قصة بالدارجة المغربية : مذكرات معلم في المدينة

Houmidi59

::الفارس المغربي ::

غير متصل
#1
بعد النجاح الذي لاقته مذكراتي في العالم القروي وخاصة التشجيع من طرفكم : ها أنذا استمر في سرد مذكراتي في العالم الحضري وطبعا مستعملا الدارجة المغربية
للإشارة : قضيت زهاء 22 سنة في مدينة تاوريرت وعشت حلوها ومرها وعاينت أحداث غريبة وطرائف مضحكة .ستكتشفون كل هذا من خلال هذه الحلقات .(شحال من حلقة ؟ الله أعلم هههه)


الحلقة الأولى : قسم أو كوري (écurie)



كان التعيين ديالي فمدرسة الرازي المختلطة.بحكم اني آخر واحد التحق بيها، لْقيتْ خوتنا المعلمين والمعلمات خْداوْ التلاميذ المجتهدين وحتى اللي فيهم شوية الضو ، يعني اللي يمكن يْديرو شي حاجة فلقراية.خوكم الحوميدي لقى 55 تلميذ مْساليين.
النهار الأول حسّيت بْوَدْني غادي يطْراشو (يتْصامْكو) تصورو غير الى هضْراتْ غير مجموعة مَنْهوم ، بْحال الى راكْ فالسويقة ديال فيلاج كولوش.من فوق هاد الشي القسم عامر وهذا يعني صعيب التنفس .كنت كنْحَل السْراجم باش القسم يتْهوّى .
الايام الاولى دَرْتْ ليهوم واحد التقويم تشخيصي .لْقيت باللي كولهوم ما داخلينش حتى لمْسيد.
فالحقيقة تاوريرت فْديك لوْقيتة ما كانش فيها التعليم الأولي.كانو شي جوامع يْحفْضو الدْراري الصغار القرآن .هاد الشي اللي كاين.
كان عليا نشوف شي خطة باش يرجع القسم عادي بْحال الاقسام الأخرى.أول حاجة جبْت معايا لعْصا .شي وحدين كانو يْبانو ليا غير ديال الصداع.تْباليت بيهوم بالهرمكة.اللي كاين هو كترات الشكايات عند الإدارة .المدير جا لعندي زعفان :
_ اسمع أخويا راه الضرب ممنوع
السيد زعما بغى يلعبها علي كبير .أنا ما عمرو كنت نخاف من شي واحد .ماشي مدير هو اللي غادي يخْلعني.جاوبتو فلبْلاص :
_ شوف السيد المدير أنت عاطيني سوق ديال لغنم او باغيني نْهار كامل حاضيهْ لكْ.واش عندك شي عقل ؟
_ كيفاش؟ ما فهمتش
_ غادي نفهمك.انا مْوالف نقري قَلْ من 30 تلميذ ماشي قبيلة ديالْ الهاماجْ (متوحشون)اللي عاطيني
_ ما عندي ما نْدير لك.هداك هو القسم اللي بْقى
_ ياك .غير الله يرحم الوالدين شحال كاين من قسم ديال اللّوّل ؟
_ كاين 5
_ شحال كاين من تلميذ فكل قسم من هادوك ؟
خونا بلله بانْ تْلف .بقى يتْلعْتَم فالهدرة.شي شوية قال لي :
_ ماشي شغلك ؟
_ وحتى انت ماشي شغلك داك الشي اللي نْدير فالقسم ديالي
_ انا غادي نكتب بيك
_ سير تكتب راه ما عندك ما تقضي.غادي تْجي لجنة ويْشوفو داك المستور ديالك .شوف كيفاش غادي تْسَلَّكها.
ما زادش فلهضْرة.مشى ديريكت للإدارة.خوكم طلعو الدم .صافي ماشي غادي نكْعى .راني كْعيتْ.يا الله دخلت للقسم ، تباليت بواحد الربعة كانو يْلعبو فوق الطْوابل .عْطيتْهوم واحد السلخة ديال الله الحَدْ.
يمكن الى قسَّحت ليهوم ، حيت جاو عندي جوج معلمات كانو يخَّدمو حدايا.
- مالك يا أستاذ ؟ سمعنا لغواتْ عندك
- راه طالع لي الدم مع هاد لبْراهش؟
- غير برَّدْ يا أستاذ .أنت باقي جْديد.غادي دغيا تْلاشي(تنهار)
شفت فيها وبقيت نضحك .المعلمة تْعَجْباتْ
_ بْغيت نْسَوْلك الله يخلّيك : شْحال عندك من تلميذ فالقسم ؟
المعلمة سَكْتات بالمرَّة.لكن صاحبتها الظاهر شجاعة ، قالت
لي :
_ انا عندي 28 تلميذ وفاطمة (يعني صاحبتها) عندها 30
_ اوى تبارك الله انتوما مْبرْعين وانا اللي شادْ الصهدْ
_ كيفاش ما فهمناش
_ اجيو دخلو تشوفو
يا الله طلّو .شافو لعجب .شي يلعب فوق الطاولة ، شي يْنَقَّزْ، شي تحت الطْوابل.المهم الحيحة نايْضة.
المعلمات بْجوجهوم حشْمو .واحدة بْداتْ تْشوف فْلخْرى
_ اوى آش أضْهرْ ليكوم يا أستاذات ؟
مازادوش كلمة وحدة .بَعْدو عليا شي شوية.شفْتهوم يتكلْمو بيناتهوم.
خليتهوم ودخلت للقسم .عاود تاني جْبَدْت لعصا وطحت على شي وحدين ...هاد الشي غير باش نْرجَّع الهدوء للقسم.
دازت واحد الرْبع ساعة .المعلمات بجوجهوم جاوني
_ اسمح لينا واحد الدقيقة يا أستاذ
_ نعم ما كاين مشكل
_ غادي ناخدو ليك التلاميذ اللي من المفروض كانو عندنا
_ يا الله تفضلو ، غير أو كان .....
_ غير أو كان واشتا (أشنو) ؟
_ بغيت نقول عنداكوم عاودْ تاني تختارو المزيانين ديال هاد الديشي وتْخلّيوْ لي صْحابْ الصداع
_ أحشومة أخويا
_ ظاهرة عليكوم لحشومة أنتوما
_ واش رك أخويا تْعايرنا
_ حاشا ، انتوما اللي راكو تضّحْكو عليا.واش انتوما ب4 خْتريتو التلاميذ الزينين وْ خلّيتو لي غير لَمْقَرْعْشين (الكوسالى)
يمكن دابا عاقو باللي انا واخّى جْديد ماشي كامبو
_ دابا آشنو هو المعمول ؟
_ تردّو ليا التلاميذ ديالي اللي كانو فاللائحة الأصلية
_ واخا غادي نْشوفو مع المدير
اللي وقع هو أنه مْشاو المعلمين ديال التحضيري (القسم الأول ) عند المدير .كانو 3 ديال المعلمات ومعلم.
المهم عاود تاني رْجعت للقسم .لكن هاد المرة بْحال الى لصْداع نْقَصْ.يمكن حتى هاد لبْراهش عاقو باللي أنا واعر.هي هاديك سكتو ..او تقريبا سكتو ، لأنه كاين شي مجموعة مازال باغية الهرمكة.
المهم جا وقت الخروج بعد الحصة الاولى.كاين واحد الاستراحة ديال 5 ديال الدْقايق.موراها يدخل فوج آخر يْقرّي حتى لطْناش وال25 دقيقة.هاديك هي لوقيتة اللي خاصني نرجع فيها باش نخدم لعْشية
اللي وقع اني تْفاجأْتْ بأن التلاميد رجعو 32 تلميذ او 34 (ما رانيش عاقل) بانو لي شي كْمامَرْ(وجوه) جدادْ ما عمرو ما شفتهوم.
لقيت فالمكتب لائحة أخرى فيها الاسماء ديال التلاميذ.هي هاديك بْديتْ نْعيّط عليهوم بالواحد.كل واحد يْرَدْ علي : حاضر أو حاضرة
غير ساليتْ ، بانو لي شي وحدين ما عيَّطْشْ عليهوم:
_ اوليداتي يمكن راكو تالفين .انتوم ما مْسجْلينْش عندي
_ أستاد كُنَّا عندك البارح
_ دابا ما بْقيتوشْ.سيرو شوفو المدير.
لمهم غبْرو .
هاديك لعشية ما درتْ والو من غير كتبت المعلومات على كل تلميذ.الحمد لله ، كاين شي تلاميذ نْقيّين ومن عائلات قارية.هدا بعدا غادي يْساعدني فالخدمة ديالي.



يتبع غدا إن شاء الله
 

Houmidi59

::الفارس المغربي ::

غير متصل
#2
رد: قصة بالدارجة المغربية : مذكرات معلم في المدينة


الحلقة الثانية : الكاراج والبولة (lampe)والجوع

في الحلقة الثانية من مذكراتي في المدينة ، غدي نحكي ليكوم على حياتي الشخصية من نهار تعينت بمدرسة الرازي.
المهم داك النهار اللي وقعت فيه على محضر الدخول وتعبئة المعلومات الشخصية ، داك النهار مشيت للأوطيل ويمكن حتى بالنسبة لليوم الثاني والثالث.
فداك الأسبوع ، مْشيت عند صاحبي مول الحانوت عبد الله باش ناخود الرسائل ديالي.هضْرة تجبد هضْرة تْكلَّمنا على لكْرى.هي هاديك، قال لي : كاين واحد المحال فيه الما والضو ويقدر يصلح لي.سوّلتو فين كاين.جاوبني باللي موجود شوية بعيد فواحد الحي سْميتو بْلان الحلفا.قلت لو باللي ما كاين حتى مشكل حيت معايا اسمهان .
المهم اتفقت معاه نمشيو نشوفو المحال.الغدّ ليه مع العشرة ديال الصباح .لوقيتة اللي نخرج فيها من الخدمة. فعلا مْشى معايا راكب على لاموطو ديالي وصلنا لشي دروبة سبحان لله العظيم دكروني بالطرقان ديل أولاد سليمان.وقفنا حْدى واحد الكاراج ، أو هو يقول ليا : هذا هو المحال اللي تكلمت لك عليه
_ واه واش انا وجه سيمكا (simca) باش تْسكّني فكاراج ؟

خونا بالله ما غضب ما والو .افتح الكاراج وقال لي تفضل.
دخلت .الصراحة كاراج نقي : فيه ناموسيا (سرير) وطبلة وفيه روبيني(حنفية) وسطل وحتى لبوطاجي .يعني مجهز .
_ واخا أخويا وهاد الكارافان(caravane) بشْحال لكرى ديالها ؟
_ دابا تكلمتي بالمعقول.هادي أسيدي غير 100 درهم ولكن أنا غادي نْخليها لك ب70 درهم وما تخلّص لا ما لا ضو.
فعلا هادي همزة الى طاحت فْيد شي بخيل ما شي غير يسكن فيها راه يقدر يْخلّيها ورت لولادو وأولاد وْلادو.بقيت نْخمّم باش نشدْها غير حتى نلقى شي دار او مع منْ نسكن
_ هاديك هي قلت لو : صافي أخويا غادي ناخودها بعدا هاد
الشهر .
_ اوى طلّع ب70 درهم .
_ هاهي وزيد عليها هاد العشرين درهم بوربوار(pourboire)
المهم دابا خاصني نمشي لولاد زايد باش نْجيب حوايجي.
مع ديك الجوج والنص لوقيتة ديال الخروج ديالي مشيت للفرعية اللي كنت نخدم فيها او اللي خدمت فيها 10أيام أو أقل.مين وصلت للمدرسة لقيت يا الله جوج معلمين .يعني الثالث مكاينش وهدا يعني ان واحد فيهم راه شاد العربية والفرنسية.
المهم سلّمت عليهوم .هي هاديك عرضو علي نشرب معاهوم أتاي.
من الزّهر كانو يا الله فاش جابو ليهوم برّاد ديال أتاي مع حرشة مدهونة بالسمن والعسل.
حْنا كانكلو ، جا الشيخ عبد الرحمان .
_ تبارك الله على مولاي عبد الحميد .هادا نهار كبير .غادي ان شاء الله تْقصّر معانا
_ لا اسمح لي بزاف الحاج.انا جيت غير باش ناخود حوايجي ونمشي.
_ اوى غير ديرها او بات معانا
_ ما يمكنش غدّى ندخل بكري ولكن هادا وعد مني نهار الجمعة غادي نجي ، غير وجدو الطعام (كسكسو)
_ واخا .ما تكون غير على خاطرك
فعلا خْديتْ حْوايجي ومشيت لتاوريرت.
فالبيت الجديد ديالي حطيت البوطة ولمّاعن والفراش .قبل ما نخرج عمّرت المدكّرة اليومية .
باش نبدّل الجو ، مشيت للقهوة باش نشرب شي كاس قهوة بالحليب ونْرد مجاجي.
انا هاكْدا ، جا عندي أحمد (الأخ ديال حفيظة) باين مفْليبي (يعني مقرقب )
_ خويا حميد ما نقدرش نلقى عندك واحد الميلة ؟
_ واش أخويا كالو لك انا عندي البانكا
_ الله يرحم الوالدين غير اعْتقني باللي كاين
_ واخا هاهي 5 دراهم وما تبقاش ادّور بيا
مشى خونا بالله وبقيت بوحديتي حتى لْديك التسعة ديال الليل .رجعت للبيت بعدما دُزْت على الشريف وخديتْ ليا شوية كفتة فالخبز
هاد السكن بقيت فيه قل من شهر على ودّاش واحد النهار شي معلم خدّام معاي قال لي كاين جوج معلمين باغيين يْزيدو شي واحد معاهوم.
مْشيت معاه باش نشوف الدار.هاد الدار تبان مزيانة ونقية .فيها جوج بيوت وكوزينة ووسط الدار.المعلمين بجوجهوم استقبلوني وعرفوني بنفسهوم .الاول سميتو عبد النبي والثاني البكاي.
تكلمنا على لكرى .واحد فيهم قال لي : هاد الدار راحنا كارين ها ب350 درهم للشهر .
التاني قال لي : واش باغي تسكن بوحدك فالبيت او تختار بيت مشروك.
فالحقيقة ما فهمت والو
شرحو لي الأمر : الى خديتي بيت غير بوحدك غادي تخلص 150 درهم وحنى بجوج نخلصو 200 درهم
_ واخا نخود بيت بوحدي
من غدا غادي تسكن معانا
ديك لوقيتة كنا يمكن فأواخر اكتوبر .جات مزيانة .هي هاديك ما غاديش نخلص مول الكاراج
العشرة مع هاد الخوت ماشي صعيبة بل مستحيلة .هاد الناس الله يستر كيتغداو بالبيض ويتعشاو بالبيض وبين لغدا ولعشى كيشربو أتاي مع الخبز والزيتون.
ريحة المرميطة ماكايناش عندهوم.
النهار الأول جا خونا بالله (عبد النبي) جاب 3 ديال البيضات ، هرّسهوم حدايا ودارهوم فالمقلى .دغيا طابو .عيّط على صاحبو : البكاي لغْدى راه واجد.
خوكم على نيْتو بان لي هاد الشي قليل : صبْرو شي شويا ، غادي نْجيب شي قرعة موناضة
_ واخا ولكن ما داخلاش فالحساب
_ ما تقلقش انا باغي نْبرّعكوم
فلعشية ، خونا بالله عاود الدّيسك ديال لغدى : 3 ديال البيضات
يا الله فاش تعشينا قلت ليهوم : لله يرحم الوالدين بغيت نعرف البرنامج ديالكوم في الأكل
_ راك تشوف أخويا البيض فالصباح والبيض فلعشية
_ واش ماكاينش المرميطة ؟
_ أخويا ما كرهناش ولكن على حسابك
_ انا الَخّوت يمكن ما غاديش نتْعاشر معاكوم
_ علاش أخويا ؟
_ اولا انا كنت كناكول البيض البلدي ، غير فوق الشبعة.تانيا البيض الرومي ما شي مزيان للصحة كيْضرْني فالمعدة ويْدير لي الحساسية
_ إوى اخويا خاطرك
فعلا بْقيت ناكول برّا اللي بغيت .بعض المرات كنْجيب معايا كاسكروط باش ناكلو فالدار.الحمد لله ما كنتش نلقاهوم فالدار والا كنت غادي نضْطرْ نتقاسم معاهوم.
واحد النهار لقيت البولة (المصباح) ديال المرحاض محروقة.
شي شوية جا عبد النبي وقال لي : واش انت اللي حْرقتي البولة؟
_ لا أخويا أنا لقيتها هكدا
حْنا فالهضْرة ، جا البكاي.
قالّو عبد النبي :
_ أنت اللي حْرقتي البولة؟
_ ماشي أنا
_ اوى شكون اللي حْرقها ؟
بقين فالهضْرة الخاوية.شي شوية لقيت الحل : صافي انا غادي نمشي نشري بولة جديدة
عبد النبي ما بْغاش : والله ما تشريها .انا حالف .هو اللي يشريها على حقّاش هو اللي حْرقها
البكاي ضحك وقال لو : واخا غادي نشريها ولكن غادي تشوف
خونا البكاي شْرى البولة .مين يدخل للمرحاض يْركَّبها ، مين يخرج يْحيَّدها
بقيت نشوف هاد خيْنا والبخل ديالو فين وصل.واه بنادم جيعان فماكلتو وفشرابو وفتصرفاتو
المهم واحد النهار حْضيتو مين بغى يْحيد البولة وانا نقول لو : خويا البكاي حشوما عليك انت تقضي غراضك فالضو وحْنا تخلينا فالضّلمة
_ أنتوما ما بغيتوش تخلصو البولة
_ هاك خويا انا للي غادي نخلّصها.
_ لا صافي راها خالصة ولكن خاصّك تعطيني حقك منها
_ شحال حقي أخويا ؟
_ اعطيني 15 دورو (ريال)
_ هادا ماكان .هاك ها 20 دورو
_ لا أخويا هاك الصرف
_ دابا ما غاديش تْحيَّد البولة
_ واش حمقتي .خاصك تْحيّدها مين تخرج من المرحاض
_ ولكن علاش أخويا ؟
_ عبد النبي باقي مامخلًّصشْ الحق ديالو
_ واخا انا غادي نْخلّصْ حقو
_ ما مْعاناش
_ واه .شوف رمي عليا البولة ديالك أنا غادي نشري وحدة جديدة
داك الشي اللي درت .غير او كان شْريتها عليه ب50 ريال وخا هي كتسوى غير 45 دورو
من داك النهار نْدمت اللي خلّيتْ الكاراج وسكنت مع قبيلة الجوع
على كل حال رّجعت لصاحبي عبد الله ، لقيتو كْرى الكاراج وهاد المرة كْراه ب150 درهم
اوى خاصني نرحل باش ما كاين


