قصة بالدارجة المغربية : مذكرات معلم في المدينة

Houmidi59

::الفارس المغربي ::

غير متصل
#21
رد: قصة بالدارجة المغربية : مذكرات معلم في المدينة

الحلقة رقم 13 : ذكرياتي مع التلاميذ وآبائهم

الجزء الثاني :
آش عند هاد البوليسي مع اسمهان
ديالي ؟


هادي قصة تعود الى سنة 1987/1988 لكن البداية ديالها كانت فال 87 من شهر أبريل . كنت كي العادة نمشي للقهوة رفقة اسمهان ديالي.كنت نْحطْها فوق الطّيطْوار(trottoir) بعيدة علي بواحد 3 أو4 متر ، زعما راني حاضيها واخّا رابطها بالسلسلة.
الحدث بِْدى مين واحد البوليسي أسمر وغليض قرّبْ من اسمهان ديالي وبْدى يْغَوْتْ :
_ شْكونْ مولْ هادْ الموطورْ ؟
خوكم الحوميدي كان مْبرّعْ مع راسو بْشي كاس مونادا ، ناض من بْلاصْتو ومشى لْعندو :
_ انا مول الموطور
_ أرى لوراق
_ هاموما
بْقى يَفْلي فيهوم وحدة وحدة
_ اوى عندك الكاسك ؟
_ راه مْعلّق فوق الكيدون(guidon)
_ واش دابا كتْفلّى عليا ؟
_ حاشا أسيدْ الشرطي
_ واخّا واش فخْبارك باللي ممنوعْ تْحطْ الموطور ديالك فوق من الطّيطْوار ؟
_ الله يْخلّيكْ فين خاصّني نْحطّو؟
_ خاصّو يْكون تحت الطّيطْوار
_ ماتْكون غير على خاطْرك أسيدي
_ بْلا ما تْهكّمْ عليا
_ حاشا غير أو كان راها راشقا ليا هاد النهارْ
_ راكْ شارْبْ شي شْوية ؟
_ نعم أسيدي شاربْ
_ تبارك الله أشنو شْربتي ؟
_ غير مونادا
خنْزرْ فيا مزيانْ ومْشى .
المهم ارجعت لبْلاصتي .
يومين من بعد ، خوكم بدّل القهوة .هاد المرّة حطيتْ اسمهان ديالي تحت الطّيطْوار .
شي وْقيتة راني مع صْحابي وْأنا نسمع خونا بالله عاود تاني
يْغوّتْ :
_ شكون مول هاد الموطور ؟
مْشيت لعندو على وعْدي وسعْدي :
_ أنا مول الموطور
_ أرى لوْراق ديال الموطور بالزربة
_ هاهو ما
هاد المرة فْلاهوم مزيان أكثر من المرة اللي دازت
_ لكْلاكْسون (klaxon)خدّام ؟
_ نعم أسيدي خدّام
بْرَكْ عليه وْقال لي :
_ مزيان دابا راه خدّام ؟
_ غير اسمح لي نْقلّعْ الموطور عاد يمكن لك تعرف واش خدّام او لا
_ كتفهم عليا ياك ؟
_ حاشا
_ اوى والضو شاعل ؟
_ خاصني نْقلّع الموطور
_ صافي خلّينا من هاد الشّي
_ نعم أسيدي ، دابا أشنو كاينْ ؟
_ اللي كاين الموطور ديالك خاصّويكون فوق الطّيطّوار
_ ولكن راكْ أنْتَ اللي قُلْتي ليا نْحَطّوتحت الطيطوار
_ شوف الله يْخلّيك ما تلعبشْ مع القانون
_ واخّا أسيدي المرة الماجية غادي نْديرو فوق راسي
دازت أيامات ما بقيتش ناخود معايا اسمهان .المشكل فْديك لوقيتة ماكانْشْ الكارديان ديال الموطورات.من بعد جات العطلة الصيفية.
دابا راحنا فْبداية السنة الدراسية الجديدة 87/88 وبالضبط شهر أكتوبر .كانت الدراسة يا الله فاش بدّاتْ .
واحد النهار كانت باقي عاقل العشرة و5 مينوت يعني وقت الاستراحة.وفجأة (هادي نْخلّيوْها باللغة العربية الفصحى ) دخل رجل غليض بكسوته البوليسية ونسخة طبق الأصل للشرطي الذي مَرْمدني.
شَفْتْ فيه مزيان .أنا عْرفتو ولكن هو ، موحال الى انْتابَهْ ليا.
بالدخلة عاود تاني بْدى يْغوّتْ : فين هو سّي ......... ؟
خوكم الحوميدي موجود لتَّقْشابْ .
_ ياكْ ما جيتي تْقلّبْ على الموطور ديالي ؟
_ الله يْخلّيك واش حْنا فالموطور ولّا الاستاذ ؟
_ شكون الاستاد اللي بْغيتي ؟
_ بْغيتْ الأستاد ........
_ أنا هو
_ أنت ؟
_ إيه أنا هو الأستاد مول الموطور اللي كنت كتْمرمدْ عليه على ....
_ صافي أأستاد راني جاي قاصدك.
_ مرحبا غير او كان غير الله يرحم الوالدين الموطور ديالي واشْ نْحطّو فوق الطّيطْوار أو تحت الطيطوار ؟
ضحك وقال لي : أخويا حطّو فينْ ما بْغيتي
_ زعما فين بالضّبْطْ ؟
_ فوق راسي أسيدي فوق راسي
داك النهار الأساتدة ماتو بالضحك .
المهم قلت لو بعد ما مْسحْتْ دموعي من كترة الضحك :
_ آش حبْ الخاطر ؟
خونا بالله شْرح لي اللي كاين : البوليسي عندو جوج أولاد رشيد ومحمد علي.رشيد يقرى عندي ومحمد علي كيقرى عند أستاد أخور ، يعني في فوج مختلف.القضية وما فيها أن رشيد كيشكر فيا مزيان حيت خوكوم الحوميدي يخدم مزيان مع أولاد الشعب.أمّا محمد علي طاح فالاستادة رقية ورقية عندها غير مع لبْنات ماشي مع لولاد.محمد علي حسْ خصوصا مين خبرو خوه رشيد باللي كاين ، اوى حسّْ بالي ما غاديش يستافد والو
هي هاديك قال لي خونا بالله : الله يرحم الوالدين الى ما تْجيبو مع خوه .بْغيتو يقرى عندك.
بالطبع لْعبتها معاه كبير : اوى راك عارف القضية شوية صْعيبة ولكن غادي نشوفْ
_ الله يْخلّيكْ غير ديرْ جهدك باش تْجيبو لْعندك
_ واخّا يْكون الخير
قبل ما يودّعني قال لي : ما حدْني هنا ما تْخَمَّمْشْ فلاصورانصْ



يتبع هاد المساء مع الجزء الثالث : التلميذ البورجْوا ولد الفقير مين برّعْهومْ بالشْوى
 

Houmidi59

::الفارس المغربي ::

غير متصل
#22
رد: قصة بالدارجة المغربية : مذكرات معلم في المدينة

الحلقة رقم 13 : ذكرياتي مع التلاميذ وآبائهم

الجزء الثالث :
التلميذ البورجْوا ولد الفقير مين برّعْهومْ بالشْوى


كنت كنْدرَّسْ المستوى الثالث .ماعْقلتشْ بالضبط ولكن ما تْكون غير فْوسط السنة الدراسية.
واحد النهار جا واحد الأب ومْعاه ولدو عندي للقسم .الاب زعفان والغضب باين على وجهو .
بْلا ما يْكلّمني ودخل للقسم وقال لولدو : فين هادوك لمْصاخط اللي ادّاوْ لك لفلوس ؟
الولد كان يبكي وباين عليه الخوف.شي شوية رد على أبّاه : هدا ...هدا ...هدا
الأب حنْزَزْ فالتلاميد : نوضو دغيا
كان علي نتدخّل : أسّي فرتلان واش راك فقسم او كوميسارية ؟
شافْ فيا : اسمح لي ما رانيشْ مْعاكْ نتكلم
_ كيفاش ما راكش معايا.اخرجْ برّا او غادي ندير مع اللازم
السيد ماكانش ناوي غادي نْدورْ فيه .قال لي زعما راه يشكي : أسيدي شي مصاخيط سرقو لولدي فلوسو .راهوم سرقو لو 500 درهم
كيف ما سمعتو هاد السيد باينة عليه كامبو .واش كاين شي واحد يعطي لولدو هاد المبلغ من المال وعلى الخصوص لبرهوش ماعندوش حتى 9 سنين ؟
المهم واحد التلميد مشى يْعيّط للمدير.أما الأب المتعوس خرّجتو برّا القسم.
_ شوف الله يرحم الوالدين ماعندكش الحق تخلع ليا التلاميذ ديالي .الى عندك شي مشكل خاصّك تشوف مع الادارة
المدير هي هاديك وْصل لعندنا.اخبرتو بالتصرفات ديال خونا بالله.
خونا بالله مع ولدو رافقو المدير للإدارة.أنا دخلت للقسم ديالي.خلّيتْ دقيقة دازتْ ، عيّطتْ على 3 ديال التلاميد اللي اتهمْهوم الولد البورجوازي.بالواحد سوّلتهوم :
_ كيفاش أسْرقتي ليه لفلوس ؟
_ والله أأُستاد ما سرقت لو والو
_ اوى وعلاش راه يْحصَّلْ فيك ؟
_ غادي نكول لك الحقيقة أستاد
_ مزيان يا الله أولدي أحكي بْلا ما تْخاف
_ أستاد عبد اللطيف كان كل نهار يْجيب معاه بزاف ديال لفلوس
_ شْحال كان يْجيبْ ؟
_ ما عْرفتش أستاد.كان يْجيب جوج وراقي ديال لفلوس
_ واخّا.أشنو كان يْديرْ بديك لفلوسْ ؟
_ كان يشري الحلوى الغالية والشيكولا ماروخا والعصير
_ تبارك الله ، إوى ؟
_ كان يعطي للتلاميد
_ شكون التلاميد اللي كان يعطيهوم ؟
_ أنا أستاد وعبد الفتاح وكريم
_ راك تتكلّم على هاد الجوج صْحابك ؟
_ نعم أستاد
شفت فالتلاميد : أوليداتي شكون اللي عبد اللطيف شْرى ليه شي حاجة يرفع صبعو ؟
مجموعة ديال التلاميد رفعو صْبعهومْ
المهم من هادوك التلاميد عْرفت باللي كاين اللي شْرى لو علبة أقلام ملوّنة ، شي شْرى لو قابصَة (علبة ) شيكولا ، كان اللي عْطاه لفلوس باش يخدم ليه التمارين، شي وحدين كان كل يوم يشري ليهوم الزريعة والكاوكاو
المهم بان بللي هاد عبد اللطيف كان سخي وكريم مع التلاميد ديال القسم ديالو.
التلميد الثاني زاد أكّدْ لكلام ديال صاحبو او زاد قال لي : أستاد واحد النهار مْشينا عند أصحاب الشْوى باش ناكلو الكفتة
_ اوى كْليتو الكفتة ؟
_ أستاد فاللّوّلْ ، جْراوْ علينا.ما بْغاوشْ يْسرْبيوْنا الماكلة
_ اوى ؟
_ عبد اللطيف ورّاهوم ورقة كبيرة
خرّجت من جيبي 100 درهم .
_ أبْحالْ هادي أولدي ؟
_ نعم أستاد ، بْحالها
_ إوى زيد كمّلْ أولدي
_ أستاد مين شافو لفلوس ، جابو لينا الماكلة حتى شبعنا
_ واش كان مْعاكوم شي واحد من غيركوم أنتوما بْجوج
_ كان مْعانا واحد الولد يقرى فالقسم الخامس
من بعد التلميد التالت هو اللي زاد كمّل : أستاد أنا ما غاديش نكدب عليك.كان كل مرّة يعطيني لفلوس .أنا كنت نْخبّيهوم.
_ فينا هوما لفلوس اللي عْطاك؟
_ هاهوما أستاد
مْشى لبْلاصتو وحلْ المحفطة .جْبد علبة صغيرة ومدْها لي : لفلوس راهوم كولهوم فالقابصة
حلّيتْ العلبة واحْسبت لفلوس اللي كاين : لْقيت تقريبا 50 درهم
_ هادي اولدي رشوة ياك ؟
_ والله أأستاد هو اللي كان يعطيني لفلوس
_ نعم أولدي راني عارف وأنت كنتي كتخدم ليه التمارين .كاينة ؟
_ نعم أستاد
_ يا الله رجعو لبْلايصكوم أنا غادي نمشي عند المدير.
فالإدارة عبد اللطيف اعترف وقال كولشي.الأب ديالو ما صابْ ما يْزيد فالهضْرة
الخلاصة وهو أن عبد اللطيف شاف واحد النهار أبّاه يْخبّي لفلوس تحت الكسوة فالماريو.خلّاه حتى مْشى وبْدى كل يومين أو 3 يجبد ورقة ويصرفها على أصحابو.
شي نهار الوالد ديالو بْغى يجْبدْ لفلوس ولْقاهوم ناقصين .
من بعد اتهام ولدو حيت لمرى ديالو كانت مسافرة شْحال هادي .الولد غير بوحدو فالدار .يعني ما يكون مول الفعلة غير عبد اللطيف.
حتى انا حكيت للمدير المعلومات اللي توصّلت ليها واعطيتو لفلوس اللي خْديتهوم من عند التلميد كريم .
المدير شاف فالأب المخدوع وقال لو : شفتي لافوطْ ديال ولدك ماشي ديال التلاميد وانت جاي هاجم.فالحقيقة خاصني نعيَّطْ على البوليس ولكن الله يْسامح.
دابا غادي نعْطيكْ انتقال باش تدّيه لْشي مدرسة يقرى فيها.احْنا أسّي محمد ما نقبلوش عندنا الشّفّارة
الأب ما فادو غير جاوب المدير : نعام أسيدي اللي درتوه هو اللي كاين

انتهى

غدا إن شاء الله الحلقة رقم 14

 
غ

غير مسجل

Guest
غير متصل
#23
رد: قصة بالدارجة المغربية : مذكرات معلم في المدينة

بحال هاد الولد كاينين بزاف لحد هاد الوقت من الزمن
سواء بنات ولا ولاد كيبغيووا يبانوا، قدام لي مساكن قد الحال
المزيان في الامر هنا ان اب الولد بالاخير عرف ان ولدو هو لي كان يسرقو
و الولد بدورو حس ان الحقيقه غاده تبان فاعترف بالي كان
المهم بحال هادو لابد من انهم يتعاد تربيتهم من اول وجديد و التربيه
ديال الدار مهمه بزاف قبل لاتكون تربيه ديال المدرسه
مذكرات رائعه واني من المتابعين لك
بالتوفيق اخي
 

Houmidi59

::الفارس المغربي ::

غير متصل
#24
رد: قصة بالدارجة المغربية : مذكرات معلم في المدينة

بحال هاد الولد كاينين بزاف لحد هاد الوقت من الزمن
سواء بنات ولا ولاد كيبغيووا يبانوا، قدام لي مساكن قد الحال
المزيان في الامر هنا ان اب الولد بالاخير عرف ان ولدو هو لي كان يسرقو
و الولد بدورو حس ان الحقيقه غاده تبان فاعترف بالي كان
المهم بحال هادو لابد من انهم يتعاد تربيتهم من اول وجديد و التربيه
ديال الدار مهمه بزاف قبل لاتكون تربيه ديال المدرسه
مذكرات رائعه واني من المتابعين لك
بالتوفيق اخي
شكرا أخي الكريم على التعليق الرائع ديالك.أنا صراحة يعجبوني بْحال هاد التعاليق حيتْ كيناقشو فكرة كتعجبوم فالموضيع .عندك الحق خويا بزاف ديال الاولاد والبنات الله يهديهوم كيسرقو الوالدين ديالهوم.غراضهوم يْبانو مع أصحابهوم.انا كنحمّل المسؤولية للوالدين هوما اللي خاصهوم يْربّيو الابناء ديالهوم على القناعة.
هادا موضوع كبير خاصّو النقاش ولكن الحل ديالو في نظري راه هو التربية السليمة
شكرا على مرورك أخي الزائر.أخي الكريم هادي فرصة باشْ تتْسجل فالمنتدى باش حتى انت تكون عضو بارز.يا الله شوف ليك شي اسم مستعار وها راكْ معانا
ياكْ حْنا زعما مغاربة ؟
 

