قصة بالدارجة المغربية : مذكرات معلم في المدينة

bouchaib56

::مراقب مغربي ::

غير متصل
#41
رد: قصة بالدارجة المغربية : مذكرات معلم في المدينة

الله يكمل عليك بالخير وبالمزيد حتى يبقى كل من يقرأ مذكراتك بالبادية وبالمدينة
يطلبك على خط اسكيب ليتمتع بليس سرد قصص ولكن ليحس انه في الهاتف مع الكاتب القصاص عربي فرنسي دارجي
حتى وجدي
المهم انخليكم لاتتمتعوا مع جديد حوميديكم فكونوا مع الموعد راه اطلع ليكم ازهر خلفيوه يهدر وهو ف نفس الوقت كيتشكر نسكت اقبل ما ينفر
 

bouchaib56

::مراقب مغربي ::

غير متصل
#42
رد: قصة بالدارجة المغربية : مذكرات معلم في المدينة

وخا تخوى الصفحة من المدكرات الحوميدية انجي نتفكرها ربما القى شي مفاجأة

من لاالمذكرات غدين اندوزو ليلاتروسات واستيلوات انسيت طباشير
 

Houmidi59

::الفارس المغربي ::

غير متصل
#43
رد: قصة بالدارجة المغربية : مذكرات معلم في المدينة

الحلقة 26 : ذكرياتي مع المستوى الثالث (المرحلة الثانية)

الجزء الأول :سّي أحمد بْغى يْردْني أبّاهْ

العام الثاني ديالي فالثالث كان مميز .داك العام المعلمين ديال المدرسة جابو أولادهوم وبْناتهوم باش يقراوْ عندي.بيني أُو بينكوم ، الأغلبية ديالهوم كانو طامعين بالجوائز اللي كنعطي للتلاميد المتفوقين.الصراحة أنا ما عندي لا مع وجهيات لا مع معرفة : التلاميد عندي سواسية .اللي جاب أعلى معدل ياخود الجائزة ديالو.
هداك العام ، كان عندي تلميذ ماكاينش بحالو : متخلّق ومؤدب ونشيط وكيسمع الهضْرة.سميتو أحمد.حيت كان عزيز علي بْقيتْ نْعيَّطْ لو مولاي أحمد.هاد التلميد من بعد عْرفت جوانب من حياتو الخاصة .تصوْرو هاد الولد يا الله فاشْ زاد أبّاه سْمح فالوالدة ديالو .هاد الأم جابْ الله لْقات الخدمة حيتْ هي قارية.كانت موظفة فالعمالة .بالطبع سهرتْ على التربية والتعليم ديالو وكانت تتْهلّى فيه مزيان.
انا مين عرفت قصْتو ، أهتمّيت بيه وكنت شْحال من مرّة كنْحنْ فيه وعاملتو بْحال ولدي.
واحد النهار جات عندي أمّو .هادي أول مرة كنْشوفها.المهم دخْلاتْني بلكلام المعهود ديال المجاملة : بارك الله فيك اللي راك واقف مع ولدي وراه فالدار ما يتكلم غير عليك.زعما أنا القُدوة ديالو فْكلشي
خوكم الحوميدي ردْ عيها وْ هو حشمان : لا شكر على واجب هدا راه داخل فالعمل ديالي
هضْرة تْجيبْ هضْرة ، قالت لي : بغيتْ نطلب منّك شي طلب ولكن حْشمت وخفْتْ الى تدّيها منّي من قلّة الصْواب
_ حاشا الالّة ، راني كنسمع ليك ، تْكلمي
_ كيف ما تْشوفْ أحمد راه محروم من أبّاه ملّي زادْ.انا اللي كنْحاول نكون أبّاه وْمّو
_ آشْ نكولَّكْ : الله يعاونك على التربية ديالو
_ بارك الله فيك .
هاد الانسانة عندها واحد السحر يْخلّيك غير تْشوفْ فيها .الصراحة جميلة ومسْرارة .عْمرها تقريبا ديك 26 أو 27 عام .خوتنا بالله سكْتاتْ .خاصني نَحْيي النقاش :
_ سمْحي لي تْباني لي مازال صغيرة ، بحالك ما زال ما ممْزوْجاتْ.
ابتاسمات : عندك الحق .أبّا الله يرحمو هو اللي ارغمني من الزواج من الولد ديال صاحبو ...
_ باينة ما كنتيشْ تبغيه وطلبتي منّو الطلاق
_ والله أأُستاد بالعكس كنت باغية نْعيشْ معاه حياتي
_ إوى ؟
_ اللي كاين هو أمّو الله يسمح ليها كانت تتْدخّل فالشؤون ديال ولدها . هادي قصة ما عندك عْلاشْ تسمعها
_ عندك الحق ، نْرجعو للطَّلب ديالك
_ آه نْسيتْ .الصراحة أستاد ولدي قالها لي : الانسان كيْحسْ بالراحة مين يتكلّم معاكْ
خوكم الحوميدي بْحال الى حسْ بلحْمورية طالعا لو لوْجه ."صافي أخوتي .هادي ناوية شي حاجة .المشكل دازت تقريبا رْبع ساعة وْنا نْعيق باللي كنتْ شاد ليها يدّيها .شوفو يا خوتي مين سلّمت عليها بْقاتْ شادّة لي يدّي وْأنا عْجبني الحال .طْلقْتْ يدّي وقلت ليها : نْعمْ أختي آش حبْ الخاطر ؟
_ أستاد عبد الحميد ....أحمد بْغاكْ تكونْ أبّاه


الجزء الثاني : التلميد اللي هرب فالتْرانْ لوجدة

سمحو لي الى خلّيتْ القصة واقفة على داك الطّلب الغريب.طبعا راكو عارفين باللي الحوميدي كان متزوج وعندو بنت عندها 8 سنين او 9 .وعندو ولد فعمرو 5 أو 4 سنين.
القصة الثانية ديال واحد التلميد كان عندي يمكن يكون مْباطي (مْحطّمْ)الروكورْ فالتْزامْبيلْ (الغياب).هاد خونا يالله كل مرة هاهو مْعوطَلْ يوم أو يومين.الجمعة ماعمرو ما جا حيت كيمشي للواد .فالمشْتا يْصيّد لقْراقرْ (الضفادع) والربيع باينة العومان.
خونا بالله كل ما يْجي نعْطيه حقّو من الهرمكة ونطْلب منّو يْجيبْ أبّاه.العجيب فالأمر كل مرّة جايب ليا شي واحد : هادا عمّو ، هدا خالو ، هادا جدّو ، هادي حنّاه ، هاد عمْ جارو ، هادي خالة ولد جيرانهوم ....المهم تقريبا العائلة المحترمة ديالو كولها درت معاها العرْفْ
أرانّا الأسباب اللي كان اللي يْجي مْعاه يدْلي بيها .هنا ماكاين غير النكت.تصورو المرة الأولى جاب خالو وقال لي : أستاد سْمح لو الله يرحم الوالدين راه كان عمّو مات الله يرحمو .
المرة الثانية جاب عمّو وحتى هو قال لي : الله يرحم الوالدين الى ما تسمحلو كنّا شْوية مْلاهْيينْ مع الموت ديال خالو .
هاد خونابالله قاتل العائلة ديالو كاملة غير بالقصص .أطرف وحدة من هادو نهار اللي قال لي واحد خونا بالله جا مْعاه :أنا أبّاه.
شفْتْ فيه مزيانْ : أنت بّاه ؟
_ واشْ ما بايْناشْ علي أأستاد ؟
_ الصراحة انا اللي عارف أن بّاه مات هادي شْحال
_ آه يا ودّي واش أنا باقي حيْ وْقْتلْتيني
_ أسّي محمد سوّلْ ولدك هو مول لخْبارْ
خونا بالله صْفع ولدو حتى يمكن بانو لو النْجومْ : تْكلّم ياولد لْحرام وقْتاشْ قْتلتيني.
انا اللي ردّيتْ علي ، حيتْ ولدو قْلبها بْكى : لخبار ديال الموت ديالك أسيدي جابو لي واحد خالو اللي حتى هو مسكين مات الله يرحمو حيت عمّو الله يرحمو قالها لي
_ عمّو زعما خويا .واه ، خويا مات ؟
_ اوى سوّلْ ولدك
هاد المرّة زادْ لو واحد الدّيريكتْ حتى نيفو سالْ بالدم : وقتاش عمّكْ ماتْ ؟
أنا عاود تاني رديت عليه : اوى جدّاتو الله يرحمها هي اللي قالتها ليا هادي واحد الاسبوع
_ حتى جدّاتو ماتت زعما أمّا مسكينة.غير البارحة راني كنت عندها وشْربت لحليب ديال البقرة اللي شْرات
بغى عاود يْزيدْ لو ، ما خلّيتوشْ : صافي أخويا واش باغي حتى هو تقتلو ؟
_ أخويا ياكْ غير هو اللي باقي فالعائلة اللي ماماتْشْ.
المهم الولد ما بْقاشْ يْغيبْ بعد السلخة اللي عْطالو أبّاه وْعمّو وْ خالو وْجدّاتو .خونا بالله قال ليهوم : عَوْ ما عمّرْني ما نْغيّبْ
زعما تَقْتوهْ ؟ والو يا الله دازت شي أيّامات خونا بالله غْبرْ.المشكل حتى فْالدّار ما بانشْ.أبّاه جا لْعندي يْسَوّلْ فيه : أستاد ولدي مابْقاشْ ضْهر .آشْ درْتي ليه؟
السيد باغي يمسح فيا تهمة خطيرة : أسمع يا داك بنادم سير قلّبْ على ولدك فالسبيطارات يمكن ضَهْسو كامِيّو أو سيرْ للواد راه شي حوتة تْكون كْلاتو
_ باراكا ما تضحك علي .انا غادي نعْلمْ البوليسْ
_ اعلم حتى الجادارْمية والقيادة
دازت أيّامات ، جا لْعندي صاحبي سعيد وْقال لي : هادي واحد ال10 أيّام تْلاقيتْ فالقطار جوج تلاميد واحد فيهوم يقرى عندك.راه قال لي باللي باغي يمشي للجزائر باش يهرب من والديه اللي قاهْرينو
_ واه كي سْميتو ؟
_ جمال لم.....
_ خويا سعيد هاد البرهوش راه داير ليا مشكيل .دابا فين يكون فهاد لوقيتة ؟
_ ما يكون غير فوجدة .
المهم سعيد أعطاني لبْلاصة ديالو.اللي كان هو أني مْشيتْ للبوليس واعلمتهوم .الحمد لله الاساتدة فتاوريرت عندهوم سمعة طيبة.رجال الأمن اتّاصلو بصْحابهوم ديال وجدة وفعلا جابو الزّرْطايْ (الهرّاب ) حتى لبّاه

غدا مع الحلقة 27 من مدكرات حوميدي مع المستوى الثالث
الجزء الأول : حوميدي رْجعْ زوفْري (رُواسي)
الجزء الثاني : العشْرة مع عبد الله ولخضر
 

عبدالخالق الكوتاري

::مراقب مغربي ::
طاقم الإدارة

غير متصل
#44
رد: قصة بالدارجة المغربية : مذكرات معلم في المدينة

تحياتي استاذي القدير عبدالحميد ذكريات رائعة ويوميات تتلذذ بحلاوة احداثها وتعاقب فصولها ،حلاوة جعلتني اقضي مسائي هذا متتبعا اطوار مغامراتها
حقا اجدت الكتابة واوصلت فكرة سامية قد ترقى لمستوى رد الاعتبار لهؤلاء "الجنود" جنود التعليم الذين ينتشرون بكافة اصقاع المملكة بغية تنوير فلذات اكبادنا واخراجهم من ظلمة الجهل والامية الى رحابة العلم والتوعية فتحية لكم يا من كدتم تصبحون رسلا
امسية طيبة صديقي الغالي حميد وشكرا لالتفاتتك الطيبة بان شاركتنا عطر مشوارك الرائع باتراحه وافراحه و ان شاء الله قادم قصصك يكون مثيلا في الجمال للمنصرم منها.
 