يتبع يوم الإثنين القادم
 

bouchaib56

::مراقب مغربي ::

غير متصل
#3
رد: قصة بالدارجة المغربية : مذكرات معلم في المدينة

نحن في سفرياتنا بالكاميرا نتابع اخونا حوميدي وماصدقنا ان انتقل بنا من البادية الى المدينة حتى ظهرت متاعب من صنف اخر مشاكل السكن وكراء الكراج ووعورة الحي ومسالكه
دائما اخي حوميدي مبدع في حبك واسلوب القصة
برافو عليك
 

Houmidi59

::الفارس المغربي ::

غير متصل
#4
رد: قصة بالدارجة المغربية : مذكرات معلم في المدينة

الحلقة رقم 3 : المفتش يْقلّب على جْوى منجل

في هذه الحلقة سأعود إلى حياتي العملية.كيف ما قلت من قبل ، بعدما أصبح القسم مْقادْ وارْجع عندي 36 تلميذ ، خْدمتْ مزيان اُو ما قصَّرْتش فالعمل مع التلاميذ. تصورو أنا اللّول يمكن فالمغرب اللي فكّر يْلوّن الصويرات.فديكْ لوقيتة كانوباقيين بالأبيض والأسود بحال الأفلام ديال اسماعيل ياسين. من الأعمال الشخصية ديالي كنت كنْجيت مورْسوياتْ (قطع) ديال الجرائد نعطي لكل تلميذ مورْسو (قطعة ) من الجورنال ونطلب منّو يحسب الحرف اللي قريناه .اللي لْقى أكبر عدد ديال داك الحرف عندوجائزة.كنت كذلك نوزع عليهوم بطاقات ديال الحروف .كل تلميذ عندو مجموعة ديال الحروف وخاصو يْصاوب بها كلمات سبق لينا قْريناها.
الصراحة في ظرف شهر ونصْ التلاميذ ديالي بْقاوْ يطيرو (بلا جنْحين) فلقراية.تقريبا كولهوم يقراو ويكتبو . فشهر دجنبر كنت مرتاح مع راسي.يا الله نعطيهوم التمارين ونمشي للمكتب ديالي نْقاد لوراق اونقرى شي كتاب نكون جبتو معايا.
واحد النهار كنت صايم (الله يقبل) .كانت الله أعلم ديك الجوج ، يعني كان باقي واحد 30 دقيقة للخروج.حسّيت بشوية ديال لعيا ، هاديك هي مْشيت نستراح فالمكتب.كانو التلاميذ كيرسمو على وداش كانت عندهوم حصة الرسم.
انا بحال الى ساهي دخل المفتش على غفلة.خونا بالله يسْحاب ليه غادي نشوفو نمشي نجري لْعندو.خوكم الحوميدي كان فاتكي (fatigué)ومن الفوق ما كنتش عارف باللي هدا هو المفتش.انا بانْ ليا بحال شي أب ديال تلميذ جا يْسوّل على ولدو.انا باقي كالسْ ، قلت لو : تفضل أسّي محمد .راني شوية عيّان ، أجي قرّب عندي وما تاخودهاش مني قلّة صواب.
خونا بالله ما عجبوش الحال : تبارك الله على المعلم .واش ما عرفتيش شكون أنا ؟
_ الصراحة لّا ولكن ماشي بعيد تكون الأب ديال شي تلميذ
ضحك خونا بالله وقال لي : نوضْ راك مع المفتش
خونا بالله يسْحابلو غادي نمشي نجري عندوونقدّم لو الاعتذار ديالي .بالعكس زاد طَيَّرْهالي بالطريقة ديال الجواب ديالو .على داك الشي ، ردّيت عليه : من بعد أخويا واش باغي تخْلعني ؟
المفتش ما كانشْ ناوي على هاد الجواب قْلبها لدرب ليهود (هادا مصطلح وجدي المعنى ديالو ولّى ظريف ، بمعنى آخر بغى يْجاملني ): واش هادي طريقة باش تستقبلو الضياف ديالكوم؟
_ حاشا أالسيد المفتش ولكن راني شوية عيّان حيت راني صايم
ليهودي دغيا شْعل : الى كنت مريض أسيدي ديرْ رخصة أو سير للطبيب
صافي هاد خونا بالله راه يْقلّبْ عليها .على داك الشي خنْزرت(شَفْت فيه غضبان) فيه مزيان وقلت لو : شوف أسي محمد أنت اللي راك تقلّب على الطبيب
_ كيفاش ؟
_ غادي تخْرج من القسم والّا غادي نَضَّربك ونْديرْ لك شي فضيحة حدى التلامد.يا الله بينكا ( يعني برّا)
خونا بالله مشى او هو يتوعد : غادي نكتب ، غادي نْدير .......
شفتو مشى نيشان عند المدير .شي شوية بانو لي شي معلمين يلتاحقو بالادارة.المهم قلت مع راسي : ماشي سوقي ومن الفوق هاد خيْنا آش عندو يْدير؟ ياك راني مْرسَّمْ .
المهم بقيت مْريّحْ فالمكتب. دازت واحد الربع ساعة ، جا عندي المدير وقال لي : يا أستاد واشتا عندك مع المفتش ، راه بان ليا فيه الخلعة.
_ والو ، شوف هو اللي واشتا عندومعايا
المدير ضحك وقال لي فْوَدْني : واش بصّاح كنتي غادي ضَّرْبو ؟
_ بحال هداك الكَمْكومْ راه وجه البونيا (اللكمات)
المهم المدير قال لي : برّد السوق أأستاذ أنت باقي جديد ، غادي تهلك غير صحتك
قبل ما يمشي حيت كان وقت الخروج ، قال لي باللي المعلمين جاو وتكلمو مع المفتش وراه ما غادي يْدير والو ولكن خاصني نحْضي راسي مْعاه على حقّاش غادي يْدير ليا شي تفتيش فْأقرب فرصة ماشي بعيد مورا العظلة ديال الدورة الأولى
المهم دق الجرس وخْرجت في حالاتي بعدما رْكبت على اسمهان ديالي (لاموطو، هدا تنبيه لهادوك اللي ما مْتبْعينشْ القصة ديالي الأولى )
يومان مورا الحدث جا عندي المدير .قالك أسيدي بْغى يْدير ليا زيارة.الشغل باين .خونا بالله (المفتش) طْلب من المدير يشوف عن قرب الخدمة ديالي.
خوكم الحوميدي ديما داير الميزاجور (MISE A JOUR) يعني حاضي سْواريه مزيان
السيد المدير حْضر لي فحصة الرياضيات وحصة القراءة .عجبو الحال بزاف.أنا لْعبتها عليه كْبير.قلت لو :
_ السيد المدير تعطي للتلاميذ ديالي أي كلمة غادي يقراوها بشرط يكونو الحروف هادو اللي فالسبورة
_ واخّا غادي نْشوفو
المهم بْدا يكتب فالكلمات والتلاميذ يقراوهوم بالزربة
_ واه هاد الشي عندك مجهاد
المهم قبل ما يودّعني أعطاني التقرير اللي كان كاتبو فالوسخ وقال لي : الله يرحم الوالدين الى ما تكتبو ليا فورقة نقية وتْجيبو ليا فلعشية باش نصيفطوه لهداك الك.....
_ شكون الكي....
_ ههه على المفتش راه مشات لي سميتو



يتبع غدا إن شاء الله













 

bouchaib56

::مراقب مغربي ::

غير متصل
#5
رد: قصة بالدارجة المغربية : مذكرات معلم في المدينة

التفتيش في التعليم المغربي في بداية السبعينات
كان همه الابتزاز والتهكم على المعلم المتخرج من المدرسة لتكوين المعلمين
والى غاية التسعينات تلاشت هذه الفكرة نظرا ليقظة المعلم وفضحه لهذا الجهاز المراقباتي
في التعليم الابتدائي
وبفضل وجود النقابات التعليمية والتي للأسف تغيرت سلوكاتها تجاه المعلم
نشكر اخينا حوميدي على اطلاعنا على ماعانيناه في فترة البداية
ويستحق التقدير والتكريم على هذه القصة الشاملة لحيثيات التعليم الابتدائي برمته
 

Houmidi59

::الفارس المغربي ::

غير متصل
#6
رد: قصة بالدارجة المغربية : مذكرات معلم في المدينة

الحلقة رقم 4 : سكران ويعرف باب قِسْمو(الجزء الأول)






في هذه الحلقة سنعود من جديد إلى حياتي الشخصية. كيف ما سبق قلت ليكوم خاصني نرحل باش ما كاين. الحمد لله لَوْجيبة جابها الله .واحد الصبحية يا الله فاش خارج تْلاقيتْ مع واحد المعلم سْميتو محمود.ماعمرو ما شفتو حيت هو كيخدم فالفوج الثاني.المهم يمكن أسمع بلخبر ديال المفتش ، جا باش يعرف الحقيقة لأنّه على حساب ما قال لي : المعلم الجديد (اللي هو أنا) ضْربْ المفتش بروسية وْخَلّى نيفو يْسيل بالدم.وراه المفتش مسكين فالسبيطار اُو زيدْ أُو زيد...المهم شي هدَرة خاوية دْيال الأفلام الهندية.
حْكيت لْخونا بالله اللي وْقع بالضّبط.سّي محمود واخّا هَكْدا ما تيَّقْش.ماشي شغلي
لكلام جابْ لكلام وجات الهدْرة على لَكرى .خونا بالله فرّحني مين قال لي باللي هو ساكن فالدار ديال الواليد غير بوحدو وراه ماكرهش يزيد معاه شي واحد يسكن معاه حيت هو ما تيْفيقْش بكري.فْلَبْلاصْ قلت لو انا معاك .مين سوّلتو على لكْرى ، قال لي : بَشْحال كنت كاري ؟
جاوبتو : ب200 درهم .
قال لي : هي اللي غادي تعطيني كل شهر
الدرّي يْبان معقول وْحدّو حدْ راسو.من الفوق كْريم ، قال لي : راه باقي للشهر 10 أيام .أجي تسكن بْلا ما تْخلّص.
جْبَرْتْها من الجِنَّةِ والناس .دغيا قلت لو : غدّا هاني عندك
فْديكْ لعشية ، مْشيتْ جْمعتْ حوايجي .شافني البكاي :
_ اوى خويا واش ناوي تْفارقنا ؟
_ واه أسّي البكاي.ما نقْدرشْ نْبقى معاكوم
_ عْلاش أخويا ؟ واشْ كاينْ شي مشكل ؟
_ نْعامْ .مشكل البيض
_ كيفاش البيض ؟
_ الطبيب قال لي ما خاصنيش ناكول البيض
_ اوى ما تاكلوشْ
_ عندك الحق ولكن انتوما كتاكلوه
_ واشْ دخَّلْنا حْنا مْعاك ؟
كان خاصني نْفَسَّرْ لو باش يقتنع: اللي كاين هو انا ما باغيشْ نجمع لفلوس.انا باغي نتْبرّع مع راسي
_ البكاي ضحك : زعْما حْنا قرْزازة(سقرامين)
_ اسمح لي أخويا البكاي انتوما خاصكوم تدخلو للتاريخ.
بالطبع ، ما بغيتش نزيد معاه فالنقاش.مْشيت في حالاتي للْبيتْ ديالي باش نجمع حْوايجي.
الغد ليه مع ديك العشرة مْشيت للدار الجديدة بعدما أعطاني محمود الساروت وبيّن لي الموقع ديالها.فعلا الَخّوت دار واش من دار.فيها البالكون وفالطابق الأول.لبيوت كاين 3 .كاين الحمّام فيه البانْيو والكوزينة كبيرة تقدر تلعب فيها ماتش ديال الكورة.كاين السطح كبير وواسع
المهم دار مشمسة وتسْتاهل حتى 500 درهم.
االكوزينة مْجهزة حيت فيها الثلاجة والبوطاكاز (المطبخ) وماشينة الصابون.خونا بالله راه بورْجْوا (غني) مع راسو
المهم هدا شجعني باش نْدير لغدا.اللي كان هوأني مْشيت وشْريتْ نصْ كيلو دجاج ، كيلو بْطاطا وشوية بْصل وماطيشة .
اطْبخت ليها واحد المرميطة دايزها لكلام .باش تزيد بنّة على بنّة زدْتْ ليها الزيتون وضامة البنّة كنور
تْغدّيت مع ديك الطْناش .الباقي خلّيتو فالطنجرة وكتبت ورقة لْخونا بالله باللي هدا راه حقو من لَغْدا
هاديك لعشية بحال الى جاني النعاس .يمكن راكو عرفتو علاش ؟ لّا ما شي حيت زَنَّدْتها بطاطا ودجاج .على ودّاش شْربت
اللبن .
مين تشرب اللبن وتضْربْ فيك الشمس راه تْجيب لك النعاس.داك الشي اللي درت فالقسم.
من بعد فقت كانت الساعة الجوج .يعني ما باقي والو باش نخّرْجو
العلاقة مع خونا بالله نقدر نقول باللي مرّاتْ بتْلاتَى ديال المراحل.
المرحلة الاولى دامت تقريبا شهر.سّي محمود كان يْبان عاقل ودريويش .حيت كنا نتلاقاو غير فلعشية مورا المغرب .كان هو اللي يتكلف بْلَعشا.هوخاطيهْ الطْياب (الطبخ) حيت كان يمشي عند واحد صاحبو ويجيب طنجرة كل مرّة واشْ فيها .مرّة الحمّص بالكرعين ، مرة لحريرة ، شي مرّات مْريقة باللحم وحتى شي مرّات أخرين يْجيب كسْكْسو.من بعد قال لي هادي سْميَّتْها "خرْدولة"
خونا بالله وكّال كبير يصلاح يسكنن مع بركاش (الله يرحمو)
المهم كنّا نْرِيْحوفالبيت التالت باش نْوجدوالتحاضير أو نْصَحّوالدفاتر .فالحقيقة انا اللي كنت نْدير هاد الشي ، هو كان غير يحكي لي المغامرات ديالو.
المرحلة التانية ، خونا بالله ما بقاش يْبان فلعشية واخّا أنا جاتني مزيانة حيت كنت كنْديرْ الخدمة ديالي بلا ما يْبرزطني .ولكن اكتشفت انّ خونا بالله يدخل للدار مع ديك العشرة ديال الليل يتْمايل وجْهو أحْمر.سّي محمود كان سكران بالمعقول.غير يشوفني يبْدى يضحك ويكول شي كلام ما عندو حتى معنى.كنت نْوصلو للبيت ديالو ونقولو : نْعس اخويا محمود راك باين خابطها .
مسكين كان بعدا يسمع .هاديك هي يْطيح كاوْ.
فالصباح نمشي للخدمة وخونا بالله باقي ناعس ، نرجع من الخدمة ما زال خيْنا ناعس .مين نْفيْقو يْنوضْ كي المدعور ويمشي هاكدا بلا ما يفطر.ولكن من بعد قالو لي شي ناس (بركاكة صْحاح) باللي خونا بالله كيفطر فالقسم.
المرحلة التالثة صافي السيد أدْصَرْ، بْدى يْجيبْ صْحابو للدار باش يْقَصْرو.كنت واحد لوقيتة نكْلسْ معاهوم وكنْشوف فهاد البشر اللي بارك يْعَمَّر كرشو بْلحْرام.
العجيب فالأمر كنت نْشوفهوم يْرِيْحوعلى شكل دائرة .يْجي اللّوّل يْعَمَّر كاس ديال الرّوج (كاس صغير )
يشربو فْجُغْمة وحْدة.من بعد يْدوّزْ القرعة والكاس للتاني.هداك التاني يْديرْ بْحال اللّوّل .من بعد تمشي للتالت وهكدا حتى يْدوزو كاملين.ما كاين لا هدْرة لاكلام ، غير مرّة مرّة شي واحد يضحك ، يتبعوه اصحابو بلا ما يعرفو أعلاش راه ضْحك
بان لي هاد السكايرية ما فيهوم خير.هي هاديك بْقيت نمشي لْبيتي ونْسَدْ على راسي
خونا بالله عاقْ باللي ما عْجبنيش الحال.بقى شي مرّات يسكر برّا .
المهم واحد النهار جاب واحد السيد يخدم فالبنك الشعبي .السيد باين عليه محترام بزاف ولكن زايد فيها شي شوية ديال النخوة والبُخْ.تصورو مين سلَّمت عليه ، دغيا مشى يغسل يدّيه بالما والصابون.زعما راه فيا الميكروبات.هادا باينا كون شاف لمْرامط ديال خونا بالله غادي يقدر يسكت ليه القلب.
واخّا هكدا بعدا هادا خاطيه الشراب.
المهم شوية شوية بْقينا أنا ويّاه صْحاب .كنا كنخرجونتعشاو برّا اِمّا اللحم مفور او الكفتة
حتى هوما عجبوش المنظر ديال خونا بالله والسكايرية اللي كان يْجيب والمشكل زادوفيها حتى لبْنات
صافي هدا باغي يْشوّهنا .صاحبي الجديد (سميتو البركة) قال لي انا ما نقدرش نسكن مع هاد السكايري .السمعة ديالي راها في خطر .راه البنك الى ساقو لي لخبار يقدرو يجْريوْ علي من الخدمة
المهم قلت لو :
غير صْبر حتى لآخر الشهر راه كاينة واحد الدار زينة لكْرى ديالها غير 500درهم.
فعلا بْقينا صابرين ولكن انا واحد الحاجة بْقيت نْديرها مع خيْنا.النهار اللي يسْكرْ فيه، فْداك الصباح ما نرجعش للدار باش نْفيْقو، نمشي نيشان عند صاحبي مول الحانوت ونبقى عندو حتى لْديكْ الطناش عاد نرجع للدار غير باش نتوضى ونصلّي الظْهور.شي خاطرات نلقاه ، يا الله فاش فاق.زعما خونا باغي يْلومني : حْشومة عليك خويا حميد .علاش ما فيَّقتْنيش؟
انا نْرد عليه : واش أخويا أنا لمْرى ديالك ؟
ما يلقى ما يْرد
بالنسبة للمدرسة المدير صافي طْلع لو الدم معى خيْنا وجاب لو واحد النهار المفتش.
فلوقيتة اللي جا المفتش ، لْقاه يفطر فالقسم.المشكل ماشي لفطور : ما لقى عندولامدكرة يومية لا تحاضير وحتى الدفاتر ماشي مْصَحّين.
خونا بالله بْدى يبْكي ويرغب.المفتش شاف من حالو وقالو غادي نرجع ليك بعد أسبوع وخاصّك تكون واجد.
هداك الاسبوع خونا بالله زاد دُوزَا فالنشاط والتقصار.فالنهار اللي يْجي المفتش دار شهادة طبية واعطاهالي باش نْوصّلها للمدير