Houmidi59

::الفارس المغربي ::

غير متصل
#25
رد: قصة بالدارجة المغربية : مذكرات معلم في المدينة

[FONT=&quot]الحلقة 14 : المدير اللي صْفع المعلمة رقية



[/FONT]​

[FONT=&quot]كيف ما قلت من قبل قرّيت فالثالث عامين متتاليين وقرّيت عام او عامين فالخامس.من بعد أرجعت قرّيتْ عام فالرابع .من بعد ارجعت للثالث ديالي.[/FONT]
[FONT=&quot]على كل حال العام اللي شدّيتْ فيه الخامس ، كانو الأغلبية ديال الثالث اللي قراوْ عندي متحمّسينْ باشْ يزيدو يقراوْ عندي .هداك العام كانت الضربة القاضية بالنسبة لخوتنا بالله رقية.بزاف ديال التلميدات هربو من عندها وجاوْ باغيين يقراوْ عندي.[/FONT]
[FONT=&quot]حدت مهم هو التلميدة جميلة بنت المستشار بْغاتْ تقرى عندي وقالت لي : أستاد انا عارفة باللي انت باغي تْقرّيني على داك الشي ما عمرو مانقول لْبابا راك تضربني.[/FONT]
[FONT=&quot]خوكم الحوميدي كان يرد عليها : غير كولي لو أبنتي .انا ما يهمْنيشْ[/FONT]
[FONT=&quot]_ لا استاد انت كتضربنا على صْلاحنا[/FONT]
[FONT=&quot]هداك العام داز في أحسن الأحوال.جا عندي المفتش .هدا مفتش جديد .باقي عاقل حْضرْ لي فدرس ديال الرياضيات ودرس فالإنشاء.خونا بالله عجبو الحال .ما لْقى ما يقول.[/FONT]
[FONT=&quot]النتيجة كانت باهرة : 100 فال100 ديال النجاح .رقية سقطو ليها يمكن 13 أو 14 تلميذ[/FONT]
[FONT=&quot]المهم كاين واحد الحدث مهم هو فالسنة اللي قرّيت الرابع .باقي عاقل كانت تقرى عندي من قبل فالقسم الخامس بنت واحد صانع الاسنان.كانت صراحة من التلاميد النجباء ونجحت بمعدل مرتفع.أبّاها شحال شكر فيا وقال لي : بنتي ما عمرو وصلت لهاد المعدل.راه الفضل كلّو ليك.[/FONT]
[FONT=&quot]المضحك فالأمر العام اللي موراه كيف ما قلت كنت شاد الرابع.خونا بالله تْعجّب مين شاف باللي ما بْقيتش شاد المتوسط الثاني ، قال لي : [/FONT]
[FONT=&quot]_ والله يا أستاد ما تسْتاهل .[/FONT]
[FONT=&quot]أنا تْعجّبْت أكتر منّو : [/FONT]
[FONT=&quot]_ كيفاشْ زعما راني ما فهمت والو ؟[/FONT]
[FONT=&quot] ماشي المدير سَقْطكْ وْردّك للرابع؟[/FONT]
[FONT=&quot]الصراحة هاد الدونْتيسْت (dentiste)ضحّكني لأني أول مرّة كنسمع باللي معلم يسقط فالقسم.المهم شْرحت لو باللي المستويات بْحال بْحال ما كاينش حتى فرق بين المعلمين بالنسبة للتدريس.اللي كاين أن الأساتدة كيترقاو فالرتب والسلاليم.[/FONT]
[FONT=&quot]الحدث الكبير هو واحد العام كنت شاد الثالث .هاديك السنة المدير ضْرب المعلمة رقية بصفعة حتى طاحو ليها النضاضر.[/FONT]
[FONT=&quot]كانت شي صبْحية يمكن الى ما خفتش نكدب الساعة التسعود وربع.باقي عاقل كنت فالباب ديال القسم ديالي كنتفرّج فالتلاميد اللي داخلين مع التسعة باش يلعبو الرياضة.المدير كان واقف ، باينا مين شاف المعلمة باقا ما جاتش هو اللي قاليهوم يدخلو للساحة.شي شوية جات المعلمة رقية .دازت من حْداه.يمكن زْعف عليها.هي ما عجبهاشْ الحال.ماشي بعيد تكون سبّاتو .خونا بالله جْبدْ معاها بواحد الطرشة.انا الصراحة كانت مْضَرْقاني الشجرة واللقطة اللي شفت هو الاستادة طايحة فالأرض تْغوّتْ : عتقوني أعباد الله عتقوني [/FONT]
[FONT=&quot]شي معلمين سَدّو الباب .زعما حْنا ماشي شْغولْنا.شي وحدين دارو بْحال الى ما لاحضو والو ، شي وحدين مْشاوْ يجريوْ عند المعلمة اللي طايحة فالأرض.انا كنت من هاد الجماعة.لقينا خيْتنا تبكي وتْنوّحْ : ضربني الكافر بالله ضربني[/FONT]
[FONT=&quot]شافت فينا : ياكْ شفتوه باللي ضربني.؟[/FONT]
[FONT=&quot]شي معلمات قالو ليها : شفْناهْ أخْتي وراحنا شاهدين مْعاك[/FONT]
[FONT=&quot]واحد المعلم قال ليها : سيري دغيا لطْبيب جيبي شهادة طبية ومن بعد سيري للبوليس والجاضارْمية دفْعي شكاية[/FONT]
[FONT=&quot]لخّوت كل واحد يْرايّي ليها الحل اللي يصلح.خوكم بالله اللي هو أنا بْقيتْ غير نسمع ونْشوف.قبل ما نْوصلو المدير كان مْشى وسدْ على راسو فالإدارة.باينة ما يكون غير يقول مع راسو : راني قفّرْتها مع رقية[/FONT]
[FONT=&quot]المهم رقية مشات عند شي طبيب من الفاميلة ديالها.الطبيب كتب ليها شهادة طبية ديال 10 أيام.من بعد مع شي معلمات مْشات للسلطات المحلية باشْ ترفع شكاية ضد المدير.لخبار وصل للنيابة حيت المعلمة كتبت مراسلة.المدير حتى هو كتب مراسلة ديالو كيْتَّهم المعلمة باللي هي اللي ضرباتو[/FONT]
[FONT=&quot]من بعد المدير ما بْقاشْ يخرج للساحة.مسكين الحادث جعلو مْخبّي كي الفار.الاستادة ما بْقاتْشْ تْقرّي.خونا بالله اللي هو المدير استغل الفرصة واخبر النيابة باللي خوتنا بالله اللي هي رقية راها سامحة فالتلاميد ديالها.المهم جات لجنة تقصّي الحقائق .سَوْلو الاساتدة كاملين واحد واحد.كل واحد قال ليهوم زعما اللي شاف أو سمع.[/FONT]
[FONT=&quot]من بعد جاوْ لينا استدعائاتْ للضابطة القضائية .باقي عاقل واحد المعلم صاحبي هدا نسيت ما تكلّمتش عليه الله يرحمو معلم غير درويش .هدا غادي نخصّصْ لو حلقة كاملة.هاد المعلم اللي سميتو لمفضّل من مدينة طنجة ، قال لي : سيّ عبد الحميد وايّاكْ تشهد مع ديك المعلمة [/FONT]
[FONT=&quot]رديتْ عليه [/FONT]
[FONT=&quot]_ أعلاش أسّي لمفضل؟[/FONT]
[FONT=&quot]_ هاديك بوحاطية .راه بعدا من قبل اتهمات مدير باللي ضربها[/FONT]
[FONT=&quot]_ واه ؟[/FONT]
[FONT=&quot]_ بيني او بينك هاديك تستاهل ماشي غير صفعة ركلة [/FONT]
[FONT=&quot]ضحّكني خويا لمفضل وباش ما نزيدش نطوّل فالهضْرة ، قلت لو : يكون الخير ان شاء الله[/FONT]
[FONT=&quot]المهم بعد الشهادة ديالنا نحن المعلمون، عادت الأمور الى مجاريها.الخدمة رجعات كيف كانت .النتيجة الخّوت هو ان المعلمة والمدير كل واحد فيهوم جاه تنبيه من النيابة الاقليمية لوزارة التعليم.بانْ كدلك ان اغلبية المعلمين اللي مشاوْ يشَّهدو كولهوم شهدو باللي المعلمة هي اللي تْعدّات على المدير وأن خونا بالله اللي هو المدير بْغى يدافع على نفسو راه طيَّحها حيت ادْفعْها.[/FONT]
[FONT=&quot]المشكل هو أنا وجوج معلمين صْدقنا كدابين.[/FONT]
[FONT=&quot]موراها المدير صافي تقدرو تقولو باللي كرهني.صافي ما بقاش يتكلم معايا .الحمد لله كان عارفني باللي انا جاي من الرباط ، على داك الشي خاف يتّاخد ضدي شي إجراء[/FONT]


يتبع غدا إن شاء الله




[FONT=&quot]
[/FONT]
 

bouchaib56

::مراقب مغربي ::

غير متصل
#26
رد: قصة بالدارجة المغربية : مذكرات معلم في المدينة

ظلم المديرين للمعلمات لا ينسى على مرأى من المعلمين والمعلمات المتكالبات
ياريت لو عرفنا من القصة ان المعلمة التي صفعها المدير متزوجة
اولا لن تكفيه شهادة طبية لعشرة ايام بل من واحد وعشرين فما فوق
ومن السهل الحصول عليها في هذا الجو من الارياف
ثانيا لكان الزوج مع المدير رأسا لرأس دون عيان ليعطيه درسا لن ينساه
هكذا كان المدير كما كان المفتش المعلمة عندهم دجاجة بكامونها
 

Houmidi59

::الفارس المغربي ::

غير متصل
#27
رد: قصة بالدارجة المغربية : مذكرات معلم في المدينة


الحلقة 15 : الميلود ديما مْسالي ولمفضّل ماعاقلْ على والو
أخي وصديقي لمفضّل الله يرحمو فهاد النهار
هاد الاستاذ الفاضل الله يرحمو كان من الأصدقاء ديالي اللي كانت تربطني بيهم علاقة وطيدة خاصة من بعد ما تزوّجت.فالبداية كان تقريبا بيني او بينو غير السلام.حتى هو كان يْقرّي التحضيري ، زعما القسم الأول.كان واحد خونا بالله حتى هو يقرّي نفس المستوى .هدا اسميتو الميلود.باقي عاقل كان ماعندوش مع التعليم.هدا كان باغي الناس يْقولو لو انت موظف.خونا بالله كان لاباسْ عليه حيت عندو محطة ديال بيع الوقود، زعما بومْبا ديال ليصانص.
فالعام الأول ديالي فمدرسة الرازي كنت نتبادل القسم مع الميلود: أنا نخرج هو يدخل ، هو يخرج أنا ندخل.لعبة الفار والقط أو ما يصطلح عليه فالتعليم التناوب.كان مسكين الله يرحمو حتى هو اينيقْشيعابْل ، واخّا قاري شي حروفا ما يعرفشْ يستعملهوم.المهم كنت نْخلّيلو التحاضير ديالي ، كان كل عْشية ياخُدهوم للدار باش ولدو يكتب هوم ليه .هدا هو حالو .العحيب كان يتْخلّصْ أكثر مني أنا اللي كان عندي ديك الساعة السلّم 8.مين سوّلتْ ، قالو لي بأنه هو غير معلم مؤقت ، يعني يقدرو يْكَرْكْبوه وقتاش ما بْغاوْ.
من الطرائف ديال هاد خونا بالله واحد النهار جا عندو المفتش .كان ناوي يْديرْ لو تفتيش.ما خلّاهش يدخل .من الباب قال ليه : غير سير راك غادي اضّيّعْ وْقيتّكْ معايا ، خوكْ راه مْسالي مع قبّو.
المفتش غير ضحك ومشى في حالاتو.
واخّا هكْدا جاوْ عندو المفتشين وعندو تقارير ديالهوم.يا خّوتي كارثة هاد التقارير.كاتبين عليه غير الكحْلة.والو خونا بالله مْسالي .تْصورو حتى القرآن ما يعرفش يْحفْضو للتلاميد.باقي عاقل واحد التقرير كنت قْريتو على ملاحظة ديال النائب الاقلبمي كاتب لو بالحرف : إن مستواك أقل بكثير من مستوى تلاميذك.مهزلة هادي .زعما خونا بالله المستوى ديالو طايح لهاد الدرجة.كانخاصهوم غير يْنعْتوه بالأُمّي .
هاد الميلود كنت نْقرقب معاه الناب غير فالاستراحة اللي بيناتنا.كان يتكلم لي على الأخبار اللي كان يسمع فالراديو.بعدا فْهادي عندو ما يقول ماشي بْحال شي معلمين ما يتكلمو غير على الترقية والتفتيش والسلاليم والحركة الانتقالية.
المياود كان رجل دريويش .كانو المعلمين يحتارموه حيت كان رجل كبير .من بعد وقع شي تغيير .جابو ليه شي مطبوع باش يْعمْرو.خونا بالله صافي حيْدولو القسم.هي هاديك صيفْطوه لواحد الثانوية حيت تمّا عيْنوه شاوش.خونا بالله دوّزْ 3 أو 4 سنين وخْدى التقاعد.اولاد لحرام خَرجوه بالسلّم 2 .شوفو المنكر فين وصل.الله يستر ويبقّي الستر
صاحبي لمفضل حتى هو كان كبير .هو كان معلم عرضي .كان الله يرحمو رجل نية وكان يعمل بجد وحيوية.كان هدا الاختصاص ديالو هو القرآن الكريم.باقي عاقل كان عندو واحد الولد ذكي.بفضل لمفضل هداك التلميد حْفضْ تقريبا30 حزب.كان لمفضل يتْباهى بيه عند المعلمين وحتى مين جا المفتش .
صاحبي لمفضل عندي مْعاه طرائف كثيرة .كيف ما قلت من قبل.العلاقة معاه بْدات فلوقيتة ديال الزواج ديالي.باقي عاقل كنت سكنت فنفس الحي اللي هو ساكن فيه.كان عندنا نفس التوقيت.لهادا فوقت الخروج كنا نرجعو جميع للدار.الطريف فالأمر أنَّ سّي لمفضل كيوْقفْ فالطريق بزاف.هاد الوقفة غير باش يشرح لي شي حاجة.تصورو باش نوصل للدار كنت كنْدير تقريبا ساعة.
صاحبي لمفضل تعجبني مْعاه الشْياخة (الحديث) خصوصا مين يتكلم لي على أيّامات زْمان ديال لوْقيتة ديالو.على ما حكى لي ، كان الراتب ديالو 250 درهم فالشهر.بيه يْخلَّصْ لكرى وياكول ويشرب ويْشَيَّطْ (يقتصد) باش يَشْري العيد.سوَّلتو بْشحال كان يسوى لخْروف ديك لوقيتة، جاوبني ما ما كانش يتعدّى 100 درهم.العجيب فالأمر ، كان هو و3 أصحابو كاريين دار ب20 درهم للشهر.قالك أسيدي كان كْراها غالي بزاف.فآخر الشهر غيرْ يتْخلْصو يشْريوْ ديك ويْزَرْدو بيه.الديك كانو يشْريوَه ب100 دورو (ريال)
سّي لمفضل كان فْديكْ لوقيتة كبير فالسَّنْ كان عندو ديك الخمسين عام.الداكرة بْداتْ تَضْعاف عندو ، على ودّاش بعض المرات نْشوفو شي معلم خدّام معنا .مسكين كان ديما يقول لي : سّي عبد الحميد هاد المعلم بْحال الى شَفْتو ولكن ما عْرفتش فين؟
أنا نْجاوْبو : هداكْ أسّي لمفضّل معلم خدّام معانا فالمدرسة
كان يرد على جوابي : سبحان الله ولكن ما يقدرش يْكون خوه ؟
طبعا خاصْني نْجاوْبو : لّا أسّي لمفضّل .ما عندوش خوه.
زعما الحديتْ سالا ؟ أُوهو
_ اوى باينة أبّاه ؟
_ أسّي لمفضّل ما يمكنشْ هادا باين صغير
_ أجي نْعيْطولو
فعلا نْعيْطو للمعلم .غير يوْصل يْسلَّم على صاحبي التطواني:
_ تْبارك الله على سّي لمفضّل.كيراكْ دايرْ (كيف حالك ؟)
سّي لمفضَّل يْشوفْ فيا:
_ أسّي عبد الحميد ، راهْ يعْرفني
_ معلوم يعَّرْفك أسّي لمفضّل .زعما يخدم مْعانا
_ والله الى عندك الحق .راني دابا عْرفتو
هكدا كان حال لمفضّل ، دغيا يَنْسا ولكن بالصعوبة باشْ يعْقلْ
كنت كل عطلة نطلع للرباط مع الزوجة ديالي .هو اللي كان يتْكلف بالدار حتى نْجيوْ.كان عندنا شي نباتات ، كان ديما يسْقيهوم باشْ ما يدْبالوشْ.
واحد الصيف كنّأ خلّينالو السّاروتْ كي العادة.المهم كانت عندنا شي مجية لوجدة .حيتْ كنا دايزين على تاوريرت، جاتني الفكرة نمشي نْشوف الأحوال ديال صاحبي والدار كيفْ عاملة.
ما كانش عندنا السْوارت حيت أعطيناهوم لْسّي لمفضّل.
دقّيتْ فالباب.والو ما كانشْ اللي يْردْ.
يمكن ما كاينْ حدْ.يا الله فاشْ بغينا نمشيوْ سْمعنا شي حركة داخل الدار.لمْرى ديالي قالت لي : كاين شي واحد فالدار.
عيَّطْت على فورْ جهدي : سّي لمفضّل ، سّي لمفضّل
والو ما كاينش اللي بغى يْرد.المشكل باقي نسمع شي حسْ فْشي شْكل .بْحال الى شي واحد يْسَيَّقْ الدار
عاودْ تاني عيَّطتْ.والو.
الدار هي شقّة فالعمارة وكانت فالطابق الأول.نْزلت التحت فين كاين حانوت وطلبتْ من مولاهْ يعْطيني سَلّومْ.
بالسّلّوم طلعْتْ وطلّيتْ منْ واحد الشْريجْما صغيرة.
آه يا خّوتي شَفْتْ حاجة عجيبة وغريبة
حاجة ما يْصدّقها غير هْبيلْ (أحمق)