Houmidi59

::الفارس المغربي ::

غير متصل
#45
رد: قصة بالدارجة المغربية : مذكرات معلم في المدينة

تحياتي استاذي القدير عبدالحميد ذكريات رائعة ويوميات تتلذذ بحلاوة احداثها وتعاقب فصولها ،حلاوة جعلتني اقضي مسائي هذا متتبعا اطوار مغامراتها
حقا اجدت الكتابة واوصلت فكرة سامية قد ترقى لمستوى رد الاعتبار لهؤلاء "الجنود" جنود التعليم الذين ينتشرون بكافة اصقاع المملكة بغية تنوير فلذات اكبادنا واخراجهم من ظلمة الجهل والامية الى رحابة العلم والتوعية فتحية لكم يا من كدتم تصبحون رسلا
امسية طيبة صديقي الغالي حميد وشكرا لالتفاتتك الطيبة بان شاركتنا عطر مشوارك الرائع باتراحه وافراحه و ان شاء الله قادم قصصك يكون مثيلا في الجمال للمنصرم منها.

خويا عبد الخالق كنشكرك على التعليق ديالك واخّا أنه جا مْعطّلْ شي شوية .أخويا راها دايزة 24 حلقة وانا نكتب وحتى واحد ما رد عليها لخبار.كنت غادي نْوقفها ولكن خويا بوشعيب حيت حتى هو معلم كان مصرّْ باش نستامرْ
لمعلوماتك نفس المذكرات كنكتبها فالمنتدى ديال التعليم ديالنا .تصوّرْ انها لْقاتْ نجاحْ كبيرْ غير عدد القرائات راه واصل ل أكثر من 5000 مشاهدة .هنا عندنا بلكْشايف ما دايزاشْ 500
خويا عبد الخالق راني مْعوّلْ عليك باشْ تقرى اللي بْقى من المذكرات ديالي
يا الله ليلتك مبروكة

 

Houmidi59

::الفارس المغربي ::

غير متصل
#46
رد: قصة بالدارجة المغربية : مذكرات معلم في المدينة

الحلقة 27 من مدكرات حوميدي مع المستوى الثالث
الجزء الثاني :العشرة مع خونا بالله عبد الله

سكنتْ مع خونا بالله تقريبا عام كامل ، يعني حتى لْأواخر يونيو.يمكن نقول على العشرة مْعاه دازت ب3 ديال المراحل : المرحلة الأولى "شوف فيا نْشوف فيك آطاجين الحوت" .المرحلة الثانية " اللي كْلاه واحد ياكلوه جوج " .المرحلة الثالثة " ها العار الى ما تعطيني التيساع"
فالمرحلة الأولى ، كان كل واحد فينا أدّايها فْبيتو.أنا كنت كناكول ونشْربْ فالبيت ديالي .تقريبا فاش كنت نتْلاقى مْعاه بعض المرات فلوْقيتة ديال أتاي.العجيب فالأمر كان عندنا نفس التوقيت.
خاصكوم تعرفو أن خونا بالله كان عندو البارابول دايرو فالبيت ديالو.غي يخرج من الخدمة يدخل ويْسدْ على راسو.كنت كنسمع غير الصوت وعْرفت أن خونا بالله مبْلي بالجزيرة وكل ما يتعلق بالأخبار .ما عمْرو ما عْرضْني نتفرّج معاه.بالنسبة للماكلة ، كان الصراحة مْهالي فْراسو ولكن ماشي ديما.هدا كان مختلف على البشر العاديين.تْصَورو هاد خونا بالله يومين ياكول فيها غير الخبز وماطيشة (مثلا) والنهار الثالث يْجيبْ الكبدة او الكفتة.عاودْ تاني النهار الرابع والخامس يقْضي باللي كان والنهار السادس يْبرّعْ راسو باللحم .
بالطبع كان يْخبّي ما ياكول ولكن الريحة كتبقى فالكوزينة
المرحلة الثانية بْدات واحد النهار خوكم الحوميدي دارْ واحد المرميطة ما يقْدر عليها لا برغاش لا شوميسة : مْريقَة اللّوبيا (كْريني ) بلحم الغنمي.
خونا بالله كان فْبيتو .غير شمْ ريحة الطْيابْ وخْرج يجْري :
_ الله على ماكلة شْحال بْنينة
خونا عارضْ على راسو بطريقة فنية.خوكم الحوميدي كْريم من طبعو ، قال لو :
_ مرحبا بيك خويا عبد الله.غادي نْكون جد سعيد الى شاركْتيني لغْدا ديالي
فعلا ، تْغدّينا مزيان .خونا بالله كْلا حتى شْبعْ.من بعد قال لي باللي ماعمرو ما كْلى بْحال هاد اللّوبيا.المهم قلت لو : بْصحْتكْ.ردْ علي : الله يْسَلْمكْ
اللي كان ، من بعد صافي ماتْلاشْ تقريبا يْطَيَّبْ شي حاجة.خونا بالله لْقى الريسْطورانْ (المطعم) ديال الفابور.بْدى يتْخبّى فْبيتو .غير يْشَمْ باللي لغدى وْجدْ، يخرج ويقول لي : خويا حميد ياكْ دَوَّقني مْعاكْ.انا كي العادة نقول لو : تْفضَّلْ خويا عبد الله.
للأسف هاد السيد من النوع اللي ما يسْتَحْيى وْما يَحْشمْ.تقريبا شهر أو هو ديما ياكول والمشكل قرْعة موناضا ما يشْريها.هادا فوجدة نْسمّيوَهْ "التْمَحْريدْ"
مين يبغي ربّي جا السْبابْ على يدّو.واحد النهار ما جيتْشْ بكري باشْ نْديرْ لغدى حيتْ كان عندنا اجتماع مع المدير.مينْ وْصلْتْ للدار ، كانت الساعة تقريبا الطْناشْ.خوكم داخل مع الجوج .يعني الوقت غير كافي باشْ نْصاوب لغْدى.هاديك هي جبْتْ مْعايا شي بيضات باش نطبخهومْ مع ماطيشة.
فالدارْ شمّيتْ ريحة الكبدة بْلاصوصْ.خوكم بالل اللي هو أنا سالو رْيوكو .قلت مع نفسي الله على ريحة شْحالْ بْنينة.بالطبع قلت عْلاشْ نْديرْ البيضْ ولغْدى موجود .كنت ناوي غادي يَعْرضْ علي باشْ نتْغدّى مْعاهْ.ياكْ زعما شْحال خوكم غدّاه من نهار ، زعما غادي يا الله يْردْ جزءْ من الخير اللي كنتْ نْديرْ فيه.
آهْ يا خوتي هادي ما كنتشْ نتْصوّرْها.جاب الطبسي ديال الكبدة وبْدى يهْرمْ كي الوحشْ بْلا ما يْشوفْ فيا.شي شوية مين وْصل لْنَصْ الطّبسي قال لي هاكْ دوقْ.أعطاني شْدقْ وقال لي بسم الله.الحوميدي ما يرضاشْ يتْصدْقو عليه، ردّيتْ عليه : غير كولو راه بَحْرى داكْ الطبسي يَكْفيك.هو جْبَرها من الجنة والنّاس وكْلى كل ما فالطّبسي.
الحوميدي ما فادو غير طيّبْ البيضْ بْماطيشة .باشْ نْبنَّنْها زَدْتْ ليها شوية ضامة البنّى كْنور.
المهم صايبْتْ واحد البرّادْ أتايْ.
هي هاديك كْليتْ وانا نْفكّرْ فهادْ الكَنْسْ الحافي.شي شْوية خونا بالله جا لْعندي ، بْحال الى ما عمرو كْلى وقال لي : ريحة البيضْ شْحالْ بْنينة
زعما باغي ياكولْ.ما يعرفش مزيان الحوميدي.
خوكم قال لو : حدَّكْ تمّا
_ كيفاشْ زعما ما بْغيتْشْ تْخلّيني ناكولْ مْعاكْ
شوفو التْقَزْديرْ فينْ وْصلْ.خوكم عْطاه قُرْطاسَة ما عمرو ما ينْساها :
_ أعلاه أخويا مينْ أنتْ كنتْ كتْزرّدْ فالكبدة خلّيتيني ناكولْ
مْعاكْ ؟
هادي ما كانشْ ناوي عْليها.عْرفتو باشْ جاوبني ؟
_ خويا حميد كنت نحْسابْ ما عندكشْ مع الكبدة
_ واه أخويا واشْ أنت الطبيبْ ديالي باشْ تمْنعْها عليا؟
المهم رْجعْ لْبيتو وْسدْ على راسو.خونا بالله راه غْضَبْ.سبحان الله انا اللي خاصني نغضبْ
المهم لعْشيا ما بْغاشْ يْكلّمْني .لْغدْ ليهْ، قلت مع راسي عْلاشْ ما نشْري شْوية الكبدة ونقْليها باشْ نتغدّى بيها.
فعلا داكْ الشّي اللي درتْ.
خونا الشَّمشام جا يجْري لْعندي .قبل ما يلْحقْ للطّبْسي ، قلت لو : سّي عبد الله هاد الكبدة اللي شْريتْ يا الله تكفي واحد.ياكْ راكْ بفْلوسك ، ديرْ بْحالي.
خونا بالله صافي وغْضَبْ وبْدى يْسبْ .أنا ما دّيتْهاشْ فيه وكْليتْ حتى نقّيتْ الطّبْسي.
شي وْقيتة سْمعنا واحد جارنا كان ساكن فالطبقة الأولى .جا مسكين يسْحابْ ليه راحنا كنْتْخاصْمو.مين عْرف اللي كاين ، شْحالْ ضْحكْ وقالْ لْخونا بالله : سّي عبد الله واشْ الناس يتْخاصْمو على الماكلة ؟

المرحلة الثالثة صافي خونا بالله قاطعني بالمعقول.حتى السلام ما بْقاشْ يْقولها لي.مين يدخل يمشي ديريكت للبيت ديالو ويْسَدْ على راسو.بْقينا على داك الحال حتى لديك أواخر ماي.
جا واحد النهار باقي عاقل كانت 1 يونيو .عبد الله كان فوجدة .كانت عندو شي رخصة ديال 3 أيام.المهم كان خاصني نمشي نْخلّصْ لكْرى .المشكل ما زْعمتْشْ نْخلَّصْ عليه ولكن الحمد لله كان مْخلّي لَفْلوس ديالو عند جارنا بلخضر.
جارنا لخضر قال لي : ها الحصة ديالو ديال لكرى ، زيدْ عليها دْيالك وسير عند فْلانْ باش تخلْصو لكْرى ديال الشهر.
فعلا مْشيتْ عند مول الدار .عْطيتو فلوس لكْرى وكانت مناسبة باش نعرف حقائق غريبة على خونا بالله عبد الله.
أول حاجة عْرفت وهو أن خونا بالله كان يْخلّصْ لكرى حتى ل15 من الشهر.مول الدار تْعجَّبْ مينْ أوّلْ مرّة يْشَدْ فلوسْ لكرى ف2 فالشهر.
الحاجة الثانية وهادي هي الخطيرة .مينْ عْطاني مول الدار التوصيل .يا الله قْريتو لاحظتْ باللي التوصيل مكتوب فيه : من 1 مايو1996 الى 31 مايو 1996 . اللي متعارف عليه ان لكْرى كيْخلْصوه الناس بالتسبيق .من الفوق خونا بالله نْهار اللي جيت قال لي خاصني نْخلّصْ فلوسْ لكْرى.
عْرفتو آشْ ردْ علي مول الدار : صاحبك كيْخلّصْني حتى يْسالي الشهر.
دابا تْاَكَّدْتْ باللي هادا صهيوني كبير كان يستغل النية والثقة اللي أنا دايرْ فيه.
هي هاديك غير جا ما خلّيتْ ما عْطيتْ لو .خونا بالله هادْ المرة سْكتْ حيتْ عارف راسو بازلْها.المهم باشْ ننهي الموضوع قلت لو : هادا آخر شهر مْعاك.غيرْ أوكانْ ديرْ حسابك غادي تْخلّصْ الحصة ديالك وديالي اللي سْرقتيها مني طيلة هاد الشهورا اللي دازو
خونا بالله فضحتو مع المعلمين باش حتى واحد ما يسكن معاه .
بقى هاد المجرم ساكن غير بوحدو لسنوات حتى تْزوّجْ.