يتبع الجزء الثاني غدا ان شاء الله
 

bouchaib56

::مراقب مغربي ::

غير متصل
#7
رد: قصة بالدارجة المغربية : مذكرات معلم في المدينة

أسجل لك أخي حوميدي انطباعاتي حول شغفنا بقصة مذكرات معلم في المدينة
واشيد بما تصفه بتدقيق عن وضعية المعلم وفيه ذوبان في المجتمع المغربي
وان لم يسلم من معانات محنة في حين اخرون في ارقى المدارس النموذجية
ولا يعانون من الاقسام المشتركة ناهيك عن اكتظاظ لا وجود له
وامام هذه المقارنات نرجو تحسين وضعيته المادية في الاماكن الوعرة والنائية وتوفير سكن لائق له
وارجاع الكرامة السابقة لهذه الشمعة التي تحترق من اجل اعطاء نور يتخرج منه قياد وباشوات ووزراء اما المسكين ماذا جنى الا المعانات ومازال يعاني
 

Houmidi59

::الفارس المغربي ::

غير متصل
#8
رد: قصة بالدارجة المغربية : مذكرات معلم في المدينة


الحلقة رقم 5 : سكران وْيَعرف داري الجْديدة(الجزء الثاني)

فالنهار اللي يْجي المفتش دار شهادة طبية واعطاهالي باش نْوصّلها للمدير
المدير غير شاف الشهادة الطبية ، قال لي : هاد المسخوط غادي يفضحنا مع المفتش
أنا ردّيت : لّا والله الى مسكين راه مريض
_ مريض ؟ واش هو ديما خابطها ويْجي للمدرسة سكران...
_ نْعام أالسيد المدير ولكن يعرف الباب ديال قسمو
المدير ضحكاتو هاد العبارة .بْحال الى برْداتو ، أُهو يقول لي : غير الله يْسلّك هاد النهار على خير.
المشكل أن الله ما استاجبش .المفتش جا وقلّبْ على خونا بالله .حيت ما لْقاهش ، رجع زعفان بعدما أخبر المدير باللي غادي يتّاخد الإجرائات القانونية ضد المعني بالأمر.
هاديك هي ، المدير عيّطْ لي باش يعلمني باللي كاين.زاد قال لي : كولْ لصاحبك يمشي يْشوف كيفاش يْديرْ مع المفتش .راه مْحمَّضْها بالمعقول
المهم مين ارْجعت للدار ، لقيت خونا بالله مع شي اصحابو باركين يشربو وناشطين مع ريسانهوم.غير شافني ، قال لي : جيتْ أخويا حميد...اوى المفتش جا بعد ؟
_ جا او سوّلْ عليك
_ ياك بعدا ؟
_ ايه أخويا وراني شمّيت فيك ريحة لحْموضية
_ باينة حيت راني كنشْرب
قبل ما نْخليه ، جاوبتو : قضيتك حامضة وماشي بعيد يجريو عليك من الخدمة

دازت أيامات وجا آخر الشهر .صاحبي البركة مْشى معيا للدار الجديدة اللي كْرينا.حتى هي فيها 3 بيوت وْكوزينة.الكرْيَة ديالها كيف ما سْبقْ قلت ليكوم : 500 درهم للشهر.
البركة شد بيتو أطَّلْ على البالكون وانا خْديت بيت عندها جوج ديال الفاصاداتْ.بالنسبة للأكل خونا بالله حيتْ نْقي بزاف ما بغاش يعاشرني فالماكلة.قال لك أسيدي هو كيبغي ياكول فالريسطورا (المطعم).خليتو على هْواه.
واحد الْحَدْ كنت جاي فالتْران من وجدة لتاوريرت ، تْلاقيتْ مع واحد المعلم .غير شفتو عرفتو.كان مسكين هازْ فْيدّو التوزيع السنوي .
وْأنا نْخاطْبو : أنت باينة معلم ؟
جاوبني : وحتى أنت باينة عليك معلم؟
_ واه كي درتي باش عْرفتيها ؟
_ ما يْسوَّلْ فالمعلّم غير المعلّم
هي هاديك ولّينا أصحاب.الصراحة كان نعم الصديق.راه مازال صديق ديالي لحد الساعة
من العجيب الصدف كنت نكتب فهاد الحلقة مين جا لعندي للدار .هاد صاحبي سعيد عزيزة عليه اللوبيا.تْصورو انه يقدر ما يمشيش للخدمة الى عرضو عليه ياكول اللوبيا.
من الزهر ديالوهاد النهار لَوْلية (الزوجة) كانت طابخة اللوبيا.
المهم مين وصلنا لتاوريرت ، سوّلتو واش عندو فيت يْباتْ .ردْ عليا باللي غادي يْشوف شي أوطيل على قد الحال.خوكم كريم ، أعْرض عليه باش يْبات عندو حيت الدار كبيرة
خونا بالله فْرح ومشى معايا.
مين دْخلنا للدار ، كان البركة كيشرب القهوة.
بْحال الى البَنْكاوي ما عجبوش الحال ولكن جاوبني (زعما يدفع الهدْرة) واش هاد السيد باغي يكْري معانا الدار ؟
صاحبي سعيد هو اللي جاوبو : أنا خو مول الدار
البركة صْفار ودْبال : اسمح لي أسيدي ما تدّيهاش مني قلة صواب.
_ ما كاين مشكل
هاديك هي انا اللي ادَّخَّلْت : شوف البركة هدا ضيفي وماشي شغلك فيه.
_ صافي اخويا غير اسمح لي
المهم مشينا للبيت ديالي باش نستراحو من بعد خرجنا باش نتعشاو .كاين واحد السيد يلْغاوْ لو الشريف كيتْقنْ الكفتة.تعشّينا عندو.سعيد هو الّي خلّصْ
فالغد ليه صاحبي سعيد مشى للفرعية ديالو بعدما وعدني يْجي نهار الجمعة القادمة.
بالنسبة لخونا السكايري بعدما خلّيناه بوحدو، جا واحد النهار أبّاه ولقاه مع أصحابو يْطَوْسو (يشربو الشراب) زْعفْ وغضب واجْرى عليه من الدار.خونا بالله بقى متْشرَّدْ بين الدروبا والزناقي.
واحد الليلة جا لعندنا يبكي ويشكي .حْنا مين يدق علينا شي واحد نمْشيوْ نشوفو شكون من البالكون.البركة هو اللي شافو ، قال لي خْطيك منو .هدا مولا صْداعات ومشاكل.
واخّا هكدا جاوبتو : أهلا خويا محمود .شكون اللي جابك عندنا فهاد الليل ؟
جاوبني او هو يبكي : آه يا خويا حميد.راني تْبهدلْت
رد عليه البركة : أنت راك مْبهْدل هادي شْحال
محمود مسكين ما علّق والو على الهدْرة ولكن زاد أكَّدْ اللي قالو البنْكاوي : واه أخويا البركة راني حطّمت الروكور (الرقم القياسي) فالتبهديل
هي هاديك بْدى يبكي ويْنَوَّح بحال داك البرهوش اللي خاصّو يرضع لحليب ديال أمّو.
البركة دغيا شَفّو قال لي : سّي حميد ها العار الى ما تْحلّو الباب.
دخلناه للدار والدموع باقية تْسيل من عينو.السيد نْدم على كل ما دارو وقال لينا راني تُبْتْ لله وما بقيتش نشرب الشراب.
باش يْبرهن على كلامو ، شي شوية قال لينا : الله يْخليكوم أعطيوْني السجادة ، راني باقي ما ممْصلّيش المغرب.
المهم كلام يجيبْ كلام حْكى لينا آش وْقع ليه مع الواليد .دابا راه حاصل.ما عندو فين يْبات.
البركة اقترح عليه يسكن معانا فالدار ولكن بشرط يْخلّص لكرى .
محمود ما كانش ناوي بْحال هاد الاقتراح، دغيا قال لي : شحال حقي فلكْرى ؟
جاوبو البنكاوي : خاصك تعطينا 200 درهم.
خونا بالله جبد لفلوس كاش وقال لينا : ها لكرى ديال هاد الشهر ولكرى ديال اللي من بعدو.
البركة خْطف لفلوس أو دارهوم فجيبو .
فلْغدْ ليه محمود جاب حْوايجوباش يسكن.
العجيب فالأمر أنه ما بْقاش يْجيب صحابو ولكن مرة مرة يْغيب ومين يدخل للدار ريحة الشراب تعطي من فمو.
المشكل كان يحاول ما يتْلاقاش معانا ولكن حْنا كنّا عارفينو
واحد النهار ، جا لعندي للبيت وقال لي : خويا حميد أنا قاصدك ونتمنى ما تْخيبْ نيش
_ جاوبتو : اللي قْدرنا عليه نْديروه
المهم خونا بالله كان باغي يْسلَّفْ مني 300 درهم.
انا صراحة ما بغيتش حيت هاد المبلغ راه كبير بالنسبة لْديك لوقيتة.خونا بالله استعمل جميع الطرق باش يقْنعني وفعلا نْجح مين أعطاني شيك كتب فيه اسْميْتي
واخا قلت لو انا موافق ولكن فلوسي غادي نْخرّجها فآخر هاد الشهر



يتبع غدا الجزء الثالث

 

bouchaib56

::مراقب مغربي ::

غير متصل
#9
رد: قصة بالدارجة المغربية : مذكرات معلم في المدينة

نحن نتابع هنا حوميدي نية مئة في المئة طيب خجول
ويعطف على حال المساكين من المعلمين
وهو بذلك نلمس منه نقاوة القلب وطهارة السريرة
حوميدي الرجل الصريح الى درجة الجدية
في اقواله كما في أفعاله
نتابع بشغف وبشهية قصص ذكريات أخينا في المدينة
مما زاد في كساء قصصه غطاء أهله لاحترافية القصاص
المبدع
حيوا معي حوميدي القصاص المبدع
 

Houmidi59

::الفارس المغربي ::

غير متصل
#11
رد: قصة بالدارجة المغربية : مذكرات معلم في المدينة

الحلقة رقم6 : سكران وْ ما قْدَرْشْ يْحلْ الدارْ وْ ما زال عاقل على الشيكْ(الجزء الثالث)

