت سْويدي واش تمشي مْعانا ؟
_ إيه نمشي واش بْغيتو تْخَلّيوْني بوحْديتي ؟
ظاهرة أن خونا بالله خاف من الظلمة ومن لكلاب .اوى عندو الحق اللي خاف اسْلمْ


يتبع بعد قليل


 
أعلى