حاجة ما يَمْكنْشْ يْديرْها غيرْ برهوشْ صغير
الحمد لله خونا بالله ما وقع لو والو : ماكان لا ميَّتْ لا مضْروب...يمكن مضروبْ شي شْوية فعَقْلو
اوى خونا بالله كان يْعوم فْوسط الدار كان يا الله لابس شورْطْ طويل .كان يلعب واحد اللعبة كنت كنْديرْها فالحمام : لعبة الانزلاق.
عيّطتْ لو : سّي لمفضّل
شافْ فيا : هادا سّي حميد.العطلة دغيا سالات
_ ما زالْ أسّي لمفضّل
_ اوى عْلاشْ هاد المَجْية ؟
_ غير كنّا دايْزين لْوجدة وجاتنا الفكرة باش نْشوفو الدار
_ جاتكوم المجية غير مينْ بْغيتْ انا نْعوم
_ أوى سّي لمفضّل غيرْ كمّل العومة ديالك .حْنا ماشْيين
_ راها معاك سعيدة؟
_ واهْ أسّي لمفضّل
_ ويلي على فْضيحْتي .سير بعَّدْ انا غادي نلبسْ ونْحلْ ليكوم الباب.
باشْ خونا بالله يْحلْ الباب تقدر أديرْ بزاف ديال لحوايجْ.تقدر تتْفرّجْ ماتش ديال الكرة بين فريق النهضة الخلوية ورجاء لمْليحة ، تقدر تتْفرج فيلم كويْ بوي، تقدر تمشي للحمّام وترجع ، تقدر تمشي للقهوة وتشرب برّادْ أتايْ وجوج كيسان قهوة ، تقدر تنعس فبْلاصْتكْ حتى يْحلْ البابْ ويْفيْقكْ.
مين حَلْ لينا سّي لمفضّل الباب كان جاني النعاس واخّا الساعة كانت تقريبا لحْداشْ ديال الصباح.
الورد والنباتات ما لْقيناهوش مدْبالين ، الحمد الله .بْغيتْ نقول ما لْقيناهوش .ما كاينينْشْ
_ فينا هوما النباتات اللي وصّيتك عليهوم ؟
_ ديالاشْ هاد النباتات ؟
_ اللي كانو هْنا
_ صْبَرْ نتْفكَّرْ.....صافي راهوم فالدار عندي
_ عْلاشْ امَّحَّنْ راسك أسّي لمفضّل ؟
_ راهوم كيْقطْعو غليك الْمَا فلعْشية وأنا خْديتهوم للدار
آشْ قلت ليكوم سّي لمفضّل الله يرحمو كان تحفة نادرة
باقي عاقل درْنا لو تكريم واعرْ.من زهرو حْضرْ لو النائب الاقليمي ديال وجدة.المهم المعلمين جْمعنالو حْصيْصة وشْرينا لو جلّابة شمالية وسلهام ورزّة وبلغة ومصحف.
الدكريات مع سّي لمفضّل كثيرة .كل وحدة تْنسّيك فْختْها.لهادا سأكْتفي بهادا القدر.الى تفكّرت من بعد شي وحدة كونو هانْيين غادي نحكيها ليكوم
هدا وعد منّي
يا الله خليت ليكوم الراحة والى اللقاء مع الحلقة رقم 16


 

Houmidi59

::الفارس المغربي ::

غير متصل
#28
رد: قصة بالدارجة المغربية : مذكرات معلم في المدينة

الحلقة رقم 16 : حوميدي بن بطوطة في الترحال وموليير فلقراية

الجزء الأول : حوميدي ديما حاصل مع لكّرى

هاد الحلقة غادي نتكلّم فيها عن جوانب من حياتي الشخصية (1987).العام الذي غادي خوكم يدخل فالقفص الذهبي، كنت كْريت دار عند صاحبي أستاذ .كان باقي لكْرى رخيص حيت يا الله كنت نْخلّص 350 درهم.المهم قبل نهاية السنة الدراسية شْريتْ بعض اللوازم اللي خاص مولات الدار غير تدخل تلْقاها.فالصيف وبالضبط فشهر يوليوز كان العرس .المهم شهر العسل قْضيتو في الرباط.
فشهر شتنبر مشيت رفقة الزوجة ديالي الى تاوريرت قصد الاستقرار.المشكل ديال السكنى دائما كاين.هاد الدار كان فيها الصْداع حيت اللي ساكنين فوق منّا ديما الموسيقى على فور جهدها.لذلك رحلت من جديد الى منزل آخور.هاد المرة لكْرى كان 450 درهم للشهر.هاد الدار يمكن بقينا فيها حتى لمتمْ السنة الدراسية.حتى هي اضْطرّيتْ نرحل منها لسبب واحد .الفاتورة ديال الما كانت ديما مرتفعة على ودّاش الما كان مشروك بين الجيران.تصورو أني كنت نْخلّص فالشهر ما مقداره 400 درهم.ثمن كراء منزل بتاوريرت
للمرة الثالثة رحلْت الى منزل آخور .هاد المنزل وقع لي فيه مشكلان .المشكل الأول أنه كان مغْموم ، يعني ديما الضو شاعل لأن الشمس كانت تحشمْ تدخل ليه والمشكل الثاني هاد المرة الضو هو اللي كان مشروك.هنا الفضيحة الكبرى كنت نْخلص تقريبا 500 درهم كل شهر.
بالطبع رحلت من جديد الى منزل خامس يمكن هاد المنزل بْقيت فيه تقريبا 3 سنين متتالية .في هاد المرحلة كانت بيني وبين صديقي لمفضل علاقة وطيدة .كنّا كنتبادلو الزيارات بيناتنا.فهاد البيت ازدادت بنتي عفاف وكان ذلك سنة 1991 .
باقي عاقل يوم ديال السبوع (العقيقة) عْرضْت على كل المعلمين والمعلمات بالمدرسة.المعلمات جاوْ فالنهار والمعلمين جاوْ بالليل.
الاساتذة الله يكتَّر خيرهوم جمعو لفلوسْ وشْراوْ ليا كادو معتابرْ : 3 ديال لكْواش ، هي فالحقيقة 2 كواش كبار وكاشة صغيرة على حسلب عفاف.من الفوق كاين اللي عْطاوْ للْمَدامْ لفلوس.المهم يمكن تكون جمْعات واحد 800 درهم أو أكثر .


الجزء الثاني : إداعة الجزائر كتستهْلكْ بزّاف ديالْ الضّو

حتى فهاد المنزل كان عندي مشاكل مع مول الدار ولكن هاد المرة استطعت باش نْحلْ المشكل ديال مثلا الضّو والماء .خونا بالله كان عندو حانوت وساكن هو ومْراتو والوالدة ديالو وجوج
خْواتاتو.لهادا فْرضْت عليه باشْ يخلّصْ جوج ثلث ، أمّا أنا فقط الثلث.
ولكن واحد النهار ، جا عندي وقال لي :
_ سّي حميد راك تضحك علي
_ كيفاش ما فهمتش ؟
_ اوى خاصّك تْخلّص معايا الفاتورة ديال الضّو بالنَّصْ
_ ولكن حْنا متّافقين شْحال هادي باللي أنتَ تْخلَّصْ جوج ثلثْ وْ أنا غير الثُّلُثْ حيت أنت عندك ثلّاجة كبيرة فالحانوت وْكتاكولْ بزّافْ الضّو
_ واخّا ولكن أنت راك تْشدْ لانْجيري (بالعربية الجزائر)
جواب غريب وعجيب .خونا بالله كيْظنْ باللي راني نتفرّجْ فالتلفزة ديال الجزائر كنستهلك الكهرباء اكتر من القانون.طلبت منّو يشرح لي حيت انا ما فاهم والو.
خونا بالله قال لي : تاوريرت بعيدة على الجزائر ما يمكنش تْشَدْ التلفزة ديالهوم .هو كيْشوف باللي راني شْريت هداك الجهاز اللي ساعدني باش نلْتقَطْ البرامج ديال الاداعة والتلفزة الجزائرية ، زعما هداك الجهاز كيْسْتهْلك الضّو بكتْرة.
هدا هو الكلخ والا فلا.
باش نْحل المشكل عْطيتو خيط دايزْ من التلفزة ديالي للتّلفزة ديالو باش حتى هو يتمتع بالاداعة الجزائرية.من بعد خونا بالله اكتشف باللي كاين قنوات ديال اسْبَنْيول والبرتْقيزْ (اسبانيا والبرتغال)
هاد خونا بالله سْميتو عبد الرحمان كان قاري مسكين حتى للرابع وخارج كسول يمكن كان هو التّالي ديال القسم.كان مسكين بعض المرات تْجيه شي رسالة كنقْراها لو ونشرحها لو.باش يشكرني اما يعْطيني موناضا أو كاس حليب.
كانت عندي معاه علاقة محدودة .ما عمرو شريت عليه شي حاجة من غير الخبز ولحليب.


الجزء الثالث : حوميدي والمختصر المفيد

من بعد 3 سنين كانت عفاف عندها عا
م ، رحلت من عندو باش نسكن حْدى المدرسة .الصراحة كنت نمشي للخدمة حتى نسمع جرس الدخول وفالاستراحة ديما راني فالدار باش نشرب الشاي أو كأس قهوة بلحليب.
فهداك العام كنت مْشيت لْفاس باشْ ندوَّزْ الامتحان ديال السلّم 10.باقي عاقل واحد المعلمة فاسية كانت تخدم معايا ، كانت هي المقابلة ديالي فالقسم الثالث هي شادّة العربية وْانا الفرنسية.
في فاس ماكانش عندي شي واحد فالفاميلة .لهادا كان خاصني نكْري فالأوطيل.المشكل لكبير اللي عرفتو من بعد ان المرشحين ديال وجدة وبركان وتاوريرت والناضور كولهوم خاصهوم يمشيو لفاس.يعني فاس واخّا مدينة كبيرة موحال الى هاد البشر غادي يلقاوْ سرير لكل واحد.تصورو ان شي صحابي خلْصو الليلة ب400 درهم .
المهم خوكم الحوميدي جاه لْخير حتى للدار.المعلمة الفاسية اتاصلت بالواليد ديالها وقالت لو باش ينتضَرْني فمحطة القطار.قالت لي غادي يلقاكْ بابا وتمشي مْعاه عندنا للدّار حتّى تْسالي الامتحانات.مازالْ عاقل الامتحانات دوّزْناهوم فيومينْ.
الصراحة الوالد ديال الأستادة سعاد كان فالمستوى.كان مسكين فالمحطة كينتاضرني .الحمد لله كانت عندي التصْويرة ديالو .غير شفتو عيَّطْتْ لو.هي هاديك مْشينا فالطوموبيل ديالو للدار.كان ساكن فواحد الفيلا تبارك الله كبيرة وفيها حتى لابيسينْ.(المسبح)هاد السيد كان عايش غير بوحديتو.الزوجة ديالو على ما حْكالي تْوفّات مين كان عند بنتو هي الصغيرة يا الله 3 سنوات.ربّاها كيف ما ربّى جوج خوتّها اللي كان عندهوم الاول 7 سنوات والثاني 4 سنوات.هدا أب ضحّى بالشباب ديالو وما بغاش يتزوج وحْنا كنعّرفو أن الرجل يا الله تموت لمْرى ديالو غير يْقبَّرها (يدفنها) يمشي دغيا ياخود ليه شي وحدة باقية عندها سْنانْ لحليبْ
هاد خونا بالله الدار عندو نقية ومنضْمة بْحال الى عندو لمْرى فالدار.قال لي باللي هو كيعتمد على الخادمات .يمكن عندو جوج أو 3 ديال الخادمات : وحدة مكلّفْها غير بالنظافة ديال البيت ، الثانية كل اللي يهم الأكل والشراب والثالثة كل مسائل التصبين والكسوة
ولكن هاد السيد راه بورجوازي كبير.
اليوم الأول اللي وصلت عندو لْقيتْ طابلة مْعمْرة مأكولات وشروبات.قال لي : كول أولدي باشْ تْركّزْ مزيان فالامتحان.
فالصباح بكري بعدما فْطرْنا هو اللي وصّلني للمدرسة فين خاصني نْدوّز الامتحان.قبل ما يْخلّيني قال لي : غادي نرجع مع الطْناشْ باش نمشيوْ نتغدّاو فْشي مطعم فخْم.
فالامتحان كان الرقم ديالي هو 20 .يعني الأخير فالقسم.خوكم بالله يعني أنا .قرّرْت باش نكتب باللغة الفرنسية المواضيع ديالي كاملين .تْصوْرو حتى مادة التشريع دوّزْتها باللغة الفرنسية.باشْ تعَّرفو باللي الحوميدي راه فرانْساوي ديال
بصّاح .
حاجة أخرى بْغيتكوم تستافدو بيها وهي أني يمكن كتبت ما كاملاش 15 سطر .ماكاينش بْحالْ ما قلَّ ودلَّ.باقي عاقل كانو جوج أساتدة يحرسونا : استاد مع أستادة.
انا كنت ساليت تقريبا فساعة .مين بْغيتْ نمشي فْحالي ، جا عندي واحد من اللي كانو يحّرسونا وقال لي :
_ زيد شوية راجع يا أستاد راك ما كتبتي والو
شفت فيه وردّيت عليه : ما تقلقش عليا راني كاتب بين السطور.
مسكين تْمعّن فالورقة.باينة ما فْهمْ والو
خلّيتو ومْشيت في حالاتي.سْمعتهوم وْأنا حْدى الباب الأستاد يتكلم مع الأستادة : بْقى فيا مسكين ما كاتب والو.
المهم فْلعشية بعدما تغدّينا مزيان .الصراحة غّدى ديال الأمراء.استعملت نفس الطريقة : الاختصار المفيد.هاد المرّة كانو جوج اساتدة كْبارْ فالسن ما تقولو عليهوم غير فَقْها فالدين.
واحد فيهوم قال لي مين اعْطيتو الورقة : زيدْ شوية راجع أأستاد راك ما كاتب والو.
جاوبتو غير ما تقلّقْشْ راني كتبت داكْ شي بلغة موليير
_ شكون موليير ؟ قال لي مسكين : ما عمّرْني ما سمعت بيه
_ موليير كاتب فرنساوي كبير عندو مع المسرح والشعر والكوميديا.
_ اوى آشْ دخّلْو مع الامتحان ؟
_ والو غير كتبْتْ باللغة ديالو
_ واه ؟
_ واه.
حتى هو خلّيتو ما فاههم كيف ماتقولو حتى زفّتة
لْغدْ ليه كانت عندي غير الصباح اللي ندوْزو فيه الامتحان .دائما خوكم الحوميدي شوية فيها البركة.
فلعشية وصّلني الواليد ديال سعاد لمحطة القطار .فوق هاد الشي خلّصْ لي التدكرة وعْطاني شي حْويج ليا وحوايج نْوصّلهوم لبنتو سعاد
قبل ما نْودعو طْلبْ مني باش نعطيه رقم الامتحان حيت يعرف شي ناس يقدرو زعما يْشوفو شي لْعيبة باشْ ننجح.
الحوميدي ديما يبغي ينجح بدْراعو ماشي بدْراع عباد الله، جاوبتو اسمح لي الحاج أنا جيتْ بْحالي بْحال عباد الله .الى نْجحت ، داك الشي اللي بْغيتْ.الى جبْتها فالطْبَكْ (يعني خسرت) غادي تكون تجربة نستافدْ منها للعام الجايْ
ما لْقى ما يْردْ غيرْ :
_ اوى خاطرك أولدي