خونا بالله اسْكن معانا تقريبا شهر على ديك الحالة اللي قلت ليكوم من قبل.
فآخر الشهر جات صدفة العطلة ديال الدورة الاولى ، مشيت كي العادة للرباط.من الصدف أيضا خويا البركة حتى هو مْشى لوجدة يْقضي أيامات عند والديه .سّي محمود استاغلْ الفرصة ودارْ من المنزل نايت كلوب(night club) .التقاصر فالنهار والليل.جاب الله قبل ما نمشيو سدّينا لبيوت ديالنا بالساروت.تْصورو كون خلّيناهوم مفتوحين، غادي نلقاوهوم في حالة لا يرثى لها.
المهم ارجعت يوم قبل نهاية العطلة حيت كنت ناوي نْدوزْ لوجدة .
يا للْهَول ،اللي شفتو خْلعني : الكوزينة بْحال الى كانت فيها الحرب.بيت خونا بالله مفتوحة ولفراش كولشي مقلوب.هو كان ماشي ناعس ، كان طايحْ تحت الناموسية ويشخر بحال الحلّوف.
شي وحدين حْداه مْكوْرين فكل قنْتْ من البيت
المهم كيف ما نقولو حْنا لوجادة البيت مْرَبْجة .
فيّقت خونا بالله .ناضْ مسكين مقْفوزْ : آه دغيا سالاتْ العطلة .
هاد عدوالله خاصني نستعمل معاه الحيلة.هي هاديك درْتْ بْحال الى ما لاحظت والو .قلتو لو : اسمح لي انا غير كنت دايز حيت غادي نمشي لوجدة
او هو يرد علي : حتى انا غادي نمشي لوجدة
_ اسمح لي انا غادي دابا
_ حتى انا
_ اوى خويا فيّقْ اصحابك يمشيوْ فْحالاتهوم واجمع حْوايجك.انا راني مزروب
_ واخا
بالفعل رشْ على صحابو الماء باش يْنوضو .بعدما خرّجهوم ، قال لي : يا الله هاني موجود
فنظركم هاد المتعوس علاش بغى يرافقني فالكار لوجدة ؟ باينة باش يْخلّصْ علي لبْلاصة.زعما باغيني نْمَيَّكْ على داك الشي اللي شفت.
داك الشي اللي وقع.مشيت فابور لوجدة.فالطريق بْدى يتكلّم لي على البَلْية ديالو وراه ناوي يقطع كولشي حيت باغي يرجع لطريق الله.المهم شي هدْرى دخلت لي من وْدَنْ وخرْجاتْ من لوْدَنْ لوخْرى.
غير وصلنا لوجدة ودّعْتو وشَدّيتْ طاكسي لدار صاحبي الزاوش.
فلْغدْ ليه مْشيتْ عند خالي باش نطْمَئَنْ على الأحوال ديالو ونْوَصَّلّو سلام الوالدة.
سبحان الله من الصدف تْلاقيت بصاحبي البركة فلمدينة لقديمة.ما بْغيتش نْخبّي عليه داك الشي اللي وقع.البنكاوي صافي غضب: سّي عبد الحميد ، أنا ما يمكن ليش نعيش مع هاد السكايري لموسخ .راه شوَّهْ بيا اكثر من لقْياس.
صافي غادي نرحل
_ ما تخافش ، غادي نطلب منو يرحل
_ ماغاديش يرحل .غادي تْشوف
فعلا البركة عندو الحق.انا راني نْسيت باللي ما عندوش فين يسكن
قلت لصاحبي : ما تقلّقْش .لا بد نلقاوْ شي حل
هي هاديك أرْجعت لتاوريرت باش نْقاد الكوزينة .
هاديك الليلة جا البركة وقت لعشا.مابغاش يتعشى معايا كي العادة ولكن بقى معايا حتى ساليت من الأكل.
تكلمنا فالموضوع وما لْقينا حل.
جات لحْضاشْ ديال الليل خونا بالله ما بانش.
مشينا كل واحد لْبيتو باش نَعْسو.
فالصباح فقتْ بكري.طَلّيتْ على البيت .خونا بالله ما كاينش.
مين رجعت من الخدمة ، ما لقيتوش.
مْشيت عند واحد صاحبي كيْبيع الحمَّصْ والزريعة.هاد صاحبي ماقاريش وخّا هكدا عندو شي أفكار خطيرة.غير احْكيت لو على السكايري، قال لي عندي الحل باش تتْهنّى منو الى الأبد
_ واه أخويا أتيني بيه
صاحبي سدّ الكرّوسة ديالو وقال لي : يا الله نمشيو للدار
مشينا للدار .قال لي واش عندك شي تورنوفيس (tournevis)؟
_ ايه عندي .علاش بْغيتيه؟
_ غير جيبو وغادي تعرف
جبتو اللي طْلب.قال لي : دابا غادي نْحيْدوالساقطة(لقْفل) ونمشيو عند صاحبي عزْرين
_ شكون هاد عزرين ؟
_ ما تخافش.هدا عزرين ديال السوارت.غادي يْبدَّل ليك السوارت ديال لقفل.مين صاحبك السكران يْجي ما غاديش يقدر يدخل
_ باز أخويا .راك مجهاد
عند عزرين الأمور دازت كيف ما شْرح لي صاحبي مول كاوكاو.هاد العملية تْقامتْ علي ب30 درهم ولكن ماشي مشكل ، صاحبي البركة غادي يْخلّص النص ديال الثمن
.هي هاديك مْشيتْ عند صاحبي للبنك ديالو .غير شافني دار راسو ما يعرفنيش
_ آش حبْ الخاطر أسيدي
_ ما تلعبْهاشْ علي كبير.انا صاحبك حميد
_ سير أخويا انا خدّام
_ مالك اصاحبي معقّد.
_ واخّا أشنو باغي؟
_ دابا تْكلّمْتي.صافي راحنا تْهنّينا من السوكارجي (السكران)
_ صافي بْغى يمشي؟
_ لّا راني بدّلْت لو لمْفاتح.
المهم شرحت لو كولشي.البركة فرح وقال لي : هدا خبر زين.هاد الليلة راني عارض عليك باش تتعشّى معايا
_ بارك الله فيك
رجعت للخدمة مع ديك الطناش والنص .المدير جا عندي باش يْسوّلْني على محمود.خْبرتو انه باقي ما جاش
المدير تْلف .ما لقى ما يْدير
المهم قلت لو يصبر راه يقدر يْبان غدّا
فالليل كنت مع صاحبي البركة فالبيت ديالو .هي هاديك سمعنا شي واحد باغي يْحل الباب.
البركة مْشى دغيا للبالكون .قال لي : أجي تشوف راه الفار تْشدْ
محمود دق فالباب .قالو البركة : شْكون ؟
جاوبنا ؟ انا محمود.
انا اللي تكلّمت معاه : مالك أخويا واش نْسيتي السوارت ديالك ؟
رد علي : هاهوما غير اوكان ما عرفتش علاش ما بْغاتش الباب تْحل
قال لو البركة : حيت راك خابطها
المهم ، اطْلب منّا نْحلّو لو الباب
البركة قال لو : سّي محمود شوف مع من تسكن .حْنا صافي فضّينا معاك
انا زدت قلت لو : راحنا بدّلنا السوارت.غير ارمي هادوك اللي فْيدّكْ
بْقى يْشوف فينا.حْنا خلّيناه ودخلنا في حالاتنا.
شي وقيتة بْدى يْغوّت ويْسبْ .لكن شكون أدّاها فيه.
البركة جْبرْها من الجنة والناس .قال لي : يمكن الى نْخلّيوْ لعْشا لْشي نهار آخورْ
فالصباح كي العادة مْشيت نخدم.جا عاود تاني المدير باشْ يْسوّلني على محمود قلتلو : راه جا ولكن راني خلّيتو يْباتْ برّا.
مين حْكيت لو اللي وقع ، المدير مات بالضحك
المشكل تْهانّينا منّو ولكن موحال الى غادي يعطيني 300 درهم اللي سلّفْتْلو.
فعلا مْشيت للبنك .قال لي واحد الموظف راه ما عندو حتى ريال فلحساب ديالو.
مين قلتلو آش يمكن لي نْديرْ، جاوبني بأني نقدر ندفع الشيك للبوليس على حقاش ما عندوش الرصيد
فعلا طْبع لي الشيك باش الغد ليه ندفعو للبوليس
فلوقيتة ديال الخدمة ديالي جا عندي فالقسم وقال لي : انا ما جيتش باش نطلب باش تْخلّيني نسكن معاك.صافي هاداك الموضوع ما بْقاتْ فيه هضْرة.راني جيتْ على ودْ الشاكْ
خونا بالله وصثلو لخبر باللي راني مْعَوَّل ندفعو للبوليس.باينة راه خاف.
على داك الشي أعطاني 100 درعم وقال لي : الله يْخلّيك غير صْبر معايا شي شوية الشهر الجايْ غادي نزيدك اللي بْقى
قبلتْ .
هادا حل معقول : غادي نصبر شهر.جاب لفلوس هو هاداك ، ما بغاش ندفعو للبوليس

يتبع غدا إن شاء الله مع الجزء الرابع
 
التعديل الأخير:

bouchaib56

::مراقب مغربي ::

غير متصل
#12
رد: قصة بالدارجة المغربية : مذكرات معلم في المدينة

الله يكون في عونك اخي حوميدي قاسيتي ومازال تنتظرط المفاجات
هذا لسبب قلة الراتب والا كنت في دار مرتاح لوحدك
ولكن السحابة ستزول في يوم ما
وانت الان تعيش على الذكريات لياخذها الجيل الحالي كعبرة
لعله يستفيذ منها في مهنة العذاب هذه
 

Houmidi59

::الفارس المغربي ::

غير متصل
#13
رد: قصة بالدارجة المغربية : مذكرات معلم في المدينة

الحلقة رقم 7 : سكران وْ مانسيش ل100 درهم(الجزء الأخير)


فداك الشهر اللي غادرنا فيه محمود ، وقعو جوج أحداث مهمة .الحدث الأول هو قدوم صديق قديم جالو التعيين بتاوريرت.تصورو أن هاد الصديق كان يْدير السطاج فمدرسة الأساتذة بالرباط وفالتعيين ديالو يتفاجاْ بهاد لمدينة اللي على حسب القول ديالو ما عمرو ما مشى ليها.خونا بالله بحال الى حسْ باللي غادي يكون غريب فهاد لبلاد.
داك النهار اللي غادي يسافر فيه جا عند الواليدة ديالي حيت كان يمشي يزورهوم مرّة مرّة.لكلام يْجيب كلام قال ليهوم ها فين عيْنوني .الوالدة مسكينة فرحات بزاف وهي تقو لو :
_ راه تمّا ولدي حميد .غادي تْوانس مْعاه
خويا الطالبي (ماشي وان) رشقات ليه ورد على الواليدة: دابا غادي نمشي لتاوريرت وْأنا عاجبني الحال.
الوالدة أعطاتو العنوان ديال المدرسة ديالي.فعلا واحد الصبحية ، جا عندي عون المدرسة وقال لي باللي شي ضيف جايني من الرباط.
من الزهر ديالو كانت باقية شي رُبوع ساعة على الخروج.
هي هاديك خرجنا بجوجنا ومشينا للدار.
مين ورّيتو البيت ديالو ، قال لي : خويا أنت دغيا تفهم
_ واش أنا ماشي معلم ؟
_ لا ،حاشا
فطرنا مزيان .من بعد وصّلتو للثانوية ديالو فين يخدم.ديك لوقيتة هاد الثانوية كانت مْجلْوقة على لمدينة.واخّا هكدا ، خويا الطالبي كان ديما فرحان.
المهم بعدما دار الاجرائات ديالو مع الإدارة ، قال لي : راني ليببْرْ (libre)حتى لنْهار الاثنين.غادي نمشي لوجدة نْجيبْ حْوايجي باش نسكن معاك
الحدث الثاني هو أيضا قدوم ولد عمي عبد الحفيظ .هاد خونا بالله كان ساكن فمكناس .مسكين حيت ما قاريش بزاف ، يا الله خارج من البيت التاني.بهاد المستوى ما يْخدْموهش حتى شفْناج.اوى كان عاطيها للْبالا والفاس ولكن دغيا عْيا ومع هو قليل صحّة ، ديسيدا باش يهاجر الى الشرق.باينا راه سْمع عليا وبغى يْجي يسكن معايا.
المهم حتى هو استقبلتو مزيان وتْهلّيتْ فيه.الصراحة كان فالمستوى حيت كان مسكين كيتْكلف بشْغول الدار : يْسَيَّقْ ، يغسل لمّاعنْ ، يْطيَّبْ....زعما الله يعطيه الصحة راه أمْرى ونصْ.
دازت أيامات وجا آخر الشهر باش نمشي نْشَدْ فلوسي.صاحبي البركة كيعرف شي صاحبو فالبنك قال لي كاين شي واحد يقدر يْتيري لك فلوس الشيك قبل ما خونا بالله يجمع لحْصيْصَة ديالو ولكن هاد الموظف الطمّاع باغي القهوة ديالو ، زعما الرشوة.
قلت لو الرشوة أُوهو ولكن من بعد فهمت بأن خونا بالله باغي غي شي غْديوَة وهاهو قاضي ليا الغراض.
المهم قْبلت وفي 30 من الشهر مْشيت عند صاحبنا.أعطيتو الشيك .قال لي نوقعو .فلبْلاصة اعطاني 300 درهم.
مع ديك الثلاثا ديال لعشية درت معاه الموعد باش نمشيو جميع نتغدّاوْ.البركة حتى هو بْغى يمشي معانا ولكن هاداك حالو ساهل.غير اخْبرْتو باللي غادي نمشيو عند الشريف، جاوبني : صافي غير سيرو ما فيا ما ياكول.
المهم عند الشريف كلينا كيلو كفتة مع برّاد أتاي.خونا بالله بان لي ما عمرو ما كْلى الكفتة ، طاح عليها كي لَعْمى.
_ تْكايس أخويا راكْ تبْقى تْجيفْ ليا وانت محسوب على الخدمة.
مسكين أحْشم وقال لي : اسمح لي الطبيب كان مانع عليا الكفتة وهادي شْحال ما دقتها
_ واش الطبيب مات ؟
_ عْلاش ؟ راني ما فهمتش
_ زعما شفتك تاكول الكفتة واخا مانعها عليك الطبيب
_ ماشي هكْدا ، اللي كاين .........
مسكين بْدى يحكي لي شي تْخرميز على حياتو .قاطعْتو :
_ صافي غير كول وسكَّتنا
مين خرجنا لقيت لغدى تْقام عليا ب70 درهم.مزيان بزاف حيت راها عندي 100 درهم زيادة .يا الله ربحنا مع السكايري 30 درهم.
فلعشية كنت مع البركة فالبيت ديالو.شي شوية سمعنا الدَّقْ فالباب.البنكاوي شاف الساعة وقال لي : راها التسعة ديال الليل.شكون زعما يْجي لعندنا فهاد الوقت؟
جاوبتو : يمكن شي جار شافك باقي ما تعشيتي وبْغى يْفوبْرَك بْشي عْشى
البركة دغيا يغضب : بْلا طْياح الهدرة الله يْخلّيك
_ واخا أنا غادي نْشوف شْكون
البركة سْبقْني للبالكون .دغيا ارْجع : هدا صاحبك السكارجي.
طَلّيت عليه : مالك أخويا محمود واش ضربك حمار الليل ؟
_ انزل أخويا حميد نتْكلّم معاك
_ غير تْكلّم راني كنسمعك
_ هاد الهدرة ما تْكالْش برّا
_ راني عارف على مَنْ غادي تتْكلم غير كولْ
_ واخا.ياك خْلصتي الشيك ؟
_ نْعام أخويا
_ ولكن خاصّك ترد ليا 100 درهم
_ اعلاش كي درتي ليها
_ ياك زعما اعطيتك فأوّل الشهر 100 درهم
_ لا أخويا ما عْطيتْني والو
_ كيفاش زعما باغي تْبلْعطْني؟
_ حْشومة
_ انت شفّار
_ تبارك الله.اوى خويا سير للمدرسة وكولْ ها ليهوم فالبوق وغادي تْشوف شكون هو الشفّار أنت ولّا أنا
_ تبقى فيك
مشى في حالاتو.
البركة نصحني باش نرد ليه اللي بقى من فلوس لغدى .
فعلا مع ديك الخروج ديالي ، مشى نيشان عند المدير يشكي لو.من بعد داز عند المعلمين واخبرهوم باللي وقع.هاد الكامبو ما فْخبْروش باللي عندهوم لخْبار باللي تنْسالو 300 درهم.
صاحبنا ما لقى حتى تَجاوُب ْمع الشكاية لا من عند المدير لا من عند المعلمين
فلْأخير عْطيتو 100 درهم وقلت لو تاكولها ان شاء الله في جهنم.
كانت هاديك آخر لقطة بيني وبينو.

يتبع غدا إن شاء الله

 

Houmidi59

::الفارس المغربي ::