يتبع هاد المساء الجزء الثالث : العشرة مع بلخضر والحلقة 28 من مدكرات معلم في المدينة

 

عبدالخالق الكوتاري

::مراقب مغربي ::
طاقم الإدارة

غير متصل
#47
رد: قصة بالدارجة المغربية : مذكرات معلم في المدينة

عبرتي عليه خويا حوميدي بحال هاد خونا فالله تستحيل العشرة معاه والحمد لله لي فضحو قدامك كبير الكرش تفركع ليه
 

Houmidi59

::الفارس المغربي ::

غير متصل
#48
رد: قصة بالدارجة المغربية : مذكرات معلم في المدينة

عبرتي عليه خويا حوميدي بحال هاد خونا فالله تستحيل العشرة معاه والحمد لله لي فضحو قدامك كبير الكرش تفركع ليه


آه يا خويا عبد الخالق كون شفتي السقراما اللي كنت عايش معاهوم مدة سنوات ...هادو كون كان الجاحظ باقي عايش يرمي الكتاب ديال البخلاء اللي كان كاتبو باش يعاود يحكي على هاد خوتنا بالله
ليلتك مبروكة
آه شي شوية كاين حلقة أخرى مع صاحبي بلخضر (هدا كريم) وصاحبي عبد الحي (هدا شوية مْسطّي)
ههههههههه

 

Houmidi59

::الفارس المغربي ::

غير متصل
#49
رد: قصة بالدارجة المغربية : مذكرات معلم في المدينة

الحلقة 28 من مدكرات حوميدي مع المستوى الثالث
الجزء الثالث :العشرة مع خويا بلخضر وعبد الحي(1)

العشرة مع خويا بلخضر كانت رائعة حيت هاد الأخ الكريم كان نعم الصديق والرفيق والناصح.اللي عْجبني فيه أنه ديما كيْتصرّف بحكمة.سكنتْ معاه فالبداية مع أستاذ آخر سْميتو عبد الحي.كنا ساكنين بْثلاثة بينا مينْ كْرينا دار كبيرة فيها 4 ديال لبيوت .هادي لكْرى ديالها كان غالي حيت كنّا كندفعو كل شهر لمولْ الدار 1200 درهم ، يعني 400 درهم للواحد.
خويا لخضر كان أستاد ديال الرياضيات فالإعدادي والأستاد الثاني كان كيدرّس التربية التشكيلية.هو على فكرة رسام ماهر كيرسم شي لوحات غاية في الروعة.للأسف كان مْسالي مع قبّو .
هاد خونا بالله كان غريب فالطباع ديالو: مرّة راه راشقا ليه ومرة طايرة ليه.المهم يقدر يتغير فالنهار حتى ل20 مرة.
بالنسبة للعشرة ، كان كل واحد فينا مْدَبَّرْ على راسو.الكوزينة كانت جامعاتنا غير باش نشربو كاس أتاي.من غير هاد الكاس ديال أتاي ، كل واحد حر يْطَيَّبْ داكْ الشّي اللي بْغى.
خوكم الحوميدي كان طبّاخ ماهر .لهادا كان دائما كيْصاوبْ لْراسو الشهيوات اللي كان من قبل ياكلْهوم مع الأسرة ديالو.خويا بلخضر كان تقريبا الوقت ديالو ديال الفراغ يقضيه فالقهوى حيت هو مبْلي بالشطْرنج.المكْلى ديالو ساهلة .فالغدا يْدوزْ ديريكتْ للسوق باش ياكولْ شوّاية ديال السردين مع كاس أتاي.
من بعد غير يدخل للدار يمشي ينعس حتى لْهديك الخمسة ديال لعْشية.من بعد يمشي للقهوة ويبقى تمّا حتى لْديكْ العشرة ديال الليل. كيف ما شفتو كنا قليل فينْ نتْلاقاوْ
خونا بالله عبد الحي هادا فْشي شْكلْ.اول ملاحظة عليه كان ينعس بزاف.تصوْرو كان بعض المرات ما يْفيقْ حتى الوحدة او الجوج ديال لعْشية.المشكل كان شْحال من مرة كيتْخاصم مع المدير وحتى الأساتدة.
اللي كان يْحيَّرني هو أنّه كان يْسخّنْ الما فوق البوطة ويْخليه حتى يبْقى لَفْوارْ يخرجْ من نيفْ المقْراجْ (الغلّاي).من بعد يْجي ويَطْفي البوطة ويرجع لْبيتو.بعد رْبع ساعة أو حتى 30 دقيقة يرجع خونا بالله للكوزينة وبْهاداك الما اللي يْكونْ بْردْ يْصاوَبْ أتايْ
هاد خونا بالله كان عزيز عليه الكاسْكروط ديال الزنقة ولكن الكاسكروط اللي ما يتعدّاش 5 ديال الدراهم.كنت مْشيتْ معاه واحد النهار.زعما عْرضْ علي نتعشّى مْعاه بْشي كاسكروط على حسابو.
إيه ياخّوتي كاسكروط تعطيه لْشي صومالي جيعان موحال الى يقبلْ ياكْلو.هاد الكاسكروط ديال خونا بالله فيه شوية ماطيشة ، شوية بْصيلة ، شوية شْلاضة ، شوية زيتون ، بيضة ، شوية كاشير ، شوية باربا ، شوية خزّو مع لاصوصْ والمايونيزْ
كاسكروط الى عْطيتيه لْشي واحد سكْرانْ يقْدر يْفيقْ او بمعنى آخر يصْحى.آه نْسيت حاجة كيْزيدها فالكاسكروط ديالو علبة ديال السردين
هاد خونا بالله سكن معانا حتى لشهر أبريل .
واحد النهار فوسط الشهر غْبَرْ بْلا ما يعلم.العجيب فالأمر داك النهار اللي كان غادي يغْبرْ فيهْ قال لي باللّي غادي يمشي لوجدة.دازت 3 أيام وخونا بالله مابانْ عليه أثارْ.خويا بلخضر قال لي : ياكْ ما خونا بالله راه مشْدودْ فالكوميسارية حيت هو مولا مشاكيل.بعدما مشينا عند البوليس ماكاين خْبار عليه.هي هاديك سوّلنا عليه شي اساتدة كيْخدْمو معاه.قالو لينا راه خدّام كي العادة ولكن راه كيْجي بكْري للمدرسة.جانا لعجبْ أنا وخويا بلخضر.كيفاشْ زعما خونا بالله رْحلْ بْلا ما يعلمنا.اوى الى دارْها هدا راه أحْمقْ
مْشينا للدار ولْقينا بيتو مسْدود .فْتحناه : البيت كان خاوي .وقتاش خْدى الامتعة ديالو ؟ العلم عند الله.
صاحبي بلخضر كان ديما حكيم .قال لي : شوف أحميد واخّا تتْلاقا بيه ما تْكلْمْلوشْ على لكْرى .خلّيه يهضَرْ غير بوحدو.
فعلا واحد النهار تْلاقينا بيه فالقهوى.خونا بالله بْدى يْحاول يْبَرَّرْ داك الشّي اللي دارْ مْعانا.انا درْتْ بالنصيحة ديال بلخضر ما بْغيتْشْ نْردْ عليه.من بعد كل ما يتلاقى بينا يْعاودْ يحكي وحْنا صُمْ بكْمٌ .يعني والو ما نْردّو عليه ما نْجاوبوه.
واحد النهار كنت غي بوحدي.جا كي العادة بْدى يشْكي ويبْكي.المهم حْكى لي اللي كاين .
خونا بالله كان جاه لكْرى شوية غالي وكان باغي شي حاجة رْخيصة.هي هاديك شي شاوشْ كيخدم فالاعدادية اللي هو فيها قال لو كاين واحد البيت فوق شي حمّامْ رْخيصْ وكْليماتيزي.هادي زعما راها باينة حيت السْخونية ديال البَرْما.لكْرى ديالو كان يا الله 150 درهم ومن الفوق ما يْخلّصْ لا ما لا ضو.والربحة لكبيرة أنه يقدر يْدوَّشْ كل نهار الى بْغى فابور بْلا ما يْخلّصْ ريالْ.
مول الحمّام قال لو باللي خاصّو يْخلّصْ 3 شهورا تسبيق.جاتو 450 درهم.خونا بالله عجْباتو لافيرْ(l'affaire).وفرح وقال مع راسو : داك الشّي اللي كنت نْخلْصو فشْهر دابا غادي نْخلْصو فثلاثة ديال الشهورا
اوي المثل كيقول الطماع ما يخْلي دار بوه غير الكدّاب
اللي وقع ان خونا بالله فاليوم الثاني ديالو فالبيت هْجمت عليه الحشرات من كل انواعها.ها البق ها البرغوت ها لقمل ها النمل ها البعوش ها سراق الزيت.مسكين حتى السروال والفيستا ديالو سكْنولو فيهم.خونا بالله رْجع ماشي يْفيقْ بكري ، راهْ ما تْلاشْ ينعس.
المشكل دابا راه دافع 450 درهم .مول الحمّام قال لو : كْلاكْ بوبي .هادا معنى بالوجدية معناه ما غاديش نْردْ لك فْلوسكْ
اوى خونا بالله قهْراتو الحشرات .شوفو مسكين وْقعْ ليه بْحال دلك الشّي اللي وْقع لْفرْعونْ مع سيدنا موسى .ياكْ زعما ربّي سلَّطْ على فرعون وقوْمو الجراد والحشرات وْخلّاوْهوم فايْقينْ بلا نعاس
إيه دابا عاد فْهمت كلام خويا بلخضر الحكيم : ربّي يْخلْصو على الفَعْلة ديالو
فعلا راه ربّي خلْصو
القضية ما وقْفاتْشْ لهادْ الحدْ.خونا بالله بْغى يرجعْ لينا ولكن حْنا كنا نْعامْلوهْ بِبُرودة.على داكْ الشي ما زْعمْ يطلبْ منّا يْعاودْ يسكن مْعانا.
المهم خونا بالله بْدى يْقلَّبْ على لكرى .هاد المرة لْقى كارْسونْييرْ (garçonnière)فيها بيت صغيرة وكوزينة لكْرى دْيالها ب900 درهم .اللي كان هو أنه كان لازم عليه يسكن فيها ويْخلّصْ كْراها لمدة 2 شْهورا .