يتبع هذا المساء إن شاء الله

 

bouchaib56

::مراقب مغربي ::

غير متصل
#29
رد: قصة بالدارجة المغربية : مذكرات معلم في المدينة

الان نوع من المحن اخرى
مجملها في السكن وظروف العيش
والماندا على قدر الحال
يمشي صداع ايبان صداع من نوع اخر

اخريتها انوثوا العصب وقلة الراتب
 

Houmidi59

::الفارس المغربي ::

غير متصل
#30
رد: قصة بالدارجة المغربية : مذكرات معلم في المدينة

الحلقة رقم 17 : ذكرياتي مع أخي جمال الله يرحمو (1)

الجزء الأول : علاقتي بأخي جمال

فهاد الحلقة غادي نتكلّم ليكوم على أخي جمال الله يرحمو فهاد النهار.أخي هادا كنت كبير عليه بْعام فقط.كنّا بجوج أنا ويّاه بْحال المشْ (قط) والفار.طبعا المشْ هو أنا ولكن هو كان بْحال داك جيري دائما يغلب طومْ .ما نكدبش عليكوم الى شي وْقيتاتْ كنت نكَّرهو حيت كان يْديرْ ليا شي حْوايجْ كنت نرجعْ فيها شوهة فالدرب.بطبيعة الحال كان هاد الشي في فترة الطفولة والمراهقة وفي الفترة الاولى قبل التوظيف والزواج.
انا مْشيتْ للتعليم بينما هو اتّجهْ جهة العسكر.من بعد اصبح موطف فإدارة الدفاع وكان إطار مهم بفضل الاخلاص والتفاني فالعمل وحتى بالخبرة ديالو اللي اكتسبها فالدراسة وفالعمل.المهم كل واحد فينا كان شاد طريقو.فْديك لوْقيتة كانت العلاقة بيني وْبينو باردة .انا صراحة كنت نْحاول نْبعْدو على حقاش كنت باقي نتفكّر ديكْ التّاشيطانيتْ ديالو.واخّا هاكدا مين نمشي للرباط باش نشوف الوالدين نتلاقى بيه.بالطبع نسلّمْ عليه وناكول ونشرب معاه فالدار ، لكن باش نمشي مْعاه للقهوة أو نبقاو بجوجْنا نتفرجو على التلفزة.خوكوم الحوميدي ديما خاوي لو السكتور.
دازت الأيام هكدا ، كل واحد فينا أتْزوّج ودارْ دارو.
الاخ ديالي كان كْرى شي دار ماشي بْعيدة على دار الواليد.واخّا هكدا ماكنتش نمشي عندو بْلا ما يعْرضْ عليا.
باختصار كانت العلاقة باردة بيناتْنا.
ربما عاقلين فالمدكرات ديالي راني كنت تْكلّمت عليه ولكن غير بِعُجالة.هاديك لوْقيتة هو كان خاطب بنت خالتي .تصورو أنه نْهار اللي جا لتاوريرت ، ما جاشْ على قِبَلي ، راه جا يْشوفْ صاحبو الطالبي .باش تعّرفو ان العلاقة بيناتنا كانت ماشي عادية.

الجزء الثاني : أخي جمال وبداية المرض

قبل ما يمرض أخي ، كان انسان دائما كيفْتخر بأنه ما عمرو يمْشي للسْبيطار (المستشفى) حيتْ هو قوي .زعْما هو ما يْوجْعو لا راسو ولا كرشو ماشي بْحالي أنا.باقي عاقل كان يْضحّكني مين يقول للواليدة انا ما فهمتش هاد قضية الشبعة .كان يشرح لينا : انا ناكول ولكن ما حاسْ والو بالشبعة .نقدرْ نْزيدْ ناكول ماكاين حتى مشكل .واش هادي هي الشبعة ؟
هادي باش تعرفو باللي خونا بالله كان في صحة جيدة.
واحد النهار جا لعند الواليد يا الله بواحد العام من الزواج ديالو .ديك لوْقيتة كنت حتى أنا فالرباط باش نقضي العطلة الصيفية ديالي.قال للواليدة انا غادي نمشي للْميريكان راه عندنا سْطاج.الواليدة سوْلاتو شْحالْ غادي يبقى .جاوبها باللي هاد السطاج غادي يْدوم 6 شْهور.
الزوجة ديالو اللي هي بنت خالتي ما بْغاتشْ تْجي تسكن مع الواليدة.لهادا كان علينا حْنا نمشيوْ نْزوروها ونْشوفو آشْ خاصها.هادي قصة أخرى ماشي لازم نْعاودها هنا.
المهم باقي عاقل اليوم اللي رجع فيه من الميريكان.كانت عندنا عطلة يمكن الى العطلة الربيعية .انا كي العادة العطل ديالي ديما مع الوالدين : كنت عازب أو متزوج.الوالدين هوما كولشي وايّاكوم تسمحو فيهوم.الحمد لله انا مرضي الوالدين من بكري.ما عمرو سافرت لْشي بْلاصة قبل ما نشوف الواليد والواليدة.
المهم مْشينا للمطار باش نستقبلوه .الأخ ديالي جا ديريكت عند الواليدة.ما بْغاشْ يمشي لبيت الزوجية .حتى كان يعرف حق الوالدين ومن الفوق ما عجبوش الحال علاش الزوجة ديالو ما بْغاتش تسكن عند الواليدة.المهم بْغى يعْطيها درس وفعلا نْجحْ فيه.
غير وْصل ، حلْ الصاك.واحد الصاكْ كبير .كانو فيه بزاف ديال لحْوايج ديال الميريكان.
باقي عاقل ، قال لينا وحْنا مجموعين أحْداه : يا الله اللي عجْباتو شي حاجة ياخودْها. بْقينا مبهوضين .اللي كان من بعد الدهشة كل واحد بْدى يختار
_ انا بْغيتْ هادي
_ هادي دْيالي
_ ارى هادي ، راها ما تصلحْشْ ليك
الرْوينة ناضتْ ولكن كل واحد ادّى اللي بْغى.
داك الشي اللي بْقى جمعو فالصاكْ : هادا غادي نْخلّيه لزوجة ديالي والاصدقاء اللي يمكن يزوروني
الاخ ديالي الله يرحمو كان ديبلوماسي .قال لينا الهدايا ديال الشّاف والزملاء اللي معايا فالخدمة ها الصّاك ديالهوم.
الواليد والواليدة حتى هوما جاب ليهوم الكادوات ديالهوم.كان صراحة مْنَضّمْ بزاف.
انتهت العطلة ورْجعت لتاوريرت.هو كدالك رْجع باشْ يخدم كي العادة.
دازت أيام ، لاحضْ جمال شي بُقَعْ فلْفخِدْ ديالو بقع لونها أزرق.هاد البقع معروفة عند الناس باللي هي من علامات فقر الدم.خويا الله يرحمو شْحال ضْحك :
_ واه انا عندي فقر الدم .انا ديما ناكول مزيان وما كنعرفش الشبعة يكون عندي الدم ناقص.موحال يكون هادا مْبصْحْ.
الواليد قال لو : خاصّك تمشي ادّيرْ التحاليل.
حيت هو تابع للْميليتير ((militaire) مْشى ديركت لمستشفى محمد الخامس.

يتبع غدا الجزء الثالث والرابع من دكريات أخي جمال الله يرحمو
 

Houmidi59

::الفارس المغربي ::

غير متصل
#31
رد: قصة بالدارجة المغربية : مذكرات معلم في المدينة

الحلقة رقم 18 : ذكرياتي مع أخي جمال الله يرحمو (2)

الجزء الثالث : مينْ المرض بانْ وظْهرْ

نتائج التحاليل كانت عجيبة وغريبة.ياالله جمال فاش دخل للمستشفى، شدّوه الفرْمْليات وْحطّوه فالناموسية .بقاوْ يْشوفو فيه ويْقولو : سبحان الله العطيم.
الأخ ديالي حيت كيعرف الاغلبية ديالهوم ، بْدى يضحك وْ قال ليهوم : مالْكوم مع هاد الخلعة ؟ ياكْ ما لْقيتو باللي الدّم ديالي ولّى أخضر؟
جاوْ الدكاترة حتى هوما.واحد فيهوم قال للأخ ديالي : سّي جمال .كيفاشْ تْحسْ بْراسك ؟ واشْ تْجيكْ شي دوخا ؟ واشْ كترْعف ؟
جمال ما لْقى ما يقول حيتْ هاد الأسئلة بانتْ لو فْشي شْكل.
واخّا هكْدا من الأدب والصْواب ردْ على الدكتور : الحمد لله أنا بخير وعلى خير.
الدّكاترة بْداوْ يتْهامسو بيناتهوم.فلْخَّرْ ديسيداوْ يَخَّبْرو خونا بالله اللي بانْ باللي راه فْدار غفْلونْ
_ شوف أولدي أنت راها حالتك جد خطيرة
صافي جمال ما بْقاشْ يْضحكْ .بْحال والو يْكون أرْجعْ أصْفر كي الليمة (الحامض)
_ واه أدكتور واشْتا (أشْنو) عندي بالضبط ؟
_ الحالة اللي عندك كونْ جاتْ لْشي حدْ من غيركْ كونْ راهْ ماتْ شْحال هادي
_ دكتور راك خْلَعْتني واشْتا عندي ؟
_ شوف أولدي ماغاديش تقدر تفهم ولكن أنا غادي نْبَسَّطْ لك الحالة ديالك
الانسان عندو فالدم الكريّات البيضاء والحمراء .المشكل انت عندك فالكريّات البيضاء.عندك واحد العدد منها ما يمكنش يتصورو أي واحد
_ شحال أدكتور عندي منهوم ؟
_ عندك أكثر من 100.000 كريّة بيضا في اللتر.
_ واه ؟ من المفروض شْحال خاص يْكونو ؟
_ ما بين 6000 و11.000 كريّة
_ واخّا أدكتور زعما أنا راني قاري .بْغيتْ نعرف المرض ديالي كي سْميْتو ؟
_ la leucémie
_ هادا راه سرطان ؟
_ اوى بْحالْ داك الشي.سرطان ديال مخ العظام.
_ واش بعدا عندو شي علاج ؟
_ عندو ولكن فالمغرب ما كاينش .خاصك تمشي لفرنسا الى بغيتي تعالج
_ الله يخلّيك بْغيتْ نعرف العلاج كيفاشْ دايرْ
_ خاصّك عملية ديال زرع مخ العظام (greffe de la moelle osseuse)
جمال بْغى يعرف كولشي ولكن الأطباء قالو لو : كولْ حاجة بْوقتها.دابا أنت غادي تبقى مْعانا تحت المراقبة الطبية لمدّة 3 أيام.من بعد غادي نْشوفو آش يمكن نْديرو ؟
المهم هوما عيْطو على الواليد والواليدة.مْساكين الوالدين جاوْ مخلوعينْ ولكن الطّبّا (الاطباء) طماْنوهوم : ما تقلقوش ما يكون غير الخير
بعد 3 أيام بانْ عْجبْ آخورْ.قبل ما يخرج تْقيّى جمال الدم أحمر يمكن تقريبا دايزة لتر ، الله يستر على ما حْكاوْلي دمْ مْكبَّدْ (sang coagulé)
من هنا بداَتْ معاناته مع المرض الخبيت
باشْ ما نطوّلْشْ عليكوم ، كان خاصْ أفراد العائلة باش يْديرو التحاليل ديال الدم ويْشوفو الفصيلة المطابقة في كل مكونات الدم مع الفصيلة ديالو.الاخوان ديالي كولهوم والاخوات والواليد والواليدة وعمّي ...المهم تقريبا العائلة كاملة ، ناقصها غير الحوميدي على حقّاش كنت فتاوريرت
الواليد اتصل بيا باش يخبرني باللي كاين وطْلبْ مني نْجي فْاَقربْ وقت ممكن
خوكوم الحوميدي فالغد ليه سافر مع زوْجتو للرباط.
في اليوم الموالي ، مْشيتْ درتْ التحاليل.من بعد رْجعت لتاوريرت حيت كانت عندي رخصة طبية ديال 3 أيام فقط.
داز أسبوع وطهْرات النتائج : دم الحوميدي هو اللي يصلح .لهادا هو اللي يمكن يعطيه من المخ ديال العمود الفقري ديالو .خوكم الحوميدي مين وصلو لخْبار تَخْلعْ.اما فالرباط كولشي فْرحْ.

الجزء الرابع : الحوميدي بين ناريْنْ : الانتقام أو التضحية


جمال الله يْرحمو حسْ بأن هداك اللي كان يحتاقرو هو اللي بْيَديه لعْمرْ ديالو.سبحان الله يا إخواني كان الله يرحمو يقول أنت ما فيك فايْدة.ربّ العالمين هو المطّلَعْ على كل شيء.هاهو يبرهن لو باللي الى الحوميدي ما بْغاش ، صافي غيرْ شهّدْ : راها الموت جايَّتَكْ
كانت لي اشكالية : واشْ نقبل ؟ واش نرفض ؟
الى قْبلت ، العملية راها خطيرة وفي طور التجربة.يعني تقدر تنجح وتقدر تفشل.أضف الى هدا راها يمكن تعْدمني.اوى آشْ المعمول ؟
الصراحة كنت متردّد .بْلا ما نكدب عليكوم كنت ما باغيشْ نعّتقو .كل ما نفكّر داكْ الشّي اللي دار مْعايا ، نقول مع راسي : هدا واخّا خويا ما يستاهلْشْ نْضحّي من أجْلو.
الفكرة ديال الرفض كانت ولكن كنت نفكّر فالوالدين ، آشْ غادي يقولو علي ؟ موحال الى غادي يْسامحولي الى ولدهوم مات.
الصراحة شهر وْأنا تنْفكّرْ
فْداكْ الشهر رَسْلو الدم ديالي وديال أخي جمال الى فرنسا بالضّبْط مستشفى سان لويز ( Hopital Saint LOUIS)
حالة جمال زادت من سيء الى أسوء.المشكل أنه جاتو حالات ديال التقيّء ديال الدم.الى زاد على هاد الحالة صافي غادي يْموت
الواليد والواليدة بْداوْ كل يوم يتّاصلو بيا عند واحد مول الحانوت باشْ يتْكلمو معايا.كانو يْرغْبوني : أولدي الله يرضي عليك خاصّك تعّتْقو ، راه زعما خوك
الواليد مسكين الله يدكرو بخير كان ديما يقول ليا : أولدي حميد أنا حاسْ باللي أنت حاسْ بيه.انا عارف داكْ الشّي اللي دار فيك ولكن راها ماشي لافوطْ ديالو راها ديالي .أنا اللي كان خاصْني نْوَقْفو عند حدّو.دابا ها هو البرهان ديال الله .غادي تْشوف أولدي الى تْكَتْباتْ ليه عْمورْ جديدة راك بالفضل ديالك .عنداك أضَّيَعْ هاد لاجَرْ
فعلا قْبلتْ.الواليد كيعرفني ديما كلمة وحدة.هي هاديك مْشى باشْ يعلم السْبيطار ديال فرنسا بالقدوم ديالنا.
باقي عاقل كان الموعد اللي عْطاوْنا هو 18 دجنبر .يعني نكونو باقيين ما شدّينا العطلة.العطلة كانت ديك لوقيتة ف22 دجنبر.
هادي قصة أخرى من مدكرات معلم فالمدينة


تابعوا البقية مع الجزء الخامس والسادس يوم غد إن شاء الله.