غير متصل
#14
رد: قصة بالدارجة المغربية : مذكرات معلم في المدينة

الحلقة رقم 8 : الاحتفالات بعيد العرش

فهاد الحلقة غادي نتكلمو على الاحتفالات ديال عيد العرش.هدا أول عيد وطني كنحتافل بيه فسنة 1984 .يا الله فاش دخلنا من العطلة ديال الدورة الاولى بِشي أيامات، المدير دار مْعانا اجتماع بخصوص هاد الحدث.الموضوع هو الاستعدادات باش نحتافلو بْحال كل المغاربة ونعطيوه كل الاهتمام اللي يستحقو.المهم المدير قسّم كل المعلمين الى مجموعات : ها المجموعة اللي غادي تتكلّف بالاستقبال، ها المجموعة اللي المهمة ديالها الاشراف على الحفل ، وهادي مجموعة غادي تْهيّأ مجموعة من التلاميد للغناء والتمثيل، مجموعة عاود تاني تهتم بالحلويات والمشروبات وفي الأخير مجموعة هي اللي غادي تهتم بتزيين المدرسة.حيت كنا جوج أفواج يعني تبارك الله 36 معلم.أرى ما تختار.
خوكم اتلحوميدي ما كان عارف ما يختار .كان كيْشوف لخّوت كل واحد فين باغي يْكون.الحمد لله واحد المعلمة (هي جارتي فالقسم ، قالت لي : أسّي عبد الحميد انا نَّصْحك تدخل فاللجنة الفنية .جاوبتها باللي انا راه خاطيني داك الشي ديال الَغْنى، ردّات علي : اللهمّ لغنا ولا صْداع التلاميد
المهم حتى أنا ولّيت فاللجنة الفنية.هي هاديك كان على كل لجنة أدّير اجتماع ديالها باش تشوف البرنامج اللي غادية اتّبْعو.
فالمرحلة الأولى زرنا الاقسام كاملين باش نختارو التلاميد اللي ممكن يحفضو دغيا الأناشيد وحتى اللي عندهوم مؤهلات فالتمثيل.
من بعد كان علينا نمتحنوهوم باش نْشوفو اللي يصلح.هاد العمليات جابو لينا اسبوع.
فشهر يناير بْدينا ندربو التلاميد على ترديد الأناشيد وعلى تشخيص المسرحيات.
من جهتي مْشيت واحد النهار ديال الأحد لوجدة.كاين واحد خونا بالله قديم فوجدة كيعيْطولو المراكشي.هاد السيد يبيع الكتب .عندو كاراج ديال لكتوب غير مْلاوْحين فكل قُنْت.والمشكل المحال عندو غامَلْ بالمعقول.بغيت نختار شي كتاب ، دغيا جاتني الدوخة.شافْني المسخوط : آش حبْ الخاطرْ يا أستادْ؟
_ بغيتْ شي كْتاب قديمْ
_ لكْتوب اللي حْداك يعَّقْلو على جَدْ النمل
_ بغيت زعما نقول راني باغي شي كتاب ديال
الأناشيد الوطنية.واش نقدر نلقاه عندك فْهادْ لافيرايْ(la féraille)؟
خونا بالله مْشى دغيا لْواحد الجبل ديال لكْتوب .بْدى يحفرْ فيه غير بْيدّيه.بانو لكتوب يْطيرو فالسْما .اما ريحة لغْمولية زادت حتى شمّيت باللي حتى انا ارْجعت غامل
الحمد لله خونا بالله شَد واحد لكتاب مدْبالْ ، جابو لي وقال لي : هاهو لكتاب اللي يصلح ليك.
_ واه هاد لكتاب الغامل
اضحك وقال لي : عنداك تْغرّكْ المظاهير.هدا كتاب ما تلقاهش واخّا تمشي للشينْوى
_ دابا أنت ما كتْشجعْشْ العلم
السيد تبْهضْ مين قلت لو هاد الملاحظة.ردْ علي : كيفاشْ زعما ؟
انا نْجاوبو : الحديث النبوي يقول "اطلبوا العلم ولو في الصين.أنت دابا ما بْغيتيش تخلّينا نمشيو عند الشينوى.أخويا خلّيه فبلاصْتو ، بعدا يشم لهْوى ماشي يبقى محبوس عندك هنا ما يْشوف لا شمس لا ضو
المراكشي عْرفني باللي انا راني مسْكة صْعيب عليه يمضغْني ، قال لي : واش باغي تاخود لكتاب ولّى لّا؟
_ أرى بعدا نشوف آش فْكرْشو
فتحت لكتاب ، شي طْروفا مْقطعين ولكن الصراحة فيه شي أناشيد رائعة.
_ واخّا شحال هاد نص كيلو غمولية ؟
بْحال الى هْضمْ لمعايرة ديالي وْ قال لي : أرى غير جوج دراهم
_ هاك خود ها جوج ديالك وهدا باش تشري الشامبوان
المهم خلّيتو كيْتْسائلْ مع راسو ومْشيت في حالاتي
فتاوريرت خْديتْ لكتاب للمدرسة باش ناخود منو الأناشيد.المعلمين غير شافوه اعجبوهوم.كولهوم بْغاو يعلمو بيه التلاميد ديالهوم.انا كنت كنقول ليهوم : راه غامل.واحد المعلم جاوبني : الله يهديك يا أستاد حتى الفرماج فيه الغامل وراه غالي فالثمانْ
دازت تقريبا 15 اليوم ديال التدريبات علّمت التلاميد ديالي مجموعة ديال الأناشيد الوطنية اللي كنت خْديتْها من الكتاب.
من بعد اجتمع أعضاء اللجنة الفنية باش نْديرو العروض ونشوفو اللي يمكن يصلح للحفل ديال عيد العرش.تقريبا جوج سيمانات وحنا كنستامعو للأناشيد والمسرحيات.
واحد النهار من هاد الأيام ، جا المفتش وْسَوَّلْ فيا.خونا بالله عوّال يفتّشني وانا ما مْساليلوش.
المفتش دخل للقسم ديالي ، لْقى يا الله مجموعة ديال التلاميذ كيكتبو .حيتْ ما لْقانيش رْجع ديريكْتْ للإدارة.المدير هي هاديك صيفط لي تلميد يعْلمْني باللي المفتش باغي يْفتّشني.مع لمْشاورة مع المعلّمين قلت للتلميد يرد على المدير باللي راني مشغول بالاحتفالات ديال عيد العرش
اللي كان هو المدير جا لْعندي شخصيا وقال لي : سّي عبد الحميد راه عندك الحق ترفض التفتيش فهاد لوقيتة حيت راك في مهمة وطنية ولكن أنا انَّصْحك باش تْخلّيه يْفتْشك .هكدا تتْهنّى منّو راه يقدر يرجع لك من بعد
_ واخّا أنا غادي للقسم.مين وْصلت لْقيتْ خونا بالله كيَفْلي فالدفاتر.
المهم قال لي : فين هوما التحاضير ؟
اعطيتهوم لو
_ فين هو التقسيط الشهري؟
اعْطيتو لو
_ فين هو التوزيع السنوي ؟
_هاهو
واحد لوقيتة شدْ المذكّرة اليومية والتقسيط الشهري وبْدى بْحال الى يْديرْ شي مقارنة بيناتهوم
_ أستاذ شفتك ما كتحْتارمْشْ داك الشي اللي مكتوب فالتقسيط الشهري
_ كيفاش زعما؟
_ هاد الدرس المفروض يكون داز الأسبوع الفايتْ .
_ اوى ؟
_ كان خاصك تكتب ملاحظة عليه
_ شوف أالسيد المفتش (دابا زعما راحنا نحتارموه) دابا حْنا كنستاعدّو باش نحتفلو بعيد العرش ما يمكنش نْدير الدروس كلها.اما الى كتبت الملاحظات راه جوج وْراقي ما يكفيوْ نيش
_ الله يْخليك أأستاد بْلا ما تفهم علي
صافي هاد خونا بالله باغيني نعْطيلو شي ديركتْ ولكن هاد المرة بْحال شوية تْرزَّنْتْ
_ شوف أداك بنادم هدا هو الحاضر عجباكْ الحال هو هدا ، ما عجْباكشْ الحال ، خلّيني ترانْكيل (tranquile)الله يرحم الوالدين.
قبل ما يمشي قال لي واخّا.المهم هاد المرة خْرج نيشان بْلا ما يْدوزْ على المدير.
شي شوية رْجعت للقسم فين كانو الأنشطة باين عليا زعفان.
واحد المعلم اسميتو عبد الكريم قال لي : ياكْما قفّرْتيها معاهْ عاوْدْ تاني ؟
_ بْحال داك الشي
_ أسّي عبد الحميد المفتش خاصّك ديما تقول لو نعم وانت أدّير اللي فْراسك
_ اسمح لي أخويا ما نقدرش خصوصا مع هاد لكْماكَمْ
_ اوى خويا شغلك هداك
غير موراها جا عندي المدير.العجيب فالأمر اللي قال لي ما كنت ناوي نسّمعو : أستاد غير ما أدّيرْش فْخاطركْ.أنت راك مْرسَّم واخَّا ينقص ليك فالنقطة.مْبَصَّحْ العام الجاي غادي تْشدْ الفرنسية حيتْ انت بيلانك(bilingue .مية فلمْية المفتش غادي يعطيك نقطة ممتازة
راني قْريتْ سْميْتك فالجورنالْ (l'opinion) لفرانسوِية ديالك مْجاهدة
نْسيتْ نقول ليكوم أنّه فْديك الفترة كانت لجنة أخرى كتْزيَّن المدرسة بالأعلام واللافتات.واحد اللجنة عاود تاني كانت متْكلْفة بتجهيز القاعة اللي غادي نشربو فيها المشروبات وناكلو الحلويات
المهم كان فالحقيقة جو رائع.لهادا دغيا نْسيتْ المفتش.
يوم جوج مارس اجتمع كل الأساتذة فالمدرسة باش نسمعو الخطاب الملكي.المدير جاب لينا التلفزة بالألوان واسمعنا لخطاب جلالة الملك الحسن الثاني (الله يرحمو)
من بعد قال لينا المدير فالصباح غادي يبدى الحفل وراه غادي تحضر السلطات المحلية ويمكن حتى القائد الممتاز غادي يشوف العروض ديالنا
اللي كان ان الحفل داز رائع .كانو شي حوايج بحال المفاجأة حيت أن العروض ما كانش فيها غير الأناشيد والمسرحيات الوطنية كان فيها حتى السكيتشات والنكت.المهم اول عيد كنحتفل بيه فالمدرسة وربما هو اللي جْعلني نْحبْ أكثر هاد العيد وداومت عليه لسنين عديدة.
جات اختبارات الدورة الثانية وْجات العطلة .كي العادة مْشيتْ للرباط .ما عندي ما نحكي ليكوم حيت كانت عادية
حتى ما تبقّى من العام دازْ الحمد لله عادي.فقط واحد الحدث هو توصلي بنقطة التفتيش.خونا بالله أعطاني 10 ، يعني كانت 11 ولكن الكافربالله نْقصْ ليا نقطة.الصراحة غْضبت وجْدبت .عندو الزهَرْ.كون كان أحدايا ماغاديش يسلك والى سْلك غادي يمشي نيشان للسْبيطار.المدير والمعلمين بْداوْ يْبرْدوني بالهدرة .فالأخير قلت ليهوم : والله الى شدّيتو غادي يعرفني مزيان
المهم قبل ما نوقعو المحضر وزّع علينا المدير المستويات.فعلا كان عند الوعد ديالو : اعطاني القسم الخامس فرنسية
شي وقيتة كنت مع صاحبي الزاوش فالجوطية .سبحان الله العظيم ، شكون تْلاقينا ؟ المفتش.
مع الناس ما يمكنش ليا نعطيه شي سلخة.ولكن بقينا تابعينو زعما يمشي لْشي بْلاصة ما فيهاش البشر ولكن خونا بالله كان ذكي .ما بْغاشْ يَتْفاك مع الناس، حيتْ هو عارف راني عوّالْ نعطيه شي سلخة.
المشكل خاصني نْدير شي حاجة.هي هاديك بْدينا عليه بالنْكير أنا وصاحبي
_ خويا محمد شفتي هاد خيْنا مول الكوستيم
_ هداك المرخي السروال
_ اوى هداك راه حمارْ
_ واه ولكن عندك الحق باينة عليه
_ راني كنت غادي نضّربو
_ أصاحبي هدا تضَّربو يقدر يموت لك بين يدّيك
_ عندك الحق ما يستاهلش
ولكن ها ما يستاهل : أتْفو عليك وعلى كَنْسك الحافي

يتبع غدا إن شاء الله


 
التعديل الأخير:

Houmidi59

::الفارس المغربي ::

غير متصل
#15
رد: قصة بالدارجة المغربية : مذكرات معلم في المدينة

[FONT=&quot]الحلقة رقم 9[/FONT] : [FONT=&quot]ولد عمّي هْربْ ،هْجرني الطالبي وْأنا نسمحْ فالبركة[/FONT]

[FONT=&quot]العشرة مع الطالبي دامت شهورا ولكن مع ولد عمّي ما كاملاش شهرايَن.اللي كان هو عبد الحفيظ سبّب لي مشكل بالموطور ديالي.حيت ماكنتش نستعمل اسمهان بزاف على ودّاش المدرسة قريبة من الدار، كان ولد عمّي يركب عليها بزاف.المشكل كان شوية سقرام.كان يخْويها من ليصانصْ اللي فيها وْأنا ديما كنعمّرها[/FONT].
[FONT=&quot]لكن المشكل لكبير هو مين اضْهسْ واحد الرجل شيباني كان قاطع الطريق.عبد الحفيظ بغى يهرب ولكن دغيا شدّوه جوج اولاد صْحاح.المهم جا البوليس .طلبو منو لوراق ديال لاموظو .خونا بالله ماعندوش.المهم قال ليهوم باللي الموطور ديال واحد ولد عمّو من الرباط.البوليس ما سوْقولوش ، بالعكس ضحكو عليه : اوى من بعد ، ردجْ عليه واحد الوليسي أسْمر، زعما باغي تْخوّفنا[/FONT]
.
[FONT=&quot]عبد الحفيظ حيت ما فاهم والو ، قال ليهوم : والله العظيم الى ولد عمّي ساكن فالرباط وأبّاه بوليسي فلقصر الملكي[/FONT]
_
[FONT=&quot]شوف أولد الناس خاصك تخلص المصاريف للسيد والى اسمح ليك ما كاين مشكل[/FONT].
[FONT=&quot]داك الشي اللي وقع خونا بالله خلّصْ واحد 200 درهم.هي هاديك طلقو سْراحو.مين دخل للدار كانت الساعة التسعة ديال الليل[/FONT].
_
[FONT=&quot]أولد عمّي فين مشيتي راني تقلّقتْ عليك[/FONT].
[FONT=&quot]بالطبع أحْكى لي ما وْقعْ.الصراحةطلّعْ ليا الدم[/FONT].
_
[FONT=&quot]صافي أولد عمّي من غدّا ان شاء الله ماكاينش لاموطو[/FONT].
[FONT=&quot]غبد الحفيط ما عجبوش الحال وْ أنا نْزيد نغضب عليه.ما خلّيتْ لوش من المعيور: شوف أولدي سير لْعند أبّاك في مكناس أنا ماعنديش الخيريَة[/FONT] .
_
[FONT=&quot]ياكْ أولدعمّي .تْعايرني بالمصروف[/FONT]
_
[FONT=&quot]إوى أفهم راسك واصرف حتى انت[/FONT]
[FONT=&quot]صافي هي هاديك لْغدْ ليه ، فالصباح بكري خْرج من الدار.مين سوْلو البركة قالّو : انا غادي نتسارى شي شوية.جا وقت لغدا ، عبد الحفيظ ما بانش .جات لعشية ، حتى أخبار عليه[/FONT].
[FONT=&quot]المهم قررت مع صاحبي سعيد نمشيوْ نْقلبو عليه فالكوميسارية.واحد البوليسي فالمداومة قال لينا راحنا شدّينا واحد خيْنا من مكناس .طْلبنا منّو نشوفو واش هو اللي راحنا نْقلبو عليه[/FONT].
[FONT=&quot]قال لينا : اسمحو ليا راه ممنوع حيت هاد خونا بالله مرتكب جريمة كبيرة[/FONT]
[FONT=&quot]هي هاديك رجعنا فيب حالاتنا وحْنا كنتكلمو غير على عبد الحفيظ[/FONT]
_
[FONT=&quot]شوف أخويا هاد ولد عمّك راه النار تحت التبن[/FONT]
_
[FONT=&quot]عندك الحق .المرّة اللي فاتتْ كان غادي يقتل واحد القَرْشْ (رجل مسن) واليوم قالك؟ راه بغى يكْريسي واحد لمْرى[/FONT]
_
[FONT=&quot]ولكن خاصنا نْشوفو لو شي محامي[/FONT]
_
[FONT=&quot]ما تخافش غادي نتّاصل بالواليد ونْشوف آش عندو ما يْدير[/FONT].
[FONT=&quot]فْديك الليلة قصّر معانا واحد جارنا عندو حانوت كبير كيْبيع بالجملة.من الصدف تْكلّمنا على ولد عمّي.هاد الجار شْحال ضْحك وقال لي : حْشومة عليك خويا حميد تْعاير ولد عمَّك بالجوع[/FONT].
_
[FONT=&quot]واش هو اللي قالها لك ؟[/FONT]
_
[FONT=&quot]واه مسكين بْقات فيه وراني مْشيتْ معاه حتى للْكار وما خلّيتو حتى رْكب فالكار اللي يمشي لمكناس[/FONT]
_
[FONT=&quot]ما يمكنش .راه فالحبس [/FONT]
_
[FONT=&quot]واش حْماقيتي .راه دابا فمكناس.غير معى المغرب راه هْدرْ معايا فالتيليفون وقال لي باللي يمكن غادي يسافر لتازة حيت كاينا الخدمة[/FONT]
[FONT=&quot]شَفْتْ فصاحبي سعيد وقلت لو : ياك ما هداك السيد اللي فالحبس ماشي عبد الحفيظ ؟[/FONT]
[FONT=&quot]جاوبني سعيد : راه باين الشْغول[/FONT]
_
[FONT=&quot]صافي ما عندي علاش نتاصل بالواليد[/FONT]
[FONT=&quot]دازت أيام ، جاتني رسالة من عندو الكاشي ديالها من تازة يخبرني فيها باللي راه كيخدم عند شي توازة وراه كيطلب مني نْسامحو حيت سافر بْلا ما يخبرني[/FONT]
[FONT=&quot]على ما ادكر فشهر ماي كان الجودافي ، جا عندي الاخ ديالي اللي صغير عليا بْعام .كان دايز لوجدة.جاب لي شي سُخْرة من عند الواليدة.هي هاديك بات معانا الليلة.باقي عاقل كانت معاه واحد بنت خالتي .قال لي باللي راها خطيبتو.باغي زعما يْبرّرْ الوجود ديالها مْعاه[/FONT].
[FONT=&quot]ديك الليلة قصّرنا جميع.سعيد صاحبي مشى دغيا وشْرى لينا كيلو كفتة باش تعشّينا[/FONT]
[FONT=&quot]فالصباح بكري خويا مشى لبركان مع خطيبتو.فآخر الشهر ، قال لي الطالبي (ماشي وان[/FONT]) [FONT=&quot]انا يمكن غادي نرحل حيت راني لْقيت شي صحابي من وجدة حتى هوما أساتدة معايا فالكوليج[/FONT]
[FONT=&quot]جاوبتو بأنه راه حر يمشي يسكن فين أبْغى[/FONT].
[FONT=&quot]بغيتْ نقول ليكوم ان هاد خونا بالله كان ديما سادْ على راسو فالبيت.مين يخرج غير باش يمشي للكوليج او للمرحاض.الماكلة : كان ياكول فالبيت ديالو[/FONT]
[FONT=&quot]المهم كان سوليتير[/FONT] (solitaire)
[FONT=&quot]بالنسبة للبركة مين شاف كتْرة الدخول والخروج فالدار قال لي : أخويا أنا ما نقدرش نْعيش فهاد الجو .جاوبتو : خويا البركة الى ما عجبكش الحال ها الباب[/FONT].
_
[FONT=&quot]واش زعما تطردني ، قال ليا[/FONT]
_
[FONT=&quot]اوى سير شوف ليك حتى انت شي وحدين خدّامين فالبنك[/FONT]
_
[FONT=&quot]غادي نمشي ونْخلّيك شاد الدار غير بوحديتك[/FONT]
_
[FONT=&quot]ما تخافش انا فرّان وْقاد بحومة[/FONT]
[FONT=&quot]فعلا البركة رْحلْ حتى هو بعد رحيل الطالبي.داك الشهر ديال يونيو خلّصتو كاشْ ولكن صاحبي سعيد كان فالمستوى .عاونّي بتقريبا نصف المبلغ.الله يْكثّر خيرو كان نعْم الصديق فوقت الشدّة[/FONT]
[FONT=&quot]الصيف كان قريب .لهادا دسّيتْ حوليجي عند جاري مول الحانوت[/FONT].
3
[FONT=&quot]شهورا ديال العطلة ما عندي علاش نخلّص فيها لكرى .ان شاء الله حتى لْديك 16 شتنبر نْجي باش نْقلّب على لكْرى[/FONT].
[FONT=&quot]الحمد لله كان لَكْرى موجود ورخيص[/FONT].
[FONT=&quot]فعلا صديق ديالي لْقى لي دار ساكن فيها معلم غير بوحدو .فيها 3 بيوت .كاريها غير ب300 درهم .ما يخلّص لا ما لا ضو[/FONT]
[FONT=&quot]صافي العام الجاي غادي تسكن معاه[/FONT]
[FONT=&quot]آه نْسيت ما تْكلّمتش ليكوم على خويا محمود.اوى راه جاه انتقال تعسّفي فشهر ابريل بْسبَبْ التقرير ديال المفتش[/FONT].
[FONT=&quot]خونا بالله انتقل لنواحي وجدة فواحد المجموعة مدرسية بعيدة على وجدة ب30 كيلومتر[/FONT].
[FONT=&quot]شوفو لعجب ، خونا بالله مْقَفَّرها مع المفتش واستافدْ من الانتقال ولخّوت هادي شْحال اُو هوما يطلبو الانتقال غير فالنواحي ديال وجدة وما عمْرو ما حلمو بيها[/FONT]
[FONT=&quot]السكايري ديال محمد جاه الانتقال حتى لعندو ، بلا ما يطلبو[/FONT] .
[FONT=&quot]واحد النهار كنت يا الله وْصلت لوجدة شاد صاكي فوق ظهري.كنت دايز من شارع محمد الخامس ، سمعت شي واحد يْعيَّطْ عليا.مين دَرْتْ نْشوف شكونْ.كان محمود فالقهوى دايرْ رْجل على رْجل يشرب كاس قهوة مْعَصْرة[/FONT]
[FONT=&quot]ضحك وقال لي : واش عاد حطّكْ الكار ؟[/FONT]
[FONT=&quot]زعما راه يتْهكّم عليا[/FONT].
[FONT=&quot]المهم مْشيت لعندو : واه أخويا يا الله فاش نْزلتْ من الكار.اوى واش ما بقيتيشْ خدّام؟[/FONT]
_
[FONT=&quot]انا باقي خدّام ، غير اوكان كنْكون ديما فوجدة مع ديك الجوج [/FONT]
[FONT=&quot]المهم حكى لي وقال لي باللي راه مرتاح فواحد الفرعية .من زهرو كولهوم سْلايْتية [/FONT].[FONT=&quot]هادي هي راه دغيا انْساجم معاهوم.من الفوق شي وحدين فيهوم عندهوم نفس الأدْواق ديالو : زعما عصير العنب والتفاح[/FONT]
[FONT=&quot]واخّا بْغى يْخلَّصْ عليا شي مونادا باردة ، خلّيتو ومْشيت كي العادة لْدار خالي [/FONT]
[FONT=&quot]سنة دراسية سالاتْ .راني حاولت نحْكي داك الشي اللي عاقلْ عليه[/FONT].