يتبع غدا الحلقة 28 والجزء الرابع : العشرة مع بلخضر وعبد الحي (2)
 
التعديل الأخير:

عبدالخالق الكوتاري

::مراقب مغربي ::
طاقم الإدارة

غير متصل
#50
رد: قصة بالدارجة المغربية : مذكرات معلم في المدينة

فصل آخر رائع من قصتك الجميلة تابعناه بتلذذ ولهفة كما عودتنا خويا حوميدي الله يحفظك
 

ouss

::مغربي ::

غير متصل
#51
رد: قصة بالدارجة المغربية : مذكرات معلم في المدينة

برارو عليك قصص واعرين عشت حياة رائعة مح لا ما جاوبتش في الاول حت الامتحانات
 

Houmidi59

::الفارس المغربي ::

غير متصل
#52
رد: قصة بالدارجة المغربية : مذكرات معلم في المدينة

الحلقة 28 من مدكرات حوميدي مع المستوى الثالث
الجزء الرابع :العشرة مع خويا بلخضر وعبد الحي(2)
بْقيتْ مع خويا بلخضر ساكنين ديك الدار بعد الهروب المفاجئ ديال خونا بالله .وبالطبع لكرى رجع يتْقام علينا ب600 درهم للواحد.
ولكن ربي كبير والرحمة ديالو ما عندها وقت.فعلا فأواخر شهر ماي غادي نخلصو لكرى ديال شهر يونيو جا لعندنا مول الدار وقال لينا : راني مْبرّعكم بلكرى ديال هاد الشهر.
من جهة أخرى جا خونا بالله طلبنا زعما الى بْغينا نخْويوْ لو الدار مع ال20 فالشهر حيت ناوي يْديرْ شي اصلاحات.
صاحبي بلخضر ولا أنا ما كان عندنا حتى مشكل.بالنسبة للإعدادي هوما مْوالفين ما تْكونشْ عندهوم الخدمة تقريبا من أواخر ماي.بالنسبة للإبتدائي لخبار فْراسكوم حْنا مشدودين حتى لْديك العشرين يعني مع الامتحانات ديال السادس.
ولكن جاتني فكرة وقلتها لصاحبنا : شوف أسّي المختار أنت مدير ، إوى سيرِْ عندك صاحبك المدير ديالنا وقلْها لو بطريقة فنيّة يخلّيني نمشي لوجدة نْشوف اولادي.راه ما كاين ما بَدّار.ياكْ أنا ما متْبوع بالامتحان حيت عندي الثالث.
المدير فرح : زعما تقّدرو تخرجو الاسبوع الجاي ؟
_ كيفاشْ؟ من غدّا أسّي المختار
_ اوى أسيدي غادي نْشوف مع داك المدير .غير اجمع حْوايجك .فْهاد آخر الاسبوع غادي تمشي عند أولادك بوجدة
فعلا داك الشي اللي كان.خوكم يا الله دار واحد النهار شي طلّة باش نْكتب الائحة ديال التلاميد اللي غادي يقْراوْ عندي العام الجايْ
العام الثاني كيف ما حْكيتْ ليكوم كنت كْريتْ مع خونا بالله عبد الله.لخبار راه فْراسكوم .باقي غير واحد النقطة نفسّرها ليكوم وتقدر تْحيّركم : علاش العام التاني ديالي ما كْريتشْ مع
بلخضر ؟
اوى اللي وقع ما كانش فالحسبان.تصورو مع بداية السنة الدراسية جا عندي واحد المعلم وقال لي كاين واحد البيت مع شي عائلة ديالو .بيت واخا فوق السطوح مجهّزْ وكاينة معاه كوزينة ومرحاض وماكاين كاعْ اللي غادي يْبرزطني .لكرى ديالو يا الله 150 درهم.الصراحة عرض مغري .وافقت بدون تردد .عرفتو علاش ؟ انا متزوج وخاصني التيقار وما عندي لا مع قْصايرْ ولا نشاط .خويا بلخضر واخّا انه رجل معقول راه يبقى ديما زوفْري .ما غاديش نتفاهم معاه.اوى من الاحسن نبقى بعيد عليه.
لكن من بعد بان باللي كنت غير كنخرْمزْ.
فالبداية لقيت داك الشي رائع.اصحاب الدار تْهلّاوْ فيا مزيان.تصوْرو تقريبا لعشى ديما مضمون وحتى لغْدى.يعني خوكم بْقى عاطيها لْبانْكسْ سيتي.(فابور)
ولكن هاد الفابور راه موراه شي حاجة من بعد بانتْ.مولات الدار عندها ولد وبنت بغاتْ خوكم الحوميدي يْراجع معاهوم .شوفو هاد الناس شْحال حيلييّينْ (عندهوم الحيلة).شافو انّ الى الولد والبنت دارو الدعم غادي بالْقَلّى غادي تتْقام عليهوم واحد 400 درهم.دابا مع خوكم الكامبو اللي هو أنا غادي ولادهوم يستافدو بالدعم ومن الفوق رابحين 150 درهم .
ما عقت بداك الشي حتى دازْ شهر أكتوبر.هي هاديك قلّبْتْ على لكرى وما لْقيتْ غير مع خونا بالله عبد الله.
فْديك لوقيتة كان بلخضر شدْ واحد الكارسونْييرْ مع عبد الحي ...إيه كيف ما قْريتو مع داكْ الهرّابْ.شوفو لعجب وخّا كان لْاعبْ معنا طومْ وجيري ها بلخضر عاود تاني سكْنو مْعاهْ.ولكن ما عندو ما يْديرْ حيتْ حتى أنا راني خْويتْ بيهْ.
يا خّوتي بنادم واعرْ مَنّي وجْبدْ.
المهم ندمت على فراقي مع بلخضر والحمد لله العام الثالث سكنت معاه وماشي العام الرابع حتى الخامس والسادس ....يعني تقريبا حتى 2005 العام اللي انتاقلتْ فيه لمدينة وجدة.خويا بلخضر باقي شاد هاديك الدار ولكن ساكن غير بوحديتو فْهادْ الساعة
حتى هو سْكن معاه خونا بالله عبد الله .من بعد اعتارف لي بأنّ السيد طبعو واعر ولكن الحكمة ديال بلخضر هي اللي غلباتْ.
المهم مول الدار مينْ عْرف باللي غادي نسكن عندو وبعد ما عْرفْ باللي حْنا ناس معقولين، قرّرْ باش شهر يوليوز وغشت ما نبقاوشْ نخلصو لكرى والدار راها ديالنا العام كلّو.
حْمدناكْ وشكرناكْ يا ربي
العشرة مع لخضر مثالية .هاد السيد ما يغضب ، ما يتقلّق.اللي درْتيها مْعاهْ يْجاوبكْ : هي هاديكْ
باشْ تعرفو مزيان خويا بلخضر كنت كنْوجّدْ لغدى ، هو مسكين يمشي يجْري للحانوت باش يشري الخبز ومونادى والدّيسيرْ (الفواكه)
فْلعشية ديما عارضْ علي نتْعشّاوْ بالكفتة.كان والشهادة لله كْريمْ.
لمّاعن (الاواني المنزلية) ما كانشْ يْخلّيني نغْسلهوم.كان يقولْ لي : باراكا عليك غير الطْيابْ.حشومة
من الصفات الحميدة ديال لخضر انّه ما كينْفعلْشْ على شي حاجة عادية.مثلا الى هرّسْتْ لو شي طبسي أو كاس ، عْرفتو آشْ يْرَدْ علي ؟ اوّلا يضحك ويقول لي : باراك الله فيك أسّي عبد الحميد ، هداك الكاس كان طالع ليا فالراس والله الى راك هنّيتي منّو
لخضر راه كنز ما يعرفو غير اللي سْكنْ معاهْ




هذا المساء مع الجزء الخامس وذكرياتي مع خويا بلخضر
 

عبدالخالق الكوتاري

::مراقب مغربي ::
طاقم الإدارة

غير متصل
#53
رد: قصة بالدارجة المغربية : مذكرات معلم في المدينة

برارو عليك قصص واعرين عشت حياة رائعة مح لا ما جاوبتش في الاول حت الامتحانات
أهلا خويا ‏ouss‏ وعواشير مباركة بالنجاح والتفوق ان شاء الله خويا راك باقي ماشتي والو را هاذ السي حوميدي تبارك الله عليه بحال المغناطيس بكلامو وكتابتو ولبغيتي كاع تزيد تشوف سير ضرب ليك شي دويرة على قصصو بالفرنسية و غادي تستمتع ولكن قبل من هاد الشي تسنى !! را حنا مع الحلقة الجديدة!! هاد العشية !!!!...
تحية للسي بوشعيب اللي حتا هو وخا ماشي بطل فالقصة الا انو استاذ وعاش ربما نفس السيرة.‏‎
 

عبدالخالق الكوتاري

::مراقب مغربي ::
طاقم الإدارة

غير متصل
#54
رد: قصة بالدارجة المغربية : مذكرات معلم في المدينة

تحية لسي بلخضر وتحية لكل متواضع طيب حقا كان ليك سند كبير أخويا حميد وصحبتو زوينة وبحال هاد الناس مبقاوش ماشي بحال هادوك خوتنا فالله لي جاورتيهم من قبل
 

Houmidi59

::الفارس المغربي ::

غير متصل
#55
رد: قصة بالدارجة المغربية : مذكرات معلم في المدينة

الحلقة 28 من مدكرات حوميدي مع المستوى الثالث
الجزء الخامس :العشرة مع خويا بلخضر وعبد الحي(3)

تعاشرْتْ مع خويا بلخضر تقريبا 8 ديال السنوات.ماعمرو ما تخاصمنا او وْقع بيناتنا شي سوء تفاهم .هاد بلخضر راه حكيم كبير .انا يْبانْ ليا هاداك كونفوشيوس يقدر يتخاصم معاك الى عاشرتيه شي مدة طويلة.يمكن يجْبَدْ البوشِيَهْ (سكين كبير).واحد النهار من أيامات الله قلت لخويا بلخضر :
_ خويا لخضر هادي 5 سنين وْأنا متْعاشرْ مْعاكْ ما عمْرو ما تْخاصمنا.أنا راه جاني لعْجبْ
رد علي ديما مبتسم : واشْ أخويا حميد باغي تتْخاصم مْعايا ؟
_ حاشا أخويا ولكن انا مسْتغربْ
_ عندك الحق حيت ما عمرو وقْعاتْ ليكْ ، ياكْ ؟
_ اوى لكدوب على الله حرام. زعما آشْ هو السر ؟ ..الى زعما كاين شي سرْ
_ كاين السر
_ أتيني بيه خويا لخضر
فعلا أخّوتي كاين السر وما يْطيحشْ على البال. السر هو : المرميطة (الطنجرة)
سمعو مزيان لكلام ديال لحكيم بلخضر : الى باغي دغيا تتخاصم مع شي حد اوى تقاسم معاه المرميطة.
خويا بلخضر انسان عظيم ومثقف .فالنقاشات عندو ما يقول ولكن خْسارة ما يْصلّيشْ.
كان ديما كيقول لي : هاد الناس اللي ديما يَدْهومْ فالما غير المنافقين .
فالحقيقة عندو الحق ولكن هدا ما يعْفي أي واحد باشْ ما يصْليشْ.
على دكْر الصلاة، كنت بعض المرات كنْصلّي فالدار.هو لاحظها .قال لي : أنت إنسان معتدل .سوَّلتو : عْلاشْ ؟ ردْ علي : حيتْ أنت كتفهم مزيان فالدين.
انا الصراحة فاللّوّلْ ما فهمت والو.من بعد شْرح لي المقصود من كلامو : شوف أخويا حميد الدين ديالنا دين يسر ما شي عسر .انت مثلا كتْصلّي بعض المرات فالدار.أنا عارف علاش؟ راه ما عندكش الوقت باش تمشي للجامع.شوف أنت خارج مع الطْناشْ ، واصل للدار مع الطناش والنّصْ.وخاصّك تْوجَّد ماتاكول ، راه الى مشيتي للمسجد عنداك 30 دقيقة باش تمشي وترجع .يعني ما غاديش تتغدى وانت خاصك تخرج مع الوحدة والنّصْ باش تمشي تخدم.انت سّي حميد انسان معتدل وكتفكّر فالدنيا والآخرة.
شفتو خويا بلخضر ديما حكيم .هنا راه مفتي بامتياز.
من بعد كل واحد فينا جاب تلفزة .لا ماشي باش نتفرجو الاخبار.جبناها باش نلعبو الألعاب .الصراحة شحال من لعبة صعيبة ساليناها حتى للنهاية .كانت ديك لوقيتة اللعبة الشهيرة النينْتانْدو والسيغا.خوكم بالله اللي هو أنا وبلخضر كنا بعض المرات نْجيبو الصباح.
على كل حال دازت أيامات ماندمناش عليها .