 

bouchaib56

::مراقب مغربي ::

غير متصل
#32
رد: قصة بالدارجة المغربية : مذكرات معلم في المدينة

القصة مشوقة ولو انها مؤلمة
معقول كل واحد يخاف على راسو
كل يعيط راسي أراسي
هنا محنة اخرى خليها على الله
الكاميرا دايرة عندك
تعطي الراس للنحيرة أو اتعادى مع الوليد والخوت
ربما انت تقرب من مفاجأة ستغير مجرى القصة المؤلمة
 

Houmidi59

::الفارس المغربي ::

غير متصل
#33
رد: قصة بالدارجة المغربية : مذكرات معلم في المدينة

الحلقة رقم 19 : ذكرياتي مع أخي جمال الله يرحمو (3)

الجزء الخامس : مينْ تْلاقيتْ مع السيد النائب الإقليمي

الموعد كان ف18 دجنبر والعطلة ما تبْدى حتى ل22 ، يعني خاصني شهادة طبية ديال أسبوع .المشكل اللي كاين خاصني نْجيبْ رخصة ديال مغادرة التراب الوطني.كيفْ ما تعرفو هاد الرخصة تعطيها النيابة الإقليمية ديال وزارة التربية الوطنية لكل موظف فقط خلال العطل الموسمية والصيفية فقط.بعدما درْتْ الطلب عن طريق المدير ولكن رفضوه لي.
كان علي نمشي نيشان عند النائب الإقليمي ونشرح لو الظروف اللي جعلتني خاصني نسافر قبل العطلة.كان واحد النائب الله يعمرها دار من فاس .كان معروف عليه الجدية والحزم.المهم استقبلني :
_ آش حبْ الخاطر أولدي
_ بْغيت رخصة مغادرة التراب الوطني
_ نعم أولدي ولكن ماشي دابا حتى ل22 من هاد الشهر
_ ولكن أسعادة النائب أنا خاصني نكون ففرنسا يوم 18 من هاد الشهر
_ لا زرْبة على صْلاحْ
_ الى تعطيني شوية من وقتك غادي نحكي ليك الظروف اللي جعلاتني نسافر قبل العطلة
فعلا شرحت لو كولشي.خونا بالله كان يسمع ليا بلا ما قاطعني.سبحان الله العظيم هاد المسؤولين لكْبار فيهوم هاد العادة زينة يْخلّيوك تْفَرّغْ اللي فْقلْبكْ ، يا الله فاشْ تْسالي ، يهجمو عليك.داك الشي اللي وقع :
_ ولدي انا ما موافقش على السفر ديالك لفرنسا
_ ولكن أعلاشْ أسعادة النائب ؟
_ أولدي ما باغيشْ نْضيَّع موظف
_ كيفاش زعما ؟
_ هاد العملية باقية فالتجربة على ما قلتي ليا ، يعني تقدر تنجح وتقدر تفشل.
_ عندك الحق سعادة النائب ولكن أنا غادي نتوَكّلْ على الله
_ الا أولدي لا ، هادا راه انتحار
_ ما عليهش أسعادة النائب الى كانت في سبيل الأسرة والوطن ما كاين حتى مشكل
_ يعني راكْ مْصمَّمْ
_ نعم سعادة النائب وبدون تردد
_ أنا كنهنيك على الشجاعة والمروؤة ديالك
_ زعما غادي تعطيني الرخصة
ضحك خونا بالله وقال لي : أسيدي حتى الى بْغيتْ تمشي من غدّا راها مفتوحة
قبل ما نمشي قلت لو : غادي نعتارف لك بواحد الحاجة أسعادة النائب
_ إيه ؟
_ الصراحة كنت من قبل غير نْقلّبْ على السبّة غير باشْ ما نمشيشْ مع الأخ ديالي
_ وعلاشْ دغْيا تقْلبْتي؟
_ الضمير ديالي كان ناعس وراه فاقْ
_ الضمير ؟
_ ما شي الضمير المهني ، هداك راه عندي من أول يوم دخلت فيه للتعليم.هدا الضمير العاطفي
_ واه هدا ما عمرو سمعت بيه
الصراحة ما جاوبتوش ، على حقاش ما فيا ما نزيد فالهضرة .معاكوم انتوما ما كاين مشكل
المهم نْزلت لتحت عند الكتابة كيفْ ما قال لي السيد النائب.يمكن راه اتصل بيه واعطاه التعليمات
يا الله وصلت عند خونا بالله ، قال لي :
_ وقتاش بغيتي هاد الرخصة تْكومانْسي (تبدأ) ؟
_ من غدا الى كان ممكن
_ واخّا ما كاين مشكل ولكن خاصها تْبدّي مع الرخصة المرضية ديالك
_ عندك الحق .الرخصة عندي من 15 دجنبر حتى ل21 .
_ صافي غادي تكون عندك رخصة مغادرة التراب الوطني من ال15 حتى ان شاء الله تْسالي العطلة.غادي نْخلّيوْها حتى ل10 يناير.ربما تقدر تْزيد شي أياماتْ مورا العطلة
_ بارك الله فيك أسّي محمد


الجزء السادس : الرحلة لفرنسا بْداتْ


فالمدرسة ، المدير تبْهضْ مين ورّيتو الرخصة :
_ أسيدي ما عندي ما يتْسالك .ولكن زعما أبّاكْ فالرباط ، تقدر تْجيبها
خلّيتو على هْواهْ
_ عندك الحق أساعدة المدير
_ سعادة المدير ؟ واه ما عمرو ما قلتيها ليا هادي
_ اوى مرّة مرّة تكون حْلوة ولكن ماشي ديما
_ كيفاش زعما فسّر لي ؟
_ شوف أسّي محمد ...
_ اوى ها اللي قلْنا
كيف ما لاحظتو كثرة الهضْرة ما شي مزيانة .المهم كان علي نمشي للقسم باش نخدم مع أولاد الشعب.
الغد ليه ، اتصلْت بالطبيب اللي فالمركز الصحي باش نحصل على شهادة طبية مدتها 7 أيام.
اوى لخّوت النهار الأخير ديالي فالمدرسة تْوادعْتْ مع صْحابي المعلمين والمعلمات والمدير وحارس المدرسة وحتى التلاميد ديالي .قلت ليهوم : الله يْهنيكوم وراحنا متْسامحينْ.بْحال زعما خوكوم الحوميدي غادي لأفْغانستان باش يحارب .
مين وصلنا لمحطة القطار ديال الرباط ، لْقيت الواليد والواليدة كانو ينْتاضْروني.خوكم بالله راه زعما مهم .
فالدار كانت العائلة كولها ولكن جمال الله يرحمو ما كانش.كان فالمستشفى حيت عاود تاني سال الدم من جوفو وهاد المرة بكترة.
المهم كانو التداكر موجودين .الواليد اتصل بواحد خالي فالخارج باش يتْعرَّضْ لينا فالمطار ديال أورلي الدولي.خوكم ما عمرو مْشى لفرنسا ، النهار اللي غادي يْشوفها غير باشْ يْودّع صْحابو وحْبابو.ما عرفتش آشْ وقع لي .حتى فالطيّارة حسِّيتْ بضَيْقْ التنفس.المضيفة قالت لي باللي هدا راه عادي.المهم جابت لي عصير ديال الليمون.
السفر دام يمكن جوج سوايع ولكن باش الطيارة تنزل غير فالمطار كان خاصها جوج سْوايع أخْرين.
المطار ديال باريس راه بحال شي خلية ديال النحل : 10 ديال الطيّارات طالعين و20 طيّارة نازلة.آه يا لخّوت مطار الرباط اللي زعما فيه الحركة مرّة كل 4 سوايع عاد تْبانْ ليك طيارة جايّة وتقدر تْشوفْها من دارك بلا ما تمشي للمطار
فباريس السما فيها الضباب ، الشمس قليل فين تْبانْ.ياكْ زعما راحنا في فصل الشتاء.
انا بعدا الحاجة اللّوْلى كنت باغي غير نمشي للدار باشْ نرتاح حيت الجو ديالهوم جاب لي الغوفة
الحمد لله كنت شْريتْ من قبل واحد البالطو من سوق تاوريرت يمكن يوزن 10 كيلو .ما يدخّل لا برد لا ريح.كاعْ ما حسّيتْ بالبردْ ديالهوم
خالي بوزيان كان ينتضرنا فالمطار .أسيدي نصراني مع راسو .كان هاز واحد اللافتة كاتب فيها بالفرنسية : Hamid et Jamal .راكو فهمتوها
بعد السلام والكلام اللي لابد منّو .مْشينا قاصدين دار خالي بالطوموبيل ديالو.تقريبا ساعة ديال الطريق باش وْصلنا .

يتبع هاد المساء الجزء السابع والثامن من مدكرات معلم في المدينة
 
التعديل الأخير:

bouchaib56

::مراقب مغربي ::

غير متصل
#34
رد: قصة بالدارجة المغربية : مذكرات معلم في المدينة

الأمور بدأت تتسع رقعة خطورتها للحالة الصحية المرضية ل جمال أخ حوميدي
والموت تنتظره; هذا الموظف العسكري الشجاع لم يعرف الطب; لما كان يتمتع به من صحة جيدة
مات تاركا وراءه :بنتين او ثلاثة ;وزوجة أرملة; لولا توظيفها ;في محل زوجها بوزارة الدفاع بالرباط ;لكانت مأساة أخرى ستنضاف لعائلته الصغرى والكبرى.
رحم الله الفقيد .وأسكنه فسيح جناته.
انا لله وانا اليه راجعون.
الموت علينا فرض .
وكل نفس ذائقة الموت.
ومازالت الزوجة: العنيدة ;المشاكسة; رافعة العصيان والطاعة بالمعروف;لحماها وحماتها; ولحوميدي ;واخوانه واخواته ;عرفنا من القصة عند سفر المرحوم الى امريكا لم تقبل السكن مع والديه .
وأم زوجها المرحوم تبقى خالة الزوجة المشاكسة الى يومنا هذا ترفض الاندماج مع خلية زوجها وقريبة من عائلتها.

الله يهدي ماخلقويبرع القصاصفي وصف حيثيات هذه القصة ويخرج منها بطلا شجاعا مضحيا بروحه في سبيل اخيه.
لاتقل شئنا ;ولكن الله شاء.

 
التعديل الأخير:

Houmidi59

::الفارس المغربي ::

غير متصل
#35
رد: قصة بالدارجة المغربية : مذكرات معلم في المدينة

الحلقة رقم 20 : ذكرياتي مع أخي جمال الله يرحمو (4)

الجزء السابع : جولة في باريس

هدا خالي بورجوازي.عرفتو فين ساكن ؟ فْ مونْ فيرمايْ (Montfermeuil) هذا فيلاج في ضواحي باريس فيه منازل فاخرة بْحال لقصورا ، زعما مبنية بالقرمود الاحمر.الى ما خفتش نكدب القصة ديال البؤساء وقعت فهاد القرية.
المهم ، غير وصلنا تغدّينا مع أولاد وبنات خالي .من بعد جا خالي وقال لينا غادي تمشيوْ لْبيتْكوم باش ترتاحو شي شوية.
فقنا مع ديك الخمسة ، خرجنا نشوفو باريس .المناظر ديال هاد المدينة رائعة خاصة الى طلعتو لبرج إيفيل .المشكل أنه شْحال ما طْلعتو من طبقة تْخلْصو عليها ثمنْ .ولكن كاين الفابور اللي هو الدروج.بانو لي النصارى مساكين مرخيينْ بزاف.خوكم الحوميدي طلع الدروج حتى وصل تقريا النص ديال البرج ولكن عييتْ.بعدا ربحنا معاهوم هاديك 80 فرنك فرنساوية .
من بعد مشينا لواحد القهوة كولشي فيها نقي.شكون اللي باركين فيها ؟ ماكاين غير أصحاب الماليطاتْ وصْحابِ لكْرافاتا والكوستيم.انا بعدا كنت لابس داك البالطو ديال 10 كيلو .كنت نْبانْ بحال هادوك اللي فالرّوس يْلْغاوْ لهوم التْزارْ (tzar) .من خصوصيات هاد القهوة وهو أنك عندك مدة معينة ، الى دزْتيها خاصّك تهَزْ قلوعكْ أو تطلب شي مشروبات حيت المشروبات اللي طلبتي فالأول صافي تْقاضاوْ مع المدة الزمنية.ولد خالي شْرح لينا هاد الأمر وأمور أخرى للأسف ما رانيش عاقل عليها.
من بعد مْشينا لْشي قنوات تحت الأرض يعني سوتران (soutterrain) زعما بالدارجة بوخْرارب .هادو قوادس كْبار يدخل فيهوم حتى الفيل .فيهوم بزاف ديال الممرات وكل ممر فين يْوصّلْ.المهم تسارينا فيهوم واخّا أنه فْشي وْقيتة هْملْنا.ولكن النصارى مْقوْمين حيت كاين لبْلايكْ (plaques et panneaux) اللي يساعدو الزوار باش يلقاوْ طريقهوم.
هاد الرحلة جوْعاتني .غير قلت لخالي باللي كرشي طالبة المعونة أُو هو يضحك وقال لي : واش تبغي تتعشى فْشي مطعم أو نتعشّاو عند خالتك فطيمة ؟
خوكم الحوميدي باغي غير ياكول حيت جو فرنسا فتح لو الشهية.
اللي كان رجعنا بالزربة للدّار.لقينا عْشى فاعل تارك .
اللي عجبني صراحة ، هنا في باريس الديور فيهوم الشوفلاج والما ديما سخون .يا الله كاشا وحدة تكفي.
هديك الليلة نْعست بكري .جمال الله يرحمو ما كْلا تقريبا والو وكان يْبان بْحال الى خايف .


الجزء الثامن : سبيطار سان لويس



فالصباح وصّلنا خالي لمستشفى سان لويس .واه هدا راه مدينة .آه يا لخّوت باطيمات متراكمة ولكن كولشي منظّم.كاين واحد الكيشيات (guichets) كل واحد باش متكلّف.
خالي كان غير يسوّلْ كل مرّة حتى وصلنا لواحد القاعة كبيرة فيها كراسى طْوالْ يقدر بنادم ينعس فيهوم.جات لعندنا واحد الدكتورة زعْرا وزوينة.قدْمت راسها لينا : الدكتورة .......
جا خالي مسكين بْغى يْبانْ قال ليها بالفرنسية :
je m'appelle monsieur Bouzian et voici mes neveux Abdelhamid et Jamal Eddine
الطبيبة سلْمت علينا وقالت لينا مرحبا بيكوم.خالي عْطاها الضّوصي.لْقات عليه يا الله نضْرة صغيرة .صافي هاد خوتنا بالله دغيا كتفهم.هي هاديك شافت فيا وقالت لي :
C'est vous le donneur ?0
جاوبتها بنعم مادامْ.شافت فالأخ ديالي وقالت لو : ما تْخافش .كولشي غادي يْدوز على أحسن ما يرام
المهم عرضاتْ علينا باش نعسو فهادوك لكراسى.جابو شي آلات باش يحلْبونا.
واخد خوتنا بالله فرْمْلية بْداتْ غير تْعمّر فلقْراعي صغار.واش 20 ..30 40
واحد لوقيتة قلت ليها بالعربية : اسمعي أشْريفة راه الصْطوكْ ديالْ الدم غادي يتْقاضى ليا
المسخوط ديال خالي باغي يلعبها كبير قال ليها :
Mon neveu vous dit que vous l'avez vidé de son sang
الممرضة ابتسْمات.النصارى ما كيضحكوش فهاد المواقف هوما غير يبتاسمو .شافتْ فيا وقال لي :

Pas du tout cher monsieur ;je viens de prélever quelques centilitres de votre sang.C'est pour les analyses.