[FONT=&quot]يتبع غدا إن شاء الله[/FONT]

[FONT=&quot]ملحوظة [/FONT]:[FONT=&quot]فالحلقة ديال الغد ان شاء الله غادي نتكلّم على السنة الدراسية 1984/1985 [/FONT].[FONT=&quot]هاد السنة درّسْت الفرنسية وكانت حتى هي سنة حافلة بالأحداث والمفاجآت.يا الله خلّيتْ ليكوم الراحة.تبْقاوْ على خير[/FONT]
 

Houmidi59

::الفارس المغربي ::

غير متصل
#16
رد: قصة بالدارجة المغربية : مذكرات معلم في المدينة

الحلقة رقم 10
الجزء الأول : هدا قِسْمْ ولّى موْقَفْ ديالْ الصَّبَّاناتْ ؟

السنة الدراسية 1984/1985 حتى هي كانت فيها المفاجآت.تصورو أن المفاجأة اللى هي مين دخلتْ للقسم ديالي ومعايا اللائحة ديال التلاميد المفروض يقراوْ عندي.خوكم دار لابّيل (l'appel): لوْلاد كولهوم حاضرين ، لبْناتْ حتى وحدة ما كايْنة.
واه لبْناتْ اتّافقو عْليا؟ ما يمكنش .والعجيب فالأمر لْقيتْ الزيادة فْعدد لوْلاد .شفْتْ فهاد المرتزقة ، قلت ليهوم : سمْحو لي راكوم غالطين فالعنوان.انتوما ما مْسجْلينْشْ عندي
واحد فيهوم كبير وفاهم ردْ علي : أستاذ راه صيفططْنا عندك الأستادة رْقية
_ شكون هاد رقية ؟
هاد الأستادة كانت فالفوج التاني لهاد السبب ما عمرو ما تْلاقيت بيها وخّا غادي نكون شفْتها فالاجتماعات ولّى في حفلات عيد العرش ما غاديشْ نعْقلْ عليها.
التلميد جاوبني : الأستادة اللي كتْقَرّي الخامس
_ صافي يمكن شفتها.واش هاديك اللي دايرة النْضاضرْ وتلبس جلابة خضرا؟
_ نْعامْ أَأُستاد
مْشيتْ ديريكتْ للقسم ديالها.ما لْقيتْهاش.ولكن منضرْ غريبْ شفْتو عندها : عندها غير لبْناتْ فالقسم.وْأنا نْعيقْ
جْبدْتْ اللائحة وبْديتْ نْعيَّط على التلميدات.غير اللي تسمع اسميتْها تجاوبني :حاضرة.المهم لْقيتهوم كولهوم هْنا
_ بْناتي غادي تمشيوْ مْعايا للقسم ديالي .كولهوم ناضو بالزربة .انا خارج وخوتنا بالله جات.
ما تْكلْمتش معايا.زعما هادي كاعْ ما مْسوْقى لي
_ لبْنات رَجعو للقسم داغيا
خوكم الحوميدي ما خافش من مفتش غادي زعما يْخافْ من معلمة.ما يمكنش ؟
_ شوفو أبناتي أنتوما راكوم مْسجْلاتْ عندي.سيرو للقسم ديالي رقم 14 .
اما الأستادة رقية قلت ليها : استادة واش بْغيتي أدّيري مَوْقَفْ ديال الصّبّانات ؟
_ الله يْخلّيك بْلا معْيورْ
_ تبارك الله عليك، واخدة لي لبنات وتْزيدي تْحلّي فمّك
_ شوف أخويا بارك الله فيك مع المدير
ضْحكت حيت فهمت هاد خوتنا بالله حاسباني كامبو.
_ المدير ماشي أحمق باش يعطيك لبْناتْ أُو هو كاتبوهوم فاللائحة اللي عندي.
تْزايدْنا فالهضْرة ، هي هاديك خوتنا بالله مْشات عند المدير.
أنا رْجعت للقسم ديالي .التلميدات شدّو بْلايصهوم.التلاميد اللي زايدين صيفطْهوم عند الأستادة ديالهوم.
المهم ، التلاميد كشْفو ليا شي حوايج غريبينْ.الله يستر ويْبقّي الستر كيف ما تقول أختي شروق، هاد النوع ديال المعلمات تْعدّى قبيلة البلاقسة.تْصوْرو هاد خوتنا بالله عْزازين عليها لبْنات.كل عام تبغي تجمع أكبر عدد منهوم باش تْخدّمهوم عندها فالدار : شي اللي تْسيَّقْ ، شي اللي تْصبَّنْ ، شي اللي تْقابلْ الدْراري الصْغار، شي اللي تمشي تْجيب السُّخرى من الحانوت.خوتنا بالله دايرة رْجَلْ على رْجل غير تْكومانْدي .ماشي بْعيد العالِيمْ اللي اخترعْ التيليكومونْد (télécomande)جاتو الفكرة مينْ شافها
هاد المسخوطة كتْخدّم اليد العاملة فابور.عْلاش شي تلميدات قابلين ؟ راه باين الشْغولْ .مسكينات طامعات فالنقط.
الحوميدي جا باش يوضع حدْ لهاد التصرف الشاد
شي شوية جا المدير شاف لبنات .قال ليهوم : شْكون اللي بْغاتْ تقرى عند الاستادة رقية ؟
حتى وحدة ما بْغاتْ تمشي
المدير ما زادْ كلمة .مشى في حالاتو.دازتْ أيامات وخوكم كيخدم بْنيْتو.يْقرّي التلاميد ويشرح باستعمال جميع الوسائل.فعلا التلاميد لْقاوْ راحتهوم معايا.شي أيامات من بعد ، جاوْ عندي شي بْناتْ من عند خوتنا بالله .باينة سمعو التمجهيدْ اللي عندي او يمكن عْياوْ بالأعمال الشاقة المنزلية وبغاو مسكينات يلتاحقو بالكوكبة.انا من طبعي مولى مبادئ جاوبتهوم باللي ما يمكنش .انا نْقرّي غير التلامد اللي مْسجْلين عندي.
مْشاوْ بْحال الى الدموع خارجة من عينيهوم.

الجزء الثاني : فْدارنا اجتامعو فيران لمدينة

سْبقْ لي تْكلّمتْ ليكوم أنّ صديق ديالي لْقى لي السّكنى مع شي معلم .صْدق داك المعلّم يخْدم معايا فالمدرسة.الصراحة رحّبْ بيا مزيان.
الدار شوية مظلامة حيت ما عندهاش السْراجم يْطلّو على برّا.لكن تبقى نْقية ورخيصة.البيت ديالي كبيرة وْفيها ناموسية وطبْلة .هاالمهم ، بعدا ما نْخافْشْ نْباتْ واقفْ
بالنسبة للأكل خونا بالله تقريبا ما ياكول والو .مسكين (الله يرحمو) كان عندو قرحة المعدة وكان تقريبا يْعاني منها بزّاف.على داك الشي كان ياكول غير الخُضْرة مسلوقة ، أما اللحم من غير الحوتْ ما ياكول والو
واحد الليلة مْشيتْ للكوزينة حيت جاني الجوع.كنت ناوي نقلي شي بيضات.
كانت عندي واحد لخْزينة (خزانة) .كنت كنْدير فيها لمّاعن ديالي.
حلّيت الباب باشْ نجْبدْ المقلى .بْحال الى بان ليا شي فار ابْيض خارج وهْربْ دغيا تحت البوطاجي.
واه واش الفار كاري بلا خْبارنا؟
المهم الملاحظة قلتها لْخويا الزروالي .جاه الضحك ولَعْجبْ.لكن قال لي : يقدر يْكون عندنا الفار حيت جاري مول الدار عندو كاراج داسْ فيه القمح.
واحد اليومين مورا الحادث ، منظر آخور وْقعْ لي .هاد المرة مجموعة ديال الفيران هجمت عليا .يمكن فرقة ديال كرة القدام .
القضية بْداتْ تحْماضْ.
من الصُّدف العجيبة جا لْعندي صاحبي سعيد.حتى هو شْهدْ لْمنظرْ الفيران.قلت لو :ولكن الفار من المخلوقات الضعيفة .ما يْخاف منْهومْ غير الفيل ولمْرى.زعما يقْدرْ يْكونو خطرْ
_ واه أخويا حميد الفيران خطار.راه منهوم يْجي التيفوسْ
_ الله يستر .اوى كان شي حل من غير الرحيل ؟
_ كاين
_ أتيني بيه
_ عليك بْشي مُشْ جيعان (قط)
_ غير هوما اللي كاين .
فعلا غير خْرجْتْ بانْ لي واحد القط سمين :
_ هدا يصلح خويا سعيد
_ واش أنت أحْمق.هداك راه شبعان
_ هدا يصلح ؟ شدّيت قط ضعيف يا الله فيه الكادَرْ
_ وارْمي المخلوق .هداك ما عمرو الفار يْخاف منّو
هاد سعيد ما غاديش نسْلك معاه.الحل هو نْشوف شي قْطوطا 3 أو 4 ونطْلقْهومْ فالكوزينة .غادي يْخَمْلوها فنْهارْ
اللي وْقع الَخّوتْ .....لَمشوشا (القطط) هربو من الدار وماشي بْعيد من تاوريرت.
عندهوم الحق يهّربو .
حتى انا راني هْربْت زعما
آه يا خّوتي المنظر اللي شفتو ما يتَّحْكى ما يتَّسْمع ، خاصكوم تْشوفوه باش تَيْقو
دخلت واحد الليلة للكوزينة .لقيت 100 ...200 ...300 فار شي فالبوطاجي ، شي فالأرض ، شي فالحيطْ.....كيفاشْ الفار ما يْكونْشْ فالحيط؟ واخّا هادي ما كايناشْ
المهم غير شافوني هجْمو عليا هجمة .أوقْسيمْ بالله (كيف ما قال السيكتور) مْشيتْ نْباتْ عند الطالبي.
سعيد مين وصلو لخبار ديالي ، شْحال ضْحك علي
_ آوَدّي يا حميدْ يا الراجْل اللي يْخاف من الفيران.
_ واخا أجي ادخل للكوزينة وْغادي تْشوف
_ أجي مْعايا
_ لّا سير غير بوحدك
خونا بالله يا الله ادخل وْأنا نسّمعو يْغوّتْ : حميد أجي عْتَقْ

فار دْخَلْ ليه تحت التريكّو
زعما الغوتَة كْبيرة والفار تحت التريكّو


يتبع غدا إن شاء الله مع الحلقة 11

 

Houmidi59

::الفارس المغربي ::