يتبع هذا المساء حلقة ممتازة

الجزء الأول : حتى المدير الجديد راه يْقلّبْ على جْوى منجلْ

الجزء الثاني : واحد لْزيرو ، مازال ما بْغى يحْشمْ



الجزء الثالث : عاود تاني رْجعْ لْطبيعتو اللّولى

 

Houmidi59

::الفارس المغربي ::

غير متصل
#56
رد: قصة بالدارجة المغربية : مذكرات معلم في المدينة

[font=&quot]

[/font]
[font=&quot]حلقة ممتازة[/font]
[font=&quot]
[/font]
[font=&quot]الحلقة[/font][font=&quot] 29[/font][font=&quot]:[/font][font=&quot]مذكرات معلم في العالم الحضري[/font][font=&quot]

[/font]
[font=&quot]الجزء الأول[/font][font=&quot] : [/font][font=&quot]حتى المدير الجديد راه يْقلّبْ على جْوى منجلْ[/font][font=&quot]
[/font]
[font=&quot]
[/font]
[font=&quot]نرجع للمستوى الثالث ديالي وبالضبط في آخر عام ديالي في تاوريرت .هداك العام كان فيه شوية المشاحنات مع الإدارة .تصورو يا الله فاشْ دْخلنا ، قال لي المدير : راني غيّرْتْ لك المستوى .غادي تْشدْ الخامس[/font][font=&quot].
[/font]
[font=&quot]هاد خونا بالله دارْ داكْ الشّي بْلا ما يْشاورني.المشكل شي جوج أخْرين دارْ مْعاهوم نفس الشّي.واحد المعلمة غيّرْ ليها المستوى الأول بالرابع ومعلم اللي كان عندو الرابع أعْطاه الأول.هادو بعدا بان باللي يمكن غير بيناتهوم يتفاهمو وكل واحد فيهوم يرجع لْقسمو.المشكل هو أنا .خاصني بعدا نعرف شْكون اللي خْدى ليا المستوى ديالي.دغيا لقيتو واحد المعلم لاعبها كبير فالمدرسة.لا خدمة من غير الدوران فالساحة .حيت هو بركاكْ ديال الإدارة [/font][font=&quot].[/font][font=&quot]اوى راكو عارفين الشغل[/font][font=&quot] .
[/font]
[font=&quot]شفت فالمدير وقلت لو : آشْ ضْهرْ لك ؟ ما غاديشْ نْقرّي الخامس[/font][font=&quot]
_ [/font]
[font=&quot]غادي تْقريهْ بالسيفْ عليكْ[/font][font=&quot]
_ [/font]
[font=&quot]بالسيف ؟ شوف أسّي ، حْنا مفتشين وبغْينا نضّرْبوهوم ماشي معى مدير اللي غادي نْحيرْ[/font][font=&quot]
_ [/font]
[font=&quot]انا راني الرئيس ديالك المباشر وعندي كامل الصلاحية باش نسند لك القسم اللي يصلح ليكْ[/font][font=&quot]
_ [/font]
[font=&quot]واخّا .وعلاشْ غيّرتي لي الثالث ديالي .واش كنْبانْ ليكْ ماشي كفؤْ فالثالث ؟[/font][font=&quot]
_ [/font]
[font=&quot]شوف أنت كتستعمل لعصا مع التلاميد [/font][font=&quot]
_ [/font]
[font=&quot]تبارك الله زعما الى شدّيت الخامس ما غاديش نضرب التلاميد[/font][font=&quot]
_ [/font]
[font=&quot]ماشي هكْدا[/font][font=&quot] .
_ [/font]
[font=&quot]فهّمْنا الله يرحم الوالدين[/font][font=&quot]
_ [/font]
[font=&quot]هادو بعدا الى ضْربتيهوم ما يتْقسْحوشْ[/font][font=&quot]
_ [/font]
[font=&quot]اوى منطيقْ عندك أخويا .واخّا .واحد المعلم فالمستوى الأول كيْعصّي مزيان التلاميد ديالو ، عْلاشْ هاداك ما غيّرتيلوشْ المستوى ؟[/font][font=&quot]
_ [/font]
[font=&quot]ماشي شغلك[/font][font=&quot]
_ [/font]
[font=&quot]حتى انت ماشي شغلك فيا أنا[/font][font=&quot]
_ [/font]
[font=&quot]بالعكس انا كنحكم فيك[/font][font=&quot]
_ [/font]
[font=&quot]اوى أجي أحكم فيا الى قْدرتي [/font][font=&quot]
_ [/font]
[font=&quot]غادي نكتب بيك [/font][font=&quot]
_ [/font]
[font=&quot]مسكين اكتب حتى تشبع .انا ما نْخاف حتى من واحد وخّا يكون النائب او الوزيرْ.زعما غادي يقطع لي راسي[/font][font=&quot].
[/font]
[font=&quot]المهم هداك النهار كان غير التوقيع. فالغد ليه مْشى معايا خويا بلخضر للنيابة اللي رجعات في تاوريرت. الحمد لله خوكم معروف بالنيابة ، معروف بالجدية ديالو ولقراية والنتائج اللي كيحصل عليها في آخر السنة[/font][font=&quot].
[/font]
[font=&quot]أغلب الموظفين كانو أولادهوم أو بناتهوم قْراوْ عندي.كولهوم قالو لي : بقى تابت فالموقف ديالك ، حْنا مساندينك[/font][font=&quot].
[/font]
[font=&quot]هي هاديك مْشيت عند المفتش ديال الفرنسية.هاد المفتش كيحتارمني مزيان.تصورو يا الله فتّشْني مرة وحدة ؛ من بعد مين يْجي غير يْوقع لي المدكرة ويكتب ليا تقرير ديال التفتيش[/font][font=&quot].
[/font]
[font=&quot]لقيتو فالمكتب ديالو .حْكيتْ لو اللي واقع.فالأول قال لي راه عندو الحق ولكن مع الإصرار ديالي اعطاني واحد النصيحة هي اللي درْتها[/font][font=&quot].
[/font]
[font=&quot]النصيحة ديالو وهو غادي نْشدْ المستوى ولكن نبقى النهار كامل مْرَيّحْ مع راسي .ما نْديرْ والو.خونا بالله اللي هو المدير غادي يْشوف اللي كاين .آشْ غادي يديرْ .يْجيبْ لي المفتش .اوى المفتش غادي يقول لو هادا راه ما يصلاحْشْ ليه الخامس ، رد لو الثالث ديالو[/font][font=&quot]
[/font]
[font=&quot]خوكم الحوميدي استقبل الثلامد ديال الخامس.ما بْغى يعطيهوم لا أدوات لا حتى شي حاجة.دازت 3 أيام وخوكم ديما داير رجل على رجل يقرى شي قصة.التلاميد مين شافوني مادّايْهاشْ فيهوم ، نَوْضو الفوضى.المدير سمع لغوات ولمدابزة عندي وقال لي (زعفان) : استاد الله يخليك ضْبطْ شوية القسم ديالك[/font][font=&quot]
[/font]
[font=&quot]ردّيتْ عليه: شوف معاهوم أنت .هادو ماشي تْلامدي .انا راني غير مْقابلْهوم حتى يْجي المفتش [/font][font=&quot]
_ [/font]
[font=&quot]اوى غادي نْعيّطْ لو دابا[/font][font=&quot]
_ [/font]
[font=&quot]بارك الله فيك .سيرْ دغيا راه فقهوة صابرين [/font][font=&quot]
[/font]
[font=&quot]خونا بالله فعلا عيّطْ على المفتش.المفتش ما ضارشْ بيا.شي شوية جا عندي وقال لي : غادي ترجع للقسم ديالك الثالث[/font][font=&quot]
[/font]
[font=&quot]ضْحكت وقلت لو : كان عليك ما دّيرشْ العيبْ[/font][font=&quot]
[/font]
[font=&quot]آه نسيت ما قلتش ليكوم : خونا بالله اللي شد المستوى الثالث جا زعما لعندي وقال لي : استاد الله يْخلّيك اعطيني التحاضير ديالك[/font][font=&quot]
[/font]
[font=&quot]طبعا جاوبتو : ياكْ ما انت حْمقْ؟ نحرقهوم ويمكن نعطيهوم لْشي اسرائيلي وانت والله ما تْشوفهوم[/font][font=&quot].