اوى الى كانو التحاليل بحال هاكدا خومكم الحوميدي موحال الى غادي تبقى فيه شي قطرة ديال الدم
على كل حال مرة تانية جات الطبيبة وبْدات تْسوّلْ فيا شي أسئلة عادية : واش تكْمي ؟ واش تشرب الشراب ؟ واش تمشي لْدور البغاء ؟ واش تلعب الكرة .الأغلبية ديال الاسئلة ديالها كان جوابي عليها لا.
بان لي باللي عجْبها الحال.قالت لخالي : هادا متبرّع مثالي .دابا نقدر نقول ليكوم أن العملية غادي تنجح غير خاصنا نتْأكدو باللي مكوّنات الدم كلها مْطابقة مع مكونات الدم ديال جمال الدين.
قبل ما نمشيو عرضات علي لواحد البيفي (buffet) فيه ما لذّ وطاب من مأكولات وحلويات.خوكم بالله اللي هو أنا طاح عليها بْحال شي صومالي داخل للسوق ديال الخضر فالمغرب .
جمال الله يرحمو مسكين مين حيْدو لو الدم أرْجع صْفر بحال الليمة (الحامض)
من بعد ودْعتنا الطبيبة وقالت لينا غدّا خاصكوم تْجيوْ تاخْدو النتائج ديال التحاليل .
فعلا الغد ليه مْشينا ديريكتْ لعندها.بعد السلام والكلام اللي لابد منّو، دْعاتنا نمشيوْ معاها للمختبر .
فالمختبر ، الطبيبة قْراتْ النتائج وقالت لجمال :
Félicitations ; votre sang est compatible avec celui de votre frère Abdelhamid.Donc la greffe de la moelle osseuse est faisable

من بعد ، مْشينا لواحد القاعة كبيرة فيها تلفزة كبيرة وقالت لينا غادي تْشوفو عملية ديال زرع مخ العظام مرحلة مرحلة .فعلا على ما شفت داك الشي بان لي ما يخْلعْشْ.خوكم بالله الآن اطمئَنْ .
من بعد شفنا لمريض حتى هو فواحد البيت بلاستيكي ما يدخل عندو حتى واحد .الماكلة ديالو كدّوز ليه غير بالأنبوب .المهم داك الشي اللي شفناه ما نقدرش نحكيه ليكوم .الصراحة تقريبا ما عاقل على والو.
من بعد رجعنا للدار ولكن هاد المرة جمال دخْلوه للمستشفى .صافي هو غادي يبقى باش يتبّع المرحلة الاولى ديال العلاج .هاد المرحلة غادي تستمر تقريبا شي 70 يوم.الحمد الله كولشي خالص من عند لاميتيالْ ديال المغرب.
اسمحو لي ما غاديش نحكي ليكوم على هاد العلاج ، راه شوية صعيب باش نحكيه.كل ما يمكن نقول ليكم أن جمال الله يرحمو دوّزْ أيام عصيبة.كنت كل يوم نْزورو فالمستشفى قبل ما نمشي نتْسارى.

الجزء التاسع : لمسارية في باريس

واحد النهار مْشيت عند واحد نْسيبي ساكن في سانْ دونيس (Saint Denis) خوكم الحوميدى مشى غير بوحدو فالميترو .شوفو راه اللي قاري ما عمرو ما يتلف.الصراحة اكتشفت شي بْلايصْ بحال تاتي (tati).هادا محال كبير بحال ألفا 55 ديال الدار البيضاء غير اوكان شحال كبير .فيه كولشي .الرْخا لله.تْقَضّيتْ منّو شحال من حاجة.
مْشيتْ من بعد لواحد الزنقة فيها البياعا تقريبا غير لعرب كيْبيعو النعناع القسبور الخبز .ولكن زنقة موسخة ومعفونة .لعرب فين ما مْشاو ماشيينْ مع لوْسوخاتْ ديالهوم. هاد الزنقة سميتها باربيسْ(barbes).كاينة واحد السوق ديال الخوردة .هادي فيها لعجب .باش تمشي ليها خاصك تْفيق بكري.مامْشيتش ليها بوحدي حيت هي بعيدة.كان خالي معايا مين زرتها وطبعا شْريتْ شي كاسيطات ديال القرآن الكريم.
باريس مدينة كبيرة وفيها ما يتْشاف.البشر هنا كل واحد أدّايْها فْسوقْ راسو.ماكاينْشْ اللي يهضَرْ معاك أو يْقولْ ليك "فين غادي ؟"
الواليد كان يتكلّم معانا تقريبا كل يوم.جمال كان عندو التيليفون باش يتكلم معاهوم.كولشي فابور.كان عندو التلفزة باش يتفرّج .المهم واخّا هكدا ما كان خاصّو والو.
ماسْخيتش بهاد لبلاد ولكن لابد من الرجوع .طبعا جبت معايا الموعد على ود العملية ديال زرع المخ. الموعد كان فالبداية ديال أبريل ، يعني فالعطلة الربيعية.هادا موضوع آخور .

انتهى هاد الموضوع .سيليه في ما بعد الأجزاء المتبقية

غدا تابعوا مذكرات معلم في المدينة : حوميدي والمستوى السادس


 

Houmidi59

::الفارس المغربي ::

غير متصل
#36
رد: قصة بالدارجة المغربية : مذكرات معلم في المدينة

الحلقة 21 : حوميدي والمستوى السادس


الجزء الأول : حوميدي ورأيو فالقسم السادس

أنا ما عارفشْ لحدْ الآنْ كيفاشْ دارو هاد خوتنا بالله وقنْعو المعلمين باش يقبْلو هاد المستوى السادس اللي ما فيه لا ربح لاخيرْ ؟ الصراحة كنّا نْقرّيوْ التلميد حتى للمستوى الخامس .مين ينجح ياخودْ الشهادة ديالو .من بعد يمشي باش يقرى فالإعدادي.فالإعدادي كانت السنة الأولى تْسمّى الملاحظة يعني بالفرنسية (l'observation) .فْهادْ السنة كيْبان التلميد اللي جابْ مْعاه شي بركة من الابتدائي ويْبانْ فيها حتّى اللي مْسالي مع قبْو.على كل حال هاد السنة هي ديال الدْريساجْ: اللي فيه ما يْزيدْ ، مرحبا بيه واللي فيه الدْغولْ ، فهاد المستوى يْقادّو لو الشغل باش يمكن عاد يستمرْ نحو الاعدادي.
دابا باركين علينا بْشي مصطلحات : ها الدعم ها التقوية ها الادماج ...هدا الباكور لاواهْ ؟
المهم هاد السادس خوكم الحوميدي ما ردْلوشْ البال حيت كنت نْقرّي ديك الساعة الثالث ومْهنّي مع قُبّي.
باقي عاقل العام اللي غادي يكون فيه هاد السادس المشؤوم ، دار المدير اجتماع مع المعلمين ديال السادس .قال ليهوم عندكوم تكوين.خوتنا بالله يسْحاب ليهوم غادي يرجعو أساتدة زعما بْحال ديال الاعدادي.حْنا فديكْ لوقيتة كنا معروفين بْإسم معلم ..هادي زعما الى البشر بغى يحتارمك ...أما أسماء التهكم بحال كوعلّيم أو ميطْ هاديك راها من عند هادوك الناس لمْراض اللي ديما حاسدين المعلم على ودْ العطلة ديالو
المهم هادا كلام .نرجعو للموضوع : قلت ليكوم أن معلمين السادس شافو الخير فهاد مشروع إضافة السادس مع الابتدائي.كل واحد وكيفاش كان يْشوفْ .كاين اللي بان ليه بأنه أصبح أستاد وغادي يبقى يْقري غير 20 ساعة ويكون عندو توقيت ديال الأساتدة ديال الإعدادي.كاين اللي مسكين قال مع راسو : غادي يْزيدوني شي حْصيْصة فالمانْضا (زعما تعويض) .
فلْأخير خوتنا بالله مين شدّو السادس وخدمو فيه بعد ما دارو تكوينات وسْطاجات اكتاشفو أنه نسخة طبق الأصل ديال المستوى الخامس.
شوفو هاد لمساخيط : ما بغاوش التلميد يْشد الشهادة ديالو على خمس سْنين ولكن ردّوها ليه 6.
الاساتدة ديال الاعدادي جبْروها من الجنة والناس .عندهوم الحق بدل ما يْشدّو 4 ديال المستويات عندهوم دابا غير 3 ديال المستويات ومن الفوق تْهنّاو من هاد الملاحظة اللي كانت تجيبْ ليهوم صْداع الراس وبلْعة ديال المشاكيل
الحمد لله ما كنتش من هادوك اللي مساكن كانو طامعين فْشي حوايج ما تكون غير فالخيال العلمي.انا هادو يْفكروني بداك الشي ديال أمريكا.الى قْريتو التاريخ امريكا اكتاشفوها يا الله هادي 2 قرونْ كانت خاوية ما فيها سكان من غير الهنود الحمر زعما ليزانْدْيانْ.هاد البشر الجديد اللي دخل ما كان عارف والو على لبلاد.بالطبع الناس ما كانوش يمشيوْ لْميريكان حيت شْحال من واحد كان يْموتْ بالجوع أو يْعضّو حْنشْ أو يقتلو شي واحد صوفاجْ.
آشْ دارو باشْ ميريكان دغيا عَمْروها بالبشر .قالو ليهوم كاين الدهب والدياموند.الناس داك الشي اللي بْغاوْ.اوى كولشي مْشى نحو العالم الجديد.من بعد زادو شجعوهوم بالأرض: حَوَّطْ الارض اللي بْغيتي وراها ديالك
اسمحو ليا راني خرجت على الموضوع يمكن غادي نوقف فهاد الفكرة


بعد قليل ، الجزء الثاني : حوميدي وتجربْتو مع السادس
 

Houmidi59

::الفارس المغربي ::

غير متصل
#37
رد: قصة بالدارجة المغربية : مذكرات معلم في المدينة

الحلقة 22 : حوميدي والمستوى السادس

الجزء الثاني : كيفاشْ حوميدي شدْ السادس

ما عْرفْتشْ ، واشْ دازو عامين أوثلاثة وْخوكم كي العادة شادْ المستوى الثالث.باركا عليا غير الحروف والكلمات ، ما خاصني صْداع الراس.
المهم واحد النهار ، فأيامات الدخول المدرسي ، الى ما خفتش نكدب مع آخر الشهر .واحد المعلم جاه الانتقال .هاد المعلم كان عندو السادس.اللي وقع ما كانش اللي يْعوْضو.المدير فكّر مزيان ووْصل لهاد النتيجة : يْشوف شي معلم أو معلمة من المستوى الثاني أو الأول يعطيه السادس ، أما التلاميد ديالو يْوزّعهوم على المعلمين اللي عندهوم نفس المستوى.من بعد الى جابو ليه شي معلم جْديد ، ما عليه غير يْردْ الأمور الى حالها.
المشكل أن حتى معلّم ما بْغا يقبل على المستوى السادس.بعْدا الأغلبية ديال لخّوت ما عندهومش مع الفرنسية.حيت هاد المعلمين قْدام ، المدير ما عندو ما يقضي مْعاهوم.هي هاديك بانتْ لو فواحد جوج معلمات يا الله فاشْ شدّو المستوى الثاني .هاد المعلّمات عندهوم يمكن 3 أو 4 سنوات ديال الخدمة. وزعما عندهوم لاليسانسْ (الإجازة).خونا بالله بانت لو يحْكَرْ عليهوم :
_ شوفو الله يْخلّيكوم ، وحدة فيكوم غادي تْشدْ السادس .
باشْ زعما يخلعهوم ، زادْ قال ليهوم :
_ شوفو راه والله حتى نكتب بيكوم الى رفضتو .
المعلمات بجوجهوم بْداوْ يبكيوْ ويْغوتو .المدير ما بْغاشْ يْبيَّن ليهوم الضّو :
_ والو والو ...وحدة فيكوم خاصها تْشدّ السادس وربّي كبير.
المعلمات عْياوْ ما يرغْبو ويْزاوكو .خونا بالله قلبو حْجرْ ..قلبو حديد مْصَدّي ....يمكن موحال الى عندو شي قلب.
خوكم الحوميدي (كان حاضر مع شي معلمين) ما عجبوش الحال .آشْ دارْ ؟ وقف وقال للمدير : أنا نْشَدْ هادْ السادس.يا الله سجْلو على سْميْتي
المدير ما كانشْ ناوي على هادي.المعلمات شافو فيا والفرحة غادية تخرج من الصدر ديالهوم.
المدير واخّا هكْدا ، قال لي : ما يمكنش أخويا.أنت راه عندك الثالث .شكون اللي غادي يْقرّيه ؟
جاوبتو : ساهْلة ماهْلة وحدة من هادوك المعلمات غادي تْشدّو .
واحد المعلمة من دوك الجوج قالت لو بالزربة : أنا قابلة أسعادة المدير
المدير ما لقى ما يقول : صافي المشكل راه تْحلْ.


الجزء الثالث : الحوميدي وتجريبتو مع السادس



خوكم بالله قرّى التلاميد ديال السادس بالطريقة ديال المستوى الخامس.عْطيتهوم المعلومات اللي غادي تْساعدهوم باش يْدوْزو الامتحان. اللي كان يهمني هو يحسبو مزيان بلا ما يغَّلطو : الجمع والطرح والضرب والقسمة.في ظرف 3 شهور التلامد دياولي ما لْقاوْ مشكل فالرياضيات.بالنسبة للفرنسية علّمتهوم كيفاش يْكَوْنو جملة مفيدة ساهلة بْلا صْداعْ الراس.اللي خاص هو الفعل والفاعل والمفعول به.زعما شْغُلْ اللغة العربية .الفرق اللي كاين هو أن اللغة الفرنسية فيها الفاعل يسبق الفعل.