غير متصل
#17
رد: قصة بالدارجة المغربية : مذكرات معلم في المدينة

الحلقة رقم 11

الجزء الأول : يمكن العشْرة غادي تحلى مع سعيد.....حاضرين فيها الفيران

واخا الفيران فالكوزينة بْقيتْ ساكن عند صاحبي الزروالي شي أيامات.سعيد صاحبي لعزيز اقترح عليا شي أدوية باش زعما نقْضيوْ على الفيران اللي استعمرو الكوزينة ، لكن ما نْفعْ معاهوم والو.يمكن الى زادو تْكاتْرو.انا كيْبان ليا باللي هاد الفيران دايْرينْ الجلْبَة.
تْصوْرو (ماشي عند المصوّر) ما بْقيتْشْ ندخل للكوزينة.الى دخلتها فْيدّي الشطّابة او مْسَبَّقْ مُشْ (قط)
زعما الى شافوه الفيران بعدا اما يَهَّجْمو عليه او يَبْقاوْ مْخبْيينْ
الحمد لله الفرَجْ جا.واحد صاحبي لْقى ليا دار فيها جوج بيوت او كوزينة مع حوْشْ صغير.لكْرى دْيالها 300 درهم.سعيد قال لي باللي غادي يسكن معيا باش يْعاونّي فلكرى.
الدار الجديدة دايزْ حْداها الواد ...الواد ديال بوخْراربْ (الواد الحار) ولكن آش المعمول .راني درت بالمثل اللي كيْقول اللهمَّ بخّوشة تْونّسْ ولا ياقوته تْهوَّسْ
العشرة كانت رائعة مع صاحبي سعيد.نقدر نقول هاد الدار فيها الخير .الجيران كانو يتْهَلّاوْ فيا .شْحال من مرة كيْجيبو لي لَغْدى.ما زال باقي عاقل فرمضان شهر كامل وخوكم الحوميدي فاطر ومْسَحّرْ.
سعيد كان يْشكْ بزّاف.كان يْقول لي : خويا حميد هاد الناس يمكن يَسَّحْرو لينا.أنا صراحة كنت ديما نقرى المعودتين من بعد نْطيحْ على الزردة.اللي يتْوكَّلْ على الله ما عمرو ما يْخاف
العجيب فالأمر أن واحد الصديق ديال سعيد ساكن عند دار خالو كان يْجيبْ لْسعيدْ الماكلة حتى لْعنْدنا.هادي بانتْ لي فيها إِنَّ، ماشي غير إِن راها إِنّْ والأخوات ديالها.سعيد تْغيَّرْ فْطبعو .بْدى مسكين كيخرج فالليل من المغرب ، ما يرجع للدار حتى مورا لعْشا بْساعاتْ.
الماكلة ما كانشْ يبْغي ناكولها مْعاه.مرَّة مرّْة كيْقولْ ليا : هاد الصوبّة شْحال بْنينة
المهم واحد النهار تْبَعْتو مين يمكن غادي يمشي كل ليلة.خونا بالله مْشى لواحد الدْريبة وبدى يمشي ويرجع بْحال الى راه يْساينْ شي حدْ.شي وْقيتة واحد البابْ تْحلْ .بانتْ لي شي خربوشة(بنت كبيرة) طَلّتْ من الباب.شفْتها بْعيني كتْصيفَطْ لو سلامها زعما كطنْحبّكْ الَعْمرْ.خونا بالله صافي غادي يسْخف.لمْسيخيطة عايْقة ، دغْيا سدّاتْ البابْ زعما دارت لو شْغول المسلسلات أ سْويفْرْ (à suivre) .خونا بالله حيت راه مخلص للمسلسل ، بْقى يمشي ويرجع فالدْريبة يمكن واحد 30 دقيقة.انا بعدا عْييت ومن الفوق قْنَطْتْ.لكن الحمد لله خوتنا بالله عاود حلّاتْ الباب .دابا كانت تبوس يَدْها وتْصيفطْ البوسة لْخونا بالله .صافي هاد المرَّة يقْدر يسكتْ ليه القلب.الحمد لله ما وْقعْ والو.
شي شْوية خربوشة قالت لو باي باي .سدّاتْ الباب.لكن خونا بالله ما زال باقي يسْتَنى ، زعما المسلسل باقي ما سالاشْ
صراحة انا عْييت ومن الفوق انْدمت على هاد المَجْية .
دازت واحد 30 دقيقة ، خوتنا بالله بانت .هاد المرّة رْماتْ ليه شي حاجة .هي هاديك سدّات الباب .هاد المرات موحال الى غادية تْبان حيتْ بانْ ليا الضو ديالْ الكولوار نَطْفى .
خونا بالله مشى ديريكتْ لداك الشي اللي طاح.من بعد عْرفْتْ باللي هاديك راها رسالة.خونا بالله مْشى تحت واحد الزْكيزة ديال الضو باش يقرى الرسالة ديالو..هي هاديك رْجعت دغيا للدار .وجَّدْت لعْشى.
مين دخل خونا المغروم ، لْقى لعْشى ، قال لي : واه لعْشى هادي مفاجأة
الحقيقة ماكنتش نْوجّد لعشى من قْبلْ.
المهم تْعشّينا .هاديك الليلة كنت باغي نعرف ’ش عند صاحبي.
_ اوى خويا فين مْشيتي هاد اللبيلة
_ مْشيتْ للجامع كي العادة
_ حتى أنا كنت فالجامع ولكن راني ما شفْتَكْشْ
_ عندك الحق كنت مع صاحبنا عبد الرحمان
_ ما يمكنشْ راني كنتْ معاه تقريبا شي ساعة
_ آه نْسيت ، خلّيتو حيت كنت معروض عند واحد صاحبي
_ فين ساكن هاد صاحبك؟
سعيد بْحال الى ما عجبوش الحال من كترة الاسئلة
_ خويا حميد شفْتكْ راك تستنطقني .واش راني داير شي جريمة؟
_ آه يا ودّي حاشا .انا غير بْغيتْ نعرف حيتْ حتى أنا كنت معروض عند شي ناس ساكنين فْواحد الدريبة .......
ما بْغيتْشْ نزيدْ فلكْلامْ .خونا بالله دْبالْ وصْفارْ
بْقيتْ نضْحك .قال لي : واشتا اللي مْضحْكَكْ ظ
_ والو غير اوكانْ شفتك كتْمشّى فهديك الدريبة
صافي خونا بالله تْلفْ
_ راني بْحالْ الى شفتْ شي خربوشة حالّة الباب .....يمكن كانت تْقلّبْ على شي واحد...
_ صافي ن صافي أنت راك تتْجسَّسْ علي
_ مالكْ أخويا واش راك مْشَرْوطْ (مغروم ) على ديك خيْتْنا؟
_ خويا حميد تبْقى على خير راني عيّان
سعيد ما بْقاش يمشي كل ليلة لديكْ لبلاصة المعلومة أوربما راه بدّل التوقيت.المهم ما بْقيتْشْ نْكلْمو فالموضوع.زعما كنت باغي نْديرْ فيه الخير.ما بْغاشْ .اوى يْعومْ بحْرو.
رغم هاد المشكل كانت العشرة مع سعيد رائعة.كان نُعْم الاخ والأنيس وما عمرو ما تْحاسبْ معيايا فمصاريف الأكل ولكْرى.كان يساهم مْعايا حتى فالبنزين ديال لاموطو وكان يْخلّصْ معايا لاسورانْصْ حتى هي
بالنسبة للفيران ن ماشي بْحال الدار ديال صاحبي الزروالي.هْنا الفيران كاينين غير هوما ولكن غير نْحسّوبيهوم تحت الأرض.مرّة مرّة كنسمعوهوم يَجريوْ.
فهاد الدار ربّيتْ واحد القط سمّيتو مينوش .هاد مينوش حيت كنت مْبرعو ، كان عاطيها غير للنعاس.
كنت نخرج من الخدمة نْجيبْ الكرسي ونمشي للحوش (الساحة) ديال الدار باش منها نتشمّشْ ومنها نقرى كتاب.مينوش يْجي دغيا عندي ويَْطْلعْ فوق رجلي.
سعيد ما كانشْ\ عندو مع مينوش وحتى مينوش ما كانش عزيز عليه سعيد.هاد المسخوط كان يمشي لفْراش ديال سعيد ويْخلّي لو شي براكة .
سعيد يْجي عندي غضبان : شفْتي هاد المشْ ديالك راه وسّخ ليا لفراش ديالي.
واخّا هكْدا كان سعيد يتْهلّى فْمينوش.كان مين كنت نمشي لْوجدة يعطيه ما ياكول ويشرب
كان واحد الجار من بعد ولّى صديق كيْجي ديما لْعندنا للدار.باقي عاقل سمين بزاف ولكن ظْرَيَّفْ .حتى هوكان يْجيبْ لينا الماكلة.هدا باين نيْتو.كانت جوج خْواتاتو باقيين مامْزَوْجاتْشْ .ماشي بعيد كان باغينا نتزوجو بيهم .
انا فْديكْ (ماشي دجاجة) الساعة ما كنتش نْفكّر فالزواج.



الجزء الثاني : دارتْها رقية واصْحابْها ودّاوْ كولشي

فشهر نونبر جا عندي المفتش باش يفتشني كي العادة.كنت كنْقرؤّيهوم باقي عاقل المحفوظات (récitation).المفتش أحضر للحصة كاملة .من الصدف الجميلة كنت قلت للتلاميد ديالي باش يْجَسْدوها بْحال شي مسرحية.المفتش عجباتو بزاف.الدليل كان غير كيْهزْ فْراسو.الصراحة ديك لوقيتة كان المستوى مرتافع ماشي بحال هاد السنوات اللي التلميد يتْهجّى فالحروف او ما يعرفش يكتب حتى الاسم ديالو بالفرنسية.
من بعد كانت عندي حصة لابوند ديسيني (la bande dessinée) هدا واحد لكتاب فيه رسوم فوق منها كلام الشخصيات ديال القصة.باش التلامد ما يْملّوش كل تلميد كنت عاطيه الدور ديالو اللي خاصّو يقراه.من كترة ما قْراوهْ شي وحدين حفضو الدور ديالهوم.هي هاديك درْتْ بيه مسرحية واعرة.القصة الى ما خفتش نكدب على واحد السيدة كانت عندها شي مرميطة سميْتْها طوب1 (top1) كتْصايَبْ ليها الصّوبّة.كانت ديما تْجيبْ المرميطة السحرية وتقول ليها : طوب1 ديري لينا الصّوبة.هي هاديك ياكلواولادها الصوبّة حتى يشَّبعو .السيدة كانت مولات خير على ودّاش عرضات على الجيران باش حتى هوما ياكلو معى راسهوم
واحد الجار غني غارْ من الجارة ديالو وبْغى تكون عندو المرميطة.مْشى لعندها باش زعما يشْريها بالتمن اللي تطلبو منّو .لكن المرأة العفيفة ما بغاتش تْفرّط فالكنز.خونا بالله خلّاها حتى مْشات للسوق، سْرق المرميطة.مين مْشى للدار قال للمرميطة : طوب1 بْغيت الصوبّة
المرميطة صايباتْ ليه عدد كبير من الزْلايف ديال الصوبّة ولكن ماقْدرشْ يْوقَّفها.الصوبّة بْداتْ تسيل بْحال الواد.خونا بالله غْرق فالدار ديالو .بْدى يْغوّتْ : عتْقوني ، عتْقوني
الحمد لله جات مولات المرميطة وقْفات المرميطة ومْشاتْ في حالاتها بعدما زَعْفاتْ عليه
من بعد ارْجع حتى هو ياكول الصوبّة ديالها.
المفتش خْرجْ من عندي راثقة لو.
من بعد جاني تقرير واعر .خونا بالله كيعتارف بالمجهودات ديالي .اما النقطة أعطاني 13,5 .هاديك النقطة خدْمات علي فايْتا5 سنين.كانو المفتشين مين يْجيو باش نتْفتّش ، ديما يْقولو لي : راه عندك النقطة ما عندك علاشْ تتفتّشْ
واخّا تْهنّيتْ من التفتيشْ باقي العام ، خوكم خدّام مع التلاميد ديالو : يشرح ليهوم مزيان، يعطيهوم التمارين، المهم ديما واقف.
جا الامتحان .قبل منّو بْيومين درنا اجتماع الاساتدة ديال الخامس.راني عاقل كنا 6 : 3 ديال الفرنسية و3 ديال العربية .كانو التلاميد يمكن 200 تلميد او أكثر.المدير بْحت معانا الطريقة اللي غادي نْدوْزو بها الامتحان للتلاميد
كولهوم اتافقو باش كل قسم يبقى كيف ما راه.هدا راه يْساعد التلميد على الكتابة والتركيز وما غاديش يْخاف .يعني كيف ما نقولو باللغة العربية ترك التلميذ في محيطه الذي درس فيه.
آه يا لخّوت فْهادي كنت نِية.ما كنتش عارف باللي خوك هو عْدوك.اللي كاين ان حتى الحراسة قدْرو يقَّنْعو المدير باش يختارو الأساتذة اللي يمكن يْساعدوهوم باش التلاميد ديالهوم يْنجْحو.يمكن ما فهمتوش هاد الفكرة.غادي نشرحها ليكوم
الاساتدة نوعان : نوع متشدد فالحراسة والعمل ونوع مرْخي ما يهمّو والو.لهادا اختارو اصحابهوم وْانا أعطاوني الأساتدة اللي هوما ما عندهومش معاهوم : أساتدة حاضيين كولشي ، زعما الدّبّانة معاهوم موحال الى تزْهقْ.
انا ما كنتش حاضر حيت كنت فوجدة ومن الفوق ما عنديش الحق نحضر ، هدا راه قانون معروف.رقية والزملاء ديالها هوما حضرو ايامات الامتحان وخوكم الحوميدي في دار غفلون.
المهم وقتاش بان الشْغولْ ؟ نْهار الاعلان عن النتائج.
واه يا خّوتي من 68 تلميد نجحو لي يا الله 40 تلميد ، أما الحاجة رقية خسرو ليها يمكن 4 او 6 ديال التلاميد من 60 تلميد .واحد التاوريرتي نجحو لو التلامد كاملين.
شوفو المنكر فين وْصَلْ.
زعما حنا خاطينا لقراية ، هوما مجهدين علينا بزاف.
ربّي يْخلّصهوم
المدير لاحظ علي : أستاد النتائج عندك عيّانة بزاف.انا كنت ناوي غادي تكون عندك أكبر نسبة نجاح ولكن هادي راها أول مرة مدرسة الرازي تعيش بْحال هاد الكارتة
حتى أنا ماشي ساهل ردّيت عليه : الى شفتي باللي الخامس ما يصلح ليش ردْني للتالث فرنسية
_ ما قلتي عيب.راه ديالك من العام الماجي


يتبع غدا إن شاء الله
 

Houmidi59

::الفارس المغربي ::

غير متصل
#18
رد: قصة بالدارجة المغربية : مذكرات معلم في المدينة

الحلقة رقم 0 : ارتسامات خوتنا بالله (خارج المنتديات)



هاد الحلقة كيف ما شفتو تحمل رقم زيرو حيت ما غاديش نحكي والو .باراكا عليكوم اليوم غير الحلقة رقم 11 .
المهم كنت فحديث مع صاحبي بوشعيب.عرفتو أشنو قال لي ؟
قال لي بالحرف : هاد القصة ديالك كون تْنشْراتْ (ماشي على السلك) عند الميريكان ، يمكن الثلث دياهوم يكون قْراها والثلث لاخور يْردْ علي واللي بقى يرمي علي الدولارات والورود والكادوات.ماشي بْعيد خونا مْبارك الرئيس ديالهوم يْجي يْزورني ويعطيني شي وسام ديال أونسْيانْ كومْباطا (ancien combattant)
هاد الجواب جْعلني نْفكّرْ فواحد المشروع : نمشي للشارع باش نْدير استجواب مع الناس اللي ممكن يكونو قْراوْ المدكرات ديالي.
صدقوني، الناس راهوم ما لقاو جهد باش يكتبو حيت بعدا شي وحدين ما قارينيش ، شي وحدين ما عندهومش مع البيسي والباقي راه ما عندهومش لفلوس باش يتّاصلو.على كل حال هوما كْتارْ عليكوم انتوما اللي قريتو القصة ديالي .واه ، يا الله خمسة ديال الناس اللي تْفاعلو مع القصة ديالي.زعما المؤشر ديال لقراية (ماشي ديال التعليم) كيْقول هاد القصة قراها لْحدْ الآن عدد كبير .اوى فهمو لي كيفاش ما لاقي غير هاد العدد ديال الردود اللي ما تْعدّاتش 5
اوى أسيادنا راني دَرْت الاستجواب وسَجّلْت لكلام العفوي ديالهوم
اليكوم ما جاء في كل استجواب
هدا سفناج : خويا الحوميدي تْبارك الله عليك.قصة واعرة ولكن دوماجْ ما كنتش نقرى عندك .على الأقل كنت بعدا تْعلّمْني كيفاشْ نْقادْ الزيروَات.كيف شفتي انا سفناج والشفنج ديالي كلّو أعوج.
انا راني بَعْتْ الشفنج وقالو لي أعوج
هدا مُصَوِّر فوطوغرافي : القصة ديالك زينة فيها تْصاورْ ما ضايْرينش لا فالمغرب لا فالخاريج.زعما هادا كْليشي يصلح يكون فيلم فالسينيما
هادي ربة بيت : خويا حوميدي القصة ديالك ماشي غير واعرة راها دارت فيا خير كبير.راني كنقراها حتى ل10 ديال المرات فالنهار .على داك الشي قلت للزوج ديالي راني ما عنديش الوقت باش نصبّن او نعْجن او نطبخ.حيت حتى هو كيْتبّعْ المدكّرات ديالك راه جاب لي خدّامة.راه شْرى لي ما شينة الصابون والميكرو اوند.القصة دخلات علي بالخير
بناي : بْنيتْ شحال من دار وشْحال من باطيمة ولكن أخويا قصة مبْنية بْحال هاد الشكل الرائع ما يْديرها غير واحد هو حوميدي.تبارك الله عليك راك عميد البنّايَ
كسّال فالحمّام : راه القصة ديالك ساعدتني بزّاف.كنعْطيها للسيد اللي باغي نْكسْلو ، هو يقْرى وانا نخْدمْ على خاطري.
طبيب نفساني : مدكرات الدكتور الحوميدي كتْعالج الحمّاق.أعطيناها لْشي مجانين عندنا راه من كثرة الضحك وْقع ليهوم سيركْوي فالراس.دابا باركين غير يضحكو وحنا تْهنّينا من الصداع ديالهوم.
بّياع كاوْكاوْ والزرّيعة : انا قْريتْ مدكرات الحوميدي وْعجباتني بزّاف.خْسارة ماخرجاتشْ فْلَكتوبْ. غادي الكاوكاو والزريعة دغيا يتْباعْ لي مين "نْكوغْطو" بْشي ورقة ديال مدكرات الحوميدي
مول العطور والروائح الزكية : القصة ديال الحوميدي راها طلقاتْ ريحتْها .دابا راني سادْ الحانوت وكنْشم ونتبرّع بالعطر ديالها
أستاذ :حوميدي كاتب يصلح يكتب للتلاميد وحتى الأساتدة.راه نابغة كبير ويقدر يمشي بعيد .
انا بعدا كنْرشْحو يْكون وزيرْ ديال التعليم
تلميد كسول : خسارة ما قريناش عند الاستاد الحوميدي .كون دابا راحنا أبطال فالقصة ديالو
قط ديال الزنقة : هاد الحوميدي واخّا شوّهْنا فالحلقة رقم 10 ولكن راه شجاع وحْنا كنبغيوْ الشجعان
فأر متشرد : الحوميدي راه ردّ لينا الاعتبار ديالو .هو وصاحبنا ألبير كامو (Albert Camus) الله يْعمّرْها دار
مدير مدرسة : الخدمة فالإدارة تكون في بعض الأحيان مملّة ولكن بفضل القصة المتسلسلة ديال الحوميدي ، ما بقيناشْ نسْخاو نخرجو من الإدارة ، حتى المعلمين ما بْقاشْ لينا الوقت باش نحْضيوْهوم.بإخْتصار ما كْرهْتشْ نخدمْ حتى السبت والأحد
مول الفرّان : الكوشا تعيى ما تسخنْ ما غاديش تْكونْ سْخونة بْحال القصة الحوميدية
أخيرا التعليق الظريف
برهوش صغير : ماما الله يْخلّيك كل ليلة قْرايْ لي القصة ديال بابا حوميدي.كَتْجيبْ لي دغْيا النعاس

 

Houmidi59

::الفارس المغربي ::