[/font]
[font=&quot]الجزء الثاني[/font][font=&quot] :[/font][font=&quot]واحد لْزيرو ، مازال ما بْغى يحْشمْ[/font][font=&quot]

[/font]
[font=&quot]بعدما انتصرت على خونا بالله ورجعت للمستوى ديالي ، بقى حاضيني فكل صغيرة وكبيرة.مثلا الى ضربت شي تلميد زعما يبغي يديرْ لي المشاكيل.يجي عندي ويقول لي : أستاد راه الله يْخليك ممنوع الضرب[/font][font=&quot].
[/font]
[font=&quot]ممنوع لواهْ الطرح والقسمة.خوكم الحوميدي دابا عْرف هاد خونا بالله باللي ما فْيدّوشْ.بقيت على السياسة ديالي[/font][font=&quot] .
[/font]
[font=&quot]المهم واحد النهار 6 ديال التلميدات ماكانوش حفضو شي حاجة كنت طْلبْتها منهوم.الغريب فالأمر كانت بنتو تقرى عندي.شوفو التناقض .هو كيعرف باللي ما كاينش شي واحد فالثالث يقدر يْقرّي بْحالي ولكن بدّل ليا المستوى.ولكن انا بالمنطق ديالي عْرفت السبب.هاد خونا بالله كان باغي شي معلم يْزيدْ لبنتو النقط .المشكل المعلم اللي يمكن يتفاهم معاه هو هاد خونا بالله اللي سْبق قلت ليكوم هو البركاك ديالو[/font][font=&quot].
[/font]
[font=&quot]على كل حال كانت بنتو من التلميدات اللي ضْربْتْ[/font][font=&quot].
[/font]
[font=&quot]فالغدْ ليه، جا عندي نائب المدير عاطيني استفسار جاني من النيابة الموضوع ديالو استعمال العنف ضد التلاميد.غير قْريتْ المحتوى ، طْلعْ لي الدم [/font][font=&quot].[/font][font=&quot]مْشيتْ ديريكتْ للإدارة باشْ نخْلي دار بوهْ.مع هو قْليوَلْ كي المُشْ ، راني نقدر نْجيبْ لو التْمامْ[/font][font=&quot].
[/font]
[font=&quot]عندو الزهر ما كانش فالإدارة .رجعت للقسم وخرّجتْ التلامد ديال البارح اللي كنت عاقبتهوم[/font][font=&quot].
_ [/font]
[font=&quot]اوى هادوكْ بني كلبونْ، زعما باغيينْ تشكيوْ بيا[/font][font=&quot]
[/font]
[font=&quot]مساكن ب5 بيهوم بْداوْ يبْكيوْ : والله أأستاد ما شْكينا بيك.ياكْ كتضْربنا ديما[/font][font=&quot] ......
[/font]
[font=&quot]فعلا عندهوم الحق .هي هاديك بانت لي بنت المدير حادْرة راسها [/font][font=&quot]
_ [/font]
[font=&quot]أجي ياديكْ لمسيخيطة .أنت مولاتْ الفعلة.اعتارفي ولّا داك الشّي اللي كنت غادي نْديرو مع أبّاكْ غادي تْخلْصيهْ[/font][font=&quot]
[/font]
[font=&quot]اللي كان هو أنها حْكاتْ لي كولشي : اوى خونا بالله شافها تبكي ، هي قالت لو راه ضْربني الأستاد.زادْ تْباحتْ مْعاها.شكون ضْربْ من غيركْ؟ أعْطاتو السْميَاتْ ديال التلاميد.هو زعما ذكي باش ما يتَّفْضاحْشْ راسل النيابة باللي 5 ديال الآباء جاوْ يتْشكّاوْ منّي.النيابة صيفطو لي هاد الاستفسار[/font][font=&quot].
[/font]
[font=&quot]لعشية مْشيت للنيابة ديما مع خويا بلخضر.استقبلنا واحد المسؤول كبير .غير شاف الورقة ، بْدى يضحك وقال لينا : النيابة ما كترسلش بْحالْ هاد الاستفسارات [/font][font=&quot]
_ [/font]
[font=&quot]كيفاش زعما ؟ قالو بلخضر [/font][font=&quot]
_ [/font]
[font=&quot]هادا المدير هو اللي كتبها ويمكن يعرف شي واحد دار ليها الكاشي (الطابع[/font][font=&quot]) [/font][font=&quot]باش تْبانْ إدارية.هدا باغي يخّلْعك .هاد الشّي اللي كاين.شوفو مزيان ما كاينش رقم الارسال الالي من المفروض يكون فكل مراسلة نيابية[/font][font=&quot].
_ [/font]
[font=&quot]انا خاصني نشكي بيه[/font][font=&quot]
_ [/font]
[font=&quot]شوف أأستاد انت معروف عندنا بالجدية .ما تْوسّخ راسك مع هاد المدير[/font][font=&quot]
_ [/font]
[font=&quot]اوى المعمول ؟[/font][font=&quot]
_ [/font]
[font=&quot]دير شغلك كيف مْوالفْ[/font][font=&quot]
_ [/font]
[font=&quot]بارك الله فيكْ[/font][font=&quot]


[/font]
[font=&quot]الجزء الثالث[/font][font=&quot] : [/font][font=&quot]عاود تاني رْجعْ لْطبيعتو اللّولى[/font][font=&quot]
[/font]
[font=&quot]

[/font]
[font=&quot]المهم خونا بالله ما بقاشْ يْبانْ تقريبا.واحد النهار تْلاقيتْ بيه فالساحة وقلت لو : الله يرحم الوالدين أدّي علي بنتك لْشي قسم آخور [/font][font=&quot]
_ [/font]
[font=&quot]هي اللي ما تْعاودشْ[/font][font=&quot]
[/font]
[font=&quot]المشكل أن بنتو ما بغاتش تتبدّلْ .عْيى مْعاها أبّاها.من بعد جاوْ عندي المعلمين يْرغبوني .فاللّخّرْ خلّيتها عندي حتى نجحات للرابع[/font][font=&quot].
[/font]
[font=&quot]هاد خيْنا ماشي شرّاني هادا صهيوني .تصورو راحنا نْديرو توزيع الاقسام بالنسبة للسنة الموالية.عاود تاني أمام الملأ ، قال لي سّي عبد الحميد غادي تْشَدْ السادس .هاد المرة والله ما نتْراجع فيها[/font][font=&quot]
[/font]
[font=&quot]خوكم أكتر منّو ، رد عليه : والله ما نْشدْ ليك السادس واخا تعطيني 100 مليون [/font][font=&quot]
_ [/font]
[font=&quot]والله حتى تْشدّو [/font][font=&quot]
_ [/font]
[font=&quot]أنت واحد الظالم كبير كانت تْبانْ لي ندخل عليك الحبس ولكن ما تستاهلش[/font][font=&quot]
_ [/font]
[font=&quot]بزاف عْليكْ[/font][font=&quot]
_ [/font]
[font=&quot]عندك الحق انا داعيك لله .ربّي غادي يستاجب ليك انا غادي نْخليلك ماشي غير السادس المستويات ديالك كاملة رْبحْ بيهوم[/font][font=&quot].
[/font]
[font=&quot]جاتْ العطلة وجْمعت حْوايجي كي العادة وخَلّيتهوم عند الحارس ديال المدرسة[/font][font=&quot].
[/font]
[font=&quot]سبحان الله العظيم كنت فواحد العرس ديال واحد الصديق ديالنا.كان معايا بلخضر.شي شوية صونا التليفون ديالي .الزوجة ديالي قالت لي : حميد مبروك عليك الانتقال راك انتقلت لشي مجموعة مدرسية فوجدة[/font][font=&quot].
[/font]
[font=&quot]آه يا خّوتي فديك لوقيتة تفكّرْت داك عدو الله وحْمدت الله وشكرتو مين عْرفت بأن الله راه استاجب لي[/font][font=&quot].
[/font]
[font=&quot]فأواخلر غشت مْشيت للمدرسة وخْديتْ حْوايجي من المدرسة .خونا بالله جا زعما يْبارك لي ، قلت لو : اوى سير شوف اللي يْشَدْ ليك السادسْ[/font][font=&quot]
[/font]
[font=&quot]من داك النهار مين نتلاقى بيه نْديرْ لو سلام باردْ[/font][font=&quot]


[/font]
[font=&quot]غدا مع الحلقة 30 من مذكرات معلم في المدينة [/font][font=&quot]
[/font]
[font=&quot]الجزء الأول[/font][font=&quot] :[/font][font=&quot]حوميدي وعلاقته بالمديرين[/font][font=&quot]
[/font]
[font=&quot]الجزء الثاني[/font][font=&quot] : [/font][font=&quot]حوميدي وعلاقتة بالمعلمين والآباء [/font]
[font=&quot]
[/font]
 

Houmidi59

::الفارس المغربي ::