طريقة ساهلة دغيا استوعْبوها .من بعد كان ساهل عليا نْزيدهوم القواعد ديال الفرنسية.
بْلا ما نفْتاخر عليكوم خوكم الحوميدي ردْ التلاميد غير النوابغ.هداك العام كولشي نْجحْ.اللي ضَحَّكني هو المدير مين قال لي : سّي عبد الحميد راكْ حقّقْتي نتائج باهرة واخّا أنت ما دايرشْ التكوين على السادس
جاوبتو : شوف أسّي محمد انا نْقرّي حتى أصحاب الباك والجامعة .هداك التكوين ما عندو ما ينفع الى كان بنادم قُبْ فالفرانْسوية
ضحك وقال لي : عندك الحق ، أنت مجْهادْ فالفرنسية .ما نْخافشْ عليك
العام اللي موراه جاوْني آباء يْرغبوني باشْ نْقرّي السادس على ودّاشْ غادي يْجيبو عندي وْلادهوم.
كان معايا واحد المعلم قديم .هو الصراحة عندو فالعربية ولكن قُبْ فالفرنسية . كنت داير معاه تنائي ماغاديش نقول ليكوم رائع ولكن فقط مقبول.هاد خونا بالله الله يستر كان شوية طمّاع ومن بعد بان على حقيقتو.
هاد الحقيقة بانت في آخر الدورة الأولى.انا كنت معروف كل نهاية الدورة الدراسية كنعطي جوائز للتلاميد الخمسة الحاصلين على أعلى معدل.هداك العام كانت تقرى عندي بنت الله يعمّرها دار .الأب ديالها مهندس والأم ديالها مهندس.شوفو : راه العلم مين ياخود العلم غادي يعطي العلماء.
هاد السيد اللي كنحيّيه من هاد المنبر جا لعندي واحد النهار وقال لي : بْغيتْ نْساهم معاك بواحد المبلغ المخصص للجوائز .هي هاديك أعطاني 100 درهم.
قبل ما يمشي قال لي : بالنسبة للبنت ديالي الجائزة ديالها على حسابي .انا غادي نشريها وانت يا أستاد اللي غادي تْسلّمْها ليها نيابة عليا.
اتفاقنا .غير يا الله مْشى جا خونا بالله يْشَمْشَمْ بحال الكلب (حاشاكوم) .زعما باغي يعرف اللي كاين.خوكم الحوميدي مايْخبّي والو ، حْكى لو كولشي.
هْنا خونا بالله بْدى يْبان .هي هاديك ، قال لي : شوف أسّي حميد أجي نْشوفو شي قصص ديال 5 دراهم نعطيوْهوم للتلامد والباقي نتْقاسموه أنت وْأنا.
خَنْزَرْتْ فيه مزيان : سّي العربي ، يمكن أنت طمّاع
خونا بالله غْضَبْ ، ما بْقى لو غير يجْدبْ : ياكْ أخويا أنا طمّاعْ ؟ اوى الله يْجازيك بخيرْ.
_ شوف أخويا هادي راها أمانة ...
_ باينة عليك ألْبوحاطي ..باغيها ليكْ كولها.
_ راكْ غالط .غادي نْزيدْ عليها ونشْري للتلاميد جوائز رائعة
_ غادي نْشوفو.
فعلا شْريتْ منجد باللغة العربية ومنجد باللغة الفرنسية ومجموعة قصص للأطفال .ألعاب ديال الذكاء.تْقام علي داكْ الشّي 200 درهم .
قبل ما نغلّفْ هومْ ، عيّطْتْ لصاحبي العربي باش يْشوفْ.فعلا ، عجْبوه بزاف.
المهم غلّفناهوم ولصّقنا عليهوم بطاقات مكتوب فكل وحدة رقم الجائزة يعني من 1 الى 5 .دابا ما خاص غير الاسماء ديال التلاميد.
حاجة مهمة جاتْ في آخر لحظة أو نقدر نقول أن اللي جابها هو العربي (المعلم) .خونا بالله بنتو كانت تقرى عندنا.بْلا ما نكدب عليكوم يا خّوتي هاد البنت لمْكلْخين أحسن منها.خونا بالله ديما نافخْ ليها فالمعدل باش تكون هي اللّولى فالقسم.لكن من زهرو، راها عندي يا الله كانت تْنَيَّطْ (تحصل) على ديكْ 3 أو 4
ربما لهاد السبب ما بْقاتش تطمع تْكون الاولى فالقسم.
المهم خونا بالله مين شاف الجوائز زاد نْفَخْ فالنقط باش تحصل بنتو على معدل مرتفع.داك الشي اللي وقع حصلت على معدل ديال 7 والصرف.يعني انها مرتبة السادسة .
خونا بالله عاد عاق باللي الجائزة مْشاتْ ليها ، قال لي : ياك الواليد ديال شيماء قال ليك غادي يْجيبْ لبنتو الجائزة ديالها ؟
جاوبتو بنعم.خونا بالله فرحْ أو قال لي : اوى بنتي يمكن نعطيوْها الجائزة السادسة.
ماكان غير نوافقو فْرأْيو .يمكن خونا بالله يسكت ليه القلب الى حْرمنا بنتو من الجائزة.
قبل توزيع الجوائز بيوم ، جا عندي العربي باش نكتبو فكل بطاقة اسم التلميد.السيد باين عليه الطمع . قال لي : اسمح لي اسّي حميد بْغيتْ نْوزَّع هاد الجوائز على الطريقة ديالي
_ تْفضَّلْ
خونا بالله شدْ الجائزة اللي فيها المنجد باللغة الفرنسية وقال لي : هاد الجائزة نعطيوها لْحنان (بنتو) .شدْ الجائزة اللي فيها المنجد باللغة العربية هادي لْفْلانة (هاد البنت كانت جارتو وكانت تتهلّى فيه مزيان) .المهم باقي الجوائز اللي أقل ثمن هادو وزّعهوم على الأول والثاني والرابع حيث الثالث كانت مولاتو هي شيماء بنت المهندس.
_ اوى آش ضْهر لكْ ؟
_ اللي ضْهر لي أنّكَ كتْخرْمزْ
مْشيت للقسم ديالي ودَرْتْ شغلي .باش يعرف بأن الحوميدي ما معاهشْ اللعب وزعت الجوائز على خمسة ديال التلاميد وقْصيتْ بنتو لأنها فالرتبة السادسة.بمعنى آخر بنت المهندس غادي تحصل على جوج جوائز : وحدة ديال المرسة والثانية ديال الواليد ديالها
في حفل توزيع الجوائز خونا بالله تصْدمْ بالمعقول ولكن ما عندي ما نْديرْ لو.

يتبع الجزء الرابع : الحوميدي وتجربتو مع السادس
غدا مع الحلقة 23
 

Houmidi59

::الفارس المغربي ::

غير متصل
#38
رد: قصة بالدارجة المغربية : مذكرات معلم في المدينة

الحلقة 23 : حوميدي والمستوى السادس

الجزء الرابع : حوميدي وتجربتو مع السادس (2)

خونا بالله ما بْغاتشْ تنهضم ليه كيفاشْ بنتو ما عندهاش الحق فالجائزة حتى هي.اللي كان هو أنه شْكاني لْوالد شيماء.هاد السيد الله يْعمّرها دار شْرى لْبنتو كادو .اوى خونا الطمّاع عجبو الحال وقال لي : خوكْ عْدوكْ
مورا العطلة ديال الدورة الأولى ، خونا بالله جاتو فكرة جهنمية : بنتو تقرى عندو العربية باش يْزيدْ ليها النقط كيف بْغى ولكن الفرنسية تَبْقى تمشي عند الأستاد علي عندو السادس .هادا زعما نصف انتقال.اوى شوفو هاد التحْراميات فين وصْلاتْ ؟ باش بنتو تحصل على أعلى معدل
ولكن هاد الكامبو ما يعرف والو على الحوميدي .فالدورة الثانية اعطيت الجوائز كي العادة ولكن اللي جابو أعلى معدل فقط فالفرنسية وطبعا اللي يقراوْ عندي
آش نقول ليكوم ؟ خونا بالله كون كان قنبولة مية فلْمية غادي يتفرْكعْ.
بالنسبة للدورة الثالثة ، ما كاين غير الامتحانات وطبعا خونا بالله خاف الى بنتو غادي تفضحو حيت مسكينة اينيقْشيعابْلْ فالفرنسية.اوى ما فادو غير وصّى عليها صحابو باش يتْهلّاوْ فيها
اللي شافْ شي حاجة ما يقول غير الله يستر


الجزء الخامس : هدا أروع قسم في حياتي

شوفو يا خّوتي المثل صريح : ديرْ النيّة وانعس مع الحية.خوكم الحوميدي ديما نيّة ولكن الحمد لله ديما غالب بإذن الله.
العام الثالث ديالي فالسادس ، خونا بالله العربي ما بْقاشْ حامَلْ يكون المقابيل ديالي.مْشى ديريكت عند المدير وعْلمو باللي كاين.عالم الله آش حْكالو والمدير قالّو : سير تْفاهم مع الأستاد علي غادي تخدم معاه وْخلّي الحوميدي مع الاستادة سعاد .
هادشي كان في أول يوم ديال توقيع المحضر.
مين يبغي ربي كولشي يتغير.قصة غريبة غادي نحكيها ليكوم كي لخرافة.يوم بعد توقيع المحضر العامل الجديد ديال تاوريرت جاب وْلادو عندنا للمدرسة بعدما سْمع باللي عندها سمعة طيبة من بين المؤسسات التعليمية فالمدينة.بالطبع مورا هاد الإشهار خونا بالله علي.
هاد علي (ماشي بابا) كان ذكي .هادا باغي الدجاجة بْكامونها.لولاد يقراوْ فالخامس وخونا بالله عندو السادس.صافي لْقى الفكرة : غادي يتّاصل بْختنا بالله رقية يْدير معاها تبادل هي تْقرّي السادس وهو يْقرّي الخامس واولاد العامل هاهوما عندو معززين مكرّمين .
المشكل أن رقية ما عندهاش معايا وانا كدلك موحال الى يْكون عندي مع لفْعى (أفعى) اللي كان هي بداتها اتاصْلاتْ بخونا بالله العربي وقالت لو غادي نخدم مْعاكْ. خوكم الحوميدي شدْ التلاميد ديال علي غير بوحدو لأن الأستادة سعاد انتاقلات في آخر لحظة.جا عندي المدير وقال لي : واش تقدر تْقري السادس عربية وفرنسية ؟
خوكم بالله اللي هو أنا جاوبو : واشْ أنا بْغلْ البلدية ؟
المدير جاه الضَّحكْ وْردْ علي : حاشا ولكن عندي حل غادي يعجْبكْ
المهم شْرح لي المقترح ديالو .الصراحة عْجبني بزاف.شوفو : من 70 تلميذ غادي نعْزل 30 تلميد.التلاميد اللي نبغي.الباقي غادي يْوزّعهوم على 4 مستويات ديال السادس بمعدل 10 في كل فوج.هوما غادي يخدمو ب40 تلميد وخوكم الحوميدي غير ب30 تلميد.هادي وحدة والثانية هي اّني اتفقْت مع المدير باشْ مايْجيشْ عندي المفتش ديال العربية .راه ما عنديش التحاضير وغادي نخدم غير بلكتاب.
التلاميد اللي جمعت داك العام : اللُّبْ ديال المدرسة.
ها ولد المدير ، ها بنت الطبيب ، ها ولد المحامي ، ها بنت المستشار..ها البورجوازيين ها ولد القايد ها ولد لخليفة (ماشي على الله هههه) ...الشخصيات ما كاين غير الشخصيات . التالي فيهوم أبّاه معلم أو أستاد
عام داز معتابرْ.
النتيجة كولهوم نجحو .
من بعد اكتشفت أن خونا بالله علي كان يستقْطب التلاميد النجباء عندو والكسالى واللي مافيهوم ما يتْشاف يرميهوم .
هاد رقية منحوسة خلّات الخير ومْشاتْ عند العربي اللي ما لقات معاه غير النحس.داك العام خسْرو ليها فايتة 20 واحد.شوهة واش من شوهة
فشهر ماي الى ما خفتش نكدب ، جا عندي المدير وقال لي : سّي عبد الحميد انا عارف باللي الثالث عزيز عليك بزاف.لهاد آشْ ضْهر لك ترجع لو ابتداءا من الموسم القادم ؟
خوكم الحوميدي داكْ الشّي اللي بْغى .
فعلا عدت الى المستوى الثالث وأنا فرحان وسعيد بعدما كبّدت الاستادة رقية خسائر فادحة في الرسوب وعلّمتها باللي الضَّحك يْجيبوه التْوالى
Rira bien qui rira le dernier
نهاية الجزء الخامس

هذا المساء

الحلقة 24 : جوانب من شخصية حوميدي
الجزء الأول : حوميدي والامتحانات

الجزء الثاني : حوميدي الكاتب


الحلقة 25 : ذكرياتي مع المستوى الثالث (المرحلة الثانية)

الجزء الأول : أعْطاه الثالث ونْدم عْليهْ
الجزء الثاني : بنت الشيكولا باغْية الرّوداجْ
 

Houmidi59

::الفارس المغربي ::

غير متصل
#39
رد: قصة بالدارجة المغربية : مذكرات معلم في المدينة

الحلقة 24 : جوانب من شخصية حوميدي
الجزء الأول : حوميدي والامتحانات

من قبل تكلّمت ليكوم عن اجتيازي للامتحان المهني المتعلق بالسلم 10.طبعا باقيين عاقلين على القصة مين مْشيتْ لفاس .اوى اللي ما زال ما قْراها يمشي يْديرْ شي طلّة وما
يْصدّعنيش .
بغيت نقول ليكوم شي حقائق على هاد الامتحانات المهنية.خاصكوم تعرفو أنها ضَهْرات فسنة 1986 .الوزارة مع الطلبات الملحة ديال النقابات اللي كانت تطالب بترقية المعلمين الى السلّم التاسع ، جابت هاد الفكرة ديال الامتحانات : المعلمون يْدوْزو الامتحان بحال التلاميد ، اللي جاب المعدل ، راه ناجح .اللي مسكين ماعندو معدل ، اوى غادي يسكت وما غادي كاعْ يْبرْزطْهوم.
آشْ وقع ؟ تقريبا الأقاليم كلها قاطْعات الامتحانات مَنْ غير شي أقاليم قليلة ومن بينْهوم نيابة وجدة.الوزارة استغلّات هاد الفرصة ونجْحات كل المرشحين الوجديين وشي وحدين دوزو فأقاليم أخرى.كانت الضربة القاضية بالنسبة اللي قاطع هاداك الامتحان.تصورو يا خّوتي أن شي مديرين (أصحاب 60 حزب) حيت هوما ماعندهوم لا فالتربية ولا علم النفس كتبو يا الله الأسماء ديالهوم .النتيجة صدقو ناجحين. كاين شي وحدينْ ما بغاوْشْ يْتيقو مينْ قالو ليهوم راكو نجحتو.سّي الصغير (باقيين عاقلين عليه، المدير ديال المجموعة المدرسية فين كنت خدّام) قال لي (الله يرحمو) هادو طاحو على ريسانْهوم.واش أنا ماكاتب والو يا الله سْميْتي ونجْحوني.هدا راه لحماقْ
على كل حال عام 87 خوكم الحوميدي دوّزْ مع خّوتو المعلمين .داك العام كانو المترشحين بزّاف .الناس (اللي باقيين فدار غفلون ) قالو صافي الوزارة غادي تنجحْنا كلنا كيف العام اللي دازْ.اوى نومو الخوخ فاللْيالي.
النتيجة كانت كاطاسْطروفيكْ(catastrophique) (كارثية ) خاصة بالنسبة لمنطة وجدة.بالنسبة للباقي خْداوْ شي بركة لابأس بها.
بالنسبة لتاوريرت ، نجحو فالامتحان 3 ديال المعلمين : جوج قْدامْ وخوكم الحوميدي.بالنسبة لنيابة وجدة كاملة نجح عدد قليل ما يتعدّاشْ 20 واحد
من بعد صافي الامتحان رْجع موضوع متْبَتْ وبقاوْ رجال التعليم الى يومنا هادا كينْتضْروه ديما والخلعة شادّاهم.
الامتحان ديالي الثاني باش نْدوز لسُّلم 10 كان في سنة 91 بالضبط الاواخر يمكن دجنبر.هاد المرة كان علينا نمشيو لفاس.هاد القصة راني حْكيتها ليكوم.
بالنسبة لنّتائج كانت فايت الكارثية.هاد المرة فنيابة وجدة كاملة او الجهة الشرقية يا الله نجحو 10 وخوكم كي العادة من هادوك المحضوضين.
جات واحد لوقيتة وطلعو لينا بخبر السلم 11.خوكم فالأول قاطع الامتحان مدة 3 سنوات.فلْأخير مْشيتْ نْدوّزْ مع الإخوان .جاب الله التيسيرْ وْكنت من بين الناجحين
دابا عْلاشْ خوكم ديما ناجح؟ هادي ما فيها لا رباط لا زاكورة.هادي فيها تدبير وحكمة(ما رانيش عليك يا خْتي).راني كنت من قبل انْصحتكوم وقلت ليكوم : الى بْغيتو تْنجحو عليكوم بالمختصر المفيد.تَبْعو معايا : المفتشين راهوم بْحالنا بشر وكيَعْياوْ.مين يْشوفو لحْروزا ديالكوم ، صافي غادي يْلاشيوْ يعني يعطيك نقطة تقدر تكون 4 أو 3 أو حتى جوج الى شاف خطّك مخرْمزْ وْ فيه ما يتَّقْرى.
خاصْكوم تْفكْرو فالمفتش : واشْ باغيين تعْميوْ لو العينين بلكْتابة ديالكوم الرقيقة ومن الفوق معمْرين الورقة غير بالنْقيل.والو ما غاديش يْشوف فالورقة ديالكوم.غادي يْشطَّبْ عليها ويعطيها هاديك ال1 او الى كان كْريم 2 أو 3
شوفو أنتوما مع التلاميد دياكوم مين تْكونو تْصَحّو اوراق الواجبات ، غير يْبانْ ليكوم داك الشّي مْخرْمزْ تبْقاوْ غير الزيروَاتْ (الأصفار)
فكرو فهاد الشّي مزيان ، من بعد ردّو علي لخبار.كيف ما قالت أختي الوجدية شروق : اوى لخْبار راه فْراسكومْ