غير متصل
#19
رد: قصة بالدارجة المغربية : مذكرات معلم في المدينة

الحلقة رقم 12 : المستوى الثالث ما كاينش بحالو

السنة التالتة ديالي قرّيتْ المستوى الثالث والصراحة هو المستوى اللي لْقيتْ فيه راحتي.هداك العام ابتكرت شْحال من حاجة فالعمل.هادي غير أمثلة : كنت صنعت بطاقات من الكارتون فيها جميع الحروف وكل حرف منّو بزاف ديال النمادج ونفس البطاقات مصغّرة للتلاميد.كل تلميد عندو المجموعة ديالو يقدر يصْنع كلمات وجمل.قمت كدالك بتلوين الصويرات وجعلتها في شكل جدّاب ومثيرْ.حاجة أخرى : صايبت وْريقاتْ صغار فيهوم رسومات للتلوين مكتوب فوق كل وحدة نقطة حسنة (bon point)يعني بْحال لفلوس .كاين اللي تسوى نقطة جوج نقط 5 نقط و 10 نقط الخ.التلميد اللي جمع مثلا 30 نقطة عندو جائزة.كان واحد التنافس لا مثيل له.بلا ما نفتاخر عليكوم كنت معروف فتاوريرت بأني أحسن معلّم.كانو الآباء يْجيبو أولادهوم من مدارس بعيدة باش يقراوْ عند خوكم الحوميدي.الحمد الله ما عمرو ربي ما حشّمني مع هاد الناس.هاد المستوى الثالث هو الوحيد اللي بْقيتْ فيه أكبر مدة .خلال السنوات اللي دازت قْراوْ عندي معظم أبناء الأساتدة ومجموعة كبيرة ديال الموطفين جابو لي أولادهوم منهم المحاميون والصيادلة والأطباء والمهندسون.واحد السيد كان مندوب ديال وزارة الصحة كان ولدو يقرى عندي .اليوم الأول اللي جا فيه ، باقي عاقل جا عندي المدير وقال لي : هدا راه الولد ديال مندوب الصحة اوى عنداك تْهلّى فيه مزيان.ردّيتْ عليه : ربّي هو اللي يتْهلّى
زعما خونا بالله يسْحابْ لو غادي المنصب ديالو يخْلعني.المهم التلميد كان فالأول شوية مْفرعنْ زعما لاعبْها كبير.كان كل صباحْ تْجيبو السيّارة بالشيفور حتى للمدرسة.كان هاد التلميد كيدخل من باب الأساتدة.التلامد عندهوم بابهوم، اما هو زعما راه ولد شخصية.ماشي بعيد يكون المدير هو اللي شجعو .
على كل حال واحد النهار كانت فرصة باش نعطيه شي بركة ديال لعْصا حيت نْسى ما خدمْشْ شي تمارين فالدار.هضْرة جابت هضْرة ، قالو لي التلامد : أستاد
أنس كيدخل من باب الأساتدة
شفت فيه وقلت لو :

_ واش مْبَصّح راك تدخل من باب الأساتدة ؟
_ نعم يا أستاد
_ اوى تبارك الله .واش باغي تتْقاد مْعايا ؟
_ لا حاشا يا أستاد
_ اوى وعْلاش راك تدخل من باب الأساتدة ؟
_ أستاد راه أبّا هو اللي قالها ليا
_ أبّاك كونْ نلْقاهْ غادي نتْفاهمْ معاه
أنس غير حْدرْ راسو وبْقى ساكت
_ شوف أولدي من غدا ان شاء الله غادي تبقى تدخل وتخرج من باب التلاميد.مفهوم ؟
_ نعم أستاد مفهوم.
نْسيت ما قلتشْ ليكوم أن الوالدة ديال أنس مهندسة .فالغد ليه جات مع ولدها .من الصدف كنت واقف فالباب الرئيسي ديال المدرسة.غير شافني أنس ، جاوْ بْجوجْهوم عندي
_ صباح الخير أستاد
_ صباح الخير لالّة
_ اسمح لي أنت هو سّي عبد الحميد الاستاد ديال أنس ؟
_ هو بْداتو
_ غير قال لي باللي راك طْلبتي منّو يبقى يدخل من الباب اللّوراني
_ نعم الباب ديال التلاميد على ودّاش هاد الباب راه خاص بالأساتدة والزوار
_ غير او كان أسيدي راه ولدي يخاف يْطيْحوه التلاميد راك تشوف بْحال الى متوحشين
_ اسمعي يا سيدتي هنا فالمدرسة التلاميد سواسية والى بغيتي ولدك يقرى مع أقرانو هاد المدرسة ما تصلح لوشْ
المهم ما خلّيتْ ما عْطيتْها.الصراحة هاد لمْرى بنت دارهوم .ماناقشتني حتى فكلمة.تْصوْرو قلت ليها :
_ على هاد لحْساب خاص ولدك نعطيوْ لومقعد ديالو والاستاد ديالو ...
_ اسمح لي يا أستاد من غدّا ان شاء الله الشيفور غادي يمشي من الجهة الأخرى باش ولدي يدخل مع التلاميد
_ لا انت اللي سمحي ليا.خاصّو اليوم يمشي من الجهة الأخرى.
أنس اللي كان ساكت ، قال للوالدة ديالو : يا الله أماما نمشيوْ دغيا قبل ما يدق الجرس.الاستاد ما يبْغيشْ اللي يتْعطَّلْ
هاد الولد عاملتو كباقي التلاميد وكلى من لعْمود حتى قال أزّا .هادي عبارة وجدية تعني حتى شْبعْ
كانت واحد البنت مْشات لي سْميتْها غير ساكتة هادي أبّاها مهندس وأمْها مهندسة .هادي كانت حشّومية ولكن مجتهدة.طبعا حتى هي ما منْعتشْ من العصا الحوميدية.التلاميد عارفينها : حتى واحد ما يمنع من لعْمود ولو يكون يْطيرْ قلقراية
مشاكل وقعات لي اثناء تدريس هاد المستوى.
واحد النهار واحد الأب جا مباشرة عند المدير ومْعاه بنتو .زعما جايْ يشكي.هاد الأب حيت كان مستشار جماعي بْغى يلعبها كبير على المدير.
المهم جا لعندي ومْعاه المدير وخاطبني بْلهْجة أقل ما يمكن القول عليها قاسية:
_ شوف أأستاد ما عندكش الحق تضرب بنتي
ضحكْت لهاد لكلام .خونا بالله ما عجْبوشْ الحال:
_ كتضحكْ علي ياك ؟
_ حْشومة غير او كان الهضرة ديالك هي اللي ضحْكاتني
_ هي هاديك راك تضحك علي
المدير ناوي يْدافع على حقّاش بانْ لو بأن القضية غادي تحْماض
_ الاستاد ما يقصد والو .هدا راه من أحسن الأساتدة ومعروف
_ شوف أسيدي هادي بنتي انا مْخنَّتْها راني ما عمرو ما قسْتْها بِيدّي
_ تبارك الله على داك الشي بنتك راها ضاصْرة
_ وتْزيدْ تْعايرني من الفوق
_ شوف الله يرحم الوالدين أنا بنتك ما عندي ما نْديرْ بيها.شوفْلها شي معلمة تْحنْ فيها
_ داكْ الشي اللي غادي نْدير
المدير ما لقى ما يقول.هي هاديك جْمعت لو كتوبها واعطيت هوم لو
_ ها كتوبها .ما تبقاش أدّور من جهتي
هاديك البنت مْشات لقسم فيه معلمة كنعرفها مزيان : فنْيانة وعزازين عليها بْحال هاد النوع ديال لبنات.
العام داز وخوتنا بالله عاودت العام .جا خونا بالله عند المدير يشكي بأن بنتو ما قْرات والو داك الشّي اللي عندها فالفرنسية غير اللي قْراتو عندي.خونا بالله نْدم ولكن ما لْقى قُدْرة باشْ يْجي يْصارحني
المهم جات العطلة وجا الدخول المدرسي.فاللائحة لْقيتْ اسميَةْ البنت جميلة .باينة راه المدير سجَّلها لي فاللائحة.
بْديتْ نْعيَّطْ على اسماء التلاميد.مين وْصلت لْجميلة قالت لي : حاضرة.كانت مسكينة حادْرة راسها وحشْمانة
_ أنت ما غاديش تدخلي عندي .سيري عند الأستادة اللي قرّاتك العام اللي داز
_ أستاد بغيتْ نقرى عندك
_ سيري فْحالك أنا ما عنديش مع بْناتْ الشيكولا
_ الله يْخلّيك أأستاد قْبلْني نقرى عندك
_ والو والو والو
_ الله يْخليك...
_ شوفي أبنتي أبّاك دار مْعايا العيب.خاصّو يْجي ويعتادر لي
مْشاتْ تجري جهة الباب : راني غادي نْجيبو دابا
يمكن 3 مينوتْ دازت جا أبّاها.ياحسرا مسكين واخّا هو صْحيح كي الفيل ، كان يْبانْ لي صغير بحال الجحش
_ أستاد انا كنعتادر لك بزاف.انا غادي نْبوسْ لك يدّيكْ.الله يرحم الوالدين بْغيتك تْقرّي لي بنتي
خونا بالله باغي يْبوس اليد غير باش أنا نْوافق ولكن الحوميدي ما شي من الشِيَمْ ديالو يتفرْعنْ على عباد الله خاصة عند الضعف ديال الآخر
جْبدْت دغيا يدّي : حاشا الشريف.ماكاين مشكل غادي نقبلها ولكن...
_ نعم سيدي ولكن أشنو ؟
_ غادي تاكول وتْفرّق هاد العام
_ ما فهمتش
البنت كانت من الفاهمات.قالت لي :
أستاد أضْربني اقْتلني ما غمرو ما نْقول لك لّّا
_الله يرضي عليك أبنتي
فعلا ديك البنت طلعات من المجتهدات.من الصدف واحد العام شدّيتْ الخامس بصفة استثنائية ، خوتنا بالله طلبات الانتقال عندي.باش تعرفو بأن هاد البنت عرفاتْ مزيان القيمة ديالي.
هاديك الفترة صاحبي الزروالي زاد الحال عليه .مابْقاشْ يجي للمدرسة .هي هاديك كنت من المتطوعين نقرّيوْ التلامد ديالو شي سويعات فالنهار حيت كانو فالقسم الخامس ومتبوعين بالامتحان.
3 شهور دازت ، توفي أخونا الزروالي الله يرحمو .المدارس كلها جمعو لو لفلوس.انا باقي عاقل 3 او 4 ديال المليون اللي وصلوها .واحد المجموعة ديال المعلمين لدارو بمدينة جرادة.على ما حْكاوْ الاخوان بانو باللي ناس كْرامْ.كانو مْوَجْدينْ الشْوى ولكن اللجنة اللي مْشات يا الله فيها 4 ديال الناس.
من الأحدات أيضا تعرّفت على معلمات جديدات كل وحْدة تبارك الله عندها 18 عام ، يعني باقية صغيرة .خوكم الحوميدي مْقزدر مع الرجال ولكن مع الآنسات ماعندوش.الصراحة كان بيني او بينهوم يا الله السلام.واحد صاحبي غير شاف وحدة فيهم باقي عاقل سْميتْها كريمة ، صافي سْخف .قال لي مسكين : انا غادي نطلب يدّها
_ غادي تعطيك رجلها
_ كيفاش زعما ؟
_ غادي تعطيك ركلة
_ وعْلاشْ أخويا واش حْنا ماشي فالمستوى ؟
_ المستوى اللي تْقرّي أنت هو الثاني ، ياكْ ؟
_ واه ، إوى؟
_ هي تْقرّي المستوى الخامس
_ ما فهمتش
_ هي أخويا لمكلخ طالعة عليك فالمستوى
خويا مصطفى غْضبْ : راك تضحك علي ياكْ أخويا عبد الحميد
_ حاشا غير اللي بْغيتْ نقول لك هاد المعلمة يا الله غادي تْسالي العام غادي تنْتاقل
ما كدبتشْ عليه .في آخر العام انتاقلات لوجدة
بالنسبة للسكنى حيت فالصيف طْلقت الدار بطلب من مولاتها ، عاود تاني كْراتهالي فالدخول المدرسي.صاحبي سعيد كي العادة تْقاسم معايا لكْرى .مينوش ما سْمحتش فيه .راني كنت خلّيتو عند جاري ادريس.لكن مين ارْجعت لقيتو ضْعيف كي الفار (حيتْ هو مش)
المهم داز عام زين ولكن المشاكل ديما كاينة وما زال كاينة.ما عمرو بنادم ما يتهنّى ..راه ما يتهنّى حتى يْموتْ


يتبع غدا ان شاء الله
 

Houmidi59

::الفارس المغربي ::

غير متصل
#20
رد: قصة بالدارجة المغربية : مذكرات معلم في المدينة

الحلقة رقم 13 : ذكرياتي مع التلاميذ وآبائهم

الجزء الأول : كوب أمال (coupe Amal)


هادو دكريات وقعات لي في فترات معينة ومختلفة من حياتي العملية.طبعا في تاوريرت.
العام الاول اللي قرّيتْ فيه الخامس، كانت عندي بنت كتشبه الولد .هي زوينة ولكن قاصّا شعرها.كانت من التلاميد المجتهدين واللي كان يعجبني فيها ديما الابتسامة فلوْجه ديالها.واحد نهار كان عندي معاها حديتْ طويل
_ أمال بنتي مالكِ مع هاد لكْويبّة ديال لوْلادْ ؟
_ ما عْرفتش أأُستاد
_ انا بعدا كونْ ما هاد الحلقات اللي فْودْنيك نحسْبك غير ولد
_ داكْ الشي اللي باغي أبّا
_ كيفاش زعما ؟
_ حْنا فالدار غير لبْناتْ.......
قاطعتها : أبّاك حيتْ باغي ولد ، قصْ ليكْ شعرك باش مسكين يْشوفْ باللي عندو ولد فالدار
أمال ضحْكات .التلامد كولهوم انْفجْرو بالضحك.
_ اوى كتمْشي لْكوافيرْ ؟
_ لّا أبّا هو للي يْحَسَّنْ لي
_ واه لاعبْها كوافيرْ ؟
عاود تاني ضحْكاتْ.التلامد حتّى هوما ماتو بالضحك
_ أستاد أبّا كوافيرْ
_ تبارك الله أبّاك حلّاق .اوى شي نْهار غادي نمشي عندو ونْقول لو الله يْخليك ديرْ ليا كوبْ أمالْ(coupe Amal)
هاد الحديتْ داز عليه شْهورا .واحد النهار حسّيتْ باللي تْغوفَلْتْ (شعري ولّى طْويل) .المشكل ما كانشْ عندي الوقت باش نمشي لوجدة على ودّاش الحلاق ديالي ما عمرو ما بدّلتو.لحد الساعة ما زال نمشي لعندو ..او عند ولدو
المهم بان لي واحد لكوافير لابس طابْلية بيضة يا الله توْصَلْ ليه لْحزّامة .طابلية جاكيطة ههه .
دخلت للحانوت .كان خونا بالله يقْرى جورنال باين قديم .غير شافني ، رحّبْ بيا مزيان .خوكم الحوميدي كانْ مْهلّي فْراسو مزْيان ومن الفوق كان بوكوصْ يحْماقو عليه لبْناتْ (beau gosse) .المهم ريَّحْتْ (جلست بالعربية) فالكرسي.الحلاق غطّا لي صدري بْواحد الطابْلية طويلة جديدة.شفتو شْحال خوكم مهم .ديك لوقيتة شعري كان رطب (راه ما زال رطب غير او كان شايب)
ابتسم (هدا كوافير مبتسم) ، قال لي :
_ سْويدي كيفاش بْغيتي نْحسّنْ ليك شعرك ؟
خوكم الحوميدي ديما موجود لتَقْشاب .هي هاديك ، جاوبتو :
_ بالمشطة ولمقصْ
ابتسم .
_ هادي باينة ولكن سْويدي واش عندك شي موديل او نوع باغيه ؟
_ نعم راني فْهمتك .ديرْ ليا الله يرحم الوالدين كوبْ أمال (coupe Amal )
خونا بالله طاح لو لمقص من يدو وقال بتعجُّبْ:
_ شْكون أمال ؟
_ هادي واحد البنت تقْرى عندي عجباتني الكْويبّة ديالها
هزْ لمقصْ وقال لي : صافي أنت الأستاد ديال بنتي
هاد المرة ضحَك .
_ واه بنتي شْحال تشكر فيك .ما تكولْ عليك غير الخير .
فعلا صاوبْ ليا كْويبة دايزها لكلام.ما بْغاشْ يتْخلّصْ مني
_ والله ما نْشدْ منْك دورو واحد.الاستاد عبد الحميد داخل للمحال ديالي .هادي ما عمرو ماننْساها .
حتى انا باش نْخلّيه فالدكريات ديالو ، ما عمْرو رْجعْت ليه.
لْغَدْ ليه ، أمال كان فخْبارها القصة.مْية فْلَمْية راها عاوْداتها للتلاميد.كولهوم صبْحو عليا
_ بالصّحّة التحْسينة أستاد
_ الله يْسلّمْكومْ أوليداتي
واحد التلميد باقي عاقل عْليه كان من أنجب التلاميد .هو الوحيد اللي تْجرّءْ او قال لي : أستاد جاتْ مْعاكْ التحسينة


تابع بعد قليل الجزء الثاني من الحلقة 13 تحت عنوان : آش عند هاد البوليسي مع اسمهان ديالي ؟


 
أعلى