غير متصل
#57
رد: قصة بالدارجة المغربية : مذكرات معلم في المدينة

[font=&quot]
[/font]
[font=&quot]الحلقة 30 من مذكرات معلم في المدينة [/font]
[font=&quot]الجزء الأول[/font][font=&quot] :[/font][font=&quot]حوميدي وعلاقته بالمديرين[/font]
[font=&quot]طيلة تواجدي عاشرْت مجموعة من المديرين وتعرّفتْ على مجموعة أخرى.بالنسبة اللي خْدمت معاهوم فالمدرسة كولهوم كيعتارفو بالكفاءة والجدية ديالي .الحمد لله هادي نقطة حسنة .ولكن شي وحدين وقعو لي معاهوم مشاكل بحال داك خونا بالله اللي بْغى يْغيّر ليا المستوى ديالي بلا الرغبة ديالي.[/font]
[font=&quot]المدير الأول هادا وجدي حر .الصراحة تقال ، كان الله يرحمو رجل طيب وقلبو ابيض.كان واخّا ينفعل ولكن دغيا يبرد.تقدرو تْقولو ما عمرو ما ضرْ شي حدْ واخّا يكون الاستاد بازلْها (داير فالْطة كبيرة).انا بْداتي وقعو ليا معاه شي فْلاشاتْ صغار ولكن دغيا خونا بالله يرجع لعندي ويطلب مني المسامحة.[/font]
[font=&quot]المدير الثاني هادا كان الصراحة إداري بمعنى الكلمة.ما يتقلّق ما يزعف.ولكن ديما الستيلو فاليد.واخّا هكدا حتى هو لحد الساعة ما كتب حتى بْشي واحد .هدا من المديرين اللي كانو تقريبا يختارو التلاميد المجهدين حيت كان يعرف مزيان القدرات والمؤهلات ديالي.صراحة كنت شي وقيتات نحشم مين نشوف باللي اللبْ ديال التلاميد عندي في حين الكورفي (التلاميد الكسالى ) فالافواج الأخرى.[/font]
[font=&quot]من بعد رجعات عندي عادية مين لاحظت واحد الحاجة مهمة: تصورو أن هاد التلاميد المجتهدين ما جاوش عندي صدفة .القضية فيها إنَّ.هاد الشرح قالو لي المدير سّي حمّو (الله يدكرو بخير) : سّي عبد الحميد ما عندك لاشْ تْقلّق من جهة المستويات ديال الثالث.راه هاد التلاميد هوما اللي طالبين ينتاقلو عندك على حقّاش المعلمات ديالهوم ما يخّدموش معاهوم بالعكس كيستغلّوهوم باش هوما يْقرّيوْ التلاميد الكسالى.اوى السّي عبد الحميد التلامد اللي راني نجيبْ لك هوما اللي باغيين يْجيوْ عندك.[/font]
[font=&quot]المدير الثالث هو هاد عدو الله اللي تكلمت ليكوم عليه.الصراحة تقال هادا يضحك لك ولكن عالم الله آش في قلبو.هدا يمكن يكتب بأي واحد والدليل راه كتب بيا ولكن ما قْضى والو.[/font]
[font=&quot]المديرين اللي تْعارفت معاهوم كولهوم الله يعمّرها دار.[/font]
[font=&quot]واحد المدير تْعرّّفْت عليه مين كان معلم في وجدة.هي هاديك طلب الإدارة وْجاتو في تاوريرت.كنت كل مرة كنْزورو فالمدرسة ديالو.هدا انسان مثقف وواعي وعندو الإجازة.تصورو كان يدخل للقسم ديال شي استاد يْشوف شي دفاتر أو يسمع لْشي أجوبة .من بعد يمشي للمكتب ديالو .شي شوية يرجع جايب معاه شي كتب او أقلام يوزّعها على التلاميد اللي بانو لو نجباء ومجدين.[/font]
[font=&quot]كاين واحد المدير أصلو من الراشدية .فالعام الأول اللي جا فيه لتاوريرت ، مات ولدو اللي عمرو 18 سنة.الغريب فالأمر هاد الولد هو اللي أكّدْ على أبّاه باش يْعمّرْ فطلبات الانتقال مدينة تاوريت.سبحان الله العظيم الموت كانت باغياه يْجي لمدينة 44 ولي باش يتدْفنْ فيها.مْشيتْ لعندو للدار باشْ نْعزّيه فالمصاب الجلل ، هي هاديك ولّينا اصدقاء.هادا المدير الوحيد اللي كنا نتبادلو الزيارات بيناتنا : مرّة نتعشى عندو انا والزوجة ديالي ومرّة هو اللي يْجي لعندي يتغدّى مع العائلة ديالو.[/font]
[font=&quot]كنت نمشي عندو للمدرسة حيت كانو جوج أساتدة أصحابي ولكن من بعد بْقيتْ نمشي لعندو فالإدارة.هي هاديك يقول لي : سير أسّي حميد شوف أصحابك أنا غادي نمشي للدار باش يْوجْدو لينا شي برّاد أتاي مع الحرشة.[/font]
[font=&quot]فعلا نطْلع عند أصحابي (الطابق الأول) نبقا مْعاهوم تقريبا نصْ ساعة.من بعد نرجع للإدارة ، نلقى البراد والحرشة كايْسايْنوني.[/font]
[font=&quot]كاين المدير اللي كْرى لينا الدار .هدا شوية تابع لفرنك ولكن فيه شوية الانسانية [/font]
[font=&quot]كاين مدير آخور هدا تعرّفتْ عليه فواحد السْطاج .هدا مدير جد متواضع.يْجي للمدرسة فالصباح بكري ، ماشي باش يحضي المعلمين والمعلمات ...حاشا هدا كيبغي الخدمة.غير يوصل يلبس الكسوة ديال الخدمة ويمشي للجرْدةْ باش يحلّقْ عليها.خونا بالله عزيز عليه النباتات.تصورو المدرسة ديالو جنّة.[/font]
[font=&quot]الجزء الثاني[/font][font=&quot] : [/font][font=&quot]حوميدي وعلاقتة بالمعلمين والآباء [/font]
[font=&quot]علاقتي بالمعلمين من بكري دائما كانت مزيانة.انا من طبعي مسالم ما عمرو ما تْعدّيتْ على شي واحد.الحمد لله من غير خونا بالله اللي كان باغي يهْرفْ لي على 300 درهم خوكم الحوميدي ديما بخير مع المعلمين والمعلمات[/font]
[font=&quot]بالنسبة للمعلمات كانو سبحان الله العظيم كيْثيقو فيا وما يْثيقوش فالمعلمين.مين يحتاجو شي حاجة انا اللي يطلبو .المهم الحوميدي كان ديما رهن إشارة المعلمات ..آه من غير هاديك اللفعة اللي تكلمت ليكوم عليها.[/font]
[font=&quot]من المعلمين اللي صراحة عْزازْ علي صاحبي عبد الكريم وصاحبي التيجيني وسّي لمفضل (الله يرحمو) وسّي بنوضن (الله يرحمو).هادو هوما الاصدقاء ديالي اللي كنت نتمشى معاهوم بزاف[/font]
[font=&quot]بالطبع ما ننْساشْ صاحبي بلخضر .هدا راه صاحبي وعْشيري.[/font]
[font=&quot]كان واحد الأستاد للأسف ما عنديش الاسم ديالو ولكن صاحبي بلخضر كان يْعيّطْ لو "عْزيزي" على ودّاشْ خونا بالله دائما فالكلام ديالو يستعمل لفظة عْزيزي[/font]
[font=&quot]هاد عزيزي كان يعرض علينا فالقهوة ويخلّص واخا نكونو 10 ديال الناس .كان كريم حتى مع الكارسون ديال القهوة.تصورو كان يعطيه 5 ديال الدراهم والقهوة يا الله ثمانْها 4 ديال الدراهم.[/font]
[font=&quot]المعلمين عامة يستعْرْفو بالقدرات ديالي لهادا كانو يْجيبو اولادهوم باش يقراوْ عندي.على كل حال ما زال عندي علاقات مع هاد المعلمين.فالأعياد والمناسبات كنتاصل بيهم او الى جاتْ لوْجيبة لتاوريرت نْزورهوم لإحياء صلة الرحم [/font]
[font=&quot]مع الآباء كانت علاقة كلها احترام واعجاب.شي مرات راني فالسوق نشري شي حاجة .يا الله فاش نبغي نْخلّصْ ، نسمع شي واحد يقول لي : والله ما تدفع دورو واحد .انا اللي نخلّصْ.[/font]
[font=&quot]القهوة تقريبا نادرا فاش كنت نخلّص داك الشي اللي شْربتْ.ديما الكارسون يقول لي راه شي واحد خلّص المشروب ديالك .شكون ؟ الله أعلم.[/font]
[font=&quot]من الآباء اللي كانت بيني وبينهوم علاقة أب كان هو المدير ديال اتصالات المغرب بتاوريرت.هدا كنت نْزورو فالمكتب ديالو .ديما خارج من عندو يدّي عامرين : ها المجلدات ، ها الأقلام الرفيعة، ها الكادوات ومن الفوق ديما شارب عصير مع حلوى ممتازة.[/font]
[font=&quot]كان واحد الأب خدام في البريد .هادا ما عمّرْني خلَّصْت المكالمات ديالي مع العائلة ديالي لا بوجدة ولا بالرباط.[/font]
[font=&quot]كاين واحد الطبيب حتى هو صاحبي وكان قرا عندي ولدو .هدا الشواهد الطبية كاعْ ما نْخمّمْشْ.وقتاش ما بغيت شي رخصة غير نطلب.[/font]
[font=&quot]الصراحة انا كنحمد الله اللي كانت علاقتي مع ناس تاوريرت مزيانة والحمد لله مرة ثانية ما درت عيب حتى مع شي واحد [/font]
[font=&quot]غدا إن شاء الله الحلقة 31 وعودة الى ذكرياتي مع أخي جمال الدين وسفري الثاني الى فرنسا[/font]
[font=&quot]
[/font]
 

Houmidi59

::الفارس المغربي ::

غير متصل
#59
رد: قصة بالدارجة المغربية : مذكرات معلم في المدينة

الحلقة 31 : ذكرياتي مع أخي جمال

الجزء العاشر : حوميدي فالسبيطارْ

ماسْخيتش بهاد لبلاد ولكن لابد من الرجوع .طبعا جبت معايا الموعد على ود العملية ديال زرع المخ. الموعد كان فالبداية ديال أبريل ، يعني فالعطلة الربيعية.
خوكم الحوميدي تْوَكّل على الله ورْكب فالطيارة اللي دّاتو لباريس.فالمطار لْقيتْ نْسيبي عبد الحفيظ .هو اللي استقبلني ومْشينا للدار ديالو اللي كتوْجد بسانْ دونيزْ.يا الله فاش وصلت اتصلنا بخالي بوزيان اللي قال لي راه غدّا خاصني نْكون فالسبيطار مع ديكْ التمنية والنّصْ.ديك الليلة نْعستْ بكري.ما عرفتش علاش ولكن حسّيتْ بالخوف.واه الحوميدي خوّاف ؟ الصراحة الانسان مين يمشي بْرجليه لْشي عملية باقية فالتجريب راه بْحال الى يغامر ولكن خاص الانسان يْديرْ فبالو باللي الأعمار راها بيد الله.فعلا قريت شوية قرآن وْحسيتْ بالطمأنينة ؛ هي هاديك نْعسْتْ.مين فقْتْ كانتْ الساعة السبعة ديال الصباح.فْطرْتْ ولكن كاس قهوة بالحليب سيكْ يعني بلا خبز أو كاطو.خوكم الشهية مْشات لو.
عبد الحفيظ وصّلني لسْبيطار.فالطريق ما بغاشْ يتكلم معايا فالموضوعْ وفالحقيقة دارها مزيانة.
فالسبيطار سان لويس ، كان خالي ينتظرني .غير سلّمتْ عليه ، قال لي : يا الله نمشيوْ نْشوفو خوك جمال.
طْلعنا لطّابق الخامس فين هو موجود .سبحان الله تْغيّر .المنظر ديالو صعيب نحكيه ليكوم .خويا جمال ارجع قْرع بحال كوجاك ولكن هو زايد عليه حتى الشْفارْ ديال عينيه ما كاينينْشْ.وجهو الله يستر ارْجع ابيضْ حيتْ الدم ما بقالوشْ في وجهو.
مسكين الله يرحمو غير شافني فْرحْ وقال لي : كنت خايف الى ما تْجيشْ لفرنسا
_ علاش أخويا ؟ كون بْغيتْ ما نْجيشْ غادي فالسفر الأول ما نمْشيشْ
_ عندك الحق ولكن الشيطان يوسوس لْبنادم شي مرّاتْ.
بعدها قلبنا الموضوع وسوّلني على الوليد والوليدة والإخوة والأخوات .قلت لو : راهوم بخير ولكن باقيين حايرين عليك.
هي هاديك جات الدكتورة وقالت لي : ميسيو عبد الحميد خاصّك تمشي باش تسجل حيت من دابا غادي تنعس هنا.
فعلا مشينا ونزلنا لتحت.بعد التسجيلات ، جات واحد الممرضة وركْباتني فكرّوسة باش زعما توصّلني للحجرة ديالي.خوكم الحوميدي ما مْوالف مع هاد لعجب : واه انا بْرجْليا وهاد خوتنا بالله دايرة لي نينّي يا مّومّو .خالي بقى يضحك مين شاف هاد المنظر : اوى سعداتك أولدي حميد .هاهوما من اللّول مْهلْيينْ فيكْ
_ واه أخالي ولكن الى بغيتي تْشدْ بلاصْتي ما كاين مشكل.
_ آه يا ودّي أنا ما قادْ على عمليات
الممرضة دخلاتني فواحد البيت يا الله فيه جوج ديال الناس : واحد الرجل كبير فالسن ناعس وواحد الشاب .البيت تبارك الله كبير ماشي بحال هادو اللي عندنا فالمغرب.الناموسية باقية جديدة امّا لفراشْ فيه ريحة الورد والياسمين.
من بعد جابت لي شي مجلات وكتب باش زعما نقرى ، واعْطاتني التيليكوموند باش نتفرج فالتلفزة .شفتو يا المساخيط هاد البيت فيها 3 ديال التلفزات .راه كل واحد والتلفزة ديالو .امّا الاداعات تعيى ما تقلّب راهوم ما يْساليوْشْ.راني كنتكلم على 1990 .كان باقي البارابول ما ضْهرْ.
المهم خالي بوزيان وعبد الحفيظ مْشاوْ في حالاتهوم بعدما سوْلوني واشْ يمكن يْجيبو ليا غدّا .ردّيتْ عليهوم : ما خاصْني والو .
شي شوية جات الممرضة وجابت لي التليفون وقالت لي الى باغي شي مكالمة ففرنسا يمكن ليك تتكلم ديريكت والى باغي تتكلم مع الخارج خاصك تتاصل بهاد الرقم ديال السْطانْدارْ ديال السبيطارْ.قلت ليها شكرا وهي كتبْتاسم ليا وقالت لي : انت زْوينْ .
آه يا خوتّي ما كْرهتشْ نكون خايبْ غير يبعْدوني من السبيطار.
تصورو هادا سبيطار فيه كولشي واخّا هكدا ما حاسْ بالراحة.دابا راني فْهمْت على السْبيطاراتْ ديال المغرب ما مْجهزينْشْ. اوى راه عندهوم الحق .راه بنادم مين يدخل لسْبيطار واش غادي تْبانْ لو شي تلفزة أو شي تيليفون أو شي ناموسية مريحة أو فرملية زوينة وحْنينة ...راها تكون شادّاتو الخلعة
حيتْ ما لْقيتْ ما نْديرْ ، قلت مع راسي نْشوف هاد لكتوب واشْ فيهوم.ما لْقيتْ غير لكدوب والمشكل كترة الاختراعات .زعما هادو مجلات علمية.
البرامج حتى هوما بانو لي سامْطينْ.
آشْ يمكن نْديرْ؟
حْنا لمغاربة فينا غير الحضْية.هي هاديك بْديتْ نْشوف فالشيباني حيت يمكن سمع الحسْ وْفاقْ من النعاسْ.شي شْوية خرّجْ شي قْريعة وبْدى يشْرب غير بالجغمة .
_ واشْ باغي تشرب شي شوية ؟
هدا الشيبوخ اللي تكلم معايا.
_ لا شكرا ما كنشربش الكحول
ضحك وبانو لي ما عندو سْنان : هادا ماشي شْرابْ .هدا اليكْسيرْ(élixir).
خوكم الحوميدي ما عندوش مع الشراب .هي هاديك قلت لو : هاد الإلكْسير راه فيه الكحول
المهم شاف فيا وهزْ راسو .فهمت باللي خونا بالله راه يقول لي : سيرْ تْنَبَّكْ مع راسكْ بالفرنسية (va te faire foutre)
غيّرت الوجهة ديالي لشّابْ.هاد خيْنا ما باين لا مريض لا صحيحْ.كان مْغطّي فلفراش بحال الى مسكين جاه البرد.آه نْسيتْ ما قلتش ليكوم راها البيت كليماتيزي.هنا تقدر تلبس تريكو عادي وتْحسْ بالدْفا.
شي شوية جات واحد الفرملية غليضة .الحمد لله ما جاتش عندي .مْشاتْ عند هداك الشاب .حيْدات لو لفراش.
آه يا ربي ، مسكين رجلو مقطوعين ! هزاتو ودّاتو معاها .ربما عندو شي حصة ديال العلاج.
دازت يمكن ساعة رجْعاتو لبْلاصتو وغطّاتو ومشاتْ في حالاتها.هي هاديكْ شافْ فيا مسكين وابتاسم وقال لي : بونسوارْ
خوكم الحوميدي شْحال تكلّم معاه ولكن ما عاقلش مزيان من غير أنه تْقاس بسرطان ودابا هاد المرض بْدى لو من رجليه .
الله يستر ويبقي الستر .
شي شوية جات الممرضة الزوينة ديالي .الى ما خفت نكدب سْميتها إيفْلينْ.قالت لي : أزْوين آشْ تحب تتعشى ؟
اعطاتني واحد لكتاب فيه يا الله جوج وراق .ما عليا غير نْكوشي(cocher) الماكلة اللي باغي.
المشكل هاد الماكلة ديال النصارى الاغلبية ديالها فيها الشْراب أو الحلّوف.ما عْرفت ما نختارْ.هي هاديك هاد الفرملية فهماتني وقالت لي : الى بغى الزوين انا غادي نختار لو لعشا ديالو .
اختارت لي شي ماكلات الروعة : شي حاجة بحال الصوبّة وشي حلوى ديال التفاح ..المهم شي حْوايج ديالْ كولْ واسْكتْ.
مع ديكْ العشرة ديال الليل جاوْ جوج فرمليات وركبوني فالكرّوسة .مْشاوْ بيا لواحد البيتْ.وحدة فيهوم قالت لي : حيّدْ الكسوة .
_ هاهي !
_ من فضلك حيّدْ كولشي
_ الشريفة واش راكي تهّضْري بْنيْتكْ ؟
الفرمليات ضحكو حتى بانو سْنانْهوم.وحدة فيهوم جاوباتني : ما تخافشْ !ما غاديش ناكلوكْ
_ يا الله تْجبدْ فلفراش غادي نْحَلْقو ليكْ
_ هنا غادي تكون العملية
دابا عاد فهمت .
من بعد خْداتْ لي الكسوة ديالي وْخبّاتها فواحد لخْزينة.
_ هاكْ لْبسْ هاد البينْوارْ!
ما عمرو شفتْ بحال هاد البينوار لونو خْضر مصاوَبْ بلوْرقْ
_ دابا نْعسْ
طْفاتْ علي الضّو.