الجزء الثاني : حوميدي الكاتب

خوكم الحوميدي كان من بكري يكتب يمكن كانت البداية ديالو مين كانت عندو 11 أو 12 عام.كان فالأول عزيز عليه الشعر.تصورو أنه في مرحلة المراهقة كان الشاب كيْشوف شي بنت خصوصا تقرى مْعاه.باش يجعلها تنتابهْ للوجود ديالو خاصّو يكتب ليها شي قصيدة واعرة.اوى خوكم الحوميدي شْحال من واحد عتْقو بْقصيدة.المشكل أن شي وحدين يا الله نعْطيه القصيدة ، بْلا ما يقْراها دغْيا يطوي الورقة باشْ يعطيها لْحبيبة القلب بْأي وسيلة سواء يْشوف شي برهوشْ صغير أو يرميها فالطريق اللي هي أدّوزْ منها.واحد النهار واحد صاحبي من هاد خوتنا المغرومين جا عندي سْميْتو باقي عاقلْ قْويدرْ.جا لْعندي غضْبانْ
_ ياكْ أخويا حميد هادْ الشّي اللي نسْتاهلْ معاكْ
صراحة فاجأني بكْلامو حيت القصائد ديالي كانت لاقية نجاح كبير.دوماج ماكنتْشْ نْدوّنْها.دابا هاهي ضاعتْ
المهم قلت لو : واشْتا (أشنو) كاين أخويا؟ ياكْ ما الحبيبة صَدْقاتْ طبيبة ؟
_ تضحك علي ياكْ أخويا
_ واخّا اسمح لي وأحْكي لي
_ ضرْباتني أخويا صفْعاتني فْلَوْجه قدّام التلاميدْ
_ واه ؟ ما يمكنشْ ؟
_ هانا شوف الصفعة مازال مَطْراسْيَة فوجهي
_ والله الى مْبَصّحْ
المهم قلت لو : فين هي الورقة ؟
ردْ علي : هاهي راها رْماتْها لي فْوجهي
_ أرى نْشوفْ
بعدما قْريتها جاني الضَّحْك .آه يا خوتي لافوطْ ديالي .القصيدة كانت هجاء لواحد الولد .خوكم الحوميدي كتْرو عليه الطلبات هي هاديك أعطاه القصيدة اللي كان خاصّو يَعْطيها لْواحد آخور.دابا راكو عْرفتو كنت كنكتب حتى الهجاء.
من بين القصائد اللي باقي عاقل عليها هادي وحدة منهوم .شوفو كيفاش مراهق عندو 14 عام يكتب بحال هاد القصيدة

يا لَجمال رأيْته
فأعجبني فأحببته
تلك هي فتاة
لم أتخلى عنها بتاتا
سمْحو ليا هادا علاش راني عاقل
المهم من بعد بْديتْ نكتب فالجرائد خاصة كانت واحد الصفحة ديال جورنال اسميتها l'opiniuon des jeunes كانت كل خميس.خوكم ديما كاتب بالفرنسية ها الشعر ها القصة ها موضوع للنقاش.
بقيت على هاد العادة حتى بان الأنترنيت .من بعد خوكم سجّل فالمنتديات وبْدى يكتب القصص ديالو بالفرنسية.كانت أول سلسلة بالفرنسية هي مغامرات جلول.هادي شخصية من ابتكاري تشبه جحا.ولكن كيف ما تشوفو خوكم ما عمرو ما تشْهَر.


 

Houmidi59

::الفارس المغربي ::

غير متصل
#40
رد: قصة بالدارجة المغربية : مذكرات معلم في المدينة

الحلقة 25 : ذكرياتي مع المستوى الثالث (المرحلة الثانية)

الجزء الأول : أعْطاه الثالث ونْدم عْليهْ

كيف ما قلت ليكوم من قْبَلْ ، المدير أخْبرني باللي المستوى الثالث راه شاغر حيت واحد الأستاد غادي يْشدْ التقاعد في آخر الموسم.بالطبع وافقت بدون تردد .الصراحة هاد المستوى كنْموت ونحْماق عليه.فيه كنوْجد راحتي أكثر من باقي المستويات.ربما السبب أني كنت كنجتهد ونبتكر طرق كثيرة باشْ نْسهَّل المأمورية ديال الأستاد أو التلميد.
المهم مع البداية ديال الموسم الدراسي خوكم كان عندو المستوى الثالث.هاد المرة المدير جْمع لي اللُّبْ ديال التلاميد، التالي فيهوم أبّاه موظف فالبلدية.
الأسبوع الأول ، جا عندي المدير وقال لي : سّي حميد ياكْ ما راه خاطرك فالسادس ؟
الحوميدي دارْ بْراسو ما فاهمْ والو : كيفاشْ زعما ؟
_ السادس راه خْوى منّو واحد القسم
_ واه ؟
_ سّي علي راه جاه تكليف فالنيابة ودابا ماكاينش اللي يْشدْ السادس.الى بْغيتيه راه موجود.
ضحكتْ وقلت لو : سّي حَمّو كنت النهار اللّول باغيه ولكن أنا ماعندي فْراق مع الثالث
قبل ما يمشي قال لي : المهم ما زال الحال وقتاشْ امّا بغيتي راه السادس موجود
_ حتى هدا تفكير.نْشوف ونْردْ عليك
دازت أيّامات خوكم مع الثالث ديالو خدّام .سبحان الله كنت نتكلم مع شي معلمين واكتشفت شي حقائق فْشي شْكل.سمعو يا خّوتي: البشر ما يبغي ليك الخير حتى يْشوف مصلاحتو.هاد المدير ماكانشْ ناوي الأستاد علي غادي يْغادرو .تصورو قبل آخيرْ السنة النيابة كترسل للمديرين الخريطة التربوية ديال السنة المقبلة باش كل واحد يْوجّد التنطيم التربوي الخاص بالمؤسسة ديالو.اللي كاين أن النيابة شافت باللي المستويات ديال السادس خاصها تكون غير 4 بدل 5.هدا يعني أن واحد من هادوك الخمسة اللي يْقرّيوْ السادس يبْقى فالتّوشْ يعني يعطيه المدير مستوى أخورْ واللي بان أنه هو الثالث على ودّاش صاحبي حْميدة غادي يتْقاعدْ.
المدير خاف الى يْنوضو الصْداعات بين المعلمين ديال السادس وربما خاف حتى منّي (أنا ماشي بوعّو) دارْ معايا هاد الحيلة ، ماشي بْعيد يْكون ساقْ لخْبرْ من عند المدير لقْديم باللي خوكم بالله الحوميدي عندو بزّاف مع الثالث.اوى هي هاديك صاوبْ لي داك السيناريو.
على كل حال راه دارْ فيا خير كبير بْلا ما يعرف.
لكن المعلم اللي مْشى وْخلّى لو السادس راه مشكل آخور خاصّو يلقا لو حل.على داك الشي جا يْجرّبْ يمكن عاود تاني تنجح لو الفكرة
لكن هاد المرة ما عندوش الزْهرْ
حاجة أخرى بانت وهي أن رقية مْشات لعندو ترغبو باشْ يعطي ليها الثالث .مسكينة راها تْشوْهات بعد العدد الهائل ديال الراسبين عندها في حين ان كل التلاميد ديالي نجحو.
دابا الآباء ديال التلاميد عرفو باللي ختنا بالله راه ما فْيدْهاشْ.
باش تعّرفو ان ما قلتو ليكم ماشي ضنْ أو شكوك ، اوى الأخت جات حتى هي لعندي وقالت لي : سّي عبد الحميد انت أستاد نشيط ومعروف بالجدية ديالك
الأخت كيف ما نقولو بالوجدية راها تْبَنْتَرْني (يعني تصبغني ).خليتها حتى سالاتْ من الثناء والمدح.عادْ جاوبتها : تبارك الله على أخْتي رقية يمكن عادْ دابا فاش بانو ليك المهارات ديالي
_ حاشا أسّي عبد الحميد من نْهار اللي جيتي فيه وأنت ديما للفوق الفوق
_ فعلا عندك الحق طْلعْت لفوقْ وراسي ضْربْ السقفْ
خوتنا بالله ابتسْماتْ : هيهيهيه .....والله الى أنت ظْريَّفْ
شفتو هاد لمْسيخيطة داخْلاني غير بالفن.ولكن ما تخافوش : أنا ظْريف ماشي كي لَخْرِيَّفْ
هاد المرة شفْتْ فيها الشّوفة ديالي الواعرة اللي كنخلع بيها شي قومان : شوفي أختي رقية بْلا ما نكدب عليك أو نّافْقكْ أنا عاجبني الثالث وغادي نبقى فيه حتى ننْتقل من هاد المدرسة لْوجدة ان شاء الله.
_ ياكْ أخويا زعما رْغبتكْ
_ سَمحي لي كان خاصّك تْرغْبي المدير هادي شْحال .يمكن كونْ راه اعْطاك الثالث قبل منّي
_ زعما انت راك رْغبتيه ؟
_ واش راكي تحلمي أنا أبّا وْما نرَّغْبوشْ
_ وعْلاشْ زعما أعطاكْ الثالث ؟
_ سيري لْعندو هو اللي يشرح لك.أنا ما فْراسي والو


الجزء الثاني : بنت الشيكولا باغْية الرّوداجْ

الحمد لله السادس لْقاوْ لو معلم .هاد المعلم جا من مدينة بركان .المشكل انّه ماجا حتى تقريبا 15 أكتوبر.حتى هو مسكين وْقع لو كيف ما وقْع لي ، خوتنا بالله خْداتلو التلاميد المجتهدين واعطاتو كيف ما يقولو التاوررْتيون "الكورْفي" (الدّيشي)
خونا بالله كان باقي شاب .انا اللّوّل اللي نصحتو باش يحْضي راسو مع هاد القومْ.
بالنسبة لي داز العام على ما يرام.التلاميد كيقراوْ ويسّمعو ويْديرو المطلوب منْهوم.آشْ بغينا آكتارْ من هادْ الشي ؟
دازت 3 شهور ، الى ما خفتش نكدب مورا الدورة الأولى بْشي أيامات.جا عندي المدير ومْعاه تلميدة باينة عليها بورجوازية .تصورو العطر اللي دايراتو توصلك ريحتو على بعد 200 متر أو أكثر.اما الملابس اللي لابسة كولْشي ألَامودْ(à la mode).
_ سّي عبد الحميد هاد الآنسة راهْ أبّاها هو اللي باغيها تقْرى عندك.
_ واه ؟
_ نعم أسّي عبد الحميد.الواليد ديالها بْغاكْ تتْهلّى فيها.
بْقيتْ نتْمعَّنْ فالبنت، عْييتْ ما نشوفْ كيفاشْ غادي نتْهلّى فيها
_ سّي حمّو هاد البنت باينْ باللي ما خاصْها حتى شي خيرْ
المدير ضْحك : سّي عبد الحميد
التلاميد كيخافو منّك وكيعَّرفو باللي انت ما مْعاك غير المعقول ومن الفوق كيبْغيوكْ حيت كتعطيهوم الجوائز
_ اوى ؟
_ إوى خاصها شوية تتْربى على يَدّيكْ .
_ صافي راني فْهمتْ : خاصها الهرْمكة
_ دابا فْهمتيني
الآنسة الجميلة دخْلات .راها سامعة علي على داكْ الشّي مسكينة شدّات لكْوانْ .
دازت 3 أيام ، كنت مْشيتْ عند المدير على شي ورقة ادارية .مينْ رجعت لقيت شي فوضى فالقسم .العجيب فالأمر دائما كنخرج من قسمي وما عمرو ما كانت عندي الفوضى على حقّاش التلاميد عارفينّي مزيان.لكن هاد المرة عقْت باللي خوتنا بالله الجديدة هي مولات الفوضى.فعلا شي تلميدات مجتهدات كنشْهد ليهوم بالأخلاق النبيلة قالو لي : أستاد هاد سارة غير أنت خْرجتي وهي بْداتْ تعايرْ فينا وتقول لينا الِْمْوسخين ألْخانزين وضرباتنا بْلَعمود .
خوتنا بالله ابتاسمتْ لي وحتى أنا ردّيت ليها الابتسامة : مْبَصّاح الغزالة ديالي هاد لمْوسخين والخانْزين ضَصْرو عليك ؟
_ واه أأستاد كانو يْلعبو ويضَّحكو
_ اوى ضْربتيهومْ ياكْ ؟
_ غير شْوية أأستاد
_ تبارك الله ، شْكون اللي كالّكْ تضَّربيهوم ؟
_ حتى واحد
شفْت فواحد جوج تلاميد صْحاحْ: أجيوْ انتوما .هزّوها وْحطّوها فوق الطابلة .
خوتنا بالله بْداتْ تْغوّتْ : السْكاتْ ولّى غادي نَتْنيرْفا (غدي نغضب)
_ واخّا أأستاد هانا ساكتة
_ حيْدو ليها الصبّاط
_ أستاد علاش بغيتي تْحيّدْ ليا الصبّاط ؟
_ بْغيتْ أبنْتي نْحَنّي ليك دوك الرَّجلينْ
قبلْ ما نْبدّي الفلقة سدّيتْ بابْ القسم.اوى اعطيتْها حتى قالت أزّا (يعني شبعات)
هاديك هي ، قلت ليها : سمعي أبنتي انا ما عمرو في حياتي ما استعملت الفلقة مع التلاميد ديالي ولكن معاك أنت غادي نْبرْعك هاد العام
_ والله أأستاد ما نْعاودْ
_ شوفي مزيان أنا ما يعجبنيش التلميد اللي يضْصَرْ علي.
_ نعم أستاد ما عمرو ما نضْصَرْ عليكْ
قبل ما ترجع للْمكان ديالها : ابتداءا من غدّا هاد الحوايج اللي لابسة ما تبقايشْ تْجي بيهوم
_ نعم أستاد
_ ها الروايح كضَّرْني فْنيفي
_ نعم أستاد
_ ممنوع تْجيبي معاك الماكلة فالطّاسة
_ نعم أستاد
يوم بعد يوم سارة تْغيْراتْ فالطبع ديالها وْ رَجْعات بنت عادية بْحال باقي التلاميد.ولكن خاصكوم تعّرفو انها كانت مازال تاكول من الهرمكة.
داز شهر ولّاتْ سارة من التلميدات اللي كنْفضّلْ فالقسمْ.
هي فالحقيقة من اللّول كانت مجتهدة ولكن المهارات ديالْها تْحَسْنو بزافْ.كانت عندي تلميدة سْميَتْها كوثر كانت هي المفضلة ديالي ولكن من بعد جات سارة وخْداتْ ليها المكانة .
شوفو سبحان الله العطيم شْحال يقدر الإنسان يتغير من أقصى درجة سيئة الى أقرب درجة ديال الجودة.
كانت هاد التلميدة باقي عاقل تْجيبْ معاها أرفع الأنواع ديال الشيكولا (الشوكولاطة) والحلويات وتَعطيني كولشي .كانت زعما تبغي تشريني ولكن الحوميدي كان ديما يقول ليها : والله لا شيكولا ولا حلوى تقدر نمنعني باش نعطيك شي سلخة.
فعلا ما عمرو ما رحمتها.
الصراحة من بعد جا عندي أبّاها ما خلّى ما شْكَرْ فيا .جاتو عْجبْ كيفاشْ بنتو تغيْرات ورجْعات بنت مهدّبة وعطوفة وحنونة
_ خوكم الحوميدي قال لو : إن الله يهدي من عباده من يشاء

غدا الحلقة 26 ذكريات الحوميدي مع المستوى الثالث في مرحلته الثانية
الجزء الثالث : سّي أحمد بْغى يْردْني أبّاهْ
الجزء الرابع : التلميد اللي هْربْ فالترانْ لوجدة

 
أعلى