الجزء الحادي عشر : حوميدي فغرفة العمليات

فالصباح بكري جا راجل فيّقني وقال لي غادي ندّيك لغرفة العمليات.زاد قال لي : ما تخافش كولشي غادي يدوز على احسن ما يرام.
هاد المرة ، السانسور انزل بينا تحت الارض.وصلنا لواحد القاعة كبيرة فيها شي ناس لابسين لخضر ، شي لابسين لزرق ، شي لابسين لبيض.كولهوم دايرين لكْمامة على فمهوم.
ركبوني فواحد الناموسية كبيرة .بان لي شي ماتِرْيالْ م****.الصراحة خْلعني .
الطبيبة واحد الزّعْرى قرْباتْ مني وقالت لي : بونجور ميسيو عبد الحميد اسمح لينا الى فيّقْناكْ بكْري ولكن منْ دابا شي شْوية غادي ترجع تنعسْ.
شفتْ فيها بحال الى متعجّبْ.
ضحكات وقالت لي : شوف هاد الشوكة فيها منوّم غادي غير نغرزْ ليك الشوكة غادي تبْدى تحسب الخرفان اللي عندك ومن بعد بايْ بايْ.
فعلا غير حسّيت بالسيروم يدخل فالدم وانا نتّرْخى.واه الدكتورة بْقات تبان ليا فْلو(flou) .هي هاديك سمعتها تقول لي : ميسيو عبد الحميد يا الله حْسبْ الخرفان قبل ما يهربو ليك .
سبحان الله فمّي مسْدود ولكن كنت نسمع راسي نقول فينا
هوما الخرفان ؟ فينا هوما الخرفان ؟
_ احْسبْ ! احسب الخرفان قبل ما يهربو !
_ الخرفان ..واحد ....جوج ...ثلاثة .....ربْ.....
صافي الحوميدي مْشى ، مْشى بْلا ما يحسبْ الخرفان .حوميدي مات ..ماتْ ...ماتْ.
شْحالْ دازْ ديال الوقت ؟ ساعة جوج ثلاثة .مين فقت حسيت بالراس كيْدور والدوخة وباغي غير نتْقيّى .البيت بان لي مضْلامْ.ما فقتشْ براسي وانا نْغوّتْ فينا هوما الخرفان ؟ فينا هوما الخرفان؟
خالي كان واقف حْدايا قال لي : على سْلامتك ولدي حميد.الحمد لله العملية ديالك دازت مزيان .ونزيد نْفرْحكْ راه المخ اللي حيْدو لك من الظهر ديالك زادو لو الدم اللي كانو حيْدو لك وراهوم دَوزوه لخوك جمال وراه الجسم ديالو تْقبلو بنجاح.
واخا ظهري كان يْضرْني ابتسمت وقلت لو : الحمد لله أخالي الحمد لله.


الجزء الثاني عشر : حوميدي من بعد العملية

هاديك الليلة نعستْ نْعاسْ كيف ما نقولو بالوجدية (هادي ما تفامها غير شروق) نعاس مْرَنَّكْ .ها مرة نفيقْ ، ها مرة ننعسْ ، ها مرة نْغوّتْ......الليلة كيف ما يقولو الفرانساويين : ليلة أجيتي nuit agitée .
فالصباح لقيتْ راسي أُونْ فورْمْ(en forme) يعني بحال الى ما عندي والو .ولكن حسّيت بالجوع :
_ بغيت ناكول
كانو الممرضين والطبّا وخالي وعبد الحفيظ واقفين حْدايا.يا الله تكلّمت ، كولهوم ضحكو .هي هاديك جات ايفلين ديالي وقالت لي : يا الله غادي تمشي معايا باش تاكول اللي بغيتي.
بالنسبة لأخي جمال العملية نجحات لو والدليل انه بْدى يحسْ بشي احساس غريب.تصورو غير فاق حتى هو قال ليهوم : جيبو لي خويا حميد بغيت دابا نشوفو .
قالو ليه : راه باقي فالبنج
ولكن هو ما بْغى يسكت : جيبو لي خويا حميد .راني توحّشْتو.
خالي مْسيخيط مع راسو ، قال لي : هاد جمال راه رجع حميد التاني .شوفو سبحان الله هاد حميد مين يجوع ما يعرف غير كرشو ودابا جمال راه ولّى غير حميد.لمعاندة ما كاينْشْ اللي يدّيها لو
المهم مشيت عند خويا ولْقيتو تْغيّر فالتصرفات معايا وقال مسكين او هو يضحك : نتمنى يا خويا حميد ما نكونش خديتْ منّك غير الحاجة الزينة
_اعْلاه أخويا كونْ كانْ فيا الدّيفو(défaut) كاعْ ما يعطيوَكْ المخ ديالي
ضْحكْ وردْ علي : عندك الحق.بْحال والو حتى انا غادي نكتب القصص بالفرنسية.
_ واهْ أخويا وْ غادي تْصيّدْ الحوتْ وتمشي لجوطية.....
_ أخويا غير نخرج من هاد السبيطار ونْدير اللي طلبتي منّي.
الواليد اتاصل بالتليفون باش يطمئنْ.كانت حداه الواليدة حتى هي حالتها حالة .حتى الاخوة والاخوات كولهوم كانو يطلبو الله باش تنجح العملية
مين جاهوم لخبر ، كولهوم فرحوا وبْداوْ يتعانقو ويقولو : الحمد لله ، الحمد لله
الواليد ديك لعشية جاب الطّلبا للدار باش يقراوْ القرآن ومنها صدقة
4 أيام مورا العملية سمحو لي بالخروج .جا عندي نسيبي عبد الحفيظ وقال لي غادي تمشي لعندي فالدار ما غادي يخصّك حتى خير.فعلا فالطريق دزْنا عند واحد الجزار كيبيع اللحم بكل الانواع ديالو .حانوت تبارك الله الحاجة اللي تْقلّبْ عليها تلقاها: ها الكفتة ، ها المخ ، ها الكوتليتْ ، ها الكبدة ، ها الصوصيصْ ، ها لحم الراس ، ها لسان البكري ، ها فْخَدْ لبْراكْ ، ها الكرعينْ ها الباكورْ...المهم غير اختار اللي بغيتي ولكن جْبدْ يامّاهوم (الدراهم)
خويا عبد الحفيظ هو اللي خلّصْ .
خوكم الحوميدي قضى ايّامات غير ديال الراحة والماكلة والنعاس.
كنت نمشي نشوف خويا جمال .حتى هو رجع كيف كان من قبل : بْحال الى عمرو ما مْرضْ.
نسيتْ ما قلتشْ ليكوم راه الطبيب أعطاني شهادة طبية ديال 20 يوم .قال لي من بعد الى باغي نزيد لك مرحبا .


يوم الثلاثاء إن شاء الله تتمة مذكراتي مع أخي جمال

 

bouchaib56

::مراقب مغربي ::

غير متصل
#60
رد: قصة بالدارجة المغربية : مذكرات معلم في المدينة

عيشتينا معك في العملية تنجح ماتنجح حتى احنا خايفين عليك
اما خوك عارفين بلي هو في خطر
والصراحة التقي بهاذ حميد ولا اعرف ان مخو عند خوه
جمال
ولاحكيت لي هذا يا الغذار ولا اعرف عنه وعنك هذه التفاصيل
على سلامتك
 
أعلى